‘കൊറോണ അമ്മയെ കൊണ്ടുപോയാൽ എന്റെ പിഞ്ചുമക്കൾ ഇത് അറിയണം’– ഹൃദയം തൊട്ട് ഡോക്ടറുടെ കുറിപ്പ്

ലോകം കൊറോണ വൈറസിനെതിരെ പോരാടുമ്പോൾ ന്യൂയോർക്കിൽ നിന്നുള്ള് ഒരു സർജന്റെ വാക്കുകളാണ് സോഷ്യൽ മീഡിയയെ കണ്ണീരിലാഴ്ത്തുന്നത്. കോർണേലിയ ഗ്രിഗ്സ് എന്ന ഡോക്ടറുടെ വാക്കുകളാണ് വൈറലായത്. സുരക്ഷാവസ്ത്രം ധരിച്ചുള്ള ചിത്രത്തോടൊപ്പമാണ് കുറിപ്പ്.

‘എനിക്ക് വളരെ ചെറിയ മക്കളാണുള്ളത്. ഈ മുഖംമൂടിയിലും വസ്ത്രത്തിലുമെല്ലാം അവർ അമ്മയെ തിരിച്ചറിയുമോ എന്നു തന്നെ സംശയമമാണ്്. കോവിഡ്–19ലൂടെ അവർക്ക് അമ്മയെ നഷ്ടമായാൽ അമ്മ വളരെ ബുദ്ധിമുട്ടിയാണണ് ജോലി ചെയ്തിരുന്നതെന്ന് അവർ മനസ്സിലാക്കണം.’– കൊർണേലിയ പറയുന്നു. കുഞ്ഞുങ്ങളായതിനാൽ അവർക്ക് ചിലപ്പോൾ ഈ കുറിപ്പ് വായിക്കാൻ കഴിയണമെന്നില്ലെന്നും ഗ്രിഗ്സ് പറഞ്ഞു.

ആരോഗ്യരംഗത്തുള്ളവരുടെ സേവനത്തെ പ്രകീർത്തിച്ച് കോർണേലിയയുടെ ട്വീറ്റിനു താഴെ നിരവധി പേരാണ് കമന്റ് ചെയ്തത്. നാലരലക്ഷത്തോളം പേർ ലൈക്സും കമന്റുമായി  എത്തി. കോർണലിയയുടെ ട്വീറ്റിനു താഴെ  ഒരാൾ കുറിച്ചത് ഇങ്ങനെ: ‘കൊറോണ വൈറസുമായി പോരാടുന്ന നിങ്ങളുടെ ധൈര്യത്തിന് അഭിനന്ദനം. നിങ്ങൾ നല്ലൊരു മനുഷ്യനാണെന്ന് ഇതിനോടകം തന്നെ തെളിയിച്ചു കഴിഞ്ഞു. നിങ്ങളാണ് യഥാർഥ ഹീറോ. കോർണലിയ നന്ദി.’

English Summary: Coronavirus: US doctor's post goes viral. Want my babies to know I tried hard