രാജസ്ഥാനിലെ ഈ സർക്കാർ സ്കൂളിൽ ക്ലാസില്ലാത്ത ദിവസമില്ല. 365 ദിവസവും ക്ലാസ്. വിദ്യാർഥികളുടെ നിലവാരം ഉയർന്നതോടെ സമീപത്തെ രണ്ടു സ്വകാര്യ സ്കൂളുകളാണു പൂട്ടിപ്പോയത്. അൽവർ ജില്ലയിലെ ഉജോലി ഗ്രാമത്തിലുള്ള ഷഹീദ് ബൽവന്ത് സിങ് സർക്കാർ മോഡൽ സീനിയർ സെക്കൻഡറി സ്കൂളാണു രണ്ടു വർഷമായി അവധിയില്ലാതെ പ്രവർത്തിക്കുന്നത്.
സാധാരണ ദിവസങ്ങളിൽ റഗുലർ ക്ലാസുകളും മറ്റു ദിവസങ്ങളിൽ ഒൻപത്, പത്ത്, പതിനൊന്ന് ക്ലാസുകളിലെ കുട്ടികൾക്ക് എക്സ്ട്രാ ക്ലാസുകളുമാണ് നടക്കുന്നത്. നിഹാൽ സിങ് എന്ന ഗണിതാധ്യാപകന്റെ ഉത്സാഹമാണ് ഇതിനെല്ലാം പിന്നിൽ. അവധിക്കാലമോ ഉത്സവാവധികളോ ഒന്നുമില്ലാതിരുന്നിട്ടും മടുപ്പില്ലാതെ വിദ്യാർഥികൾ പതിവായി സ്കൂളിലെത്തുന്നു. 2015–16 ബോർഡ് പരീക്ഷയിലും 16–17 പരീക്ഷയിലും വിദ്യാർഥികൾ കൂടുതൽ മികവു പ്രകടിപ്പിച്ചത് അധ്യാപകരെ സന്തോഷിപ്പിക്കുന്നു. സമീപ സ്കൂളുകളിലെ കുട്ടികൾ ധാരാളമായി ഇവിടെ ചേർന്നുതുടങ്ങിയിട്ടുണ്ട്.
1932ൽ പ്രൈമറി സ്കൂളായി തുടങ്ങിയ ഇവിടെ ഈ വർഷം സീനിയർ സെക്കൻഡറി വിഭാഗവും തുടങ്ങി. ഇതൊക്കെയായാലും കംപ്യൂട്ടർ ലാബോ കളിസ്ഥലമോ ഇപ്പോഴും സ്കൂളിനു സ്വന്തമായില്ല. വികസനപ്രവർത്തനത്തിനായി ഒരു സ്വകാര്യ വ്യക്തി കഴിഞ്ഞ വർഷം 43 ലക്ഷം രൂപ സംഭാവന ചെയ്തു. ഈ വർഷം ബാസ്കറ്റ് ബോൾ കോർട്ട് അടക്കം 70 ലക്ഷം രൂപയുടെ വികസനപ്രവർത്തനമാണു നടത്താൻ തീരുമാനിച്ചിട്ടുള്ളത്.
Education News>>
