അങ്കമാലി ഡയറീസിന് ശേഷം ലിജോ ജോസ് പെല്ലിശ്ശേരി ഒരുക്കുന്ന പുതിയ ചിത്രം ഈ.മ.യൗ ടീസർ ഇന്ന് പുറത്തിറങ്ങും. ജയസൂര്യയയാകും തന്റെ ഔദ്യോഗിക പേജിലൂടെ ടീസർ പുറത്തിറക്കുക. പുതിയ സിനിമയുടെ തിരക്കിനിടയിലും മറ്റൊരു ചിത്രത്തിന് വേണ്ടി സമയം കണ്ടെത്തുകയാണ് അദ്ദേഹം. ലിജോ ജോസ് പെല്ലിശ്ശേരിയും ജയസൂര്യും ഇതുവരെ ഒന്നിച്ചിട്ടില്ലെന്നതും ശ്രദ്ധേയം.
സമുദ്ര തീരനഗരമായ കൊച്ചിയിലൂടെ കടന്നുപോയ പോർച്ചുഗീസ്, ഡച്ച്, ബ്രിട്ടീഷ് അധിനിവേശങ്ങൾ ശേഷിപ്പിച്ച സാംസ്കാരികമായ അടിമണ്ണിൽ നിന്നു ഊറിക്കൂടിയതാണ് ‘ഈമയൗ’വിന്റെ സിനിമയുടെ പ്രമേയപരിസരം.
ഈശോ മറിയം യൗസേപ്പ് എന്നതിന്റെ ചുരുക്കപ്പേരാണ് ഈ.മ. യൗ. വിനായകന്‍, ചെമ്പന്‍ വിനോദ് ജോസ്, ദിലീഷ് പോത്തന്‍ എന്നിവരാണ് കേന്ദ്രകഥാപാത്രങ്ങള്‍. വെറും 18 ദിവസം കൊണ്ടാണ് ലിജോ ജോസ് സിനിമയുടെ ഷൂട്ടിങ് തീർത്തത്. കൊച്ചിയായിരുന്നു പ്രധാനലൊക്കേഷൻ.
ഷൈജു ഖാലിദാണ് ഛായാഗ്രാഹകൻ. പി എഫ് മാത്യൂസ് രചന നിർവഹിക്കുന്നു. സംഗീതം പ്രശാന്ത് പിള്ള. രാജേഷ് ജോർജ് കുളങ്ങരയാണ് നിര്‍മാണം. ഡിസംബർ റിലീസ് ആയി ചിത്രം തിയറ്ററുകളിലെത്തിക്കാനാണ് പദ്ധതി.
