ഈ ആഴ്ച ഓരോ നക്ഷത്രക്കാർക്കും എങ്ങനെ? കാണിപ്പയ്യൂർ

അശ്വതി :

അശ്രാന്ത പരിശ്രമത്താൽ പ്രതിസന്ധികളെ അതിജീവിക്കും. മംഗളവേളയിൽ വച്ച് പുതിയ സ്നേഹബന്ധം ഉടലെടുക്കും. സംയുക്തസംരംഭങ്ങളിൽ നിന്നും നിരുപാധികം പിന്മാറി സ്വന്തമായ പ്രവർത്തനമേഖലകൾക്കു തുടക്കം കുറിക്കും. ഗൃഹനിർമാണം പൂർത്തീകരിച്ചു ഗൃഹപ്രവേശനകർമം നിർവഹിക്കും.

ഭരണി :

സജീവസാന്നിധ്യത്താൽ വ്യാപാര-വിപണന-വിതരണ മേഖലകളിലുള്ള അനിശ്ചിതാവസ്ഥ ഒഴിഞ്ഞുമാറും. സഹായാഭ്യർത്ഥന നിരസിച്ചതിനാൽ സ്വജനശത്രുത വർധിക്കും. കുടുംബത്തിൽ സ്വസ്ഥതയും സമാധാനവും ഭക്തി അന്തരീക്ഷവും സംജാതമാകും. പരീക്ഷണനിരീക്ഷണങ്ങളിൽ വിജയം കൈവരിക്കും.

കാർത്തിക :

കുടുംബാംഗങ്ങൾക്കു സാമ്പത്തികസഹായം ചെയ്യുവാനുള്ള സാഹചര്യം വന്നുചേരും. വിദേശത്ത് പഠനത്തിന് അവസരം വന്നുചേരും. തൊഴിൽരംഗങ്ങളിൽ അഭൂതപൂർവമായ വളർച്ചയുണ്ടാകും. അസുലഭനിമിഷങ്ങളെ അനിർവചനീയമാക്കുവാൻ അവസരമുണ്ടാകും.

രോഹിണി :

കരാറുജോലികൾ പൂർത്തീകരിച്ച് പുതിയത് ഏറ്റെടുക്കും. നിക്ഷേപമെന്ന നിലയിൽ ഭൂമിയോ ഗൃഹമോ വാങ്ങുവാനിടവരും. നിക്ഷേപസമാഹരണയജ്ഞത്തിൽ ലക്ഷ്യപ്രാപ്തി നേടും. ഭരണ സംവിധാനം വിപുലമാക്കുവാൻ കഴിവുള്ളവരെ നിയമിക്കും. നാഡീരോഗങ്ങൾക്കു ശസ്ത്രക്രിയ വേണ്ടിവരും.

മകയിരം :

അനന്തസാധ്യതയുള്ള മേഖലയിൽ ഉദ്യോഗത്തിന് അവസരമുണ്ടാകും. പ്രാണായാമവും വ്യായാമവും രോഗശമനത്തിനു വഴിയൊരുക്കും.പണം മുടക്കി വ്യാപാര വ്യവസായ മേഖലകളിൽ ഏർപ്പെടുന്നത് അബദ്ധമാകും. പറയുന്ന വാക്കുകളിൽ അബദ്ധമുണ്ടാകാതെ സൂക്ഷിക്കണം.

തിരുവാതിര :

സൗഹൃദസംഭാഷണത്തിൽ തൊഴിൽപരമായ ആശയങ്ങൾ പ്രവർത്തനതലത്തിൽ അവലംബിക്കും. ഉത്തരവാദിത്തമില്ലാത്ത ജോലിക്കാരെ പിരിച്ചുവിട്ടു വിശ്വസ്തരായവരെ ഏൽപിക്കുന്നതുകൊണ്ടു ഫലപ്രാപ്തിയുണ്ടാകും.  മറ്റുള്ളവരുടെ ഉയർച്ചയിൽ അഭിനന്ദിക്കുന്നതുവഴി ആത്മാഭിമാനമുണ്ടാകും.

പുണർതം :

വ്യക്തിപ്രഭാവത്താലും സുതാര്യതയുള്ള സമീപനത്താലും ദുഷ്പ്രചരണങ്ങൾ നിഷ്പ്രഭമാകും. കാർഷികവിളകൾക്ക് ഇൻഷുറൻസ് പരിരക്ഷ ഏർപ്പെടുത്തണം.  നീർദോഷരോഗങ്ങൾക്ക് ചികിത്സയോടൊപ്പം പ്രാണായാമവും വ്യായാമവും ശീലിക്കും. സത്യാവസ്ഥ ബോധിപ്പിക്കുവാൻ സാധിക്കുന്നതിനാൽ മേലധികാരിയുടെ തെറ്റിദ്ധാരണകൾ ഒഴിഞ്ഞുമാറും.

പൂയം :

ആർഭാടങ്ങൾക്കു നിയന്ത്രണങ്ങൾ ഏർപ്പെടുത്തുന്നതുവഴി മിച്ചം വയ്ക്കുവാൻ സാധിക്കും. ഭരണസംവിധാനത്തിലുള്ള ആശയക്കുഴപ്പം പരിഹരിച്ചു പ്രവർത്തനക്ഷമമാക്കുവാൻ സാധിക്കും. വിശേഷപ്പെട്ട ദേവാലയദർശനത്തിന് യോഗമുണ്ട്. അനുഭവജ്ഞാനമുള്ള മേഖലകളിൽ പണം മുടക്കും.

ആയില്യം:

പ്രകൃതിദത്തമായ ഭക്ഷണരീതികളാൽ രോഗശമനമുണ്ടാകും. സ്വന്തം പോരായ്മകളാൽ വന്നുഭവിക്കുന്ന തെറ്റുകൾക്ക് അന്യരെ കുറ്റം പറയരുത്. ജീവിതഗതിയെ മാറ്റിമറിക്കുന്ന പല ഘട്ടങ്ങളേയും തന്ത്രപരമായി അതിജീവിക്കേണ്ടതായിവരും. യുക്തിപൂർവമുള്ള സമീപനത്താൽ പ്രലോഭനങ്ങളെ അതിജീവിക്കും. കുടുംബാംഗങ്ങളിൽ ചിലരുടെ മൗഢ്യമനോഭാവം മനോവിഷമത്തിനു വഴിയൊരുക്കും.

മകം :

അമിതമായ അന്ധവിശ്വാസവും അത്യാഗ്രഹവും അബദ്ധങ്ങൾക്കു വഴിയൊരുക്കും. സംയോചിത കൃഷിസമ്പ്രദായം ആവിഷ്കരിക്കുന്നതിൽ അനുഭവജ്ഞാനവും സാമ്പത്തികനേട്ടവും ഉണ്ടാകും. സാമ്പത്തിക ബാധ്യതകൾ ഒഴിഞ്ഞുമാറി ജീവിതനിലവാരം വർധിക്കും. പരിചയസമ്പന്നരുടെ നേതൃത്വത്തിൽ പുതിയ പ്രവർത്തനങ്ങൾ അവലംബിക്കും.

പൂരം : 

പരിമിതികൾക്കനുസരിച്ചു ജീവിക്കുവാൻ തയാറാകുന്നത് മനസ്സമാധാനത്തിന് വഴിയൊരുക്കും. പരീക്ഷണനിരീക്ഷണങ്ങളിൽ വിജയം കൈവരിക്കും. സംസർഗഗുണത്താൽ സദ്ചിന്തകൾ വർധിക്കും. പരമപ്രധാനമായ വിഷയങ്ങൾ തനതായ അർത്ഥതലങ്ങളോടുകൂടി പ്രവർത്തിക്കുവാൻ തയാറാകും.

ഉത്രം : 

വേണ്ടപ്പെട്ടവർ വിരോധികളായി തീരുമെങ്കിലും പ്രതികരിക്കാതിരിക്കുകയാണ് നല്ലത്. മോഹവിലകൊടുത്തു കുടുംബസ്വത്ത് വാങ്ങുവാനിടവരും. നിലവിലുള്ള പാഠ്യപദ്ധതി ഉപേക്ഷിച്ചു മറ്റൊന്നിനു ചേരും. ഏറ്റെടുത്ത ദൗത്യം പ്രവൃത്തിപഥത്തിലെത്തിക്കുവാൻ അനുഭവജ്ഞാനമുള്ളവരെ നിയമിക്കും.

അത്തം :   

വ്യവസ്ഥകൾ പാലിക്കുവാൻ കഠിനപ്രയത്നം വേണ്ടിവരും. തൊഴിൽ മേഖലയോടു ബന്ധപ്പെട്ടു മാനസികസംഘർഷം വർധിക്കും. കാലഹരണപ്പെട്ട ഗൃഹോപകരണങ്ങൾ മാറ്റി വാങ്ങുവാനിടവരും. നിരവധികാര്യങ്ങൾ നിശ്ചിതസമയത്തു നിഷ്കർഷയോടുകൂടി ചെയ്തു തീർക്കും.

ചിത്തിര :

വ്യായാമമുറകളാലും ഭക്ഷണക്രമീകരണത്താലും പ്രമേഹ-നീർദോഷരോഗപീഡകൾക്കു കുറവുതോന്നും.  സുപ്രധാനമായ കാര്യങ്ങൾ തനതായ അർത്ഥമൂല്യങ്ങളോടുകൂടി അവലംബിക്കുന്നതുവഴി ആത്മാഭിമാനം തോന്നും. വർഷങ്ങൾക്കുശേഷം സഹപാഠികളെ കാണുവാനും ഗതകാലസ്മരണകൾ പങ്കുവയ്ക്കുവാനും അവസരമുണ്ടാകും.

ചോതി :

വിദഗ്ധചികിത്സകളാൽ രോഗശമനം വന്ന് കരാറുജോലികൾ ഏറ്റെടുക്കും. അവ്യക്തമായ കാരണങ്ങൾക്ക് അന്യരെ സംശയിക്കുന്ന പ്രവണത ഉപേക്ഷിക്കണം. പ്രവർത്തനശൈലിക്ക് ആദരം വന്നുചേരുമെങ്കിലും അഹംഭാവം ഒഴിവാക്കണം. പരാജയത്തെ അതിജീവിവാൻ തക്കവണ്ണം പഠിക്കുവാനും പരീക്ഷയെഴുതുവാനും സാധിക്കും. അവസരങ്ങൾ വേണ്ടവിധത്തിൽ പ്രയോജനപ്പെടുത്തും.

വിശാഖം :

അഭയം പ്രാപിച്ചുവരുന്നവർക്ക് അഭയം നൽകുന്നതിൽ ആത്മസംതൃപ്തിയുണ്ടാകും. പ്രസ്ഥാനത്തിന്റെ അവസ്ഥ മനസ്സിലാക്കി ചില ജോലിക്കാരെ ഒഴിവാക്കി പ്രസക്തമായ ചുമതലകൾ ഏറ്റെടുക്കും. അശ്രദ്ധകൊണ്ടു പണനഷ്ടവും മാനഹാനിയും ഉണ്ടാകും. നിസാരകാര്യങ്ങൾക്കു പോലും അശ്രാന്തപരിശ്രമം വേണ്ടിവരും. പ്രധാനതീരുമാനങ്ങൾക്ക് പുനഃപരിശോധന വേണ്ടിവരും.

അനിഴം :

സൽകീർത്തിയും സജ്ജനപ്രീതിയും വർധിക്കും. തൊഴിൽ ചെയ്യുന്ന സ്ഥാപനത്തിൽ ലാഭശതമാന വ്യവസ്ഥകളോടുകൂടിയ പ്രവർത്തനങ്ങൾക്ക് അവസരം ലഭിക്കും. വേണ്ടപ്പെട്ടവർക്ക് ഉപകാരം ചെയ്യുവാൻ അവസരം ഉണ്ടാകും. ഏറെക്കുറെ പൂർത്തിയായ ഗൃഹത്തിൽ ഗൃഹപ്ര വേശനകർമം നിർവഹിക്കും. ഉൽപന്നങ്ങളുടെ ഗുണനിലവരം വർധിപ്പിക്കുവാൻ നടപടികൾ സ്വീകരിക്കും.

തൃക്കേട്ട :

ഏറ്റെടുത്ത ദൗത്യം തൃപ്തിയാകും വിധത്തിൽ പൂർത്തീകരിക്കുവാനിടവരും. പുതിയ സ്നേഹബന്ധം ഉടലെടുക്കും. പുതിയ കരാറുജോലികൾ ഏറ്റെടുക്കും. ഉദ്യോഗത്തിൽ പുനർനിയമനം സാധ്യമാകും. അവഗണിക്കപ്പെടുന്ന അവസ്ഥ ഒഴിഞ്ഞുമാറി പരിഗണിക്കപ്പെടുന്നതിൽ ആശ്വാസം തോന്നും. പണം കടംകൊടുക്കുന്നതും ജാമ്യം നിൽക്കുന്നതും ആവുന്നതും ഒഴിവാക്കണം.

മൂലം :

പരീക്ഷണനിരീക്ഷണങ്ങളിൽ അനുകൂല അവസരങ്ങൾ വന്നുചേരും. വ്യാപാരമേഖലയിൽ ധ്രുവീകരണത്തിന്റെ ഭാഗമായി ചില ഉദ്യോഗസ്ഥരെ പിരിച്ചുവിടും.  അസുഖങ്ങൾക്ക് നിസാരചികിത്സകളാൽ രോഗശമനമുണ്ടാകും. സങ്കീർണമായ വിഷയങ്ങളെ അഭിമുഖീകരിക്കുവാനുള്ള കഴിവും അറിവും ഉണ്ടാകും.

പൂരാടം :

ദുഃസൂചനകൾ ലഭിച്ചതിനാൽ സാമ്പത്തികവിഭാഗത്തിൽ കൂടുതൽ ശ്രദ്ധ കേന്ദ്രീകരിക്കും. മറ്റുള്ളവരുടെ കാഴ്ചപാടിൽ ധനാഢ്യനെന്നു തോന്നുന്ന വിധം ജീവിക്കുവാൻ അവസരം ഉണ്ടാകും.  ജീവകാരുണ്യപ്രവർത്തനങ്ങളിൽ സജീവമാകും. വിട്ടുവീഴ്ചാ മനോഭാവത്താൽ കുടുംബത്തിൽ സ്വസ്ഥതയും സമാധാനവും ഉണ്ടാകും.

ഉത്രാടം :

നിലവിലുള്ള പ്രസ്ഥാനത്തിന്റെ ഒരുവിഭാഗത്തിന്റെ സമ്പൂർണ ചുമതല ഏറ്റെടുക്കുവാനിടവരും. പൊതുജന ആവശ്യം അന്വേഷിച്ചറിഞ്ഞു പുതിയ പദ്ധതികൾക്കു രൂപകൽപന ചെയ്യും.  കാര്യനിർവഹണശക്തിയും, ആത്മവിശ്വാസവും വർധിക്കും. വിശേഷപ്പെട്ട ദേവാലയദർശനത്തിന് അവസരമുണ്ടാകും. അന്യരുടെ വിഷമാവസ്ഥകൾക്കു ശാശ്വതപരിഹാരം നിർദേശിക്കുവാൻ സാധിക്കും.

തിരുവോണം :

തൊഴിൽ മേഖലകളിൽ നിലനിൽപിന് അനുസൃതമായി പ്രവർത്തിക്കേണ്ടിവരും. വേണ്ടപ്പെട്ടവർ വിരോധികളായി തീരും. ചെയ്യാത്ത കുറ്റത്തിന് അപരാധം കേൾക്കുവാനിടവരും. യാത്രാക്ലേശം വർധിക്കും. ചെലവുകൾ വർധിക്കുന്നതിനാൽ നീക്കിയിരുപ്പു കുറയും. 

അവിട്ടം :

നിലവിലുള്ള ഉദ്യോഗം ഉപേക്ഷിച്ചു മറ്റൊന്നിനു ശ്രമിക്കുന്നത് അഭികാമ്യമല്ല. കക്ഷി രാഷ്ട്രീയ മത്സരങ്ങളിൽ പരാജയപ്പെടും. അശ്രദ്ധകൊണ്ടു വാഹനാപകടത്തിനു യോഗമുണ്ട്.  വർധിച്ചുവരുന്ന അധികാരപരിധി ഏറ്റെടുക്കുവാനിടവരുമെങ്കിലും സാമ്പത്തികനേട്ടമുണ്ടാവുകയില്ല.

ചതയം :

നിസ്സാരകാര്യങ്ങൾക്കുപോലും അശ്രാന്തപരിശ്രമം വേണ്ടിവരും.   രേഖാപരമല്ലാത്ത സാമ്പത്തിക ഇടപാടുകളിൽ നഷ്ടം സംഭവിക്കും. രക്തശുദ്ധിക്കുറവിനാൽ ഭക്ഷണക്രമീകരണം വേണ്ടിവരും. മറ്റുള്ളവരുടെ ഉയർച്ചയിൽ അഭിനന്ദിക്കുന്നതിനാൽ ആത്മാഭിമാനമുണ്ടാകും. വർധിച്ചുവരുന്ന ഉത്തരവാദിത്തം ഏറ്റെടുക്കും.

പൂരോരുട്ടാതി : 

അർഥപൂർണമായ ആശയങ്ങൾക്ക് ആത്മാർഥമായി സഹകരിക്കും. വികസിതരാഷ്ട്രത്തിലേയ്ക്കു സ്ഥിരതാമസത്തിന് അപേക്ഷ നൽകും. ഭരണസംവിധാനത്തിലുള്ള അപാകതകൾ പരിഹരിക്കുവാൻ വിദഗ്ധ നിർദേശവും ഉപദേശവും തേടും.

ഉത്രട്ടാതി :

സാഹചര്യങ്ങൾക്കനുസരിച്ചു സ്വയംപര്യാപ്തത ആർജിക്കും. ഉപരിപഠനത്തിന് ഉന്നതവിദ്യാഭ്യാസസ്ഥാപനത്തിൽ പ്രവേശനം ലഭിക്കും. പഠിച്ച വിദ്യ പ്രാവർത്തികമാക്കുവാൻ സാധിക്കും. ചിരകാലാഭിലാഷപ്രാപ്തിയായ വിദേശയാത്ര സഫലമാകും. കുടുംബത്തിൽ സ്വസ്ഥതയും സമാധാനവും ഉണ്ടാകും. 

രേവതി: 

വസ്തുതകൾക്കു നിരക്കാത്ത സംയുക്തസംരംഭങ്ങളിൽ നിന്നും പിന്മാറും. വാസ്തവവിരുദ്ധമായ തോന്നലുകൾ ഒഴിവാക്കുവാൻ സ്വയം തയാറാകും. പഠിച്ച വിദ്യ പ്രാവർത്തികമാക്കുവാൻ അവസരം വന്നുചേരും.

English Summary : Weekly Star Prediction By Kanippayyur / 2021 October 17 to 23