സൈന്യത്തിൽ ചേരാൻ തയാറെടുക്കുന്നവർക്ക് സൗജന്യ പരിശീലനം; 23 വയസ്സുവരെയുള്ള 50 ൽ അധികം ഉദ്യോഗാർഥികൾ

തളിപ്പറമ്പ്∙സൈന്യത്തിൽ ചേരാൻ തയാറെടുക്കുന്നവർക്ക് സൗജന്യ പരിശീലനവുമായി വെള്ളാവ് സാംസ്ക്കാരിക ഗ്രന്ഥാലയം. ഫെബ്രുവരി, മാർച്ച് മാസങ്ങളിൽ കണ്ണൂരിൽ നടത്തുന്ന ആർമി റിക്രൂട്മെന്റ് റാലിയിൽ പങ്കെടുക്കാൻ ആഗ്രഹിക്കുന്ന ഉദ്യോഗാർഥികൾക്കാണ് വെള്ളാവ് സാംസ്കാരിക ഗ്രന്ഥാലയത്തിന്റെ നേതൃത്വത്തിൽ ദിവസങ്ങളായി സൗജന്യ പരിശീലനങ്ങൾ നടത്തി വരുന്നത്. വെള്ളാവ്-കുറ്റ്യേരി പ്രദേശത്തെയും സമീപ പ്രദേശങ്ങളായ, പരിയാരം കുറുമാത്തൂർ,പാച്ചേനി, മഴൂർ, പൂമംഗലം, പന്നിയൂർ,തളിപ്പറമ്പ പ്രദേശങ്ങളിലെയും 23 വയസ്സുവരെയുള്ള 50 ൽ അധികം ഉദ്യോഗാർഥികൾക്കാണ് എല്ലാ ദിവസവും പുലർച്ചെ 5.45 മുതൽ 7 വരെ കായിക പരിശീലനം നൽകുന്നത്.

ദിവസവും 5 കിലോ മീറ്റർ ഓട്ടം, പുൾഅപ്സ്, ലോങ് ജംപ് കൂടാതെ വിവിധ കായിക അഭ്യാസങ്ങൾക്കും പരിശീലനം നൽകുന്നു. ഞായറാഴ്ചകളിൽ ഇവർക്ക് പയ്യന്നൂർ കോളജ് ഗ്രൗണ്ടിൽ പരിശീലനം നടത്തുവാനുള്ള സൗകര്യവും വായനശാല ചെയ്തു കൊടുക്കുന്നുണ്ട്. സേനാ പരിശീലകരായ ബൈജു രാമപുരം, ശ്യാംകുമാർ വെള്ളാവ് , ശരത് കുമാർ വെള്ളാവ് , ചന്ദ്രൻ കരിക്കൻ, കെ.പി. രമേശൻ കെ.പി എന്നിവരാണ് പരിശീലനം നൽകുന്നത്. 15 ദിവസത്തിലധികമായി പരിശീലനം തുടർന്ന് വരുന്നുണ്ട്. വരും ദിവസങ്ങളിൽ കായിക പരിശീലനത്തിന് പുറമേ ഉദ്യോഗാർഥികൾക്ക് ആർമി എഴുത്ത് പരീക്ഷകൾക്ക് കൂടിയുള്ള പരിശീലനം നൽകുമെന്ന് ന ഗ്രന്ഥാലയം എന്ന് ഭാരവാഹികളായ സി.പവിത്രൻ എം.വിജു എന്നിവർ പറഞ്ഞു.