കാർഷിക മേഖലയിൽ മെച്ചപ്പെട്ട ജോലിയാണോ ആഗ്രഹം; പ്ലസ്ടുവിനു ശേഷം പഠിക്കാം ഈ കോഴ്സുകൾ

ചോദ്യം: അഗ്രികൾചർ മേഖലയുമായി ബന്ധപ്പെട്ട കോഴ്സുകളും സാധ്യതകളും വിശദീകരിക്കാമോ ?

ജോസ് പ്രകാശ്

ഉത്തരം: കൃഷിമേഖലയിൽ മെച്ചപ്പെട്ട ജോലി കിട്ടാൻ സഹായിക്കുന്ന പ്രോഗ്രാമാണ് ബിഎസ്‌സി അഗ്രികൾച‍ർ. അഖിലേന്ത്യാ തലത്തിലെ പ്രവേശനം ഐസിഎആർ പ്രവേശനപരീക്ഷ വഴിയും കേരളത്തിലെ പ്രവേശനം നീറ്റ്-യുജി വഴിയുമാണ്. പഠനശേഷം ഇന്ത്യൻ ഫോറസ്റ്റ് സർവീസ്, നബാർഡ്, ബാങ്കുകൾ, സർക്കാർ കൃഷി ഓഫിസുകൾ എന്നിവിടങ്ങൾക്കു പുറമേ ഗവേഷണരംഗത്തും സ്വകാര്യ മേഖലയിൽ ഫുഡ് പ്രോസസിങ്, അഗ്രി - പ്രൊഡക്‌ഷൻ സ്ഥാപനങ്ങളിലും അവസരമുണ്ട്.

ദേശീയതലത്തിലെ പ്രധാന സ്ഥാപനങ്ങൾ:

ഇന്ത്യൻ അഗ്രികൾചറൽ റിസർച് ഇൻസ്റ്റിറ്റ്യൂട്ട്, ന്യൂഡൽഹി; ജി.ബി.പന്ത് യൂണിവേഴ്സിറ്റി ഓഫ് അഗ്രികൾചർ & ടെക്നോളജി, പന്ത് നഗർ, ഉത്തരാഖണ്ഡ്; ചൗധരി ചരൺ സിങ് ഹരിയാന അഗ്രികൾചറൽ യൂണിവേഴ്സിറ്റി, ഹിസാർ, ഹരിയാന; പ്രഫ. ജയശങ്കർ തെലങ്കാന സ്റ്റേറ്റ് അഗ്രികൾചറൽ യൂണിവേഴ്സിറ്റി, ഹൈദരാബാദ്; പഞ്ചാബ് അഗ്രികൾചറൽ യൂണിവേഴ്സിറ്റി, ലുധിയാന, പഞ്ചാബ്.

കേരള കാർഷിക സർവകലാശാലയുടെ വിവിധ ക്യാംപസുകളിലായി ബിഎസ്‌സി അഗ്രികൾചർ, ബിഎസ്‌സി ക്ലൈമറ്റ് ചേഞ്ച് & എൻവയൺമെന്റൽ സയൻസസ്, ഡിപ്ലോമ (അഗ്രികൾചറൽ സയൻസസ് / ഓർഗാനിക് അഗ്രികൾചർ), എംബിഎ അഗ്രി ബിസിനസ് മാനേജ്മെന്റ് പ്രോഗ്രാമുകളുണ്ട്. കേരള വെറ്ററിനറി & അനിമൽ സയൻസസ് യൂണിവേഴ്സിറ്റിയിൽ ബിടെക് (ഡെയറി ടെക്നോളജി, ഫുഡ് ടെക്നോളജി), ഡിപ്ലോമ (ഡെയറി സയൻസ്, പൗൾട്രി പ്രൊഡക്‌ഷൻ, ഫീഡ് ടെക്നോളജി) കോഴ്സുകളുണ്ട്. ഓരോ പ്രോഗ്രാമിനുമുള്ള യോഗ്യതയും പ്രവേശന രീതിയും സ്ഥാപനങ്ങളുടെ വെബ്സൈറ്റിൽനിന്നറിയാം.

ചില അനുബന്ധ പഠന മേഖലകളും സ്ഥാപനങ്ങളും

∙ അഗ്രികൾചർ എൻജിനീയറിങ്: കൃഷി ഉപകരണങ്ങളുടെ രൂപകൽപനയും നൂതന കൃഷി സങ്കേതങ്ങളും പഠിക്കുന്ന ശാഖ.

സ്ഥാപനങ്ങൾ: ജി.ബി.പന്ത് യൂണിവേഴ്സിറ്റി ഓഫ് അഗ്രികൾചർ & ടെക്നോളജി, അഗ്രികൾചറൽ എൻജിനീയറിങ് & റിസർച് ഇൻസ്റ്റിറ്റ്യൂട്ട്, കോയമ്പത്തൂർ; കേളപ്പജി കോളജ് ഓഫ് അഗ്രികൾചറൽ എൻജിനീയറിങ് & ടെക്നോളജി, തവനൂർ, മലപ്പുറം

∙ അഗ്രികൾചർ ഇക്കണോമിക്സ്: ഭൂമി, വെള്ളം തുടങ്ങിയ വിഭവങ്ങളുടെ മെച്ചപ്പെട്ട ഉപയോഗത്തിലൂടെ മികച്ച ഉൽപാദനത്തിനും വിപണനത്തിനുമുള്ള വഴികൾ പഠിപ്പിക്കുന്നു. സ്ഥാപനങ്ങൾ: ഇന്ത്യൻ അഗ്രികൾചറൽ റിസർച് ഇൻസ്റ്റിറ്റ്യൂട്ട്, ന്യൂഡൽഹി; നാഷനൽ ഡെയറി റിസർച് ഇൻസ്റ്റിറ്റ്യൂട്ട്, കർണാൽ (ഡെയറി ഇക്കണോമിക്സ്); ഇന്ദിരാഗാന്ധി ഇൻസ്റ്റിറ്റ്യൂട്ട് ഓഫ് ഡവലപ്മെന്റ് റിസർച്, മുംബൈ (എംഎസ്‌സി ഇക്കണോമിക്സ് - സ്പെഷലൈസേഷൻ: അഗ്രി ഇക്കണോമിക്സ്); യൂണിവേഴ്സിറ്റി ഓഫ് അഗ്രികൾചറൽ സയൻസസ്, ബെംഗളൂരു; ജി.ബി. പന്ത് യൂണിവേഴ്സിറ്റി ഓഫ് അഗ്രികൾചർ, മീററ്റ്, യുപി

∙ അഗ്രി ബിസിനസ് മാനേജ്മെന്റ്: മെച്ചപ്പെട്ട കാർഷികോൽപാദനം, മാർക്കറ്റിങ്, ഫാം മാനേജ്മെന്റ് എന്നിവ പഠനവിഷയങ്ങൾ.

സ്ഥാപനങ്ങൾ: ഐഐഎം അഹമ്മദാബാദ്; ആനന്ദ് അഗ്രികൾചറൽ യൂണിവേഴ്സിറ്റി; ബനാറസ് ഹിന്ദു യൂണിവേഴ്സിറ്റി; അലിഗഡ് മുസ്‌ലിം യൂണിവേഴ്സിറ്റി

∙ ഡെയറി സയൻസ്, ഡെയറി ടെക്നോളജി: പാലുൽപന്നങ്ങളുടെ സംസ്കരണം, സംഭരണം, ക്വാളിറ്റി കൺട്രോൾ തുടങ്ങിയവയും ഇവയ്ക്കാവശ്യമായ സാങ്കേതികവിദ്യകളും പഠിപ്പിക്കുന്നു.

സ്ഥാപനങ്ങൾ: നാഷനൽ ഡെയറി റിസർച് ഇൻസ്റ്റിറ്റ്യൂട്ട്, കർണാൽ, ഹരിയാന; ആനന്ദ് അഗ്രികൾചറൽ യൂണിവേഴ്സിറ്റി

∙ ഫോറസ്റ്റ് മാനേജ്മെന്റ്: വനമേഖലയുമായി ബന്ധപ്പെട്ട ഭരണപരവും നിയമ, സാമ്പത്തിക, സാമൂഹിക കാര്യങ്ങളും പഠിപ്പിക്കുന്ന ശാഖ.

സ്ഥാപനങ്ങൾ: ഫോറസ്റ്റ് റിസർച് ഇൻസ്റ്റിറ്റ്യൂട്ട്, ഡെറാഡൂൺ; ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറസ്റ്റ് മാനേജ്മെന്റ്, ഭോപാൽ

∙ ഫുഡ് ടെക്നോളജി / ഫുഡ് എൻജിനീയറിങ്: ഭക്ഷ്യസംസ്കരണ രീതികൾ, അവയുടെ സാങ്കേതികവിദ്യ, മാർക്കറ്റിങ് തുടങ്ങിയവ പഠിക്കാം.

സ്ഥാപനം: നിഫ്റ്റെം (NIFTEM) തഞ്ചാവൂർ, സോനിപ്പത്ത്; ഖരഗ്പുർ, ഗുവാഹത്തി ഐഐടികൾ, ജാമിയ ഹംദർദ്, ഡൽഹി

∙ പ്ലാന്റേഷൻ മാനേജ്മെന്റ്: പ്ലാന്റേഷനുകളിലും അഗ്രി - ബിസിനസ് മേഖലകളിലും മാനേജ്മെന്റ്, ഇക്കണോമിക്സ് തത്വങ്ങൾ പ്രയോഗിക്കുന്നതിനെക്കുറിച്ചുള്ള പഠനം.

സ്ഥാപനം: ഇന്ത്യൻ ഇൻസ്റ്റിറ്റ്യൂട്ട് ഓഫ് പ്ലാന്റേഷൻ മാനേജ്മെന്റ്, ബെംഗളൂരു

∙ ഫ്ലോർ മില്ലിങ് ടെക്നോളജി: യന്ത്രസഹായത്തോടെ ധാന്യങ്ങൾ പൊടിച്ചെടുക്കുന്നതിനുള്ള സാങ്കേതികവിദ്യകൾ.

സ്ഥാപനം: ഇന്റർനാഷനൽ സ്കൂൾ ഓഫ് മില്ലിങ് ടെക്നോളജി, മൈസൂരു

Content Summary : Agriculture - Courses, Entrance Exams, Scope