ഡിസൈൻ രംഗത്ത് മികച്ചൊരു ജോലിയാണോ സ്വപ്നം; ജയ്പുർ ഐഐസിഡിസിയിൽ പഠിക്കാനവസരം

രാജസ്ഥാൻ സർക്കാരിന്റെ നിയന്ത്രണത്തോടെ 1995 മുതൽ പ്രവർത്തിക്കുന്ന ഐഐസിഡി, വിവിധ ഡിസൈൻ പ്രോഗ്രാമുകളിൽ 2023–24 വർഷത്തെ പ്രവേശനത്തിന് ജനുവരി 21നു വൈകിട്ടു 4 വരെ ഓൺലൈനായി അപേക്ഷ സ്വീകരിക്കും. കരകൗശലത്തിന് ഊന്നൽ നൽകുന്ന പാഠ്യക്രമമാണ്. Indian Institute of Crafts & Design, J-8, Jhalana Institutional Area, Jaipur-302004. ഫോൺ: 094606 73297; admissions@iicd.ac.in. വെബ് : www.iicd.ac.in.

∙ പ്രോഗ്രാമുകൾ

എ) 4–വർഷ ബിഡിസ്: ഏതെങ്കിലും വിഷയങ്ങളെടുത്ത് പ്ലസ്ടു ജയിച്ചവർക്കാണ് പ്രവേശനം. 6 വിഭാഗങ്ങളിൽ സ്പെഷലൈസേഷൻ: സോഫ്റ്റ് മെറ്റീരിയൽ ഡിസൈൻ (തുകൽ, കടലാസ്, പ്രകൃതിയിലുള്ള നാരുകൾ, തുണി) / ഹാർ‍ഡ് മെറ്റീരിയൽ ഡിസൈൻ (ലോഹം, ശില, മരം, ചൂരൽ, മുള) / ഫയേർഡ് മെറ്റീരിയൽ ഡിസൈൻ (പോഴ്സ്‌ലെയ്ൻ, എർത്തൻവെയ്ർ, സ്റ്റോൺവെയ്ർ, ടെറാക്കോട്ട) / ഫാഷൻ ക്ലോത്തിങ് ഡിസൈൻ / ജ്വല്ലറി ഡിസൈൻ, ക്രാഫ്റ്റ്സ് കമ്യൂണിക്കേഷൻ (ഗ്രാഫിക്സ്, ഫൊട്ടോഗ്രഫി, വിഡിയോഗ്രഫി ആനിമേഷൻ, സർഗാത്മക ഇലസ്ട്രേഷൻ) ഇഷ്ടപ്പെട്ട സ്പെഷലൈസേഷൻ ഏതെന്ന് അപേക്ഷാവേളയിൽ അറിയിക്കണം. ആദ്യ 2 സെമസ്റ്ററിലെ പ്രകടനവും നോക്കിയാവും ഇതിൽ തീരുമാനമെടുക്കുക. ആകെ 180 സീറ്റ്.  

ബി) 2–വർഷ എംഡിസ്: ഡിസൈൻ / ആർക്കിടെക്ചർ ബിരുദം. സ്പെഷലൈസേഷനുകൾ ബിഡിസിന്റെ തന്നെ – ആകെ 90 സീറ്റ്    

സി) 3–വർഷ എംവോക്: ഡിസൈൻ–ഇതര (നോൺ–‍ഡിസൈൻ) വിഷയങ്ങളിലെ ബിരുദധാരികൾക്ക്. 90 സീറ്റ്

ബിഡിസ്, എംവോക് എന്നിവയിലെ ആദ്യവർഷം ഫൗണ്ടേഷൻ പ്രോഗ്രാമാണ്. യുജി പ്രോഗ്രാമിൽ 4 തലങ്ങളിൽ സർട്ടിഫിക്കറ്റ് കിട്ടും. ഒരു വർഷത്തിനു ശേഷം ഡിപ്ലോമ, 2 വർഷത്തിനു ശേഷം അ‍‍ഡ്വാൻസ്ഡ് ഡിപ്ലോമ, 3 വർഷത്തിനു ശേഷം ബിവോക്, 4 വർഷത്തിനു ശേഷം ബിഡിസ് എന്ന സമ്പ്രദായമുണ്ട്.

∙ സിലക്‌ഷൻ

എല്ലാ പ്രോഗ്രാമുകളിലേക്കും ഒരേ ശൈലിയിലാണ് വിദ്യാർഥികളെ തിരഞ്ഞെടുക്കുന്നത്. ചെന്നൈ അടക്കം 14 കേന്ദ്രങ്ങളിൽ 2023 ഫെബ്രുവരി 12ന് രാവിലെയും ഉച്ചകഴിഞ്ഞുമായി 2 മണിക്കൂർ വീതമുള്ള എഴ‌ുത്തുപരീക്ഷയിൽ ജനറൽ അവയർനെസ്, ക്രിയേറ്റിവിറ്റി & പെർസെപ്ഷൻ ടെസ്റ്റ് (35% മാർക്ക്), മെറ്റീരിയൽ, കളർ & കൺസെപ്ച്വൽ ടെസ്റ്റ് (45%) എന്നീ 2 ഭാഗങ്ങളുണ്ട്. 

കേരളത്തിൽ കേന്ദ്രമില്ല. ഫെബ്രുവരി 12നു തന്നെ പരീക്ഷ കഴിഞ്ഞ് 20% മാർക്കിന്റെ ഇന്റർവ്യൂവിലും പങ്കെടുക്കണം. 

ഈ സമയത്ത് സ്വന്തം രചനകൾ കാണിക്കാം. ഫെബ്രുവരി 27ന് സിലക്‌ഷൻ  ലഭിച്ചവരുടെ ലിസ്റ്റിടും. ഏപ്രിൽ 3ന് അകം ഫീസടയ്ക്കണം. ജൂലൈയിൽ ക്ലാസ് തുടങ്ങും.

∙ അപേക്ഷാ ഫീ 

അപേക്ഷാ ഫീ 1750 രൂപ. എൻആർഐ 3500 രൂപ. പഠനത്തിന് സെമസ്റ്റർ ഫീ – 1,20,000 രൂപ. പ്രവേശന ഫീ – 7000 രൂപ. ഹോസ്റ്റൽ ഭക്ഷണമടക്കം സെമസ്റ്ററൊന്നിന് ആകെ ഫീസ് 2,20,000 രൂപയോളം വരും. എല്ലാ പ്രോഗ്രാമുകൾക്കും ഫീസ് തുല്യം. എൻആർഐ വിഭാഗക്കാർക്ക് വിശേഷ നിരക്ക്. പഠിച്ചു യോഗ്യത നേടുന്നവർക്ക് നല്ല ജോലി കിട്ടിയ ചരിത്രമാണുള്ളത്. 

Content Summary : IICD Jaipur Admission 2022