എൻട്രൻസില്ല: 13 പാരാമെഡിക്കൽ കോഴ്സുകളിലേക്കുള്ള പ്രവേശനം പ്ലസ്ടുമാർക്ക് അടിസ്ഥാനമാക്കി, വിശദാംശങ്ങളിങ്ങനെ...

കേരളത്തിലെ സർക്കാർ/സ്വാശ്രയ കോളജുകളിൽ താഴെപ്പറയുന്ന 13 ബിരുദ കോഴ്‌സുകളിലെ പ്രവേശനം 12ലെ മാർക്ക് ആധാരമാക്കിയായിരിക്കും. എൻട്രൻസ് പരീക്ഷയില്ല.

Read Also :  ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് സയൻസ് ആൻഡ് ടെക്നോളജിയിൽ നിന്ന് നേടാം ഇരട്ടഡിഗ്രി

1. ബി എസ്‌സി നഴ്‌സിങ്: 4 വർഷം, സർക്കാർ കോളജുകളിൽ ഒരു വർഷം ഇന്റേൺഷിപ്പും.

2. ബി എസ്‌സി എംഎൽടി (മെഡിക്കൽ ലാബ് ടെക്‌നോളജി): 4 വർഷം.

3. ബി എസ്‌സി പെർഫ്യൂഷൻ ടെക്‌നോളജി: 3 വർഷവും ഒരു വർഷം ഇന്റേൺഷിപ്പും. 

4. ബിഎസ്‌സി എംആർടി (മെഡിക്കൽ റേഡിയോളജിക്കൽ ടെക്നോളജി): 4 വർഷം.

5. ബിഎസ്‌സി ഓപ്‌ടോമെട്രി: 3 വർഷവും ഒരു വർഷം ഇന്റേൺഷിപ്പും.

6. ബിപിടി(ഫിസിയോതെറപ്പി) 4 വർഷവും 6 മാസം ഇന്റേൺഷിപ്പും. 

7. ബിഎഎസ്എൽപി (ഓഡിയോളജി & സ്‌പീച്ച് ലാംഗ്വേജ് പതോളജി) 3 വർഷവും 10 മാസം ഇന്റേൺഷിപ്പും. 

8. ബിസിവിടി (കാർഡിയോ വാസ്‌ക്യുലാർ ടെക്‌നോളജി): 3 വർഷവും ഒരു വർഷം ഇന്റേൺഷിപ്പും. 

9. ബിഎസ്‌സി ഡയാലിസിസ് ടെക്നോളജി: 3 വർഷവും ഒരു വർഷം ഇന്റേൺഷിപ്പും. 

10. ബിഒടി (ഒക്യുപേഷനൽ തെറപ്പി) 4 വർഷവും 6 മാസം ഇന്റേൺഷിപ്പും. 

11. ബാച്‌ലർ ഓഫ് മെ‍ഡിക്കൽ ഇമേജിങ് ടെക്നോളജി.

12. ബാച്‌ലർ ഓഫ് റേഡിയോ തെറപ്പി ടെക്നോളജി.

13. ബാച്‌ലർ ഓഫ് ന്യൂറോ ടെക്നോളജി.

11, 12, 13 കോഴ്സുകൾ തുടങ്ങുന്നതിന് സർക്കാർ/സർവകലാശാലാ അംഗീകാരം പ്രതീക്ഷിച്ചുകൊണ്ട് പ്രോസ്പെക്ടസിൽ ഉൾപ്പെടുത്തിയിരിക്കുകയാണ്.

 

 

12–ാം ക്ലാസ് പരീക്ഷയിലെ വിവിധ സ്‌ട്രീമുകളിൽ (കേരള ഹയർ സെക്കൻഡറി, വിഎച്ച്എസ്ഇ, സിബിഎസ്‌ഇ, ഐഎസ്‌സി മുതലായവ) നേടിയ മാർക്കുകൾ തുല്യപ്പെടുത്തി കണക്കാക്കുകയാവും ചെയ്യുക. അപേക്ഷ സ്വീകരിച്ച് റാങ്കിങ് നടത്തുന്ന ചുമതല എൽബിഎസിനാണ്. വിലാസം: LBS Centre for Science & Technology, Nandavanam, Thiruvananthapuram 695033. www.lbscentre.kerala.gov.in. വാർഷികഫീസ് സർക്കാർ കോളജുകളിൽ 21,000 – 23,000 രൂപ. 

 

കേരളീയർക്കാണു പ്രവേശനത്തിന് അർഹത. പിഐഒ, ഒസിഐ വിഭാഗക്കാരെയും പരിഗണിക്കുമൈങ്കിലും സംവരണമില്ല. ഫിസിക്‌സ്, കെമിസ്‌ട്രി, ബയോളജി എന്നിവയ്‌ക്കു മൊത്തം 50% എങ്കിലും മാർക്കോടെ പ്ലസ്‌ടു ജയിച്ചിരിക്കണമെന്നതാണ് പൊതുവേയുള്ള മാനദണ്ഡം.ബിഎഎസ്‌എൽപി കോഴ്‌സിന് ഫിസിക്‌സ്, കെമിസ്‌ട്രി എന്നിവയ്‌ക്കു പുറമേ ബയോളജി/മാത്‌സ്/കംപ്യൂട്ടർ സയൻസ്/സ്‌റ്റാറ്റിസ്‌റ്റിക്‌സ്/ഇലക്‌ട്രോണിക്‌സ്/സൈക്കോളജി ഇവയിലൊന്നും ചേർത്ത് ആകെ 50% എങ്കിലും മാർക്കോടെ പ്ലസ്‌ടു.

 

ഹയർ സെക്കൻഡറിയിലെ 2 വർഷങ്ങളിലും ബോർഡ് പരീക്ഷയുണ്ടെങ്കിൽ രണ്ടിലെയും മാർക്കുകളുടെ തുകയാണ് പ്രവേശനയോഗ്യതയ്ക്കു പരിഗണിക്കുക. 12ൽ മാത്രമാണു ബോർഡ് പരീക്ഷയെങ്കിൽ അതിലെ മാത്രം മാർക്കും,

ഹയർ സെക്കൻഡറിക്കു തുല്യമാണ് കേരള വിഎച്ച്എസ്ഇ. അപേക്ഷാസമർപ്പണത്തിന്റെ അവസാന തീയതിയിൽ പരീക്ഷായോഗ്യത നേടിയിരിക്കണം. ക്രീമിലെയറിൽപ്പെടാത്ത പിന്നാക്കസമുദായക്കാർക്ക് 45% മാർക്ക് മതി. ഒഇസി, ഭിന്നശേഷി വിഭാഗക്കാർക്കും 45% മതി. പട്ടികവിഭാഗക്കാർ പരീക്ഷ ജയിച്ചിരിക്കണമെന്നേയുള്ളൂ. ഏതു സമുദായക്കാരായാലും 2023 ഡിസംബർ 31ന് 17 വയസ്സ് പൂർത്തിയാക്കിയിരിക്കണം. സർവീസ് ക്വോട്ടക്കാരല്ലാത്തവർക്ക് ഉയർന്ന പ്രായപരിധി പൊതുവേയില്ല. ബിഎസ്‌സി നഴ്സിങ്ങിന് 35 വയസ്സ് കവിയരുത്. 

 

∙ സീറ്റ് വിഭജനം

 

1. സർക്കാർ സീറ്റുകൾ:  എൽബിഎസ് ഡയറക്‌ടർ അലോട്ട് ചെയ്യുന്ന സീറ്റുകൾ. സർക്കാർ കോളജുകൾ, സർക്കാർ നിയന്ത്രിത സ്വാശ്രയ കോളജുകൾ, സർക്കാരുമായി കരാറിലേർപ്പെടുന്ന സ്വകാര്യ സ്വാശ്രയ കോളജുകൾ എന്നിവയിൽ സർക്കാർ സീറ്റുകളുണ്ട്. ന്യൂനപക്ഷ നഴ്സിങ് കോളജുകളിലെ 20% സർക്കാർ സീറ്റുകൾ അതതു സമുദായങ്ങളിലെ അപേക്ഷകരെ മെറിറ്റ് അടിസ്‌ഥാനത്തിൽ റാങ്ക് ചെയ്‌തു നികത്തും. 

2. മാനേജ്‌മെന്റ് സീറ്റുകൾ: സർക്കാർ സീറ്റുകളല്ലാത്തവ. 

 

∙ സംവരണം

 

കേന്ദ്ര സംസ്‌ഥാന സർക്കാർ നോമിനി, സർവീസ് ക്വോട്ട, ഭിന്നശേഷി (സർക്കാർ കോളജുകളിൽ 5%) വിഭാഗക്കാർക്കു പുറമേ വിമുക്‌തഭടർ, സൈനികർ, സ്‌പോർട്‌സ് താരങ്ങൾ, എൻസിസി കെഡറ്റുകൾ മുതലായ വിഭാഗക്കാർക്ക് നിർദിഷ്‌ട വ്യവസ്‌ഥകളനുസരിച്ച് സീറ്റ് സംവരണമുണ്ട്. പ്രഫഷനൽ കോളജ് പ്രവേശനത്തിനുള്ള സാമുദായിക സംവരണ മാനദണ്ഡങ്ങളും പാലിക്കും.

 

∙അപേക്ഷ

 

എത്ര കോഴ്‌സിനു ശ്രമിക്കുന്നെങ്കിലും ഒരൊറ്റ ഓൺലൈൻ അപേക്ഷ മതി. അപേക്ഷാഫീ 800 രൂപ ജൂൺ 30ന് അകം അടയ്ക്കണം. പട്ടികവിഭാഗക്കാർക്ക് 400 രൂപ. ഓൺലൈൻ അപേക്ഷ ജൂലൈ 3 വരെ. ഹാർഡ് കോപ്പി അയയ്ക്കേണ്ട. സർവീസ് ക്വോട്ടയിലെ അപേക്ഷയ്ക്കു വിശേഷ വ്യവസ്ഥകളുണ്ട്. പൂർണവിവരങ്ങൾക്കു വെബ്‌സൈറ്റിലെ വിജ്ഞാപനവും പ്രോസ്പെക്ടസും നോക്കാം.

 

Content Summary : Paramedical courses: Admission to 13 graduate courses without entrance