കുവൈത്തിൽ വിദേശികൾ കുത്തനെ കുറഞ്ഞു

കുവൈത്ത് സിറ്റി∙ ഈ വർഷം ആദ്യ പകുതിയിൽ കുവൈത്ത് ജനസംഖ്യയിൽ 56300 വിദേശികൾ കുറഞ്ഞു. ജൂണിൽ അവസാനിച്ച 6 മാസത്തെ കണക്കനുസരിച്ച് രാജ്യത്തെ മൊത്തം ജനസംഖ്യ 46,28000 ആയതായി സിവിൽ ഇൻഫർമേഷൻ അതോറിറ്റിയുടെ സ്ഥിതിവിവര കണക്ക് വ്യക്തമാക്കുന്നു.

അർധവാർഷിക കണക്കനുസരിച്ച് ജനസംഖ്യയിൽ 0.9% കുറവാണ് രേഖപ്പെടുത്തിയത്. 2017ൽ 2.0%, 2018ൽ 2.7%, 2019ൽ 3.3% വളർച്ചയുണ്ടായ ജനസംഖ്യയിൽ 2020ൽ 2.2% കുറവുണ്ടായതായും കണക്കുകൾ തെളിയിക്കുന്നു. ഈ വർഷം ആദ്യപകുതിയിൽ സ്വദേശികളുടെ എണ്ണത്തിൽ 13,300 പേരുടെ വർധനയുണ്ട്.

അർധവാർഷിക കണക്കനുസരിച്ച് 0.9% വർധനയാണ് അത്. അതോടെ സ്വദേശികളുടെ എണ്ണം 14,73000 ആയി. 31,54000 ആണ് വിദേശികൾ. രാജ്യത്തെ തൊഴിൽ ശേഷി ഏകദേശം 28ലക്ഷം ആണ്. മൊത്തം ജനസംഖ്യയുടെ 60.5% ആണ് തൊഴിൽശേഷി. സ്വദേശി ജനസംഖ്യയിൽ 30.9ശതമാനവും വിദേശി ജനസംഖ്യയിൽ 74.2ശതമാനവും തൊഴിൽ രംഗത്തുണ്ട്.