നറുക്കെടുപ്പിൽ എട്ടുകോടിയിലേറെ രൂപ നേടി മലയാളി; ഭാഗ്യമെത്തിയത് ലണ്ടൻ യാത്രക്കിടെ എടുത്ത ടിക്കറ്റിന്

ദുബായ്∙ ദുബായ് ഡ്യൂട്ടി ഫ്രീയുടെ മില്ലേനിയം മില്യണയർ സീരീസ് 407 നറുക്കെടുപ്പിൽ ദുബായിൽ താമസിക്കുന്ന മലയാളി എട്ടു കോടിയിലേറെ രൂപ( 10 ലക്ഷം ഡോളർ) സമ്മാനം നേടി. ജയകൃഷ്ണൻ( 46) എന്നയാളെയാണു ഭാഗ്യം തേടിയെത്തിയത്.

നവംബർ എട്ടിന് ഭാര്യയോടും രണ്ടു മക്കളോടുമൊപ്പം ലണ്ടനിലേക്കു പോകുന്നതിനിടെ ദുബായ് വിമാനത്താവളത്തിൽ നിന്നാണു ജയകൃഷ്ണൻ ടിക്കറ്റ് വാങ്ങിയത്. ദെയ്‌റയിലെ ഇന്റഗ്രൽടെക് നെറ്റ്‌വർക്ക്സ് എൽഎൽസിയുടെ ഓപറേഷൻസ് മാനേജരായി ജോലി ചെയ്യുന്ന ഇദ്ദേഹം പതിവായി ദുബായ് ഡ്യൂട്ടി ഫ്രീ പ്രമോഷനുകളിൽ പങ്കെടുക്കുന്നതായും ഇതാദ്യമായാണ് സമ്മാനം നേടുന്നതെന്നും പറഞ്ഞു.

മില്ലേനിയം മില്യണയർ നറുക്കെടുപ്പിനെ തുടർന്നു രണ്ട് ആഡംബര വാഹനങ്ങൾക്കായുള്ള ഫൈനസ്റ്റ് സർപ്രൈസ് നറുക്കെടുപ്പും നടന്നു.  ജർമൻ സ്വദേശി റെയ്‌നർ ബോഥേൺ, നവംബർ 11-ന് ഓൺലൈനിൽ വാങ്ങിയ ഫൈനെസ്റ്റ് സർപ്രൈസ് മെഴ്‌സിഡസ് ബെൻസ് ജി 63 (ട്രാവെർട്ടൈൻ ബീജ് മെറ്റാലിക്) ആഡംബര കാർ സമ്മാനം നേടി. ദുബായിൽ ജോലി ചെയ്യുന്ന 43 കാരനായ റഷ്യൻ പൗരൻ വിറ്റാലി കാരി നവംബർ 14-ന് ഓൺലൈനിൽ വാങ്ങിയ ടിക്കറ്റ് വഴി ബിഎംഡബ്ല്യു ആർ 9T പ്യുവർ (ഗ്രാനൈറ്റ് ഗ്രേ) ആഡംബര മോട്ടോർബൈക്കും സ്വന്തമാക്കി.

English Summary: Malayali won eight crore in Dubai duty free