മലയാളി പെന്തക്കോസ്ത് കോൺഫറൻസ്: ഒരുക്കങ്ങൾ അവസാനഘട്ടത്തിൽ

ഹൂസ്റ്റൺ ∙  2024 ജൂലൈ നാലു മുതൽ ഏഴ് വരെ ഹൂസ്റ്റൺ ജോർജ് ബ്രൗൺ കൺവൻഷൻ സെന്ററിൽ നടത്തപ്പെടുന്ന വടക്കേ അമേരിക്കൻ മലയാളി പെന്തക്കോസ്ത് വിശ്വാസ സമൂഹത്തിന്റെ (പിസിഎൻഎകെ) ദേശീയ കോൺഫറൻസിന്റെ ഒരുക്കങ്ങൾ അവസാന ഘട്ടത്തിൽ എത്തിയിരിക്കുന്നു. ഷിക്കാഗോ പ്രമോഷനൽ യോഗം 18ന് (ശനിയാഴ്ച) വൈകിട്ട് 4. 30ന്   ഗിൽഗാൽ പെന്തക്കോസ്തൽ അസംബ്ലി സഭാ ഹാളിൽ വച്ച് (123 Busse Rd, Mt. Prospect, IL, 60056) നടത്തപ്പെടും. വിവിധ നഗരങ്ങളിലെ പ്രധാന സഭകളിൽ വച്ച് ഓൺ സൈറ്റ് റജിസ്ട്രേഷനുകളും നടന്നുവരുന്നു. മേയ് 19ന് കാൽവറി പെന്തക്കോസ്ത് ചർച്ചിലും, മേയ് 26 ന് മെട്രോ ചർച്ച് ഓഫ് ഗോഡിലും  റജിസ്ട്രേഷൻ ക്യാമ്പ് ഉണ്ടായിരിക്കും. 

ഓൺലൈൻ റജിസ്ട്രേഷൻ മേയ് 31ന് അവസാനിക്കും. കോൺഫറൻസിനോട് അനുബന്ധിച്ച് പുറത്തിറക്കുന്ന സോങ് ബുക്കിലേക്ക് പരസ്യങ്ങൾ നൽകേണ്ടവർ എത്രയും വേഗം ഭാരവാഹികളുമായി ബന്ധപ്പെടണമെന്ന് നാഷനൽ സെക്രട്ടറി രാജു പൊന്നോലിൽ അറിയിച്ചു. സിറ്റികളിൽ നിന്നുമുള്ള ബസ് - ട്രെയിൻ ഗതാഗത മാർഗ്ഗങ്ങൾ ഉപയോഗിച്ച് സമ്മേളന നഗറിലേക്ക് ആയിരങ്ങൾ എത്തിച്ചേരുമെന്ന് സംഘാടകർ വിശ്വസിക്കുന്നു. 

എയർപോർട്ടിൽ വന്നിറങ്ങുന്നവർക്ക് സുരക്ഷിതമായി കോൺഫറൻസ് സെന്ററിൽ എത്തിച്ചേരുവാൻ സൗജന്യ വാഹന സൗകര്യം ക്രമീകരിച്ചിട്ടുണ്ട്. കാർ മാർഗ്ഗമായി എത്തിച്ചേരുന്നവർക്കും കൺവൻഷൻ സെന്ററിൽ സൗജന്യ പാർക്കിങ് ഭാരവാഹികൾ ക്രമീകരിച്ചിട്ടുണ്ട്. വ്യത്യസ്തമായ പ്രോഗ്രാമുകൾ, മികച്ച നിലയിലുള്ള താമസ സൗകര്യങ്ങൾ തുടങ്ങിയവ കുറ്റമറ്റ രീതിയിൽ ക്രമീകരിക്കുന്നതിനായി നാഷനൽ - ലോക്കൽ കമ്മിറ്റികൾ പ്രവർത്തിച്ചു കൊണ്ടിരിക്കുന്നു. 

 പ്രശസ്ത ആത്മീയ സുവിശേഷ പ്രഭാഷകരും സംഗീതജ്ഞന്മാരും വിവിധ ദിവസങ്ങളിലായി നടത്തപ്പെടുന്ന കോൺഫറൻസിൽ മുഖ്യ പ്രഭാഷകരായി എത്തിച്ചേരും.  വിശ്വാസികൾ പ്രാർഥനയോടെ കോൺഫറൻസിൽ പങ്കെടുക്കുവാന്‍ നാഷനൽ ഭാരവാഹികളായ പാസ്റ്റർ ഫിന്നി ആലുംമൂട്ടിൽ, രാജു പൊന്നോലിൽ, ബിജു തോമസ്, റോബിൻ രാജു, ആൻസി സന്തോഷ് എന്നിവർ അഭ്യർഥിച്ചു.
കൂടുതൽ വിവരങ്ങൾക്ക്: www.pcnakhouston.org