ഡിൻഗോ - മധു തൃപ്പെരുന്തുറ എഴുതിയ കഥ

“വായ്ത്താരികളല്ല തെളിവുകൾ, അതിന് ശാസ്ത്രീയമായ അടിത്തറയുണ്ട്. ഒന്ന് ചോദിച്ചോട്ടെ, ഡ്രൈവ് ചെയ്തിരുന്നത് അമോസ് അല്ലേ?”

“മുൻപും പറഞ്ഞിരുന്നു, എനിക്ക് ഡ്രൈവിംഗ് ലൈസൻസില്ല. അസാരിയ എന്റെ മടിയിലായിരുന്നു. മിലൻ അവന്റെ പപ്പക്കൊപ്പം മുൻസീറ്റിലും.”

‘‘അസാരിയ അണിഞ്ഞിരുന്ന ജാക്കറ്റിന്റെ കഴുത്തിൽ കത്രിക പോലെ എന്തോ മൂർച്ചയേറിയ ഒരായുധം വരഞ്ഞിട്ടുണ്ട്. അൾട്രാവയലറ്റ് ഫോട്ടോഗ്രാഫിയിൽ അത് കണ്ടെത്തി. ഇരുളിന്റെ മറപിടിച്ച് ഒരു കൊടുംപാതകം. കാട്ടുനായുടെ പല്ലെന്താ ഈർച്ചവാളോ? തുടക്കം മുതൽ എനിക്ക് സംശയം തോന്നിയിരുന്നു.” ഇൻസ്പെക്ടറുടെ പുരികം കുരുക്കുതീർത്ത് മുകളിലേക്കുയർന്നു. “നിങ്ങൾ എന്താണ് പറഞ്ഞു വരുന്നത്?’’ അമോസ് ഹെൻറിയുടെ നേരെ ക്രൂദ്ധനായി അടുത്തു. ഒരു നിമിഷം, അലക്സി ഷർട്ടിനു പിടിച്ച് പിന്നിലേക്ക്‌ വലിച്ചില്ലായിരുന്നെങ്കിൽ.....

“പ്രകോപിതനായിട്ട് കാര്യമില്ല മിസ്റ്റർ അമോസ്. ഫോറൻസിക് റിപ്പോർട്ട് വന്നിട്ടുണ്ട്. കാമറബാഗിലെ രക്തക്കറയെക്കുറിച്ച് ഇനി സത്യം പറഞ്ഞേ മതിയാവൂ.”

‘‘യാത്രക്കിടെ അസാരിയയുടെ നഖങ്ങൾ നെയിൽകട്ടർ ഉപയോഗിച്ച് വെട്ടിയിരുന്നു. ഒരു നിമിഷത്തെ എന്റെ അശ്രദ്ധ. അവളുടെ വിരൽത്തുമ്പിൽ നിന്നും രക്തം പൊടിഞ്ഞു. ആ നെയിൽ കട്ടർ കാമറബാഗിലാണ്‌ സൂക്ഷിച്ചത്.’’ അലക്സി വിശദീകരിച്ചു.

‘‘ഇനിയെങ്കിലും തുറന്നു പറയ്‌, വിശ്വാസികളായ നിങ്ങൾ കുട്ടിയെ വിശുദ്ധബലി നടത്തി. മൃതദേഹം വലിയ കാമറബാഗിൽ ഒളിപ്പിച്ചു. എന്നിട്ട് തന്ത്രപൂർവം ഒരു യാത്ര പ്ലാൻ ചെയ്തു. കുറ്റവാളി എത്ര സമർഥനാകട്ടെ, മിടുക്കനായ ഒരു പോലീസ് ഓഫീസർക്ക് അവരെ കണ്ടെത്താനാകും.’’

“നിങ്ങൾ ഇവിടെനിന്ന് പോകൂ ഇൻസ്പെക്ടർ, ഈ മെന്റൽ ടോർച്ചറിംഗ് സഹിക്കാൻ വയ്യ. ഞങ്ങൾക്ക് വേണ്ടത് അൽപം സ്വസ്ഥതയാണ്.’’ നിയന്ത്രണച്ചരടുകളറ്റ് അമോസ് അലറി.

ഡാർവിനിലെ കോടതിപരിസരത്ത് വലിയൊരു ആൾക്കൂട്ടം തമ്പടിച്ചിരുന്നു. തിരക്ക് വകഞ്ഞ് അമോസിനെയും അലക്സിയെയും കോടതി മുറിയിലേക്ക് കടത്തിവിടാൻ പൊലീസിനു നന്നേ വിയർക്കേണ്ടി വന്നു.

“നിനക്ക് വധശിക്ഷ തന്നെ പിശാചേ”, ജനക്കൂട്ടത്തിനിടയിൽ നിന്ന് ഒരാൾ അലക്സിക്ക് നേരെ കുരച്ചുചാടി. നരകത്തിലേക്കുള്ള ആ പോക്ക് കണ്ടോ....” മറ്റൊരാൾ അടക്കം പറഞ്ഞു. ആൾക്കൂട്ടത്തിന്റെ ആക്രോശവും പരിഹാസച്ചിരിയും അവരെ ചുറ്റിവരഞ്ഞു. അവൾക്കുമാത്രം കേൾക്കാവുന്ന ഒരുള്ളിരമ്പക്കത്തിൽ അലക്സി അമോസിന്റെ ഇടംകൈയ്യിൽ മുറുകെ പിടിച്ചു. തന്റെ ദുർവിധിയെ ശപിച്ചില്ല. പകരം കരുത്തുപകരാൻ ദൈവത്തോട് പ്രാർഥിച്ചു. രാജ്യചരിത്രത്തിൽ ആദ്യമായി കോടതി നടപടികൾ ലൈവായി ടെലിക്കാസ്റ്റ് ചെയ്യപ്പെട്ടു. പബ്ലിക് പ്രോസിക്യൂട്ടർ വില്യം ബ്ലേക്ക് ചാനലുകൾക്ക് മുൻപിൽ കേസിന്റെ നാൾവഴികൾ ഓരോന്നായി വിശദമാക്കുകയാണ്.

‘മജിസ്ട്രേട്ടിന്റെ വിധി ഇതുപോലെ നിഷ്ഠുരകൃത്യം ചെയ്യുന്ന അമ്മമാർക്കുള്ള മുന്നറിയിപ്പായിരിക്കും’, കാമറയെ നോക്കി പ്രോസിക്യൂട്ടർ മൂന്നുതരം ഉറപ്പിച്ചു. ഒരാഴ്ചയായി വാദപ്രതിവാദങ്ങൾ നടക്കുന്നു. ഹെൻറിയുടെ ഇൻക്വസ്റ്റിന്റെ ചുവടുപിടിച്ചായിരുന്നു പബ്ലിക് പ്രോസിക്യൂട്ടർ ഉന്നയിച്ച വാദമുഖങ്ങൾ. പുതിയതായി എന്തെങ്കിലും പുറത്തുകൊണ്ടുവരാൻ പ്രതികളെ കൂട്ടിൽക്കേറ്റി മണിക്കൂറുകൾ വിസ്തരിച്ചിട്ടും വില്യമിനായില്ല.

“ഫോറൻസിക്കിൽ മാറ്റിനി ജാക്കറ്റിൽ കണ്ട മുറിവ് കാട്ടുനായുടെ പല്ലുകൊണ്ടുള്ളതല്ല. അസാരിയയുടെ കഴുത്തിൽ അമ്മയുണ്ടാക്കിയ മുറിവാണത്. മൃതദേഹം കാമറബാഗിൽ ഒളിപ്പിച്ചു. അയേഴ്സ്പാറക്കടുത്ത് വിജനതയിൽ വസ്ത്രം ഉപേക്ഷിച്ചു. വളരെ തന്ത്രപൂർവ്വം ഫ്രെയിം ചെയ്ത കുറ്റകൃത്യം. ബുദ്ധിശാലിയായ കുറ്റവാളിയാണ് അലക്സി. അമോസ് എല്ലാത്തിനും കൂട്ടുനിന്നു”. 

“എന്തിനൊരമ്മ മകളെ കൊല്ലണം?” മജിസ്ട്രേട്ടിന്റെ ചോദ്യത്തിന് പബ്ലിക് പ്രോസിക്യൂട്ടർ വടക്കൻ പ്രവിശ്യയിൽ പ്രചരിച്ച ഒരു കഥ പറഞ്ഞു, “യുവറോണർ, വിശ്വാസികളായിരുന്നു ഈ കുടുബം. കുട്ടിയെ കൊല്ലണമെന്ന് കരുതിക്കൂട്ടി വിനോദയാത്ര പ്ലാൻ ചെയ്തു. കാറിന്റെ പിൻസീറ്റിലിരുന്ന് അലക്സി കൃത്യം നടപ്പിലാക്കിയ ശേഷം ക്യാമ്പ് സൈറ്റിൽ എത്തി. എന്റെ മോളെ ഡിൻഗോ കൊണ്ടുപോയേ എന്ന് നിലവിളിച്ചു. അസാരിയ എന്ന വാക്കിന്റെ അർഥം തന്നെ പിശാചിന്റെ സന്തതി എന്ന്. കൊലപാതക ദിവസം കുട്ടിയെ കറുത്ത വസ്ത്രങ്ങൾ അണിയിച്ചിരുന്നു.” ചിരിച്ചുകൊണ്ട് “കഴുത്തിൽ ചുവന്ന മാലയിട്ടില്ലന്നേയുള്ളു.”

ഡിഫൻസ് പ്രോസിക്യൂട്ടർ ശക്തമായി എതിർത്തു.

‘‘ശുദ്ധകളവാണ്. കാട്ടുനായുടെ കോമ്പല്ലിന് ബ്ലെയിഡിനെക്കാളും മൂർച്ചയുണ്ട്. കാട്ടുനായയെപ്പറ്റി കാൽനൂറ്റാണ്ടിലേറെ പഠനം നടത്തുന്ന വില്യം ഹാരീസ് ‘ദി വൈൽഡ്‌ ലൈഫ്’ മാസികയിൽ പ്രസിദ്ധീകരിച്ച ജേർണൽ കോടതിക്ക് മുന്നിൽ ഹാജരാക്കിയിരുന്നു. സംഭവദിവസം രാത്രി ഒരു കുട്ടിയുടെ കരച്ചിൽ കേട്ടെന്ന് ജാക്കറ്റ് കിട്ടിയ സ്ഥലത്തിനടുത്തുള്ള ആശുപത്രിയിലെ നഴ്സ് പറഞ്ഞിട്ടുണ്ട്. അലഞ്ഞു തിരിയുന്ന ധാരാളം  കാട്ടുനായ്‌ക്കളുള്ള സ്ഥലമാണ്‌ അയേഴ്സ് പാറ. ഫോറൻസിക്കിൽ പല കാരണങ്ങൾ കൊണ്ട് തെറ്റുപറ്റാം. പിന്നെ പബ്ലിക് പ്രോസിക്യൂട്ടർ ഏത്‌ ഡിക്ഷണറിയാണ് ഫോളോ ചെയ്യുന്നത്? അസാരിയ എന്നാൽ പിശാചിന്റെ സന്തതിയല്ല, ദൈവത്തിന്റെ മകളെന്നാണ്. മൃതദേഹമോ മൃതദേഹ അവശിഷ്ടമോ കണ്ടെത്താൻ കഴിയാത്ത സ്ഥിതിക്ക് കുറ്റവാളികളെ നിർണ്ണയിക്കാനാവില്ല. അലക്സിയെയും അമോസിനെയും നിരുപാധികം  വിട്ടയക്കണം.”

പത്തുമണിയോടെ ജഡ്ജി ചേംബറിലെത്തി വിധിന്യായം വായിച്ചു. അപൂർവങ്ങളിൽ അപൂവ്വമായ കേസിൽ ശാസ്ത്രീയമായ തെളിവുകളാണ് കോടതി കണക്കിലെടുത്തത് എന്നോർമ്മിപ്പിച്ചു. മകളെ കൊലപ്പെടുത്തിയ അലക്സിക്ക് ജീവപര്യന്തവും കുറ്റവാളിക്ക് എല്ലാ സഹായവും ചെയ്ത അമോസിന് പതിനെട്ടുമാസത്തെ തടവും കോടതി വിധിച്ചു. എന്നാൽ അമോസ് ജയിൽശിക്ഷ അനുഭവിക്കേണ്ടതില്ല. ഈ കാലയളവിൽ മറ്റ് ഏതെങ്കിലും കുറ്റകൃത്യത്തിൽ ഏർപ്പെട്ടാൽ നല്ലനടപ്പ് റദ്ദാക്കപ്പെടുകയും ജയിലിൽ അടക്കപ്പെടുകയും ചെയ്യും. മൂന്നു വർഷങ്ങൾക്കിപ്പുറം ആലീസ് സ്പ്രിങ്ങിലെ ടൗൺ പൊലീസ് സ്റ്റേഷനിലേക്ക് ഒരർജന്റ് മെസ്സേജെത്തി. ബ്രിട്ടിഷ് യാത്രികനായ പോൾനിക്സനെ ഒരാഴ്ചയായി കാണാനില്ല. അയേഴ്സ് പാറ കയറാൻ പോയതായി വിവരം കിട്ടിയിട്ടുണ്ട്. അന്വേഷണം എത്രയും പെട്ടെന്ന് തുടങ്ങണം. ഹെൻറി ഏതാനും പൊലീസുകാർക്കൊപ്പം അയേഴ്സ് പാറയിലേക്ക്‌ യാത്ര തിരിച്ചു. ചുവന്നപാറയുടെ വിചിത്രാകൃതിയും കുത്തനെയുള്ള കയറ്റിറക്കങ്ങളും ജോലി ശ്രമകരമാക്കി.

“നല്ല വഴുക്കലുണ്ട്, ബ്രിട്ടീഷുകാരന്റെ പൊടിപോലും കിട്ടാൻ സാധ്യതയില്ല. നിറയെ നായ്‌ മടകളാണ്. കാട്ടുനായ്ക്കൾ വല്ല എല്ലോ മുട്ടമോ അവശേഷിപ്പിച്ചാൽ തന്നെ ഭാഗ്യം.” ഹെൻറി ഒപ്പമുള്ള പൊലീസുകാരോട് പറഞ്ഞു. തിരച്ചിൽ മണിക്കൂറുകൾ നീണ്ടു. മടങ്ങാൻ നേരം കുത്തനെയുള്ള പാറയിടുക്കിൽ തുണിക്കഷണം പോലെ എന്തോ ഒന്ന് കറുത്തുചുരുണ്ടുകിടക്കുന്നത് ഹെൻറിയുടെ ശ്രദ്ധയിൽ പെട്ടു. അതെടുക്കാൻ പൊലീസുകാർ ചങ്ങല പോലെ കൈകൾ കൊരുത്തു സഹായിച്ചു. അതൊരു ഓവർക്കോട്ടായിരുന്നു. അതിന്റെ ഹുക്കിൽ കുരുങ്ങിയിരുന്ന ഏതാനും മുടിനാരുകൾ ഇൻസ്പെക്ടർ വലിച്ചെടുത്തു. എന്നിട്ടാ ഓവർക്കോട്ട് മെല്ലെ കാറ്റിനഭിമുഖമായി നിവർത്തി.

ഡിൻഗോയുടെ കോമ്പല്ലുകൾ തുളയിട്ട ഒരു കുഞ്ഞു വസ്ത്രം! അന്തരീക്ഷത്തിൽ വിതുമ്പൽ തീർത്തത് ഉലഞ്ഞു പാറി.

എന്റെ മകൾ ഒരു കറുത്ത ഒാവർക്കോട്ട് ധരിച്ചിരുന്നു. അലക്സിയുടെ വാക്കുകൾ ഭൂതകാലത്തിൽ നിന്നുയർന്ന് ഇടിമുഴക്കം പോലെ ഹെൻറിയുടെ ശിരസ്സ് പിളർത്തി.

(*1980ൽ ഓസ്ട്രേലിയയിലെ വടക്കൻ പ്രവിശ്യയിൽ നടന്ന സംഭവത്തിന്റെ സ്വതന്ത്രാവിഷ്കാരം)

Content Summary: Dingo, Malayalam short story written by Madhu Thripperunthura