ഗായകൻ സിദ്ധാർഥ് മേനോന്റെ വിവാഹ ചിത്രങ്ങൾ വൈറൽ

ഗായകനും അഭിനേതാവുമായ സിദ്ധാർഥ് മേനോന്റെ വിവാഹ ചിത്രങ്ങള്‍ വൈറലാകുന്നു. അടുത്ത സുഹൃത്തും മറാഠി നടിയും നർത്തകിയുമായ തന്‍വി പാലവിനെയാണ് സിദ്ധാർഥ് ജീവിതസഖിയാക്കിയത്. ഇരുവരുടെയും വിവാഹചിത്രങ്ങള്‍ ആരാധകർ ഏറ്റെടുത്തു കഴി‍ഞ്ഞു. 

തന്റെ വിവാഹക്കാര്യം താരം തന്നെയാണ് ആരാധകരെ അറിയിച്ചത്. നിരവധി പേർ സമൂഹമാധ്യമങ്ങളിലൂടെയും നേരിട്ടും വധു വരൻമാർക്ക് ആശംസകൾ നേർന്നിരുന്നു. ഉറ്റ സുഹൃത്തിനെ വിവാഹം കഴിക്കുകയാണെന്നും തന്റെ ജീവിതത്തിലെ ഏറ്റവും മികച്ച തീരുമാനമാണിതെന്നും പറഞ്ഞാണ് സിദ്ധാർഥ് തന്റെ വിവാഹക്കാര്യം ആരാധകരെ അറിയിച്ചത്. 

തൈക്കുടം ബ്രിഡ്ജ് എന്ന പ്രമുഖ സംഗീത ബാൻഡിലൂടെ ആരാധകർക്ക് സുപരിചിതനായ സിദ്ധാർഥ്, ഫഹദ് ചിത്രമായ നോർത്ത് 24 കാതം എന്ന ചിത്രത്തിലൂടെയാണ് പിന്നണി ഗാനരംഗത്ത് ചുവടു വച്ചത്. 

സംഗീത ആൽബങ്ങൾക്കു പുറമേ പിന്നണി ഗാനരംഗത്തും താരം സജീവമാണ്. വി.കെ.പ്രകാശ് സംവിധാനം ചെയ്ത റോക്ക് സ്റ്റാർ എന്ന ചിത്രത്തിലൂടെ അഭിനയത്തിലും ചുവടു വച്ച സിദ്ധാർഥ് പത്തോളം ചിത്രങ്ങളിൽ ചെറുതും വലുതുമായ വേഷങ്ങളിൽ അഭിനയിച്ചിട്ടുണ്ട്.