‘കേരളത്തിന്റെ ധൂർത്തിന് കേന്ദ്രത്തെ പഴിച്ചിട്ട് കാര്യമില്ല; സംസ്ഥാനത്ത് വലിയ ധനകാര്യ തകർച്ച’

ഇപ്പോഴത്തെ ദൗർഭാഗ്യകരമായ ധനകാര്യ പ്രതിസന്ധിക്ക് കാരണം കേന്ദ്ര നയങ്ങളാണെന്ന കുറ്റപ്പെടുത്തൽ വസ്തുതാപരമല്ല. ഒരു ഫെഡറൽ സംവിധാനത്തിൽ കേന്ദ്ര സർക്കാരിന്റെ മാനദണ്ഡങ്ങൾ പാലിക്കാൻ സംസ്ഥാനങ്ങൾക്ക് ഉത്തരവാദിത്തമുണ്ട്. ഈ പശ്ചാത്തലത്തിൽ വേണം ധനമന്ത്രി ബാലഗോപാലിന്റെ വാദങ്ങൾ പരിശോധിക്കാൻ. കേന്ദ്രത്തിൽ നിന്നുള്ള റവന്യു കമ്മി ഗ്രാന്റ്, മുൻ വർഷത്തേക്കാൾ 6017 കോടി രൂപ കുറഞ്ഞുവെന്നാണ് ധനമന്ത്രി പറയുന്നത്. ‌എന്നാൽ രൂക്ഷ ധന പ്രതിസന്ധി അഥവാ വലിയ  റവന്യു കമ്മിയുള്ള സംസ്ഥാനങ്ങൾക്കു മാത്രമാണ് ഈ ഗ്രാന്റ് നൽകാറുള്ളത്. റവന്യു ഗ്രാന്റ് കേന്ദ്ര നികുതി വിഹിതം വീതിച്ചു കൊടുക്കുന്നതുപോലെയുള്ള ഒരു കാര്യമല്ല.    പതിനഞ്ചാം ധനകാര്യ കമ്മിഷൻ ഏറ്റവും കൂടുതൽ റവന്യു കമ്മി ഗ്രാന്റ് അനുവദിച്ച ഒരു സംസ്ഥാനം കേരളമാണ്– 53,137 കോടിരൂപ. 

കിഫ്ബി വഴിയുള്ള കടം വാങ്ങലും സാമൂഹിക സുരക്ഷാ പെൻഷനു വേണ്ടിയുള്ള കടം വാങ്ങലും ബജറ്റിനു പുറത്താണു നടക്കുന്നതെങ്കിലും യഥാർഥത്തിൽ അവ ഉപയോഗിക്കുന്നത് ബജറ്റ് ആവശ്യങ്ങൾക്കാണെന്നാണ് സിഎജിയുടെ കണ്ടെത്തൽ. അതുകൊണ്ട് ഈ വായ്പകൾ സംസ്ഥാന സർക്കാരിന്റെ വായ്പയാണെന്ന് സിഎജി പറയുന്നതിൽ കാര്യമുണ്ട്. ഭരണഘടനാ സ്ഥാപനമായ സിഎജിയുടെ ഈ വിലയിരുത്തലിനെ എങ്ങനെ ചോദ്യം ചെയ്യാനാകും? നമ്മുടെ നികുതി പിരിവ് ജീർണതയിലേക്കു  പോയതിന്റെ  പ്രധാന കാരണങ്ങളിലൊന്ന് ജിഎസ്ടി നഷ്ടപരിഹാരത്തെ ആശ്രയിക്കുകയും നികുതി പിരിവ് മെച്ചപ്പെടുത്തുന്നതിൽ പരാജയപ്പെട്ടതുമാണ്. 

∙ അഞ്ചാം സംസ്ഥാന ധനകാര്യ കമ്മിഷൻ ശുപാ‍ശകൾ  നടപ്പിലാക്കിയില്ല

സംസ്ഥാന സർക്കാരിന്റെ വിഹിതം തദ്ദേശ ഭരണ സ്ഥാപനങ്ങൾക്ക് അനുവദിക്കുകയെന്നതാണ് സംസ്ഥാന ധനകാര്യ കമ്മിഷന്റെ ചുമതല. കേരളത്തിലെ ത്രിതല പഞ്ചായത്ത് സംവിധാനത്തിൽ 1200 തദ്ദേശ ഭരണ സ്ഥാപനങ്ങളുണ്ട്. അവരുടെ പ്രവർത്തനങ്ങളും പരിശോധിച്ച ശേഷം സംസ്ഥാനത്തിന്റെ നികുതി വരുമാനത്തിന്റെ 20 ശതമാനം ഈ സ്ഥാപനങ്ങൾക്കു നൽകണമെന്ന് ഞങ്ങൾ ശുപാർശ ചെയ്തു. ആ ശുപാർശകൾ ആദ്യത്തെ രണ്ടു വർഷം നടപ്പിലാക്കിയില്ല. മൂന്നാം വർഷം മുതൽ നടപ്പിലാക്കാൻ നടപടി തുടങ്ങിയെങ്കിലും മിക്ക ശുപാർശകളും നടപ്പിലാക്കിയില്ല. അതിന്റെ പ്രധാന കാരണം ശമ്പള, പെൻഷൻ പരിഷ്കരണം മൂലം പണമില്ലാതായതാണ്. 

പത്താം ശമ്പള, പെൻഷൻ പരിഷ്കരണം മൂലം ഒരുവർഷത്തെ അധിക സാമ്പത്തിക ബാധ്യത 7700 കോടിയാണെന്ന് ധനവകുപ്പ് കമ്മിഷനെ അറിയിച്ചു. 1200 തദ്ദേശ സ്ഥാപനങ്ങൾക്ക് അവയുടെ  വികസനം ആസ്തികളുടെ പരിപാലനം എന്നിവ നടത്താൻ പണില്ലാത്ത അവസ്ഥയുണ്ടായി. രണ്ടു ദശാബ്ദക്കാലമായി മാറ്റം വരുത്താത്ത തദ്ദേശ ഭരണ സ്ഥാപനങ്ങളുടെ നികുതി നിരക്കുകൾ, ഫീസുകൾ, വാടക എന്നിവ വർധിപ്പിക്കുന്നതിനുള്ള ശുപാർശയും സർക്കാർ നടപ്പിലാക്കിയില്ല. ഒരു ഭരണഘടനാസ്ഥാപനമായ ധനകാര്യ കമ്മിഷന്റെ ശുപാർശകൾ തള്ളി എങ്ങനെയാണ് പ്രാദേശിക സർക്കാരുകളുടെ ധനസ്ഥിതി മെച്ചമാക്കുന്നത്? കമ്മിഷന്റെ ശുപാർശകൾ നടപ്പിലാക്കിയിരുന്നുവെങ്കിൽ തദ്ദേശ ഭരണ സ്ഥാപനങ്ങളുടെ തനതു വരുമാനം ഗണ്യമായി വർധിക്കുമായിരുന്നു. വരുമാന സാധ്യതകൾ നശിപ്പിച്ചിട്ട് ധനസ്ഥിതി മെച്ചപ്പെടുത്താൻ കഴിയില്ലെന്നു നാം മനസ്സിലാക്കണം. അഞ്ചാം  ധനകാര്യ കമ്മിഷന്റെ  ശുപാർശകൾ നടപ്പിലാക്കാനുള്ള നടപടികൾ ഈ ബജറ്റിലുണ്ടാകണം.  

∙ ധനകാര്യ വകുപ്പ് ഉടച്ചു വാർക്കണം 

നമ്മുടെ ധനകാര്യ വകുപ്പിനെ ഉടച്ചു വാർക്കുകയെന്നത് വളരെ അത്യാവശ്യമാണ്. ഇന്ത്യൻ ഇക്കണോമിക്സ് സർവീസിലെ പരിശീലനം സിദ്ധിച്ച ഉദ്യോഗസ്ഥരാണ് കേന്ദ്ര സർക്കാരിലെ എല്ലാ വകുപ്പുകളിലും ധനകാര്യ ഉപദേഷ്ടാക്കളായി ഉള്ളത്. എന്നാൽ ക്ലാർക്കായി പ്രമോഷനിലൂടെയെത്തുന്ന ഉദ്യോഗസ്ഥരാണ് ധനവകുപ്പിന്റെ തലപ്പത്തുള്ളത്. അവർക്ക് ഈ വിഷയത്തിൽ വേണ്ടത്ര പ്രാഗൽഭ്യമില്ലാത്തത് ധനകാര്യ മാനേജ്മെന്റിന് പ്രതിസന്ധി സൃഷ്ടിക്കുന്നുണ്ട്. ധനകാര്യ സെക്രട്ടറിക്കു താഴെയുള്ള തസ്തികകളിൽ നിയമിക്കുന്നത് ഈ വിഷയത്തിൽ പ്രാഗൽഭ്യമുള്ള  ഒരു പ്രഫഷനൽ ടീമിനെയാകണം. ആ വിധത്തിൽ ധനകാര്യ വകുപ്പിനെ അഴിച്ചു പണിയണം.

∙ മടങ്ങിയെത്തിയ ഗൾഫ് മലയാളികളുടെ പ്രശ്നങ്ങൾ 

കോവിഡ് മഹാമാരിമൂലം 14 ലക്ഷത്തിലധികം മലയാളികൾ ഗൾഫ് രാജ്യങ്ങളിൽനിന്നു നാട്ടിലേക്കു തിരിച്ചെത്തിയതായി കണക്കാക്കുന്നു. ഇതിൽ വലയൊരു വിഭാഗം ആളുകൾക്ക് വീണ്ടും തിരിച്ചു പോകാൻ കഴിഞ്ഞിട്ടില്ല. അവർ പ്രവർത്തിച്ചിരുന്ന സ്ഥാപനങ്ങൾ അടച്ചു പൂട്ടിയതോ അവയിലെ ഉടമസ്ഥർ അവരെ തിരിച്ചു വിളിക്കാൻ തയാറാകാത്തതോ ആകാം കാരണം. ഇവർക്ക് ആനുകൂല്യം നൽകേണ്ടതുള്ളതുകൊണ്ട് ഒഴിവാക്കുന്ന പ്രവണതയാണ് ഉണ്ടായത്. അടുത്തകാലത്തു നടന്ന ഒരു പഠനം അനുസരിച്ച് ഇത്തരത്തിൽ മടങ്ങിവന്നതിൽ മൂന്നുലക്ഷത്തിൽ അധികം പേർ മടങ്ങിപ്പോകാൻ കഴിയാതെ നാട്ടിൽ തുടരുന്നു എന്നാണ്. ഇവരിൽ ഭൂരിഭാഗം പേർക്കും ജോലിയോ വരുമാനമോ ഇല്ല. ഗൾഫ് പണത്തെ പ്രധാനമായി ആശ്രയിച്ചിരുന്ന ഈ കുടുംബങ്ങൾ രൂക്ഷമായ സാമ്പത്തിക തകർച്ചയിലാണ്. ഇവരെ സഹാക്കാൻ വേണ്ട നടപടികൾ ഈ ബജറ്റിൽ പ്രഖ്യാപിക്കണം.  

∙ ഈ ബജറ്റിൽനിന്നു പ്രതീക്ഷിക്കുന്നത്...

എല്ലാ മേഖലകളിലും വൻ തകർച്ചയാണ് സംസ്ഥാനം നേരിടുന്നത്. അനാവശ്യമായ ശമ്പള, പെൻഷൻ വർധന, അനാവശ്യ ബ്യൂറോക്രസി വികസനം, പൊതുമേഖലാ സ്ഥാപനങ്ങളിലെ അനാവശ്യ ചെലവുകൾ നിയന്ത്രിക്കുക തുടങ്ങിയ ധനകാര്യ അച്ചടക്കങ്ങൾ സ്വീകരിക്കണം. തുടർച്ചയായി നഷ്ടത്തിലുള്ളതും മോശമായി പ്രവർത്തിക്കുന്നതുമായ പൊതുമേഖലാ സ്ഥാപനങ്ങളെ നിയന്ത്രിക്കണം. കാര്യക്ഷമമല്ലാത്ത പൊതുമേഖലാ സ്ഥാപനങ്ങളെ സർക്കാർ, സ്വകാര്യ പങ്കാളിത്തത്തോടെ ഉടച്ചു വാർക്കണം. സർക്കാർ ഫണ്ടിൽനിന്ന് പണം കൊടുത്ത് അനാവശ്യ സ്ഥാപനങ്ങളും തസ്തികകളും സൃഷ്ടിക്കുന്ന പ്രവണത അവസാനിപ്പിക്കണം. തദ്ദേശ ഭരണ സ്ഥാപനങ്ങൾക്കു കൂടുതൽ പങ്കാളിത്തം നൽകണം. 

കേരള ഫിസ്കൽ റെസ്പോൺസിബിലിറ്റി ആക്ടിന്റെ മാനദണ്ഡങ്ങൾ അനുസരിച്ചുള്ള റവന്യു കമ്മി, ധനകമ്മി, ജിഎസ്ഡിപി അനുപാതം എന്നിവ നേടാൻ വേണ്ട നടപടികൾ സ്വീകരിക്കേണ്ടതുണ്ട്. നിത്യ നിദാന ചെലവുകൾക്കു കടം വാങ്ങുന്ന സ്ഥിതിക്കു മാറ്റം വരുത്തുകയും വേണം. ബജറ്റിനു പുറമെയുള്ള കടമെടുപ്പ്, മറ്റു കടമെടുപ്പുകൾ എന്നിവയിൽ സിഎജിയുടെ നിർദേശങ്ങൾ പാലിക്കണം. റവന്യു വരുമാനം വർധിപ്പിക്കാൻ വേണ്ട നടപടികൾ സ്വീകരിക്കണം. തദ്ദേശ സ്ഥാപനങ്ങളുടെ വരുമാനം, നികുതി, നികുതിയേതര വരുമാനങ്ങൾ, ഫീസുകൾ, വാടക ഇനത്തിലുള്ള വരുമാനം എന്നിവ വർധിപ്പിക്കാൻ നടപടി സ്വീകരിക്കണം. ധനധൂർത്ത് സ്വഭാവത്തിലുള്ള ചെലവുകൾ നിയന്ത്രിക്കണം. അനാവശ്യ ബ്യൂറോക്രസി, വകുപ്പ്, സ്ഥാപനങ്ങൾ എന്നിവ പുതുതായി തുടങ്ങരുത്. ശമ്പള, പെൻഷൻ വർധന ഇനിയെങ്കിലും പത്തു വർഷത്തിലൊരിക്കലേ പരിഷ്കരിക്കാവൂ. 

പുറം കരാറുകൾ നൽകാവുന്ന പല കാര്യങ്ങളും അങ്ങനെ ചെയ്യണം. സ്വകാര്യ എയ്ഡഡ് വിദ്യാഭ്യാസ സ്ഥാപനങ്ങളിൽനിന്ന് കൂടുതൽ വരുമാനമുണ്ടാക്കാനുള്ള നടപടികൾ സ്വീകരിക്കണം. ആഡംബര വാഹനങ്ങൾ വാങ്ങൽ, വാഹന ദുരുപയോഗം എന്നിവ കർശനമായി നിരോധിക്കണം. 2016ലെ ധവളപത്രത്തിൽ ചൂണ്ടിക്കാട്ടിയുള്ള പ്രശ്നങ്ങൾക്ക് പരിഹാരം ഉണ്ടാക്കണം. വ്യാപകമായ താൽക്കാലിക നിയമനങ്ങൾ നിയമാനുസൃതമാക്കണം. പരിസ്ഥിതിയോടു നീതി പുലർത്തുന്ന വികസന സമീപനങ്ങളും നമുക്കു വേണം. മറ്റു രാജ്യങ്ങളിലേക്കുള്ള യുവാക്കളുടെ കുടിയേറ്റം പ്രോത്സാഹിപ്പിക്കണം. അതിനുള്ള സാഹചര്യങ്ങൾ ഒരുക്കണം. ഏറ്റവും പ്രധാനം റവന്യു കമ്മി കുറയ്ക്കുകാണ്. കമ്മി നികത്താനായുള്ള ഭീമമായ കടമെടുപ്പ് ഒഴിവാക്കാൻ ഇതിലൂടെ സാധിക്കും. പെട്ടെന്നു നടപ്പിലാക്കാവുന്ന കാര്യമല്ല ഇത്. എന്നാൽ അതിലേക്കുള്ള വഴിവെട്ടിത്തെളിക്കാനുള്ള ധീരമായ നടപടികളും ഇച്ഛാ ശക്തിയും ധനമന്ത്രിയിൽ നിന്നുണ്ടായേ തീരൂ. ഇന്നത്തെ രാഷ്ട്രീയ സാഹചര്യത്തിൽ അതിന് പ്രായോഗിക പരിമിതികൾ ഏറെയുണ്ട്. എന്നാൽ സംസ്ഥാനത്തിന്റെ ധനകാര്യ മാനേജ്മെന്റ് ശക്തിപ്പെടുത്തുന്നതിനു മറ്റു കുറുക്കുവഴികളില്ലെന്ന തിരിച്ചറിവ് ധനമന്ത്രിക്കും അദ്ദേഹത്തോടൊപ്പം നിൽക്കുന്നവർക്കും ഉണ്ടാകണം. 

English Summary: Budget Debate: Dr. B.A. Prakash Analyze Kerala Economy and the Challenges it Faces