യുപിയിലും അദാനിക്ക് തിരിച്ചടി, പേടി മാറാതെ വിപണി; ബലൂൺ പോലെ പൊട്ടുമോ ചൈന– യുഎസ് ബന്ധം?

∙ പാക്കിസ്ഥാനിലെ പ്രതിസന്ധി

പാക്കിസ്ഥാന്റെ സമ്പദ്‌വ്യവസ്ഥ കടുത്ത പ്രതിസന്ധി നേരിടുന്നതിനിടെ ഡിസംബറിലെ പണപ്പെരുപ്പം 48 വർഷത്തിനിടയിലെ ഏറ്റവും ഉയർന്ന നിലയിലെത്തി (27.55%). കഴിഞ്ഞയാഴ്ച പാക്ക് റിസർവ് ബാങ്ക് പലിശനിരക്കുയർത്തിയിരുന്നു. 24 വർഷത്തിനിടയിലെ ഏറ്റവും ഉയർന്ന തലത്തിലാണ് പലിശ നിരക്കുകൾ. രാജ്യത്തിന്റെ വിദേശനാണ്യ ശേഖരം വെറും 368 കോടി ഡോളറായി ചുരുങ്ങുകയും ചെയ്തു. ഇത് കഷ്ടിച്ച് ഒരു മാസത്തെ ഇറക്കുമതിച്ചെലവിനു മാത്രമേ തികയൂ. രാജ്യാന്തര നാണ്യനിധി (ഐഎംഎഫ്) വായ്പ പാക്കേജിനായി വയ്ക്കുന്ന നിർദേശങ്ങൾ കടുപ്പമാണെന്നും എന്നാൽ നിയന്ത്രിക്കാനാവുന്നതിനപ്പുറത്തെ പ്രതിസന്ധി നേരിടുന്ന സാഹചര്യത്തിൽ അംഗീകരിക്കുകയല്ലാതെ വഴിയില്ലെന്നും പാക്ക് പ്രധാനമന്ത്രി ഷഹബാസ് ഷെരീഫ് പറയുന്നു. സാമ്പത്തിക പ്രശ്നങ്ങളും ഭീകരവാദ വിഷയവും ചർച്ച ചെയ്യുന്നതിനായി ഫെബ്രുവരി ഏഴിന് സർവകക്ഷിയോഗം വിളിച്ചിരിക്കുകയാണ്. ഐഎംഎഫ് വ്യവസ്ഥകളും ചർച്ച ചെയ്തേക്കാം.

∙ പലിശ കൂട്ടലിന് അറുതിയാകുമോ?

പണപ്പെരുപ്പം കുറഞ്ഞുവരുന്ന സാഹചര്യത്തിൽ നടക്കുന്ന ആർബിഐ പണനയ സമിതി യോഗത്തിലേക്ക് പ്രതീക്ഷയോടെയാണ് വിപണി ഉറ്റുനോക്കുന്നത്. തിങ്കൾ മുതൽ നടക്കുന്ന യോഗം ബുധനാഴ്ച പുതിയ പലിശനിരക്കുകൾ പ്രഖ്യാപിക്കും. 2022 മേയിൽ 4 ശതമാനത്തിൽനിന്നു തുടങ്ങിയ പലിശനിരക്കു വർധന നിലവിൽ 6.25 ശതമാനത്തിലെത്തി നിൽക്കുന്നു. റീപ്പോ നിരക്കിൽ ഇത്തവണ 0.25% വർധനകൂടി വരുത്തുമെന്നാണ് പൊതുവെ പ്രതീക്ഷിക്കപ്പെടുന്നത്. തുടർന്നങ്ങോട്ട് തൽക്കാലം വർധനയുണ്ടാകില്ലെന്നു കരുതുന്ന സാമ്പത്തികവിദഗ്ധർ ഏറെയുണ്ട്. അതുകൊണ്ടുതന്നെ പലിശനിരക്കു വർധന പ്രഖ്യാപിച്ച ശേഷം ആർബിഐ ഗവർണർ ശക്തികാന്ത ദാസ് എന്തു പറയുന്നു എന്നതിലാകും വിപണിയുടെ ശ്രദ്ധ മുഴുവൻ. 

യുഎസ് ഫെഡറൽ റിസർവിന്റെ കഴിഞ്ഞയാഴ്ചത്തെ പലിശ വർധന പ്രതീക്ഷിച്ചതുപോലെ കാൽ ശതമാനത്തിലൊതുങ്ങി. പക്ഷേ യുഎസ് സമ്പദ്‍വ്യവസ്ഥയും തൊഴിൽമേഖലയും ശക്തമാകുന്നതിന്റെ സൂചനകൾ ലഭിച്ചതിനാൽ പലിശനിരക്കു വർധന തുടരുമെന്ന് ഏതാണ്ട് ഉറപ്പായിരിക്കുകയാണ്. യുഎസിലെ തൊഴിലില്ലായ്മ നിരക്ക് 53 വർഷത്തിനിടയിലെ ഏറ്റവും താഴ്ന്ന നിലയിലെത്തി (3.4%). നോൺ ഫാം പേ റോൾ പ്രകാരം പുതുതായി തൊഴിൽ ലഭിച്ചവരുടെ എണ്ണം 5.17 ലക്ഷം ആയി ഉയരുകയും ചെയ്തു. രണ്ടു കണക്കുകളും വിപണി പ്രതീക്ഷിച്ചിരുന്നതിലും ഏറെ മെച്ചപ്പെട്ടതാണ്. യുകെയിലും യൂറോ മേഖലയിലും കഴിഞ്ഞയാഴ്ച 0.5% പലിശ ഉയർത്തിയിരുന്നു. ഇതോടെ യുകെയിൽ പലിശ 4% ആയി. ഇത് 2008നുശേഷമുള്ള ഏറ്റവും ഉയർന്ന നിരക്കാണ്. പണപ്പെരുപ്പം ഇനി താഴേക്കു വന്നേക്കാമെങ്കിലും പണനയത്തിലെ നിലപാടു മാറ്റാൻ സമയമായിട്ടില്ലെന്നാണ് ബാങ്ക് ഓഫ് ഇംഗ്ലണ്ട് ഗവർണർ ആൻഡ്ര്യൂ ബെയ്‌ലി പറഞ്ഞത്.

∙ പ്രവർത്തന ഫലങ്ങളിൽ തിളക്കവും കോട്ടവും

മൂന്നാംപാദ പ്രവർത്തനഫലങ്ങളുടെ പ്രഖ്യാപനം അവസാനഘട്ടത്തിലെത്തുകയാണ്. ഒട്ടേറെ കമ്പനികൾ മികച്ച പ്രവർത്തനം കാഴ്ചവച്ചിട്ടുണ്ട്. കഴിഞ്ഞയാഴ്ച പുറത്തുവന്ന ഫലങ്ങളിൽ എസ്ബിഐ അതിന്റെ ചരിത്രത്തിലെ ഏറ്റവും മികച്ച പാദഫലമാണ് നേടിയത്. ബാങ്കിന്റെ അറ്റാദായം 68% വർധിച്ച് 14,205 കോടി രൂപയായപ്പോൾ പലിശവരുമാനം (നൽകിയ വായ്പകൾക്കു ലഭിച്ച പലിശയിൽനിന്ന് നിക്ഷേപങ്ങൾക്കു നൽകിയ പലിശ കിഴിച്ച ശേഷമുള്ള തുക) 24% വർധിച്ച് 38,068 കോടി രൂപയായി. ബാങ്ക് ഓഫ് ബറോഡയുടെ ലാഭം 75.4% വർധിച്ച് 3853 കോടി രൂപയായി. പലിശവരുമാനത്തിൽ 26.5% വർധനയുണ്ട്. എൽആൻഡ്ടിയുടെ ലാഭം 24.2% വർധിച്ച് 2553 കോടി രൂപയായപ്പോൾ ഐടിസിയുടെ അറ്റാദായം 21% കൂടി. 2021 ഡിസംബർ പാദത്തിൽ 1422.6 കോടി രൂപ നഷ്ടമായിരുന്ന ഇൻഡിഗോ (ഇന്റർഗ്ലോബ് ഏവിയേഷൻ) ഈ വർഷം മൂന്നാം പാദത്തിൽ 1583 കോടി രൂപ ലാഭം നേടി. 

ഗെയ്‌ലിന് 92 ശതമാനവും കോൾ ഇന്ത്യയ്ക്ക് 70 ശതമാനവും ലാഭ വർധനയുണ്ടായപ്പോൾ ബിപിസിഎലിന്റെ അറ്റാദായത്തിൽ 36% ഇടിവു നേരിട്ടു. ബജാജ് ഫിൻസെർവിന് 42% ലാഭവർധനയുണ്ട്. ടൈറ്റന്റെ ലാഭം 9.8 ശതമാനവും ജിൻഡാൽ സ്റ്റീൽ ആൻഡ് പവറിന്റേത് 68ശതമാനവും ഇടിഞ്ഞു. ടാറ്റ കൺസ്യൂമർ 32.7% ലാഭവർധന നേടിയപ്പോൾ ഡാബറിന്റെ ലാഭത്തിൽ 5.4% ഇടിവു നേരിട്ടു. ടാറ്റാ പവറിന് 121.8% ലാഭവർധന ലഭിച്ചു. ഇന്ത്യാ സിമന്റിന്റെ ലാഭം ഏഴിരട്ടിയിലേറെ വർധിച്ച് 133 കോടി രൂപയായി. സൺ ഫാർമയ്ക്ക് 5.2% ലാഭവർധനയുണ്ട്. ടാറ്റാ സ്റ്റീൽ അനലിസ്റ്റുകളുടെ കണക്കുകൂട്ടലുകൾ തെറ്റിച്ചുകൊണ്ട് 2224 കോടിരൂപ നഷ്ടം രേഖപ്പെടുത്തി. 2021 ഡിസംബർ പാദത്തിൽ 9572 കോടി രൂപ ലാഭമുണ്ടായിരുന്ന സ്ഥാനത്താണിത്. ലാഭം 88% ഇടിയുമെന്നായിരുന്നു അനലിസ്റ്റുകളുടെ കണക്കുകൂട്ടൽ. നഷ്ടം പ്രതീക്ഷിച്ചിരുന്നില്ല. ഈയാഴ്ച വരാനിരിക്കുന്ന ഫലങ്ങളിൽ ഭാരതി എയർടെൽ, ഹീറോ മോട്ടോകോർപ്, അദാനി പോർട്സ്, എൽഐസി, ലൂപിൻ, എം&എം, മുത്തൂറ്റ് ഫിനാൻസ് തുടങ്ങിയവ ഉൾപ്പെടും.

∙ മറ്റു സൂചനകൾ

∙ ജനുവരി 27ന് അവസാനിച്ച വാരത്തിൽ ഇന്ത്യയുടെ വിദേശനാണ്യ ശേഖരം 300 കോടി ഡോളർ വർധിച്ച് 57,676 കോടി ഡോളറായി. 7 മാസത്തിനിടയിലെ ഏറ്റവും ഉയർന്ന ശേഖരമാണിത്.

∙ ജിഎസ്ടി കൗൺസിൽ ഈ മാസം 18ന് യോഗം ചേരും.

∙ ഇന്ത്യയിലെ സേവനമേഖലയുടെ പിഎംഐ (പർച്ചേസിങ് മാനേജേഴ്സ് ഇൻഡക്സ്) ജനുവരിയിൽ 57.2 ആയി താഴ്ന്നു. ഡിസംബറിൽ ഇത് ആറു മാസത്തിനിടയിലെ ഏറ്റവും ഉയരത്തിലായിരുന്നു (58.5)

∙ ജനുവരിയിലെ ജിഎസ്ടി വരവ് 1.56 ലക്ഷം കോടി രൂപയായി ഉയർന്നു. ജിഎസ്ടി ഏർപ്പെടുത്തിയ ശേഷമുള്ള രണ്ടാമത്തെ ഏറ്റവും വലിയ പ്രതിമാസ നികുതിവരവാണിത്.

∙ മാന്ദ്യഭീതിക്ക് നേരിയ ആശ്വാസം പകർന്ന് 2022ലെ അവസാന പാദത്തിൽ യൂറോ മേഖലയിലെ ജിഡിപി നേരിയ വളർച്ച രേഖപ്പെടുത്തി. 0.1% തളർച്ചയായിരുന്നു സാമ്പത്തിക വിദഗ്ധർ പ്രതീക്ഷിച്ചിരുന്നത്. റഷ്യ– യുക്രെയ്ൻ യുദ്ധത്തെത്തുടർന്ന് കുതിച്ചുയർന്ന ഊർജവിലയിൽ വർഷാവസാനം കുറവു വന്നതാണ് ഈ മാറ്റത്തിനു കാരണമായി പറയുന്നത്. ശൈത്യകാലം ആശങ്കപ്പെട്ടതുപോലെ രൂക്ഷമായിരുന്നില്ല. സ്പെയിനും ഫ്രാൻസും വളർച്ച നേടിയപ്പോൾ ജർമനിയുടെ ഇറ്റലിയും തളർച്ചയാണ് രേഖപ്പെടുത്തിയത്. വരുമാനം കുറയുകയും പലിശനിരക്കുകൾ കൂടുകയും ചെയ്തതു മൂലം വളർച്ച പതുക്കെയാകാമെങ്കിലും മാന്ദ്യത്തിൽനിന്നു കരകയറുമെന്ന സൂചനയാണ് യൂറോ മേഖല തരുന്നത്.

∙എംഎസ്‌സിഐ എമേർജിങ് മാർക്കറ്റ്സ് ഇൻഡെക്സിൽ ചൈനയ്ക്കു തൊട്ടുപിന്നിൽ രണ്ടാം സ്ഥാനത്തുണ്ടായിരുന്ന ഇന്ത്യ അദാനി ഗ്രൂപ്പ് കമ്പനികളുടെ ഓഹരികളിലെ കനത്ത വിൽപനയെത്തുടർന്ന് മൂന്നാം സ്ഥാനത്തായി. തയ്‌വാനാണ് രണ്ടാം സ്ഥാനം. സൂചികയിൽ ചൈനയ്ക്ക് 31.2% വെയ്റ്റേജാണുള്ളത്. തയ്‌വാൻ 14.2 ശതമാനവും ഇന്ത്യ 13 ശതമാനവുമായി നിൽക്കുന്നു. കഴിഞ്ഞ ഓഗസ്റ്റിലാണ് ഇന്ത്യ തയ്‌വാനെ പിന്തള്ളി രണ്ടാം സ്ഥാനം കരസ്ഥമാക്കിയിരുന്നത്.

∙ ടെക്നിക്കൽ നിലവാരങ്ങൾ

ബജറ്റ് ദിനത്തിൽ 17,353നും 17,972നും ഇടയിലായിരുന്നു നിഫ്റ്റിയുടെ ചാഞ്ചാട്ടം. കഴിഞ്ഞയാഴ്ചയിലെ ഏറ്റവും താഴ്ന്ന നിലവാരവും ഉയർന്ന നിലയും ഇതുതന്നെ. വൻ ചാഞ്ചാട്ടത്തിനിടെ ഇൻട്രാഡേയിൽ 17,400നു ചുവടെ പോയെങ്കിലും ക്ലോസിങ്ങിൽ എല്ലാ ദിവസവും 17,400 നിലവാരത്തിനു മുകളിൽ നിൽക്കാൻ നിഫ്റ്റിക്കു കഴിഞ്ഞു. ഈയാഴ്ചയും 17,400 നിഫ്റ്റിയുടെ ശക്തമായ പിന്തുണമേഖലയായി തുടരും. എന്നാൽ 17,350നു ചുവടെയുള്ള ക്ലോസിങ് 16,800 വരെയുള്ള വീഴ്ചയ്ക്ക് വാതിൽ തുറന്നിട്ടേക്കാം. മുകളിലേക്ക് ആദ്യ കടമ്പ 17,800 തന്നെ. അതിനു മുകളിൽ 17870, 17,980, 18,000 തുടങ്ങിയ പ്രതിരോധമേഖലകള്‍ മറികടക്കണം. 18200–250 നിലവാരം ഭേദിക്കാനായാൽ ശക്തമായ റാലിക്കു സാധ്യത തുറക്കാമെന്ന് ടെക്നിക്കൽ അനലിസ്റ്റുകൾ വിലയിരുത്തുന്നു. ബാങ്ക് നിഫ്റ്റിക്ക് 41,800 നിലവാരം ഭേദിക്കാനായാൽ മുന്നേറ്റം പ്രതീക്ഷിക്കാം.

(ലേഖകന്റെ ഇമെയിൽ: sunilkumark@mm.co.in)

English Summary: Adani, RBI, Chinese Spy Balloon, Pak Economic Crisis... What to Expect in Indian and World Stock Markets this Week