ചൈനീസ് ചാരക്കപ്പൽ യുവാൻ വാങ്–5 ശ്രീലങ്കയിലേക്ക്; ഇന്ത്യയ്‌ക്ക് ഭീഷണി, എതിർപ്പ്

ന്യൂഡൽഹി ∙ ചൈനീസ് ചാരക്കപ്പൽ യുവാൻ വാങ്–5 ന്റെ ആഗമന ഉദ്ദേശ്യം ഇന്ത്യ ‘വിശദമായി’ ചോദിച്ചതോടെ, കപ്പലിന്റെ വരവു നീട്ടിവയ്ക്കാൻ ചൈനയോടു ശ്രീലങ്ക ആവശ്യപ്പെട്ടു. ഇന്ധനം നിറയ്ക്കാനെന്ന പേരിൽ ബുധനാഴ്ചയാണു കപ്പൽ ഹംബൻതോട്ട തുറമുഖത്തെത്തുമെന്ന് ആദ്യം അറിയിച്ചിരുന്നത്. ഓഗസ്റ്റ് 11ന് കപ്പലെത്തുമെന്നാണു ചൈനയുടെ പുതിയ നിലപാട്. തയാറെടുപ്പുകൾ പുരോഗമിക്കുന്നതിനിടെയാണ് ഇന്ത്യ സ്വരം കടുപ്പിച്ചത്.

ഉപഗ്രഹങ്ങളെ അടക്കം നിരീക്ഷിക്കാനും സിഗ്നലുകൾ പിടിച്ചെടുക്കാനും ശേഷിയുള്ള കപ്പൽ ഇന്ത്യൻ മഹാസമുദ്രത്തിന്റെ വടക്കുപടിഞ്ഞാറൻ മേഖലയിൽ നിരീക്ഷണത്തിനാണ് എത്തുന്നതെന്നു വിലയിരുത്തിയിരുന്നു. കൂടുതൽ ചർച്ചകൾക്കു ശേഷം കപ്പലിന്റെ വരവിൽ തീരുമാനമെടുക്കാമെന്നും അതുവരെ യാത്ര നീട്ടണമെന്നും ആവശ്യപ്പെട്ട് ശ്രീലങ്കൻ വിദേശകാര്യ മന്ത്രാലയം കൊളംബോയിലെ ചൈനീസ് എംബസിക്കു കത്തു നൽകി.

ശ്രീലങ്കയുടെ രാഷ്ട്രീയാന്തരീക്ഷം കലുഷിതമായിരിക്കെ അതിൽനിന്നു നേട്ടമുണ്ടാക്കാനാണു ചൈനയുടെ നീക്കം. വർഷങ്ങളായി ഇന്ത്യയിലെ സുരക്ഷാതന്ത്രജ്ഞർ ഭയന്നിരുന്നതാണ് ഇപ്പോൾ സംഭവിക്കുന്നത്. ഹംബൻതോട്ട വികസിപ്പിക്കുന്നവർക്ക് 99 വർഷത്തേക്കു തുറമുഖം പ്രവർത്തനത്തിനു നൽകാമെന്നായിരുന്നു ഓഫർ. കരാർ ലഭിച്ചതു ചൈനയ്ക്കാണ്. ചരക്കുകപ്പലുകൾക്കു മാത്രമാണു പ്രവർത്തനാനുമതി. സൈനിക കപ്പലുകൾക്ക് തുറമുഖത്ത് എത്തണമെങ്കിൽ ശ്രീലങ്കയുടെ അനുമതി ആവശ്യമാണ്.

പര്യവേക്ഷണക്കപ്പൽ അയയ്ക്കാൻ ചൈന സമ്മതം തേടുമ്പോൾ ഗോട്ടബയ രാജപക്സെയായിരുന്നു ശ്രീലങ്കയുടെ പ്രസിഡന്റ്. രാജപക്സെ അനുമതിയും നൽകി. ജനകീയ വിപ്ലവത്തെത്തുടർന്ന് ഗോട്ടബയ നാടുവിട്ടപ്പോൾ അധികാരത്തിലെത്തിയ റനിൽ വിക്രമസിംഗെ ഭരണകൂടമാണ് ഇപ്പോൾ വെട്ടിലായിരിക്കുന്നത്.