പഞ്ചായത്തുകൾക്ക് കേന്ദ്രം വക 240 കോടി

ന്യൂഡൽഹി ∙ കോവിഡ് പ്രതിരോധ പ്രവർത്തനങ്ങൾക്കായി കേരളത്തിലെ ത്രിതല പഞ്ചായത്തുകൾക്കു കേന്ദ്ര സർക്കാർ 240.6 കോടി രൂപ അനുവദിച്ചു. 25 സംസ്ഥാനങ്ങൾക്കായി മൊത്തം 8923.8 കോടിയാണ് അനുവദിച്ചത്.

  15–ാം ധന കമ്മിഷൻ ശുപാർശയനുസരിച്ചു തദ്ദേശസ്ഥാപനങ്ങൾക്കുള്ള തുക ജൂണിലാണു നൽകേണ്ടതെങ്കിലും കോവിഡ് പശ്ചാത്തലത്തിൽ നേരത്തേയാക്കി.

കേന്ദ്രം അനുവദിച്ച അരലക്ഷം മെട്രിക് ടൺ ഭക്ഷ്യധാന്യങ്ങൾ സംസ്ഥാന സർക്കാരിനു കൈമാറിയതായി കേന്ദ്രമന്ത്രി വി. മുരളീധരൻ അറിയിച്ചു.

ഈ മാസവും അടുത്ത മാസവുമായി 1.53 കോടി ആളുകൾക്കു വിതരണം ചെയ്യും. 1,26,488 മെട്രിക് ടൺ അരിയും 28,312 മെട്രിക് ടൺ ഗോതമ്പുമുണ്ട്.