നായകടി കൂടുന്നു: 2017ൽ 1.35 ലക്ഷം, ഈ വർഷം 1.96 ലക്ഷം കേസ്; പേവിഷ മരണം 21

ന്യൂഡൽഹി ∙ ഈ വർഷം സെപ്റ്റംബർ 16 വരെ കേരളത്തിൽ 21 പേർ പേവിഷബാധയേറ്റു മരിച്ചതായി ജസ്റ്റിസ് എസ്.സിരിജഗൻ സമിതി സുപ്രീം കോടതിയെ അറിയിച്ചു. ഇതിൽ 3 പേർ കുട്ടികളാണ്. 12 കേസുകൾ മാത്രമാണ് ലാബ് പരിശോധനയിൽ സ്ഥിരീകരിച്ചത്. ബാക്കിയുള്ളവ മറ്റു സാഹചര്യങ്ങൾ പരിശോധിച്ചാണു സ്ഥിരീകരിച്ചത്. 

മരിച്ചവരിൽ 6 പേർ പേവിഷബാധയ്ക്കെതിരെയുള്ള ആന്റി റേബീസ് സീറവും (ഇമ്യൂണോഗ്ലോബുലിൻ) ആന്റി റേബീസ് വാക്സീനും സ്വീകരിച്ചു. മറ്റുള്ളവർ നായകടി മൂലമുള്ള മുറിവ് അവഗണിച്ചെന്നും റിപ്പോർട്ടിലുണ്ട്. കേരളത്തിലെ തെരുവുനായ പ്രശ്നം സുപ്രീം കോടതി 28നു പരിഗണിക്കാനിരിക്കെയാണ് സമിതി റിപ്പോർട്ട് നൽകിയത്. 

റിപ്പോർട്ടിലെ മറ്റു വിവരങ്ങൾ

∙ നായകടി കൂടുന്നു 

കഴിഞ്ഞ 5 വർഷത്തിനിടെ സർക്കാർ ആശുപത്രികളിൽ റിപ്പോർട്ട് ചെയ്ത നായകടി കേസുകളിൽ വർധനയുണ്ട്. 2017 ൽ 1.35 ലക്ഷമായിരുന്നത് 2021 ൽ 2.21 ലക്ഷമായി. 2022 ഓഗസ്റ്റ് വരെ മാത്രം 1.96 ലക്ഷം കേസുകൾ. 

സംസ്ഥാനത്ത് ഏറ്റവുമധികം നായകടി കേസ് തിരുവനന്തപുരത്താണ് – 27,343. പാലക്കാട് (22,782), കൊല്ലം (21,692), തൃശൂർ (20,664) എന്നിവിടങ്ങളിലും കൂടുതലാണ്. ഏറ്റവും കുറവ് വയനാട് (6351), ഇടുക്കി (5494) എന്നിവിടങ്ങളിലാണ്.