ജയരാജനെതിരായ 'കൊലയാളി' പരാമര്‍ശം: കെ.കെ. രമയ്‌ക്കെതിരെ കേസെടുക്കും

കോഴിക്കോട്∙ ആര്‍എംപി നേതാവ് കെ.കെ. രമയ്‌ക്കെതിരെ കേസെടുക്കാന്‍ വടകര മജിസ്‌ട്രേറ്റ് കോടതി ഉത്തരവ്. പി. ജയരാജനെതിരായ 'കൊലയാളി' പരാമര്‍ശം നടത്തിയെന്നു ചൂണ്ടിക്കാട്ടി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ നല്‍കിയ പരാതിയുടെ അടിസ്ഥാനത്തിലാണ് കോടതി നടപടി. 

രമയ്‌ക്കെതിരെ കോടിയേരി ബാലകൃഷ്ണന്‍ കേന്ദ്രതിരഞ്ഞെടുപ്പു കമ്മിഷനും സംസ്ഥാനതിരഞ്ഞെടുപ്പ് ഓഫിസര്‍ക്കും പരാതി നല്‍കിയിരുന്നു. വടകരയിലെ എല്‍ഡിഎഫ് സ്ഥാനാര്‍ഥി പി.ജയരാജനെ കൊലയാളിയെന്ന് വിശേഷിപ്പിച്ചു വോട്ടര്‍മാര്‍ക്കിടയില്‍ തെറ്റിദ്ധാരണ പരത്താനും പൊതുജന മധ്യത്തില്‍ സ്ഥാനാര്‍ഥിയെ അപകീര്‍ത്തിപ്പെടുത്താനും ശ്രമിക്കുന്നുവെന്നാണു പരാതി.

ഗൂഢാലോചന ആരോപിച്ചു രണ്ടു കേസുകളില്‍ കെട്ടിച്ചമച്ച ആരോപണങ്ങളുടെ അടിസ്ഥാനത്തിലാണ് ജയരാജന്‍ പ്രതിയായത്. ഒരു കൊലപാതക കേസിലും ജയരാജനെ കുറ്റവാളിയെന്നു കോടതി ഇതുവരെ കണ്ടെത്തിയിട്ടില്ല. ഈ സാഹചര്യത്തില്‍ രമയ്‌ക്കെതിരെ മാതൃകാപരമായ നടപടി സ്വീകരിക്കണമന്നു കോടിയേരി ആവശ്യപ്പെട്ടു.