പിണറായി രഹസ്യ ഉടമ്പടികൾ നടപ്പാക്കുന്നു; ഇടതു തുടർഭരണം വലിയ അപകടം: രാജീവൻ

നമ്മുടെ ബുദ്ധിജീവികൾ നിലവിലുള്ള രാഷ്ട്രീയ സാഹചര്യത്തോട് എങ്ങനെ പ്രതികരിക്കുന്നു?

കേരളത്തിൽ സാമൂഹിക, സാംസ്കാരിക, സാഹിത്യ മേഖലയിൽ അങ്ങനെ വിശേഷിപ്പിക്കാൻ ആരുണ്ട്? ഒരു ആനന്ദിനെ മാത്രം പറയാം. ശാസ്ത്ര സാങ്കേതിക മേഖലയിൽ ബുദ്ധിജീവികൾ ഏറെയുണ്ട്. പക്ഷെ അവരെയാരും കണക്കിലെടുക്കാറില്ലെന്നുമാത്രം. അവർ കൃത്യമായി കാര്യങ്ങൾ പഠിക്കുന്നവരുമാണ്. നല്ല ഫിസിഷ്യനെ ബുദ്ധിജീവിയായി അംഗീകരിക്കാനാവാത്ത നമ്മൾ ഗവേഷണ പ്രബന്ധമെന്ന നോട്ടുപുസ്തകം തുന്നിക്കൂട്ടുന്നവരെ ബുദ്ധിജീവിയായി എഴുന്നള്ളിക്കും. ഇവിടെ ഇടതുഭരണത്തെ അനുകൂലിക്കുന്നവർ മറ്റുപല നേട്ടങ്ങളും മനസ്സിൽ കാണുന്നു.

കഴിഞ്ഞ 5 വർഷത്തെ ഭരണനേട്ടങ്ങളാണ് പിണറായി സർക്കാർ ഉയർത്തിക്കാട്ടുന്നത്. അതേക്കുറിച്ച് താങ്കളുടെ വിലയിരുത്തൽ?

കൊട്ടിഘോഷിക്കുന്ന ഈ നേട്ടങ്ങളൊന്നും ഞാൻ കേരളത്തിൽ കാണുന്നില്ല. അതേസമയം മുൻമുഖ്യമന്ത്രിമാരുടെ കാലത്തെല്ലാം അവരുടെ വ്യക്തിമുദ്ര പതിപ്പിച്ച നേട്ടങ്ങളുണ്ട്. അതേ മാതൃകയിൽ പിണറായിക്ക് എന്തു പറയാനുണ്ട്. പുതിയ സർവകലാശാലകളായിട്ടും, വിമാനത്താവളങ്ങളായിട്ടും, മെട്രോ റെയിലായിട്ടും ഇഎംഎസ്, കരുണാകരൻ, ഉമ്മൻചാണ്ടി, വി.എസ് തുടങ്ങിയവരുടെ കാലഘട്ടങ്ങളിലെല്ലാം അത്തരം നേട്ടങ്ങളുണ്ട്. പിണറായി കുറെ ഉദ്ഘാടനങ്ങൾ നടത്തി. പിന്നെ മാധ്യമങ്ങളിലൂടെ നടത്തിയ പരസ്യങ്ങളാണ്. ഇത്തരം തെറ്റിദ്ധരിപ്പിക്കലുകളാണ് ഈ തിരഞ്ഞെടുപ്പിൽ ഇടതുമുന്നണിയുടെ പ്രധാന ആയുധം. ഇത്രയേറെ പണം പരസ്യങ്ങൾക്ക് ചെലവഴിച്ച മറ്റൊരു സർക്കാരുണ്ടാവില്ല. 

അധികാരസ്ഥാനത്തിരിക്കുന്നവരുടെ കുടുംബവും അഴിമതി ആരോപണങ്ങളുടെ നിഴലിൽ വരുമ്പോൾ?

അതും ഫാഷിസത്തിന്റെ മറ്റൊരു മുഖമാണ്. ഫിലിപ്പീൻസിൽ ഭരണാധികാരി ജനങ്ങളെ അടക്കിഭരിച്ചപ്പോൾ അദ്ദേഹത്തിന്റെ ഭാര്യയും കുടുംബവും രാജ്യം കൊള്ളടിക്കുകയായിരുന്നു. ബാങ്കും മറ്റും കൊള്ളയടിച്ച സമ്പത്ത് അവർ അമേരിക്കയിൽ കൊണ്ടുപോയി നിക്ഷേപിക്കുകയായിരുന്നു. അന്ന് ഐ ഫോൺ ഇല്ലാതിരുന്നതിനാൽ അദ്ദേഹത്തിന്റെ ഭാര്യയ്ക്ക് അതു കിട്ടിയില്ല.

കേരളത്തിൽ ബിജെപിയുടെ വളർച്ചയെ എങ്ങനെ കാണുന്നു?

ഇ. ശ്രീധരൻ വന്നതു പോലെ നിരവധി പേർ ആ പാർട്ടിയിലേക്ക് വരാനിടയുണ്ട്. ഐടി, മെഡിക്കൽ മേഖലകളിൽ ബിജെപിക്ക് നല്ല സ്വാധീനമുണ്ട്. അതിനു കാരണം മോദിയുടെ ഇമേജ് ബ്രാൻഡിങ് തന്ത്രങ്ങളാണ്. സാംസ്കാരികമായും സാമ്പത്തികമായും ഇന്ത്യയെ ബ്രാൻഡ് ചെയ്യുന്ന തന്ത്രമാണത്. അംബാനി, ആദാനി വിഭാഗങ്ങളിലൂടെ ലോകത്തിന്റെ എല്ലാ മേഖലകളിലും ഇന്ത്യയുടെ സ്വാധീനമുറപ്പിച്ചു. ഇതിനിടയിൽ രാഹുൽഗാന്ധി ഓടിനടന്നിട്ടു കാര്യമില്ല. അദ്ദേഹത്തിന് കാര്യങ്ങൾ മനസിലാക്കാനായിട്ടില്ല. 

തുടർഭരണം കേരളത്തിന് അപകടമാണോ?

തുടർഭരണത്തിലുടെ വളരെ വലിയ അപകടമാണ് കേരളത്തെ കാത്തിരിക്കുന്നത്. അധികാരത്തിലെത്തുന്ന ഇടതുപക്ഷത്തിന്റെ പേരിൽ ഇവിടെ നടക്കാൻ പോകുന്നത് ബ്യൂറോക്രസിയുടെ ഭരണമായിരിക്കും. പരിചയസമ്പന്നരായ മന്ത്രിമാരുടെ വലിയൊരു പടയെ പിണറായി വിജയൻ കയ്യൊഴിഞ്ഞു. തുടർഭരണം കിട്ടിയാൽ സെക്രട്ടറിമാരും പിണറായി വിജയനും ചേർന്നായിരിക്കും ഭരണം നയിക്കുക. കെ.കെ.ശൈലജയെപ്പോലും മാറ്റാൻ നടത്തിയ ശ്രമമാണ് എ.കെ.ബാലന്റെ ഭാര്യയെ മത്സരിപ്പിക്കാൻ നടത്തിയ നീക്കത്തിലൂടെ കണ്ടത്. പക്ഷേ അതു വിജയിച്ചില്ല. ബംഗാൾ മാതൃകയിൽ ഉദ്യോഗസ്ഥഭരണത്തിലൂടെ കേരളം നശിക്കാനാണ് സാധ്യത.

കിറ്റ് വിതരണമാണല്ലോ കേരളത്തിലെ സജീവചർച്ച?

മറ്റു സംസ്ഥാനങ്ങളിൽ പണ്ട് അരിയും പലവ്യഞ്ജനങ്ങളും ടെലിവിഷനും സാരിയും വിതരണം ചെയ്ത്, അതുവഴി വോട്ടു നേടിയതിനെ പരിഹസിച്ചവരാണ് നമ്മൾ കേരളീയർ. ഇന്ന് നാം അതേ കിറ്റ് വാങ്ങി വോട്ടു ചെയ്യാൻ ക്യൂ നിൽക്കുകയാണെന്നോർക്കണം.  

പ്രകൃതിയും ഇടതുഭരണവും?

പ്രകൃതിയെ ചൂഷണം ചെയ്യുകയാണ് കമ്യൂണിസ്റ്റ് മുദ്രവാക്യം. പുഴയെയും മലകളെയും അവർ കൊള്ളടയടിക്കുകയാണ്. ജനവാസകേന്ദ്രങ്ങൾക്ക് 50 മീറ്റർ അടുത്തുവരെ ക്വാറികൾക്ക് അനുമതി നൽകാമെന്ന നിയമം നടപ്പാക്കാൻ ഇടതുമന്ത്രിസഭയ്ക്ക് ധൈര്യം വരുന്നത് അങ്ങനെയാണ്. പ്രകൃതിയുമായി സഹവർത്തിത്വം ഉണ്ടെങ്കിലേ മനുഷ്യന് നിലനിൽപ്പുള്ളൂവെന്ന് തിരിച്ചറിയാൻ ഇവർക്കാവില്ല. പശ്ചിമഘട്ടത്തിന്റെയും കടലിന്റെയും ചെറിയൊരു മാറ്റം മതി നമ്മുടെ ജീവിതം അവതാളത്തിലാക്കാൻ.

ആരോഗ്യ, വിദ്യാഭ്യാസമേഖലകളിലെ പുരോഗതി കണ്ടില്ലെന്ന് നടിക്കാനാകുമോ

രണ്ടു രംഗത്തും പുതിയ കെട്ടിങ്ങളും, ഉപകരണങ്ങളും വന്നിട്ടുണ്ട്. എന്നാൽ ഇതെല്ലാം കടം വാങ്ങി നിർമിച്ചവയാണെന്ന് ഓർക്കണം. പി.എം. താജിന്റെ ‘രാവുണ്ണി’ എന്ന നാടകത്തിലെ രാവുണ്ണിയാണ് യഥാർഥത്തിൽ മന്ത്രി തോമസ് ഐസക്ക്. കൂടുതൽ കടം വാങ്ങുമ്പോഴാണ് അയാൾക്ക് കൂടുതൽ സന്തോഷം കിട്ടുക. വീടിനു ചുറ്റും കക്കാൻ നിറയുമ്പോഴാണ് അയാൾക്ക് കൂടുതൽ ഹരം കിട്ടുക. രാവുണ്ണി ഫണ്ട് ആണ് ഇന്നത്തെ കിഫ്ബി. 

കേരളത്തിലെ പ്രതിപക്ഷം?

രമേശ് ചെന്നിത്തലയുടെ കഴിഞ്ഞ 5 വർഷത്തെ പ്രകടനമാണ് എടുത്തുപറയേണ്ടത്. എന്നാൽ അദ്ദേഹത്തിനൊപ്പം പാർട്ടിയുണ്ടായിരുന്നില്ല. ഏകാകിയായ പോരാളിയായിരുന്നു അദ്ദേഹം. കഴിഞ്ഞ 5 വർഷവും പ്രകൃതിസംരക്ഷണ രാഷ്ട്രീയത്തെക്കുറിച്ചു പറഞ്ഞതു പി.ടി.തോമസ് മാത്രവും. പ്രകൃതിസംരക്ഷണ രാഷ്ട്രീയമില്ലാതെ ഇനി നമുക്ക് മുന്നോട്ടു പോകാനാവില്ലെന്നതാണ് യാഥാർഥ്യം. 

English Summary: Interview with Writer TP Rajeevan