തോറ്റാലും ബംഗാള്‍ അധികാരി മമതതന്നെ; ‌ഇടതുവോട്ടിൽ ഇടിച്ചു കയറി ബിജെപിയും

വലിയ കാര്യങ്ങൾക്കു വേണ്ടി നടക്കുമ്പോൾ ചില ത്യാഗങ്ങൾ വേണ്ടി വരുമെന്നാണ് മമത ബാനർജി തന്റെ തോൽവിയെക്കുറിച്ചു പറഞ്ഞത്. നേതാവെങ്കിൽ മമതയെ പോലെ ആകണം. എതിരാളി കരുത്താർജിക്കുന്നതിനൊപ്പം സ്വന്തം കരുത്തു വർധിപ്പിക്കാനും ശത്രുവിനെ അതിന്റെ മടയിൽ ചെന്ന് ആക്രമിക്കാനും തയാറാവണം. പടയ്ക്കിടെ കൂറുമാറ്റം നടത്തിയ സുവേന്ദു അധികാരിയെ നേരിടാൻ സുരക്ഷിതമായ ഭവാനിപ്പൂർ മണ്ഡലം വിട്ട് അകലെയുള്ള നന്ദിഗ്രാമിൽ ചെന്ന് മമത മത്സരിച്ചു. സുരക്ഷിതമായി രണ്ടാമതൊരു മണ്ഡലത്തിൽ കൂടി മത്സരിക്കുമെന്ന് കരുതിയവർക്കുപോലും തെറ്റി. കോൺഗ്രസിന് സാധിക്കാത്തത് തൃണമൂൽ കോൺഗ്രസിന് സാധിച്ചത് ഇന്ത്യൻ രാഷ്ട്രീയത്തിലെ ദിശാസൂചകമാണ്. 294 അംഗ സഭയിൽ 200നു മുകളിൽ സീറ്റുനേടി ഭദ്രമായ അവസ്ഥയിലാണ് തൃണമൂൽ കോൺഗ്രസ് തിരിച്ചെത്തിയത്. ബിജെപിയെ നേർക്കുനേർ നേരിടാൻ മമതയ്ക്ക് ഇനിയും സാധിക്കും എന്ന വിശ്വാസമാണ് ഇവിടെ അരക്കിട്ടുറപ്പിക്കുന്നത്.

ജന്മനാലേ പോരാളി എന്നത് മമത ബാനർജിക്കുള്ള ഒരു വിശേഷണം മാത്രം. എപ്പോഴും യുദ്ധസന്നദ്ധയാണവർ. ഒപ്പം ഉഴവുകാളയെപ്പോലെ അധ്വാനിക്കുകയും ശത്രുവിനെ ചവിട്ടേറ്റ പാമ്പിനെപ്പോലെ ആക്രമിക്കുകയും ചെയ്യും. മന്ത്രിയും മമതയുടെ വിശ്വസ്തനുമായ സുവേന്ദുവിനെ പാർട്ടിയിൽ എത്തിച്ചുകൊണ്ടാണ് ബിജെപി ബംഗാളിൽ കളി തുടങ്ങിവച്ചത്. നന്ദിഗ്രാമിലെ കിരീടം വയ്ക്കാത്ത നേതാവായിരുന്നു സുവേന്ദുവും അദ്ദേഹത്തിന്റെ പിതാവും.

മമത എത്തിയതോടെ സംസ്ഥാനം കണ്ട കടുത്ത മത്സരമായിരുന്നു നന്ദിഗ്രാമിൽ നടന്നത്. മാർച്ച് 10ന് വോട്ടെടുപ്പു ദിവസം മമത ബാനർജിക്ക് പരുക്കേറ്റിരുന്നു. തുടർന്ന് വീൽചെയറിലാണ് പ്രചാരണം നടത്തിയത്. സിപിഎമ്മിനു വേണ്ടി ഡിവൈഎഫ്ഐ സംസ്ഥാന പ്രസിഡന്റ് മീനാക്ഷി മുഖർജിയും വന്നതോടെയാണ് മമതയുടെ നില പരുങ്ങലിലായത്.നന്ദിഗ്രാമിൽ 2007-08 കാലത്ത് പീഡനങ്ങളിൽനിന്ന് മമതയുടെ ആളായിനിന്ന് നാട്ടുകാരെ രക്ഷിച്ചയാളാണ് സുവേന്ദു അധികാരി. അതിനാൽ ശക്തമായ ജനപിന്തുണയുമുണ്ടായിരുന്നു. മമതയോ സുവേന്ദുവോ (ഭൂമി കന്യയോ ഭൂമി പുത്രനോ?) എന്ന തിരഞ്ഞെടുപ്പ് നടത്തേണ്ടി വന്നപ്പോൾ നാട്ടുകാർ സുവേന്ദുവിനൊപ്പം നിന്നു.

മുദ്രാവാക്യങ്ങൾ ഏശിയില്ല

ദീദി കൊള്ളാം പക്ഷേ പാർട്ടിക്കാരോ? ഇത്തവണ തിരഞ്ഞെടുപ്പിൽ ഈ ചോദ്യം ഉന്നയിച്ചത് ബിജെപി ആയിരുന്നു. തൃണമൂലിന്റെ ജനാപത്യവിരുദ്ധ നയങ്ങളാണ് ബിജെപി പ്രചാരണവേളയിൽ ഉയർത്തിക്കാട്ടിയത്. തൃണമൂലിനെ നേരിടാൻ കഴിയാത്ത ഇടതുപക്ഷക്കാരാണ് ബിജെപിക്ക് പല തിരഞ്ഞെടുപ്പിലും വോട്ടു ചെയ്തിരുന്നത്. അതിനാൽ അക്കാര്യം ഏശുമെന്ന് ബിജെപി കരുതി. പക്ഷേ അതുണ്ടായില്ല. അതേസമയം, നിരവധി വെൽഫയർ പദ്ധതികളാണ് മമത പ്രചാരണത്തിൽ മുഖ്യവിഷയമാക്കിയത്.

രണ്ടു രൂപയ്ക്ക് അരി ഉൾപ്പെടെ 70 പദ്ധതികൾ നടപ്പാക്കി. എന്നാൽ താഴെത്തട്ടിൽ ‘കട്ട്’ വ്യാപകം എന്ന ആരോപണവും ഉയർന്നിരുന്നു. കട്ട് മണി ആയിരുന്നു തൃണമൂലിന് എതിരായ ബിജെപിയുടെ മറ്റൊരു മുദ്രാവാക്യം. ഇതിനു പുറമെയാണ് തൃണമൂലിൽനിന്നുള്ള കൂറുമാറ്റം പരീക്ഷിച്ചത്. തൃണമൂൽ നേതാക്കളായ മുകുൾ റോയ്, അർജുൻ സിങ്, നിതിഷ് പ്രമാണിക്, ലോക്കറ്റ് ചാറ്റർജി എന്നിവർ 2019ൽ ബിജെപിയിലെത്തി. ഇത്തവണ സുവേന്ദു, രജിബ് ബാനർജി എന്നിവരടക്കം 30 തൃണമൂൽ എംഎൽഎമാർ ബിജെപിയിലെത്തി. മിക്കവർക്കും സീറ്റു കിട്ടി. വലിയ ജനകീയ സമരങ്ങളൊന്നും നടത്താതെയാണ് ബിജെപി നേട്ടമുണ്ടാക്കിയത്.

ബിജെപി വന്നു, ലക്ഷ്യം നേടിയില്ല

തൃണമൂലിനുവേണ്ടി തിരഞ്ഞെടുപ്പു തന്ത്രങ്ങൾ ഒരുക്കിയ പ്രശാന്ത് കിഷോർ തുടക്കത്തിലേ ഒരു കാര്യം പറഞ്ഞിരുന്നു: ബിജെപി 100 സീറ്റു കടന്നാൽ ഈ ജോലി ഞാൻ അവസാനിപ്പിക്കും എന്ന്. 100 സീറ്റിനു താഴെ ബിജെപിയുടെ വെല്ലുവിളി അവസാനിച്ചു. ബംഗാളിൽ ബിജെപി 2014 വരെ ‘ചെറിയ കളിക്കാരൻ’ മാത്രമായിരുന്നു. 1998, 1999, 2004 ലോക്സഭാ തിരഞ്ഞെടുപ്പിൽ തൃണമൂലിന്റെ സഖ്യകക്ഷിയുമായിരുന്നു അവർ. എന്നാൽ 2001ലും 2006ലും നിയമസഭാ തിരഞ്ഞെടുപ്പിൽ ബിജെപിയെ ഒഴിവാക്കി മമത കോൺഗ്രസിനെയാണ് സഖ്യകക്ഷിയാക്കിയത്. അത്ര പ്രാധാന്യമേ അവർക്ക് ഉണ്ടായിരുന്നുള്ളൂ, 2011ൽ ഇടതുമുന്നണിയെ പുറത്താക്കിയ തിരഞ്ഞെടുപ്പിലും കോൺഗ്രസായിരുന്നു മമതയ്ക്ക് തുണ. അത്തവണ 4.1ശതമാനം വോട്ടുമാത്രം കിട്ടിയ പാർട്ടിയായിരുന്നു ബിജെപി.

മോദി തരംഗം ദൃശ്യമായ 2014ൽ 17ശതമാനം വോട്ടും രണ്ടു സീറ്റും ആരുടേയും പിന്തുണയില്ലാതെ നേടി ബിജെപി എല്ലാവരേയും ഞെട്ടിച്ചു. 2011ലും 14ലും തൃണമൂലും കോൺഗ്രസും വോട്ടുശതമാനം നിലനിർത്തി. അപ്പോൾ ഒരു കാര്യം വ്യക്തമായി. ഇടതുമുന്നണിയുടെ വോട്ടുകളിലേക്കാണ് ബിജെപി കടന്നുകയറിയത്. വോട്ടുതിരിച്ചുപിടിക്കാനുള്ള പദ്ധതിയൊന്നുമില്ലാതെ ഇടതുസഖ്യം നിസ്സംഗത തുടർന്നതോടെയാണ് ബിജെപി പടർന്നുകയറിയത്.
അധികാരം പിടിക്കുന്ന കാര്യത്തിൽ ധാർമിക ആശങ്കകൾ ഒന്നുമില്ലായിരുന്നെങ്കിലും ഇത്തവണ ബംഗാളിൽ ബിജെപിക്ക് അടിതെറ്റി. കഴിഞ്ഞ ലോക്സഭാ തിരഞ്ഞെടുപ്പിലെ പ്രകടനം അനുസരിച്ചാണെങ്കിൽ 126 സീറ്റുകളാണ് ബിജെപിക്ക് കിട്ടേണ്ടത്. എന്നാൽ അതു നൂറിൽ താഴെ ഒതുങ്ങി.

വർഗീയതയും കളത്തിൽ

1957 മുതൽ തിരഞ്ഞെടുപ്പുകൾ കണ്ടിട്ടുള്ള താൻ ഇത്രയും വർഗീയവൽക്കരിക്കപ്പെട്ട തിരഞ്ഞെടുപ്പ് കണ്ടിട്ടില്ല എന്നാണ് പ്രചാരണത്തിനിടെ സിപിഎം പൊളിറ്റ്ബ്യൂറോ അംഗം ബിപൻ ബസു സമൂഹ മാധ്യമത്തിൽ കുറിപ്പിട്ടത്. ബിജെപി നടത്തിയ പ്രചാരണത്തെ മുൻനിർത്തിയാണ് മുതിർന്ന നേതാവ് ഇങ്ങനെ അഭിപ്രായപ്പെട്ടത്. ഇന്ത്യൻ സെക്യുലർ ഫ്രണ്ട് എന്ന പുതിയ പാർട്ടിയെ മുന്നണിയിൽ ഉൾപ്പെടുത്തി സിപിഎമ്മും മതരാഷ്ട്രീയത്തെ പുൽകാൻ തയാറായി. എന്നാൽ ബംഗാൾ ജനത അതെല്ലാം തള്ളി. 199 സീറ്റു നേടി ഭരണം നടത്തിയിരുന്ന മമത ഇത്തവണ നില മെച്ചപ്പെടുത്തി.

സ്വാതന്ത്ര്യാനന്തരം രാജ്യം കണ്ട ഭീകരമായ വർഗീയലഹളകളിൽ പലതും ബംഗാളിനെ നടക്കിയിട്ടുണ്ട്. എന്നാൽ ക്രമേണ വർഗീയ രാഷ്ട്രീയത്തോട് അകലം പാലിക്കുകയാണ് ബംഗാൾ ചെയ്തത്. സംസ്ഥാനത്ത് ശക്തിപ്രാപിച്ചുവന്ന ഇടതുരാഷ്ട്രീയം ആണ് വർഗീയതയെ തടഞ്ഞുനിർത്തുന്നതിൽ പ്രധാനപങ്കുവഹിച്ചത്. എഴുപതുകളുടെ തുടക്കത്തിലെ കിഴക്കൻ ബംഗാളിൽനിന്നുള്ള അഭയാർഥി പ്രവാഹമായിരുന്നു മറ്റൊന്ന്.

ജീവൻ രക്ഷിക്കാനും ജീവിതം കരുപ്പിടിപ്പിക്കാനുമായി എത്തിയ ലക്ഷക്കണക്കിന് ജനങ്ങളുടെ പ്രശ്നങ്ങൾ ഏറ്റെടുക്കാനും അവരെ സഹായിക്കാനും പുരോഗമന പ്രസ്ഥാനങ്ങൾ തയാറായി. ഇങ്ങനെ മാനുഷിക മുഖമുള്ള രാഷ്ട്രീയത്തെ സാമുദായികവൽക്കരിക്കാൻ ഇത്തവണത്തെ പ്രചാരണത്തിൽ ബോധപൂർവമായ ശ്രമമുണ്ടായി. സംസ്ഥാനത്തെ 28 ശതമാനം വരുന്ന മുസ്‌ലിം വോട്ടർമാർ പരമ്പരാഗതമായി സിപിഎമ്മിനേയും തുടർന്ന് മമതയേയും ആണ് തുണച്ചിരുന്നത്. 75 സീറ്റുകളിൽ നിർണായകമാണ് മുസ്​ലിം വോട്ട്. ഇന്ത്യൻ സെക്യുലർ ഫ്രണ്ടിന്റെ സാന്നിധ്യം മമതയ്ക്ക് ദോഷമാകുമെന്നു കരുതിയെങ്കിലും അതുണ്ടായില്ല.

ഇടതുക്ഷീണം ബിജെപിക്ക് നേട്ടം

2016 നിയമസഭാ തിരഞ്ഞെടുപ്പിൽ കോൺഗ്രസ് സഖ്യത്തോടെ ഇടതുമുന്നണിയും മറുവശത്ത് ഒറ്റയ്ക്ക് തൃണമൂലും ഏറ്റുമുട്ടി. ഇടതുസഖ്യം 39 ശതമാനവും മമത 45 ശതമാനവും നേടി. കോൺഗ്രസിന് 44 സീറ്റുകിട്ടിയപ്പോൾ ഇടതുപക്ഷം 32 സീറ്റിലേക്ക് ചുരുങ്ങി. 2014ലെ 17 ശതമാനം എന്ന ബിജെപി വോട്ട് 2016 ആയപ്പോൾ 10 ശതമാനം ആയതുമാത്രമാണ് ഇടതുപക്ഷത്തിന് ചൂണ്ടിക്കാട്ടാൻ ഉണ്ടായ ഏക കാര്യം. ഇതേ കാലയളവിൽ കോൺഗ്രസ് സഖ്യമുണ്ടായിട്ടും ഇടതു സഖ്യത്തിന്റെ വോട്ട് 3 ശതമാനം കുറഞ്ഞത് അവർ ചർച്ചയ്ക്കെടുത്തില്ല. അതായത് രണ്ടു വർഷം മുൻപ് ബിജെപി കൊണ്ടുപോയ വോട്ട് അവരിലേക്ക് തിരിച്ചെത്തിയില്ല എന്ന കാര്യം അവർ ഗൗരവത്തിലെടുത്തില്ല.