ദർശനത്തിന് ആറടി അകലം: നിർദേശങ്ങൾ പുറത്തിറക്കി മലബാർ ദേവസ്വം ബോർഡ്

പാലക്കാട്∙ ലേ‍ാക്ഡൗൺ ഇളവുകളുടെ ഭാഗമായി ഭക്തരെ പ്രവേശിപ്പിക്കുമ്പോൾ ക്ഷേത്രത്തറയും പ്രദക്ഷിണവഴിയും ഇടവിട്ടു ശുചീകരിക്കണമെന്ന് മലബാർ ദേവസ്വം ബേ‍ാർഡ് കമ്മിഷണർ അറിയിച്ചു. ക്ഷേത്രത്തിനകത്തും ദർശനത്തിനും വഴിപാടുകൾക്കും ആറടി അകലത്തിൽ നിൽക്കാൻ ക്രമീകരണം ഏർപ്പെടുത്തണമെന്നും നിർദേശം നൽകിയിട്ടുണ്ട്.

മറ്റുനിർദേശങ്ങൾ:

∙ പ്രവേശനം ടെസ്റ്റ് പോസിറ്റിവിറ്റി റേറ്റ് (ടിപിആർ) 16% താഴെയുള്ള എ, ബി കാറ്റഗറിയിൽ ഉൾപ്പെട്ട തദ്ദേശ സ്ഥാപനങ്ങളിലെ ക്ഷേത്രങ്ങളിൽ മാത്രം.

∙ക്ഷേത്രത്തിനറെ വിസ്തൃതി അടിസ്ഥാനപ്പെടുത്തി സാമൂഹിക അകലം ഉറപ്പുവരുത്തി ഒരു സമയം പരമാവധി 15 പേർക്കു മാത്രമേ കയറാവൂ. സാഹചര്യങ്ങൾക്കനുസരിച്ചു പ്രവേശന സമയം പരിമിതപ്പെടുത്തും.

∙ക്ഷേത്രം ശ്രീകോവിൽ, തിടപ്പള്ളി , ചുറ്റമ്പലം ഉൾപ്പെടെ മുഴുവൻ ക്ഷേത്ര ഭാഗങ്ങളും പരിസരവും ശുചീകരണം നടത്തി അണുവിമുക്തമാക്കി മാത്രം ഭക്തർക്ക് പ്രവേശനം

∙ പ്രവേശന കവാടത്തിൽ കൈകൾ അണുവിമുക്തമാക്കാനുള്ള സജ്ജീകരണം (സാനിറ്റൈസർ ,സോപ്പ്/ ഹാൻഡ് വാഷ്, വെള്ളം) ഏർപ്പെടുത്തണം. ശരിയായ രീതിയിൽ കൈകാലുകൾ അണുവിമുക്തമാക്കാതെ ഉള്ളിലേക്ക് പ്രവേശിപ്പിക്കരുത്.

∙ മാസ്‌ക് ധരിക്കാത്തവരെ പ്രവേശിപ്പിക്കരുത്.

∙ പ്രവേശന കവാടത്തിലും പാർക്കിങ് ഏരിയയിലും സാമൂഹിക അകലം പാലിക്കാൻ ആറടി അകലത്തിൽ നിൽക്കാനുളള സംവിധാനം ഒരുക്കണം.

∙വഴിപാടിന് ഓൺലൈൻ പെയ്മെന്റിന് സൗകര്യമൊരുക്കണം.

∙അകലം പാലിച്ച് ക്ഷേത്രത്തിലെ ഇരിപ്പിടങ്ങൾ സജ്ജീകരിക്കണം.

∙ പ്രവേശനവും പുറത്തേക്കുള്ള വഴിയും പ്രത്യേകമായി സജ്ജമാക്കേണ്ടതാണ്.

∙ ക്ഷേത്ര പരിസരത്തുള്ള കടകളിലും മറ്റു സ്ഥാപനങ്ങളിലും കോവിഡ് സുരക്ഷാ മാനദണ്ഡങ്ങൾ പാലിച്ചു മാത്രമേ പ്രവേശിക്കാവൂ.

∙കൈകാലുകൾ അണുവിമുക്തമാക്കാൻ സജ്ജീകരിച്ച സ്ഥലം ഇടവിട്ട് അണുനശീകരണം നടത്തണം..

∙ സുരക്ഷാ സംവിധാനങ്ങൾ സംബന്ധിച്ച് പ്രവേശന കവാടത്തിൽ നോട്ടീസ് പ്രദർശിപ്പിക്കണം.

∙ക്ഷേത്രത്തിലെത്തുന്നവരുടെ പേര് ,ഫോൺ നമ്പർ, സ്ഥലം, വയസ്സ് എന്നിവ രേഖപ്പെടുത്തണം.

∙ കണ്ടെയ്ൻമെന്റ് സോൺ, ഹോട്സ്പോട്ട് പ്രദേശങ്ങളിലെ ക്ഷേത്രങ്ങളിൽ തദ്ദേശ സ്വയംഭരണ സ്ഥാപനത്തിന്റെ/ ജില്ലാ ഭരണകൂടത്തിന്റെ നിർദ്ദേശാടിസ്ഥാനത്തിൽ ഭക്തജനങ്ങളെ പ്രവേശിപ്പിക്കാം. പ്രദേശത്തെ പ്രത്യേക സാഹചര്യമനുസരിച്ച് അധികൃതർ പുറപ്പെടുവിക്കുന്ന നിർദ്ദേശങ്ങളും കണക്കിലെടുത്തുവേണം പ്രവേശനമെന്നന്നും കമ്മീഷണർവ്യക്തമാക്കി.

English Summary: Malabar Devasvom Board Directions for Temple reopening