ഒറ്റരാത്രിയിൽ ആ ‘നിരോധനം’; സാമ്പത്തിക ദുരന്തത്തിന്റെ സൂനാമിയിൽ തകർന്ന് ശ്രീലങ്ക

സ്വകാര്യ ഇറക്കുമതിക്കാരുടെ പൂഴ്ത്തിവയ്പുകൊണ്ടാണ് ആവശ്യസാധനങ്ങളുടെ ക്ഷാമവും വിലക്കയറ്റവും ഉണ്ടാകുന്നതെന്നാണ് സർക്കാരിന്റെ നിലപാട്. ഏത് പ്രതിസന്ധികളെയും നേരിടുന്നതിന് രാജപക്‌സെ സഹോദരന്മാർ ഉരുക്കുമുഷ്ടിയാണ് ഉപയോഗിക്കുന്നതെന്നാണ് പ്രതിപക്ഷത്തിന്റെ ആക്ഷേപം. എൽടിടിഇയുമായുള്ള യുദ്ധം ജയിക്കാൻ അത് ആവശ്യമായിരിക്കാം, എന്നാൽ സാമ്പത്തിക പ്രതിസന്ധി നേരിടാൻ ആ മാർഗം ഉപയോഗിക്കുന്നത് രാജപക്‌സെ കുടുംബത്തിന്റെ അധികാരക്കൊതി മൂത്ത മനസ്സിനെയാണ് കാണിക്കുന്നതെന്ന് അവർ ആരോപിക്കുന്നു.

മുൻപ് ആഭ്യന്തര സെക്രട്ടറി ആയിരുന്ന ഇപ്പോഴത്തെ പ്രസിഡന്റ് ഗോട്ടബയ രാജപക്‌സെ പ്രതിസന്ധികൾ ഉണ്ടാകുമ്പോഴെല്ലാം അത് പരിഹരിക്കാൻ നിയോഗിക്കുന്നത്‌ സിവിൽ സർവീസിലെ ഉദ്യോഗസ്ഥരെയല്ല, മറിച്ച് സേവനത്തിലുള്ളതോ വിരമിച്ചതോ ആയ പട്ടാള ഓഫിസർമാരെയാണ്. കേവലം 2.1 കോടി മാത്രം ജനസംഖ്യയുള്ള രാജ്യത്തിന് ഒരു ലക്ഷത്തിലധികം അംഗബലമുള്ള കരസേനയാണുള്ളത്. കരസേനയിലെ ഉന്നത ഉദ്യോഗസ്ഥരിൽ ഭൂരിപക്ഷത്തിനും കാര്യമായ പണിയൊന്നുമില്ല. മന്ത്രിമാരെ മണിയടിച്ച് അവർ പറയുന്ന കാര്യങ്ങൾ ചെയ്‌തു സുഖമായി ജീവിക്കുകയാണ്.

കോവിഡിൽ ഇടിഞ്ഞ് ശ്രീലങ്കൻ രൂപയുടെ മൂല്യം

ഉപഭൂഖണ്ഡത്തിൽ ആദ്യമായി സ്വതന്ത്ര സാമ്പത്തിക സമ്പ്രദായത്തിലേക്കു മാറിയ രാജ്യമാണ് ശ്രീലങ്ക. അരി, പഞ്ചസാര, സവാള, ഉരുളക്കിഴങ്ങ്, മണ്ണെണ്ണ, പെട്രോൾ, പാചകവാതകം, മരുന്ന് തുടങ്ങി മിക്ക അവശ്യസാധങ്ങൾക്കും ശ്രീലങ്ക ഇറക്കുമതിയെയാണ് ആശ്രയിക്കുന്നത്. ഇവയെല്ലാം ഇറക്കുമതി ചെയ്യുന്നത് സ്വകാര്യ ഇറക്കുമതിക്കാരാണ്. കോവിഡിനെ തുടർന്നുണ്ടായ സാമ്പത്തിക മാന്ദ്യവും അതിനെ നേരിടാൻ സർക്കാർ സ്വീകരിച്ച നടപടികളും രാജ്യത്തേക്കുള്ള ഇറക്കുമതി ഏതാണ്ട് അസാധ്യമാക്കി. മഹാമാരിയെ തുടർന്നുള്ള സാമ്പത്തിക മാന്ദ്യം സർക്കാരിന്റെ ഡോളർ ശേഖരവും ശോഷിപ്പിച്ചു. രാജ്യത്തിന്റെ വിദേശ നാണയ ശേഖരം 750 കോടി ഡോളറിൽനിന്ന് 280 കോടി ഡോളറായി ഇടിഞ്ഞു.

ഇതിന്റെ ഫലമായി ശ്രീലങ്കൻ രൂപയുടെ മൂല്യവും അതിവേഗം കുറയാൻ തുടങ്ങി. സാധനങ്ങൾ ഇറക്കുമതി ചെയ്യണമെങ്കിൽ അവ നൽകുന്ന രാജ്യത്തിന് അതിന്റെ വില ഡോളറിൽ നൽകണം. അതിനു ഇറക്കുമതിക്കാർ രാജ്യത്തുനിന്ന് ഡോളർ സമാഹരിക്കണം. ആവശ്യക്കാർ കൂടുന്നതനുസരിച്ചു ഡോളറിന്റെ ശ്രീലങ്കൻ രൂപയ്ക്കെതിരെയുള്ള മൂല്യം കൂടിക്കൊണ്ടേയിരുന്നു. ഒരവസരത്തിൽ 216.55 ശ്രീലങ്കൻ രൂപ കൊടുത്താലേ ഒരു ഡോളർ കിട്ടൂ എന്ന അവസ്ഥ വന്നു. ശ്രീലങ്കയുടെ സാമ്പത്തിക നില മാറ്റമില്ലാതെ തുടരുകയാണെങ്കിൽ ഇത് 300-350 രൂപ വരെ പോകാം എന്ന് വിപണി നിരീക്ഷകർ പറയുന്നു. ഇപ്പോൾ 197-200 രൂപ നിരക്കിലാണ് ഡോളറിന്റെ മൂല്യം.

കരിഞ്ചന്തയിൽനിന്ന് ഡോളർ വാങ്ങേണ്ട ഗതികേട്

ഡോളറിനെതിരെയുള്ള രൂപയുടെ വലിയ ചാഞ്ചാട്ടം മാത്രമല്ല ഇറക്കുമതിക്കാരെ വിഷമിപ്പിക്കുന്നത്. സർക്കാർ നിശ്ചയിക്കുന്ന നിരക്കിൽ ഡോളർ കിട്ടാത്തതും അവർക്ക് വലിയ പ്രതിസന്ധി ഉണ്ടാക്കുന്നു. അതിനാൽ അവർ വലിയ നിരക്കിൽ കരിഞ്ചന്തയിൽനിന്ന് ഡോളർ വാങ്ങേണ്ട ഗതികേടിലാണ്. ഇത് അവരുടെ ബിസിനസ് അപ്പാടെ നഷ്ടത്തിലാക്കുന്നു. കാര്യങ്ങൾ കൂടുതൽ വഷളാക്കികൊണ്ട് ശ്രീലങ്കയിലെ സെൻട്രൽ ബാങ്ക് ഡോളറിലെ അവധി വ്യാപാരം നിരോധിച്ചു. അതുപോലെത്തന്നെ 200 രൂപയിൽ കൂടുതൽ ഡോളർ മാറ്റിക്കൊടുക്കരുതെന്നു കറൻസി ഡീലർമാർക്കു കർശന നിർദേശവും നൽകി.

ശ്രീലങ്കൻ രൂപ ക്ഷീണിക്കുമ്പോഴെല്ലാം ഇറക്കുമതിക്കാർ ഡോളർ ഇടപാടിൽ തങ്ങൾക്കുണ്ടാകാവുന്ന നഷ്ടം സംഭവിക്കാതെ നോക്കുന്നത് ഡോളറിന്റെ അവധി വ്യപാരത്തിലൂടെ ആയിരുന്നു. ഇത് നടക്കാതെ വന്നതോടുകൂടിയും വിപണിയിൽനിന്ന് ഡോളർ അധികം വാങ്ങാൻ കഴിയാത്തതും ഭക്ഷ്യവസ്തുക്കൾ ഉൾപ്പെടെയുള്ളവയുടെ ഇറക്കുമതി തീരെ കുറയാൻ കാരണമായി. ഇതോടെ പല അവശ്യ വസ്തുക്കൾക്കും ക്ഷാമം നേരിട്ടു.

നിലവിൽ പഞ്ചസാരയും പാൽപ്പൊടിയും അടക്കമുള്ള അവശ്യ വസ്തുക്കൾക്ക് റേഷനിങ് ഏർപ്പെടുത്തിയിരിക്കുകയാണ്. അവശ്യ സാധനങ്ങൾ വിൽക്കുന്ന കടകൾക്കു മുന്നിൽ ജനങ്ങളുടെ നീണ്ട നിര ശ്രീലങ്കയിൽ ഇപ്പോൾ ഒരു സാധാരണ കാഴ്ചയാണ്. ഊർജ മന്ത്രാലയം പെട്രോളിന്റെയും ഡീസലിന്റെയും ഉപഭോഗം കഴിയുന്നത്ര ചുരുക്കാൻ വാഹന ഉടമകളോട് ആവശ്യപ്പെടുന്നു. അല്ലാത്തപക്ഷം അവയ്ക്ക് റേഷനിങ് ഏർപ്പെടുത്തേണ്ടി വരുമെന്ന് മുന്നറിയിപ്പ് നൽകുന്നു. ഇങ്ങനെ ലാഭിക്കുന്ന പണം കൊണ്ട് ജീവൻരക്ഷാ മരുന്നുകൾ ഇറക്കുമതി ചെയ്യാൻ കഴിയില്ലേ എന്നവർ ചോദിക്കുന്നു.

കോവിഡിൽ കൈവിട്ട സാമ്പത്തികം

2019 ഏപ്രിലിൽ ക്രിസ്ത്യൻ പള്ളിക്കും പ്രമുഖ ഹോട്ടലുകൾക്കും നേരെ നടന്ന ഭീകരാക്രമണവും വർഷത്തിന്റെ മധ്യത്തോടെ സർക്കാർതന്നെ ഇല്ലാതായിപ്പോയ ഭരണഘടനാ പ്രതിസന്ധിയും തീർത്ത രാഷ്ട്രീയ-സാമ്പത്തിക അനിശ്ചിതത്വം കൊറോണയുടെ വരവോടെ കൂടുതൽ വഷളാവുകയായിരുന്നു. മേഖലയിലെ മറ്റു രാജ്യങ്ങളുമായും തട്ടിച്ചു നോക്കുമ്പോൾ ശ്രീലങ്ക സാമ്പത്തികമായി മുന്നിലാണ്. 2020ൽ ഇന്ത്യയുടെ ആളോഹരി വരുമാനം 1694 യൂറോ ആയിരുന്നപ്പോൾ ശ്രീലങ്കയുടേത് 3441 യൂറോ ആയിരുന്നു.

2019ൽ ലോകബാങ്ക് ശ്രീലങ്കയെ ‘അപ്പർ മിഡിൽ ഇൻകം നേഷൻ’ ഗണത്തിലായിരുന്നു ഉൾപ്പെടുത്തിയിരുന്നത്. സാമ്പത്തിക പ്രതിസന്ധി രൂക്ഷമായതോടെ രാജ്യം വീണ്ടും ‘ലോവർ മിഡിൽ ഇൻകം നേഷൻ’ പട്ടികയിലായി. ശ്രീലങ്കയുടെ സാമൂഹിക സൂചികകൾ, പ്രത്യേകിച്ച് പൊതുജന ആരോഗ്യ സൂചികകൾ കേരളത്തിന് തുല്യമോ അതിനുപരിയോ ആണ്. അതുകൊണ്ടുതന്നെ കോവിഡിന്റെ ഒന്നും രണ്ടും വരവുകൾ വളരെ വിജയകരമായി നേരിടാൻ ശ്രീലങ്കയ്ക്ക് കഴിഞ്ഞു. എന്നാൽ വൈറസിന്റെ മൂന്നാം വരവ് നേരിടുന്നതിൽ രാജ്യം കാര്യമായി വിജയിച്ചില്ല. അതുകൊണ്ടുതന്നെ ദിനംപ്രതി രോഗികളുടെ എണ്ണം പലപ്പോഴും 5000 കവിഞ്ഞു, മരണം പല ദിവസങ്ങളിലും നൂറും കടന്നു.