‘നീതി’ തോക്കിൻകുഴലിലൂടെ; ഗുണ്ടകൾക്കു നേരെ എൻകൗണ്ടറുമായി സ്റ്റാലിനും

തന്നോടൊപ്പം വെള്ളദുരൈ മുന്നിലാണിരുന്നതെന്നും വീരപ്പനും സംഘവും പിന്നിലിരുന്നെന്നുമാണു ശരവണന്റെ വിശദീകരണം. ശരവണൻ ഏറെക്കാലം തമിഴ്‌നാട് ദൗത്യസേനാ തലവൻ കെ. വിജയകുമാറിന്റെ ഡ്രൈവറായിരുന്നു. വീരപ്പനും സംഘവും കയറിയ സ്‌ഥലത്തുനിന്ന് ആംബുലൻസ് ഏറ്റുമുട്ടൽ നടന്ന പാപ്പാരപട്ടിയിലെ പച്ചിനപ്പട്ടിയിൽ വെറും 15 മിനിറ്റ്‌കൊണ്ടാണെത്തിയതെന്നും ശരവണനും വെള്ളദുരൈയും പറയുന്നു. എങ്ങനെയാണു വീരപ്പനെയും സംഘത്തെയും ആംബുലൻസിൽ ചികിൽസയ്‌ക്കായി കൊണ്ടുപോകാൻ മാത്രം വിശ്വാസ്യത ശരവണനും വെള്ളദുരൈയും നേടിയെടുത്തതെന്നു വ്യക്‌തമാക്കാൻ വിജയകുമാറോ മറ്റ് ഉദ്യോഗസ്‌ഥരോ തയാറായതുമില്ല. ഈ ആംബുലൻസ് സംഭവം ഉൾപ്പെടെ ചേർത്ത് 2016ൽ ‘വീരപ്പൻ’ എന്ന തമിഴ് സിനിമയും പുറത്തിറങ്ങിയിട്ടുണ്ട്.

ആംബുലൻസിലെ ക്യാമറ

വ്യാജനമ്പറിൽ നൽകിയ ആംബുലൻസ് പൊലീസ് വാൻ പരിഷ്‌കരിച്ചതായിരുന്നുവത്രേ. ഇതിൽ ക്യാമറ അടക്കമുള്ള സംവിധാനങ്ങൾ ഏർപ്പെടുത്തിയിരുന്നു. അഞ്ചുകിലോമീറ്റർ ദൂരെനിന്നു സംഘത്തിന്റെ യാത്ര സംബന്ധിച്ച സൂചനകൾ ദൗത്യസേനയ്‌ക്കു നൽകേണ്ട ക്യാമറ ഏറ്റുമുട്ടൽ നടന്ന സ്‌ഥലത്തിനു രണ്ടു കിലോമീറ്റർ അകലെ മാത്രമാണ് പ്രവർത്തിച്ചു തുടങ്ങിയത്. ഡ്രൈവറുടെ ക്യാബിൻ വേർതിരിച്ചിരുന്നുവെന്നും പറയുന്നു. ഏറ്റുമുട്ടൽ നടന്ന് ഏതാനും മണിക്കൂറുകൾക്കകം ദൗത്യസേന ആംബുലൻസ് ടാർപോളിൻകൊണ്ടു മൂടി. 

വീരപ്പൻ ആത്മഹത്യ ചെയ്‌തുവെന്ന വാദവും ഉണ്ട്. ദൗത്യസേനയുടെ കയ്യിൽ അകപ്പെട്ടപ്പോഴോ സേന വളഞ്ഞുവെന്നു മനസ്സിലാക്കിയപ്പോഴോ ആകാം. എത്ര വെടിയുണ്ടകൾ വീരപ്പന്റെ ദേഹത്ത് ഉണ്ടായിരുന്നുവെന്ന് ആരും പുറത്തു പറയുന്നില്ല. വീരപ്പന്റെ സംഘത്തിൽ ദൗത്യസേനാംഗങ്ങൾ നേരത്തേ കയറിപ്പറ്റിയിരുന്നുവെന്ന വാദവും നിലവിലുണ്ട്. തമിഴ് തീവ്രവാദികൾ എന്ന വ്യാജേന കയറിയ ഇവർ സംഘത്തിൽ ഭിന്നിപ്പ് ഉണ്ടാക്കി. വീരപ്പൻ കണ്ണുശസ്‌ത്രക്രിയയ്‌ക്കു പോകുന്ന വിവരം നൽകിയത് ഇവരാണ്. മുംബൈയിലോ ശ്രീലങ്കയിലോ പോകുകയായിരുന്നു വീരപ്പന്റെ ഉദ്ദേശ്യം. അവിടെവച്ച് തിരിച്ചറിയാതിരിക്കാനാണ് മീശ കളഞ്ഞതെന്ന് ഒരു തമിഴ് പത്രം റിപ്പോർട്ട് ചെയ്തിരുന്നു.  

8 മാസത്തിനിടെ 2 എൻകൗണ്ടർ

ഡിഎംകെ അധികാരത്തിൽ വന്ന് 8 മാസങ്ങൾ പൂർത്തിയാകുമ്പോൾ പുറത്തറിഞ്ഞു നടന്നത് 2 എൻകൗണ്ടറുകളാണ്. കഴിഞ്ഞ ഒക്ടോബറിൽ മാല മോഷണ സംഘാംഗമായ ജാർഖണ്ഡ് സ്വദേശി എൻകൗണ്ടറിൽ പൊലീസിന്റെ വെടിയേറ്റു മരിച്ചു. തുടർന്ന് കഴിഞ്ഞ 7നു രാവിലെ ചെങ്കൽപ്പെട്ടി‍ൽ പൊലീസിനു നേരെ ബോംബെറിഞ്ഞ ഗുണ്ടാം സംഘാംഗങ്ങളെ പൊലീസ് വെടിവച്ചു കൊന്നു. ഇരട്ടക്കൊലപാതകം നടത്തി ഒളിവിൽ പോയ മൂന്നംഗ സംഘത്തിലെ ദിനേശ്, മൊയ്തീൻ എന്നീ യുവാക്കളാണു പൊലീസിന്റെ വെടിയേറ്റു മരിച്ചത്. 

വ്യാഴാഴ്ച രാത്രി ചെങ്കൽപ്പെട്ട് ബസ് സ്റ്റാൻഡിൽ കാർത്തിക് (അപ്പു 32) എന്നയാളെ ബോംബ് എറിഞ്ഞ് ഭീകരാന്തരീക്ഷം സൃഷ്ടിച്ച ശേഷം ഇവർ വെട്ടിക്കൊലപ്പെടുത്തിയിരുന്നു തുടർന്നു മിനിറ്റുകൾക്കകം മഹേഷ് (22) എന്നയാളെയും സംഘം വീട്ടിൽക്കയറി വെട്ടിക്കൊന്നു.  ഇരട്ടക്കൊലപാതകത്തിനു ശേഷം മുങ്ങിയ സംഘത്തെ കണ്ടെത്താൻ നടത്തിയ തിരിച്ചിലിനിടെയാണു ഗുണ്ടാ സംഘം പൊലീസിനു നേരെയും ബോംബെറിഞ്ഞത്. പൊലീസിനു നേരെ ബോംബും കത്തിയുമായി ആക്രമണത്തിനെത്തിയപ്പോൾ സ്വയരക്ഷയ്ക്കായാണു വെടിവച്ചതെന്നാണു വിശദീകരണം. 

തിരുച്ചിറപ്പള്ളിയിൽ സ്പെഷൽ എസ്ഐ ഭൂമിനാഥൻ ആടുമോഷ്ടാക്കളുടെ വെട്ടേറ്റു മരിച്ച സംഭവത്തിനു ശേഷം രാത്രി പട്രോളിങ് നടത്തുന്ന പൊലീസ് ഉദ്യോഗസ്ഥർ അടക്കം തോക്ക് കൈവശം വയ്ക്കാനും ആവശ്യം വന്നാൽ ഉപയോഗിക്കാനും മടിക്കരുതെന്നു ഡിജിപി നിർദേശിച്ചിരുന്നു. ഭൂമിനാഥന്റെ മരണത്തോടെ ഗുണ്ടകൾക്കെതിരെയുള്ള നടപടികളും പൊലീസ് ശക്തമാക്കിയിരുന്നു. 

എൻകൗണ്ടർ പ്രതികാരമോ..?

കുപ്രസിദ്ധരായ കുറ്റവാളികളാണു ഏറ്റുമുട്ടൽ കൊലയ്‌ക്ക് ഇരയാകുന്നതെങ്കിലും ക്രമസമാധാനപാലനത്തിനപ്പുറമുള്ള ലക്ഷ്യങ്ങൾ ഇവരുടെ അറസ്‌റ്റിനും കൊലയ്‌ക്കും പിന്നിലുണ്ടെന്ന ആരോപണം ഓരോ എൻകൗണ്ടറിനു ശേഷവും ഉയരുന്നുണ്ട്. മതിയായ തെളിവുകളോടെയല്ലാതെയാകും പലപ്പോഴും പ്രതികളുടെ അറസ്‌റ്റ്. കോടതിയിൽ തെളിവുകളുടെ ബലത്തിൽ കേസു നടത്താൻ കഴിയില്ല എന്നതിനാൽ പ്രതിയെത്തന്നെ ഇല്ലായ്‌മ ചെയ്‌തു കേസ് ഒഴിവാക്കാനാണ് ഏറ്റുമുട്ടൽ കൊല വഴി പൊലീസിനു ലക്ഷ്യമിടുന്നത്. നീതിന്യായ വ്യവസ്‌ഥയെ നോക്കുകുത്തിയാക്കി പൊലീസ് തന്നെ കുറ്റവും ശിക്ഷയും വിധിക്കുകയാണിവിടെ - മനുഷ്യാവകാശ സംഘടനകൾ കുറ്റപ്പെടുത്തുന്നു.

ഏറ്റുമുട്ടൽ കൊലപാതകങ്ങൾ കൈകാര്യം ചെയ്യുന്നതുമായി ബന്ധപ്പെട്ടു സുപ്രീം കോടതിയും ദേശീയ മനുഷ്യാവകാശ കമ്മിഷനും നൽകിയിട്ടുള്ള മാർഗ നിർദേശങ്ങൾ തമിഴ്‌നാട് പൊലീസും സംസ്‌ഥാന സർക്കാരും ലംഘിക്കുകയാണെന്നും ഇവർ ചൂണ്ടിക്കാണിക്കുന്നു. സംസ്‌ഥാനത്തു നടന്ന ഏറ്റുമുട്ടൽ കൊലപാതക സംഭവങ്ങളിലൊന്നും അതിൽ ഉൾപ്പെട്ട പൊലീസുകർക്കെതിരെ നിയമ നടപടി സ്വീകരിക്കാനോ, ഉന്നത തല അന്വേഷണം നടത്തി സത്യാവസ്‌ഥ പുറത്തുകൊണ്ടുവരാനോ നീക്കമുണ്ടായിട്ടില്ല. 

തുടക്കത്തിൽ പ്രതിക്ഷേധം തണുപ്പിക്കാൻ പ്രഖ്യാപിക്കുന്ന ആർഡിഒ തല അന്വേഷണം എവിടെയുമെത്താതെ ഒടുങ്ങുകയാണു പതിവ്. കുറ്റവാളിയുടെ ആക്രമണത്തിൽനിന്നു രക്ഷപ്പെടാൻ ആത്മരക്ഷാർഥം പൊലീസ് വെടിവയ്ക്കുകയായിരുന്നുവെന്ന വാദത്തിന്റെ ബലത്തിൽ ഇതുമായി ബന്ധപ്പെട്ട കേസുകളും അവസാനിക്കും. അതേ സമയം പൊതുജനങ്ങളിൽ ബഹുഭൂരിപക്ഷവും ഗുണ്ടകളെയും സ്‌ഥിരം കുറ്റവാളികളെയും കർശനമായി നേരിടണമെന്ന അഭിപ്രായക്കാരാണ്.

പൊലീസ് ഏറ്റുമുട്ടലിൽ അത്തരക്കാർ കൊല്ലപ്പെടുന്നതിനെ രഹസ്യമായി സ്വാഗതം ചെയ്യുന്നവരാണ് ഭൂരിപക്ഷം ജനങ്ങളും. മനുഷ്യാവകാശ സംരക്ഷണം എന്നു പഞ്ഞ് പൊലീസ് നടപടിയെ വിമർശിക്കുന്നതിനോടും ജനത്തിനു സഹതാപവും നന്നേ കുറവാണ്. സ്വൈരമായ സാമൂഹിക ജീവിതത്തിനു ഭീഷണിയാകുന്ന ഗുണ്ടാ പ്രവർത്തനത്തെ അടിച്ചമർത്തുമ്പോൾ ജനം പൊലീസിനെ അഭിനന്ദിക്കുന്ന നിലപാടാണെടുക്കുന്നത്. സർക്കാരും പൊലീസും വിമർശനങ്ങളെ അവഗണിക്കുന്നതിനു ഒരു കാരണവും അതു തന്നെ.

English Summary: Police Encounter Killings Again in Tamil Nadu; The Dreadful History