സ്റ്റാലിനറിയാം വിയർപ്പിന്റെ വില; ഇനി ചിന്നമ്മ? അണ്ണാഡിഎംകെ വോട്ട് ചോർന്ന് ബിജെപിയിൽ?

കൊങ്കു നാട് പിടിക്കുകയെന്നതു സ്റ്റാലിന്റെ പ്രധാന അജൻഡകളിലൊന്നായിരുന്നു. അതിനായി കോയമ്പത്തൂർ, സേലം ജില്ലകളിലേക്കു രണ്ടു മന്ത്രിമാരെ വീതം പ്രത്യേകം നിയോഗിക്കുകയും ചെയ്തു. കോയമ്പത്തൂർ കോർപറേഷനിൽ ചരിത്രത്തിലാദ്യമായി മേയർ സ്ഥാനം ഡിഎംകെയ്ക്കു ലഭിച്ചു. അണ്ണാഡിഎംകെയെപ്പോലെ, ബിജെപിക്കും സ്വാധീനമുള്ള മേഖലയാണു കൊങ്കു നാട്. ഇരു പാർട്ടികളും ഒറ്റയ്ക്കു മത്സരിച്ചതും ഡിഎംകെയുടെ കുതിപ്പിനു കാരണമായി. സംസ്ഥാനത്തെ 21 കോർപറേഷനിലും ഭൂരിപക്ഷം നേടിയ ഡിഎംകെ ആകെ സീറ്റുകളിൽ 68% നേടി. നഗരസഭകളിൽ 61%, ടൗൺ പഞ്ചായത്തുകളിൽ 58% എന്നിങ്ങനെയാണു മറ്റു തദ്ദേശ സ്ഥാപനങ്ങളിലെ വിജയത്തിന്റെ തോത്. വാഴ നനയുമ്പോൾ ചീരയും നനയുമെന്നതു പോലെ, ഡിഎംകെയുടെ മഹാ വിജയത്തിന്റെ ഗുണം സഖ്യ കക്ഷികളായ കോൺഗ്രസിനും ഇടതു പക്ഷത്തിനും മുസ്‍ലിം ലീഗിനുമെല്ലാം ലഭിച്ചു.

ഉണ്ടയില്ലാത്ത ഇരട്ടക്കുഴൽ തുപ്പാക്കി

1996 നിയമസഭാ തിരഞ്ഞെടുപ്പിലെ പരാജയവുമായി താരതമ്യം ചെയ്യുമ്പോൾ അണ്ണാഡിഎംകെയുടെ ഇത്തവണത്തെ തോൽവി അത്ര പരിതാപകരമല്ല. അന്ന് ആകെ 4 സീറ്റുകളാണു പാർട്ടി നേടിയത്. സാക്ഷാൽ ജയലളിത സ്വന്തം മണ്ഡലത്തിൽ തോറ്റു. എന്നാൽ, അന്നു പാർട്ടിയെ കൈപിടിച്ചുയർത്താൻ ജയലളിതയെന്ന പുരട്ച്ചി തലൈവിയുണ്ടായിരുന്നു. തോൽവിയിലും അണ്ണാഡിഎംകെയുടെ സംഘടനാ സംവിധാനം അതേപടി തുടർന്നു. തെക്കൻ തമിഴ്നാട്ടിലും കൊങ്കുനാട്ടിലും പരമ്പരാഗത കേന്ദ്രങ്ങളിൽ വോട്ടു വിഹിതം വലിയ രീതിയിൽ താഴോട്ടു പോയില്ല.

ജയലളിതയുടെ മരണ ശേഷം പാർട്ടിയുടെ ‘തല’ ദുർബലമായെന്ന വിലയിരുത്തൽ ശരിവയ്ക്കുന്നതാണു പാർട്ടിയുടെ തുടർച്ചയായ തിരഞ്ഞെടുപ്പു തോൽവികൾ. പാർട്ടി പിടിക്കാനുള്ള ശ്രമം പരാജയപ്പെട്ടു വി.കെ.ശശികല നാലു വർഷത്തോളം ജയിലിൽ കിടന്നു. തിരിച്ചെത്തിയപ്പോഴേക്കും എടപ്പാടി കെ.പളനി സാമിയും ഒ.പനീർസെൽവവും പാർട്ടി പിടിച്ചടക്കിയിരുന്നു. ജയലളിതയുടെ ഹൃദയ തോഴിയെ പാർട്ടിയിലേക്ക് അടുപ്പിക്കാൻ ഇരുവരും തയാറായില്ല. ഭരണമുണ്ടായിരുന്ന കാലത്ത് അതിന്റെ സാധ്യതകൾ ഉപയോഗപ്പെടുത്തി പാർട്ടിയെ കെട്ടുറപ്പോടെ നിർത്താൻ എടപ്പാടിക്കു കഴിഞ്ഞിരുന്നു. മറ്റു സാധ്യതകളൊന്നും മുന്നിലില്ലാത്തതിനാൽ എടപ്പാടിക്കു കീഴിൽ ഉപമുഖ്യമന്ത്രിയായി ഒ.പനീർസെൽവം അടങ്ങിയിരുന്നു.

ഇരുവരും ചേർന്നുള്ള ഇരട്ട നേതൃത്വം ഇരട്ടക്കുഴൽ തുപ്പാക്കിയാണെന്നാണ് അണ്ണാഡിഎംകെ അവകാശപ്പെട്ടിരുന്നത്. ആ തുപ്പാക്കിയിൽ ഉണ്ടയില്ലെന്നു തദ്ദേശ തിരഞ്ഞെടുപ്പു ഫലം തെളിയിച്ചിരിക്കുന്നു. എടപ്പാടിയുടെ തട്ടകമായ എടപ്പാടി നഗരസഭയിലും പനീർസെൽവത്തിന്റെ സ്വന്തം പെരിയകുളത്തും ഡിഎംകെ ഭരണം പിടിച്ചെടുത്തു. സ്വന്തം കോട്ട കാക്കാൻ കഴിയാത്തവർക്കു എങ്ങിനെ പാർട്ടിയെ രക്ഷിക്കാനാകുമെന്നു അണികൾ ചോദിച്ചു തുടങ്ങിയിരിക്കുന്നു. ഡിഎംകെയുടെ കടന്നു കയറ്റത്തിനൊപ്പം, അണ്ണാഡിഎംകെ വോട്ടുകൾ ബിജെപിയിലേക്കു പോകുന്നുണ്ടോയെന്ന ആശങ്കയും ഇത്തവണത്തെ ഫലം പാർട്ടിക്കു മുന്നിലേക്കിടുന്നുണ്ട്.

ജയലളിതയെപ്പോലെ ആജ്ഞാശക്തിയുള്ള നേതൃത്വത്തിന്റെ അഭാവം പ്രതിപക്ഷത്തിരിക്കുമ്പോൾ തെളിഞ്ഞു കാണുന്നു. ശശികലയെ മാറ്റി നിർത്തുന്നതിലുള്ള വിരോധം കാരണം തെക്കൻ തമിഴ്നാട്ടിലെ തേവർ വോട്ടുകൾ പാർട്ടിയെ കയ്യൊഴിയുന്നതായി ഓരോ തിരഞ്ഞെടുപ്പും തെളിയിക്കുന്നു. എടപ്പാടി മുഖ്യമന്ത്രിയായിരുന്നപ്പോൾ പിന്തുണച്ചതു പോലെ, അദ്ദേഹത്തിന്റെ സമുദായമായ ഗൗണ്ടറുകൾ ഇപ്പോൾ പാർട്ടിക്കൊപ്പമില്ലെന്നു കൊങ്കുനാട് ഫലം വ്യക്തമാക്കുന്നു. ടി.ടി.വി.ദിനകരന്റെ അമ്മ മക്കൾ മുന്നേറ്റ കഴകം ചെറിയ രീതിയിലാണെങ്കിലും പാർട്ടി വോട്ടു ചോർത്തുന്നുണ്ട്. തേവർ ബെൽറ്റായ ഒരത്തനാട് നഗരസഭയിൽ അണ്ണാഡിഎംകെയ തോൽപിച്ചു ദിനകരന്റെ പാർട്ടി ഭരണം പിടിച്ചതു ഒപിഎസ്-ഇപിഎസ് നേതൃത്വത്തിനു നാണക്കേടായി.

വരുമോ ശശികല?

അണ്ണാഡിഎംകെ നേതൃത്വത്തിലേക്കു തിരിച്ചുവരാനുള്ള ശശികലയുടെ ശ്രമങ്ങൾക്കു തദ്ദേശ തിരഞ്ഞെടുപ്പുചിത്രം കരുത്തുപകരും. പനീർസെൽവത്തിന് ഇപ്പോൾ തന്നെ അര സമ്മതമാണ്. എടപ്പാടിയുടെ എതിർപ്പിന് ഇനി പഴയ ശക്തിയുണ്ടാകില്ല. വ്യക്തിപ്രഭാവമുള്ള നേതാക്കൾക്കു ചുറ്റും കറങ്ങുന്ന അണ്ണാഡിഎംകെയുടെ കടിഞ്ഞാൺ ‘ത്യാഗത്തലൈവി ചിന്നമ്മ’യുടെ കൈകളിലെത്തിയാൽ അദ്ഭുതപ്പെടേണ്ടതില്ല. പാർട്ടി കൈപ്പിടിയിലൊതുക്കിയാലും എടപ്പാടിയെ പൂർണമായി മാറ്റി നിർത്തുക ശശികലയ്ക്കും എളുപ്പമാകില്ല. കൊങ്കുനാട്ടിലെ ഗൗണ്ടറുകൾ അണ്ണാഡിഎംകെയുടെ പരമ്പരാഗത വോട്ടു ബാങ്കാണ്. അവരുടെ പ്രതിനിധിയായ എടപ്പാടിയെ തഴഞ്ഞാൽ ആ മേഖലയിൽ കനത്ത തിരിച്ചടി നേരിട്ടേക്കാം. ശശികലയുടെ നേതൃത്വത്തിനു കീഴിൽ ഒപിഎസും-ഇപിഎസും ഒരുമിച്ചു പ്രവർത്തിക്കുന്ന അണ്ണാഡിഎംകെ ഉടൻ യാഥാർഥ്യമാകാനാണു സാധ്യത.

സ്റ്റാലിൻ തേരോട്ടം നടത്തുമ്പോഴും തമിഴ്നാട്ടിൽ എക്കാലവുമുള്ള ഡിഎംകെ വിരുദ്ധ വോട്ടു ബാങ്ക് അതേപടി നിലനിൽക്കുന്നുണ്ട്. മറ്റു പാർട്ടികൾ ആ വിടവിലേക്കു തള്ളിക്കയറുന്നതു തടയാൻ അണ്ണാഡിഎംകെ നഷ്ടപ്രതാപം വീണ്ടെടുക്കേണ്ടിവരും. ഡിഎംകെ കഴിഞ്ഞാൽ തമിഴ്നാട്ടിലെ മുക്കിലും മൂലയിലും സംഘടനാ സംവിധാനമുള്ള ഏക പാർട്ടിയാണു അണ്ണാഡിഎംകെ. ഒന്നോ രണ്ടോ തിരഞ്ഞെടുപ്പു പരാജയങ്ങൾ കൊണ്ട് അവരെ എഴുതിത്തള്ളാനാകില്ല. 10 വർഷം മുൻപാണു തമിഴ്നാട്ടിൽ ഇതിനു മുൻപ് തദ്ദേശ തിരഞ്ഞെടുപ്പു നടന്നത്. അന്നു സംസ്ഥാനത്താകെ 10 കോർപറേഷനുകൾ. പത്തിടത്തും ഭരണം പിടിച്ചതു അണ്ണാഡിഎംകെ. അന്നത്തെ പൂജ്യത്തിൽ നിന്നാണ് ഇന്നത്തെ മിന്നും വിജയത്തിലേക്കു ഡിഎംകെ അടിവച്ചടിവച്ചു കയറിയത്. അണ്ണാഡിഎംകെയുടെ രാഷ്ട്രീയ ഭാവി, നിലവിലെ പ്രതിസന്ധിയെ അവർ എങ്ങനെ അവസരമാക്കി മാറ്റുമെന്നതിനെ ആശ്രയിച്ചിരിക്കും.

വിരിഞ്ഞോ, താമര മുകുളങ്ങൾ?

ഡിഎംകെയുടെ വിജയത്തിനൊപ്പം തദ്ദേശ തിരഞ്ഞെടുപ്പു ഫലത്തിനു പിന്നാലെ തമിഴ്നാട്ടിൽ നിന്നു മുഴങ്ങിക്കേട്ട ഒരു അവകാശവാദവും രാഷ്ട്രീയ കേന്ദ്രങ്ങളിൽ ചർച്ചയായി. ഡിഎംകെയ്ക്കും അണ്ണാഡിഎംകെയ്ക്കും പിന്നിൽ തങ്ങൾ സംസ്ഥാനത്തെ മൂന്നാം കക്ഷിയായിരിക്കുന്നുവെന്ന പ്രഖ്യാപനം നടത്തിയതു ബിജെപി സംസ്ഥാന അധ്യക്ഷൻ അണ്ണാമലയാണ്. ഒറ്റനോട്ടത്തിൽ അതിൽ കഴമ്പില്ല. സീറ്റെണ്ണത്തിൽ കോൺഗ്രസിന്റെ പിന്നിലാണു ബിജെപി. കോൺഗ്രസ് ആകെ 592 സീറ്റുകൾ നേടിയപ്പോൾ ബിജെപിക്കു ലഭിച്ചതു 308 എണ്ണം മാത്രം. എന്നാൽ, കോൺഗ്രസ് ഡിഎംകെ സഖ്യത്തിനൊപ്പമാണു മത്സരിച്ചത്. ബിജെപി ഒറ്റയ്ക്കായിരുന്നു. 2011ൽ നേടിയ 272 സീറ്റുകളാണു 308 ആയി ഇത്തവണ വർധിപ്പിച്ചത്. ആകെ സീറ്റെണ്ണം നേരത്തെ 1.76% ആയിരുന്നെങ്കിൽ ഇപ്പോഴത് 2.4% ആയി.

ബിജെപിയുടെ അവകാശവാദങ്ങൾ അതേപടി മുഖവിലക്കെടുക്കാനാവില്ലെങ്കിലും ഫലത്തിലെ ചില സൂചനകൾ ശ്രദ്ധേയമാണെന്നു ബിജെപിയെ അനുകൂലിക്കുന്നവർ പറയുന്നു.. സംസ്ഥാനത്തെ 28 ജില്ലകളിൽ പാർട്ടി തദ്ദേശ സ്ഥാപനങ്ങളിൽ പ്രാതിനിധ്യം നേടി. 10 ഇടത്ത് ഒരാളെയും ജയിപ്പിക്കാനായില്ല. എതിരാളികളെ ഞെട്ടിച്ച് ചെന്നൈ കോർപറേഷനിൽ ഒരു സീറ്റ് നേടി. പത്തിലേറെ സീറ്റുകളിൽ ഡിഎംകെയ്ക്കു പിന്നിൽ രണ്ടാമതെത്തി. വെസ്റ്റ് മാമ്പലത്തു ജയിച്ച ഉമാ അനന്തൻ എന്ന ബിജെപി സ്ഥാനാർഥി തീവ്ര ഹിന്ദുത്വ നിലപാടുകളിലൂടെ നേരത്തെ വിവാദങ്ങളിൽ നിറഞ്ഞു നിന്നയാളാണ്. ആലന്തൂർ, മാധവരം, റോയപുരം തുടങ്ങി അണ്ണാഡിഎംകെ ശക്തികേന്ദ്രങ്ങളിലാണു ബിജെപി രണ്ടാമതെത്തിയിരിക്കുന്നത്.

ഡിഎംകെയ്ക്കു പകരക്കാരായി അണ്ണാഡിഎംകെയെന്നതു മാറി ചില വോട്ടർമാരെങ്കിലും ബിജെപിയെ കണ്ടു തുടങ്ങിയോയെന്ന സംശയം ഇതുണർത്തുന്നുണ്ട്. അതേസമയം, ബിജെപി നേടിയ 308 സീറ്റുകളിൽ 200 എണ്ണവും പരമ്പരാഗത ശക്തികേന്ദ്രമായ കന്യാകുമാരി ജില്ലയിലാണെന്ന മറുപുറവുമുണ്ട്. 1996ൽ ഒറ്റയ്ക്കു മത്സരിച്ചു കന്യാകുമാരിയിലെ പത്മനാഭപുരം സീറ്റ് ബിജെപി നേടിയിരുന്നു. അതിനു ശേഷം സംസ്ഥാനത്ത് പാർട്ടിയുടെ വളർച്ച പടവലങ്ങ പോലെ താഴോട്ടാണ്. അതിനാൽ, തദ്ദേശ തിരഞ്ഞെടുപ്പിലെ ചെറിയ നേട്ടങ്ങൾ രാഷ്ട്രീയ സൂചനയായി കാണാനാകില്ലെന്ന വിലയിരുത്തലുമുണ്ട്. 2024 ലോക്സഭാ തിരഞ്ഞെടുപ്പിൽ അണ്ണാഡിഎംകെ സഖ്യത്തിനൊപ്പം തന്നെ മത്സരിക്കുമെന്ന ബിജെപി സംസ്ഥാന അധ്യക്ഷന്റെ പ്രഖ്യാപനവും ശ്രദ്ധേയം.

ബംഗാൾ ഉൾക്കടലിൽ രൂപംകൊള്ളുന്ന ന്യൂനമർദങ്ങൾ ഇടയ്ക്കിടെ തമിഴ്നാട്ടിലെ കാലാവസ്ഥ തകിടം മറിക്കാറുണ്ട്. അപ്രതീക്ഷിതമായി രൂപംകൊള്ളുന്ന രാഷ്ട്രീയ ന്യൂന മർദങ്ങളാണു ഇവിടെ പല തിരഞ്ഞെടുപ്പുകളുടെയും ഗതി നിർണയിക്കുന്നത്. ഇപ്പോൾ ആ കാറ്റ് വീശിയതു ഡിഎംകെയ്ക്കും എം.കെ.സ്റ്റാലിനും അനുകൂലമായാണ്. രാഷ്ട്രീയ വൃത്തങ്ങളിലെവിടെയോ രൂപം കൊള്ളുന്ന മറ്റൊരു ന്യൂനമർദത്തിൽ അതിന്റെ ദിശ വീണ്ടും മാറി മറയാം.

English Summary: From Karunanidhi to Stalin and DMK's Big Win; Winds of Change in Tamil Nadu Politics