സൂനാമി പോലും തൊടാത്ത തീരത്തെ നശിപ്പിച്ച് വികസനം?; ശംഖുമുഖത്തെ നാശം മുന്നറിയിപ്പ്

നോക്കി നിൽക്കെ കടലെടുക്കുക– ശംഖുമുഖത്തെ കടലാക്രമണത്തെ ഇതിലും നന്നായി വിശേഷിപ്പിക്കാൻ കഴിയില്ല. സൂനാമി പോലും തൊട്ടിട്ടില്ലാത്ത തീരത്തെ താണ്ടി ശംഖുമുഖം എയർപോർട്ട് റോ‍ഡ് വീണ്ടും കടലെടുത്തത് ആശങ്കയുണ്ടാക്കുകയാണ്. 2003ൽ ശംഖുമുഖത്തെ ബീച്ച് റോഡിൽ നിന്ന് 200 മീറ്ററോളം ദൂരെ നീണ്ടു കിടന്ന തീരമാണ് 2019ൽ ചുരുങ്ങിച്ചുരുങ്ങി ഒടുവിൽ റോഡിന്റെ തന്നെ അന്തകനായി മാറിയത്. റോഡ് ശക്തിപ്പെടുത്തിയപ്പോഴാകട്ടെ അതും നാശത്തിന്റെ വക്കിലായി. കേരളത്തിന്റെ തെക്കൻ തീരത്ത് ഇതുവരെ നടത്തിയിട്ടുള്ള അശാസ്ത്രീയ പ്രവർത്തനങ്ങളുടെ ആകെ ഫലമാണ് ഇപ്പോൾ ശംഖുമുഖം ഉൾപ്പെടെയുള്ള തീരമേഖലയിൽ പ്രതിഫലിക്കുന്നത്. കടലാക്രമണത്തിന് ഒരു കാരണമല്ല, ഒരുപാട് കാരണങ്ങളാണുള്ളത്. അവയുടെയെല്ലാം സംയുക്ത ഫലമാണ് ഇപ്പോൾ ശംഖുമുഖം ബീച്ചിന്റെ അവസ്ഥ. ശംഖുമുഖം ബീച്ചിൽ മുൻപുണ്ടായിരുന്ന പടിക്കെട്ടു മുതൽ ശംഖുമുഖം എയർപോർട്ട് റോഡിനു ബലമേകാൻ ഇപ്പോൾ നിർമിച്ചവ ഉൾപ്പെടെ കടലാക്രമണം കൂട്ടുകയേ ഉള്ളൂവെന്നാണ് ഭൗമ ശാസ്ത്ര പഠന കേന്ദ്രത്തിൽ മറൈൻ സയൻസ് വിഭാഗത്തിന്റെ മേധാവിയായിരുന്ന കെ.വി.തോമസ് പറയുന്നത്. തീരത്തെ മണൽ കാർന്നെടുക്കലും തിരികെ നിക്ഷേപിക്കലും കടലിന്റെ സ്വാഭാവിക പ്രക്രിയയാണ്. ബീച്ച് എത്ര വലുതായാലും അതിൽ നടത്തുന്ന നിർമാണ പ്രവർത്തനങ്ങൾ ഈ സ്വാഭാവിക പ്രക്രിയയ്ക്കു മാറ്റമുണ്ടാക്കും. മണൽത്തിട്ടകൾ തിരകളെ ശാന്തമാക്കുകയാണ് ചെയ്യുന്നത്. ഒരു മീറ്റർ ആഴമുള്ള സമുദ്ര ഭാഗത്ത് മുക്കാൽ മീറ്ററിലധികം തിര ഉയരില്ല. എന്നാൽ മനുഷ്യന്റെ നിർമാണ പ്രവർത്തനങ്ങളിലൂടെ കടലിന്റെ ആഴം കൂടുമ്പോൾ തിരയുടെ ഉയരവും ശക്തിയും കൂടുന്നു. കൂടുതൽ കരഭാഗത്തേക്കു തിരകളെത്താൻ ഇതു കാരണമാകും–കെ.വി.തോമസ് പറയുന്നു.

കടൽഭിത്തിയും പ്രശ്നം

കടലാക്രമണം തടയാൻ വ്യാപകമായി നിർമിക്കുന്ന കടൽഭിത്തികൾ തീരത്തെ സംരക്ഷിക്കുകയല്ല, നശിപ്പിക്കുകയാണ് ചെയ്യുന്നതെന്ന് കെ.വി.തോമസ് പറയുന്നു. സാധാരണ നിലയിൽ തിരകൾ പതിയെ കരയിലേക്കു കയറി, അതുപോലെ പതിയെയാണ് തിരികെയിറങ്ങുന്നത്. എന്നാൽ അവിടെ കടൽഭിത്തി വരുന്നതോടെ തിരയുടെ ഗതി മാറുന്നു. കരയിലേക്കു കയറി സാവധാനം തിരികെയിറങ്ങേണ്ട തിരകൾ ഉയർന്നു പൊങ്ങി ശക്തമായി നിലത്തടിക്കുന്ന സ്ഥിതി വരുന്നു. കൂടുതൽ മണ്ണ് ഇളകാൻ ഇതു കാരണമാകും.

ഓഖി പ്രശ്നമായി

ശക്തിയേറിയ കാറ്റുകളുള്ളപ്പോഴോ കാലവർഷ സമയത്തോ ആണ് കേരള തീരത്തു കാര്യമായ രീതിയിൽ മണൽ കടലെടുക്കുന്നത്. കാലവർഷ സമയത്ത് ഇത്തരത്തിൽ കടലെടുക്കുന്ന മണ്ണ് തിരികെ നിക്ഷേപിക്കപ്പെടാൻ കുറഞ്ഞത് 2–3 മാസം എടുക്കും. ഓരോ വർഷവും ഇത്തരത്തിൽ തീരം കുറഞ്ഞും കൂടിയും മാറിക്കൊണ്ടേയിരിക്കും. എന്നാൽ ഓഖി വന്നപ്പോൾ തീരം കൂടുതലായി കടലെടുത്തു. കാലവർഷത്തിൽ കടലെടുത്ത മണ്ണ് തിരികെ നിക്ഷേപിക്കപ്പെടുന്നതിനു മുൻപെയാണ് ഓഖിയെത്തിയത്. അടുത്ത കാലവർഷത്തിനു മുൻപ് ഒലിച്ചു പോയ മണ്ണ് തിരികെ നിക്ഷേപിക്കപ്പെട്ടില്ല. കാലവർഷത്തിൽ തിര ശക്തിയായി അടിച്ചപ്പോഴും തീരം കൂടുതൽ ദുർബലമാവുകയാണുണ്ടായത്. അതിനെത്തുടർന്നാണ് ഇപ്പോഴും തുടരുന്ന കടലാക്രമണങ്ങൾ.

സംസ്ഥാനത്ത് അതിതീവ്ര കടലാക്രമണമുണ്ടാകുന്ന 10 പ്രദേശങ്ങൾ ഹോട്സ്പോട്ടുകളായി സംസ്ഥാന സർക്കാർ നിശ്ചയിച്ചിട്ടുണ്ട്. തിരുവനന്തപുരം ജില്ലയിലെ ശംഖുമുഖം, കൊല്ലംകോട്, കൊല്ലത്തെ ആലപ്പാട്, ആലപ്പുഴയിലെ ഒറ്റമശ്ശേരി, എറണാകുളത്തെ ചെല്ലാനം, തൃശൂരിലെ കൊടുങ്ങല്ലൂർ, മലപ്പുറത്തെ പൊന്നാനി, കോഴിക്കോട്ടെ കാപ്പാട്, കണ്ണൂരിലെ തലശ്ശേരി, കാസർകോട്ടെ വലിയപറമ്പ് എന്നിവയാണ് അതിതീവ്ര കടലാക്രമണമുണ്ടാകുന്ന കേന്ദ്രങ്ങൾ.

ഇവിടങ്ങളിൽ നിലവിലുള്ള താൽക്കാലിക നിർമാണങ്ങൾ നീക്കം ചെയ്യാനും കടലാക്രമണ പ്രതിരോധത്തിനു സ്ഥിരം സംവിധാനം ഒരുക്കാനുമാണ് ഹോട്സ്പോട്ടുകൾ നിശ്ചയിച്ചതെന്നാണു മന്ത്രി റോഷി അഗസ്റ്റിൻ അന്നു പറഞ്ഞത്. എന്നാൽ കടലാക്രമണ പ്രതിരോധ സംവിധാനം ശരിയായ രീതിയിലല്ല നിർമിക്കുന്നതെന്നതിന്റെ ഓർമപ്പെടുത്തലാണ് ശംഖുമുഖത്ത് ആവർത്തിക്കുന്ന കടലാക്രമണം.

പൂന്തുറ ഭാഗത്തു നിന്നു തുടങ്ങിയ തീര ശോഷണമാണ് ഇപ്പോൾ ശംഖുമുഖത്തെത്തിയതെന്നാണ് കെ.വി.തോമസ് പറയുന്നത്. കരമനയാർ വന്നു ചേരുന്ന ഭാഗത്ത് പൂന്തുറ പൊഴിയിൽ മനുഷ്യന്റെ ഇടപെടലുകൾ ഉണ്ടാക്കിയ മാറ്റമാണ് മൂല കാരണം. പൊഴികൾ മാറിമറിയുന്ന സ്വഭാവമുള്ളവയാണ്. അതിൽ മനുഷ്യൻ ഇടപെടുമ്പോൾ അതിന്റെ സ്വാഭാവിക പ്രവർത്തന രീതി മാറുകയും മറ്റു പ്രത്യാഘാതങ്ങളുണ്ടാവുകയും ചെയ്യും. അവിടെ കടലാക്രമണം തുടങ്ങിയപ്പോൾ കടൽഭിത്തി നിർമിച്ചു. ഒരിടത്തു കടൽ ഭിത്തി നിർമിച്ചാൽ അതിനു ശേഷമുള്ള ബീച്ച് ഭാഗം പതിയെ ഇല്ലാതാകുകയാണ് ചെയ്യുന്നത്. അത്തരത്തിൽ പതിയെ ബീച്ച് തന്നെ ഇല്ലാതാക്കുന്നതാണ് കടൽഭിത്തി.