കൗതുകങ്ങളേറെ, വിവാദങ്ങളും; തൃക്കാക്കരപ്പൂരം കൊടിയിറങ്ങുമ്പോൾ...

∙ വാക്കുകൾ കൊണ്ടു കീറിമുറിച്ച് 

വികസനം, സിൽവർലൈൻ എന്നൊക്കെപ്പറഞ്ഞു പ്രചാരണം തുടങ്ങിയെങ്കിലും ഒട്ടും വൈകാതെ തൃക്കാക്കരയുടെ അന്തരീക്ഷം രാഷ്ട്രീയ വിവാദങ്ങളുടെയും ആക്ഷേപങ്ങളുടെയും ശബ്ദഘോഷങ്ങളിൽ മുങ്ങി. ‘കഴിഞ്ഞ തിരഞ്ഞെടുപ്പിൽ പറ്റിയ അബദ്ധം തിരുത്താനുള്ള ഒരവസരം കൂടി തൃക്കാക്കരയ്ക്ക് ഒരു സൗഭാഗ്യമായി കൈവന്നിരിക്കുകയാണ്’ എന്ന് എൽഡിഎഫ് കൺവൻഷനിൽ മുഖ്യമന്ത്രി പിണറായി വിജയൻ പ്രസംഗിച്ചതോടെയാണ് ആദ്യ വെടി പൊട്ടിയത്. പി.ടി.തോമസിന്റെ വേർപാടിനെ മുഖ്യമന്ത്രി സൗഭാഗ്യമായി കാണുന്നുവെന്ന ആക്ഷേപമാണു യുഡിഎഫ് ഉയർത്തിയത്. 

തൃക്കാക്കരയിൽ എൽഡിഎഫ് പ്രചാരണത്തിനു നേതൃത്വം കൊടുത്ത മുഖ്യമന്ത്രിക്കെതിരെ കെപിസിസി അധ്യക്ഷൻ െക.സുധാകരൻ ‘ചങ്ങലയിട്ട നായയെപ്പോലെ’ എന്ന പരാമർശം തടത്തിയതോടെ അടുത്ത വെടി പൊട്ടി. അതിനു മറു വെടിയായി സിപിഎം കണ്ണൂർ ജില്ലാ സെക്രട്ടറി എം.വി.ജയരാജന്റെ സുധാകര നിഗ്രഹം. പിന്നാലെ സുധാകരനെ ന്യായീകരിക്കാൻ യുഡിഎഫ് നേതാക്കളുടെ ശ്രമം. കണ്ണൂരിൽ സാധാരണ പറയുന്ന പ്രയോഗം മാത്രമാണ് അതെന്നായിരുന്നു പ്രതിപക്ഷ നേതാവ് വി.ഡി.സതീശന്റെ പ്രതികരണം. മലയാള അധിക്ഷേപ താരാവലിയുടെ ഉപജ്ഞാതാവാണു മുഖ്യമന്ത്രിയെന്നായിരുന്നു രമേശ് ചെന്നിത്തലയുടെ വിമർശനം. സുധാകരനെതിരെ പൊലീസ് കേസും അതിനെതിരെ ഏതാനും യുഡിഎഫ് പ്രതിഷേധങ്ങളുമായി ആ വിവാദം കെട്ടടങ്ങി. 

∙ വിഡിയോയിൽ കുരുങ്ങിയ വിവാദം 

എൽഡിഎഫ് സ്ഥാനാർഥിയെ അപകീർത്തിപ്പെടുത്തുന്ന വിധത്തിലുള്ള വിഡിയോ ദൃശ്യം പുറത്തു വന്നതോടെ പ്രചാരണം സർവ മര്യാദകളും വിട്ടു താഴേക്കു പോയി. അതിന്റെ പിതൃത്വത്തെച്ചൊല്ലി യുഡിഎഫും എൽഡിഎഫും ഏറ്റുമുട്ടിയതു തൃക്കാക്കര ജീവിതം കലുഷിതമാക്കി. സംഭവത്തിൽ അറസ്റ്റുകൾ തുടരുമ്പോഴും പ്രതികളുമായി ബന്ധമുണ്ടെന്നു സമ്മതിക്കാൻ ഒരു പാർട്ടിയും തയാറല്ല; സ്വാഭാവികം! തൃക്കാക്കരയിൽ പ്രത്യേകിച്ചു വേഷമൊന്നും ഇല്ലാതിരുന്ന പി.സി.ജോർജിനും വിദ്വേഷ പ്രസംഗങ്ങളുടെ സാഹചര്യത്തിൽ പ്രസക്തി കൈവന്നു. പി.സിയുടെ അറസ്റ്റിനെ നാടകം എന്നു വിശേഷിപ്പിച്ചാണു സർക്കാരിനെതിരെ യുഡിഎഫ് ആഞ്ഞടിച്ചത്. പി.സി.ജോർജാകട്ടെ, ജയിലിൽ നിന്നിറങ്ങിയ ശേഷം മുഖ്യമന്ത്രിയെ രൂക്ഷമായി വിമർശിക്കാനും മറന്നില്ല. ഫലം എന്താണെങ്കിലും പറയാനുള്ളതു പറഞ്ഞശേഷം പി.സി അദ്ദേഹത്തിന്റെ വഴിക്കു പോയി. 

∙ വോട്ടു ദിനത്തിലും കുമ്പിടിമാർ 

ഒരിടത്തു വോട്ടുള്ളയാൾ മറ്റൊരിടത്തു വോട്ടു ചെയ്യാനെത്തുന്ന മറ്റൊരു തരം കുമ്പിടി മാജിക്! കള്ളവോട്ടായിരുന്നു തിരഞ്ഞെടുപ്പു ദിവസത്തെ വലിയ ആക്ഷേപം. വോട്ടു ചെയ്യാൻ വരാത്ത, മുംബൈയിലുള്ള വോട്ടറുടെ പേരിൽ കള്ളവോട്ടു ചെയ്യാനെത്തിയതു ഡിവൈഎഫ്ഐ നേതാവാണെന്നു യുഡിഎഫ് ആരോപണം. പരിശോധിക്കുമെന്ന ഒഴുക്കൻ മറുപടിയാണ് എൽഡിഎഫ് നൽകിയത്. സിപിഎം വ്യാപകമായി കള്ളവോട്ടു ചെയ്തെന്ന ആക്ഷേപം യുഡിഎഫ് ഉയർത്തിയപ്പോൾ കള്ളവോട്ടു ചെയ്യുന്നതു യുഡിഎഫുകാരാണെന്നായിരുന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ ആക്ഷേപം. ഇതിനിടെ, പോളിങ് ബൂത്ത് വളപ്പിൽ മാധ്യമ പ്രവർത്തകരോടു സംസാരിക്കാൻ ശ്രമിച്ച ബിജെപി സ്ഥാനാർഥി എ.എൻ.രാധാകൃഷ്ണനെ പൊലീസ് തടഞ്ഞപ്പോൾ അദ്ദേഹം ഇടഞ്ഞു. അതു പോയി ‘വിജയനോടു’ പറഞ്ഞാൽ മതിയെന്നായിരുന്നു ചൂടൻ പ്രതികരണം! അങ്ങനെ, അപൂർവമായൊരു പ്രചാരണ കാലം അനുഭവിച്ചു തീർത്തു, തൃക്കാക്കര.

∙ വോട്ടെണ്ണലെങ്ങനെ?

1) വെള്ളിയാഴ്ച രാവിലെ 7:30ന് സ്ഥാനാർഥികളുടെയും രാഷ്ട്രീയ പാർട്ടി പ്രതിനിധികളുടെയും സാന്നിധ്യത്തിൽ എറണാകുളം മഹാരാജാസ് കോളജിലെ സ്ട്രോങ് റൂം തുറന്ന് വോട്ടിങ് മെഷീനുകൾ പുറത്തെടുത്തു. തുടർന്ന് മെഷീനുകൾ കൗണ്ടിങ് ടേബിളുകളിലേക്കു മാറ്റി.

2) വോട്ടെണ്ണുന്നതിനായി 21 കൗണ്ടിങ് ടേബിളുകൾ. ഓരോ ടേബിളിലും ഒരു കൗണ്ടിങ് സൂപ്പർവൈസർ, ഒരു കൗണ്ടിങ് അസിസ്റ്റന്റ് കൂടാതെ ഒരു മൈക്രോ ഒബ്സർവർ എന്നിവർ ഉണ്ടാകും. എല്ലാ കൗണ്ടിങ് ടേബിളുകളിലും സ്ഥാനാർഥികളുടെ ഓരോ കൗണ്ടിങ് ഏജന്റുമാരും.

3) കൗണ്ടിങ് ഹാളിലേക്കു സ്ഥാനാർഥികൾക്കും അവരുടെ ഇലക്‌ഷൻ ഏജന്റിനും കൗണ്ടിങ് ഏജന്റുമാർക്കും മാത്രം പ്രവേശനം. കൗണ്ടിങ് ഹാളിൽ മൊബൈൽ ഫോൺ അനുവദിക്കില്ല.

4) ആദ്യം എണ്ണിയത് പോസ്റ്റല്‍ വോട്ടുകൾ. തുടര്‍ന്ന് ഇലക്ട്രോണിക് വോട്ടിങ് യന്ത്രങ്ങളിലേക്ക്. 

5) മുഴുവന്‍ വോട്ടുകളും എണ്ണിത്തീരാന്‍ 12 റൗണ്ടുകളാണ് ആവശ്യമായി വരിക. ഒരു റൗണ്ടില്‍ 21 ബൂത്തുകൾ എണ്ണും. ആദ്യ റൗണ്ടിൽ ഓക്സിലറി ബൂത്തുകൾ ഉൾപ്പെടെ 1 മുതൽ 15 വരെയുള്ള ബൂത്തുകളിലെ വോട്ടുകളാണ് എണ്ണുക. തുടർന്ന് മറ്റ് ബൂത്തുകളിലെ വോട്ടുകൾ ഇങ്ങനെ എണ്ണും. ആദ്യ 11 റൗണ്ടുകളിൽ 21 ബൂത്തുകൾ വീതവും അവസാന റൗണ്ടിൽ 8 ബൂത്തുകളുമാകും എണ്ണുക. ആകെ 239 ബൂത്തുകളാണ് തൃക്കാക്കര നിയോജകമണ്ഡലത്തിലുള്ളത്.

6) വോട്ടെണ്ണൽ കേന്ദ്രമായി പ്രവർത്തിക്കുന്ന മഹാരാജാസ് കോളജിന് ജൂൺ 3ന് അവധിയായിരിക്കും.

English Summary: A Month of Political Festival: Thrikkakara is Moving to the Final Day