‘കേരളത്തിലേക്ക് അരിയും ഗോതമ്പും കുറയും; മന്ത്രി ചോദിച്ചു: റാഗി കൊടുത്തുകൂടേ..?’

കാലാവസ്ഥാ മാറ്റം കാരണം കാർഷിക ഉൽപാദനത്തിലുണ്ടായ കുറവ് ലോകമാകെ ഭക്ഷ്യ പ്രതിസന്ധി സൃഷ്ടിച്ചിരിക്കുകയാണ്. യുക്രെയ്നെതിരെ റഷ്യ നടത്തുന്ന യുദ്ധം പ്രശ്നങ്ങൾ കൂടുതൽ വഷളാക്കിയിരിക്കുന്നു. കാലാവസ്ഥയിലെ മാറ്റം ഇന്ത്യയിലെ കാർഷികോൽപാദനത്തെ വരെ ബാധിച്ചു തുടങ്ങി. ഒരു ഉപഭോക്തൃ സംസ്ഥാനമെന്ന നിലയിൽ കരുതലോടെ നീങ്ങേണ്ട കാലമാണിത്. കേരളത്തിൽ മുൻഗണനാ വിഭാഗത്തിനു മാത്രമായി ഗോതമ്പു വിതരണം പരിമിതപ്പെടുത്തിയിരിക്കുകയാണിപ്പോൾ. മറ്റുള്ളവർക്കുള്ള റേഷൻ നിർത്തലാക്കി. ഇതു കേരളമുൾപ്പെടെയുള്ള സംസ്ഥാനങ്ങളെ ഗുരുതരമായി ബാധിച്ചിട്ടുണ്ട്. ഗോതമ്പ് ക്ഷാമമാണു കേന്ദ്രം കാരണമായി പറയുന്നത്. വരാനിരിക്കുന്ന നാളുകളിലെ പ്രശ്നങ്ങളിലേക്കുള്ള ചൂണ്ടുപലക കൂടിയാവുകയാണിതെന്നു പറയുന്നു ഭക്ഷ്യ-പൊതുവിതരണ വകുപ്പു മന്ത്രി ജി.ആർ. അനിൽ. ഭക്ഷ്യ സംസ്കാരത്തിൽ ചില മാറ്റങ്ങൾ വരുത്തുന്നതിനെക്കുറിച്ചു കേരളം ചിന്തിച്ചു തുടങ്ങിയിട്ടുണ്ട്. റേഷൻ കടകൾ വഴി റാഗി വിതരണം ചെയ്യുന്നതിനെപ്പറ്റിയും ആലോചിക്കുന്നു. ആവശ്യത്തിന് ഗോഡൗണുകൾ ഇല്ലാത്തത് കേരളത്തിൽ ഭക്ഷ്യധാന്യ സംഭരണത്തിനു വെല്ലുവിളിയാകുന്നുവെന്ന പ്രശ്നവുമുണ്ട്. അതേസമയം നെല്ലുൽപാദന രംഗത്ത് അടുത്ത കാലത്ത് നടത്തിയ ചില പരീക്ഷണങ്ങൾ ആത്മവിശ്വാസം നൽകിയിട്ടുണ്ടെന്നും മന്ത്രി പറയുന്നു. എന്താണ് ഭാവിയിൽ കേരളത്തിലെ ഭക്ഷ്യമേഖല നേരിടാനിരിക്കുന്ന വെല്ലുവിളി? റേഷൻ കടകളിലൂടെ റാഗി വരുമ്പോൾ നാം നമ്മുടെ ഭക്ഷണരീതിയും മാറ്റേണ്ടി വരുമോ? കേരളത്തിനാവശ്യമായ ഭക്ഷ്യധാന്യം നമുക്കു തന്നെ ഉൽപാദിപ്പിക്കാനാകാത്തതിൽ എന്താണു വെല്ലുവിളി? കോവിഡ് കാലത്തു വിതരണം ചെയ്തതു പോലെയുള്ള കിറ്റ് വിതരണം ഇനിയുമുണ്ടാകുമോ? ഈ ചോദ്യങ്ങൾക്കുള്ള ഉത്തരവുമായി, കേരളത്തിലെ ഭക്ഷ്യ പൊതുവിതരണ സമ്പ്രദായത്തിലെ ഭാവി -വർത്തമാനങ്ങളെപ്പറ്റിയും മുന്നൊരുക്കങ്ങളെപ്പറ്റിയും മനോരമ ഓൺലൈൻ പ്രീമിയം അഭിമുഖ പരമ്പരയായ ‘ദി ഇൻസൈഡറി’നോടു സംവദിക്കുകയാണ് മന്ത്രി ജി.ആർ.അനിൽ...

∙ റേഷൻ വിതരണം: കേന്ദ്ര നിലപാടുകൾ പ്രതിസന്ധി

സ്റ്റാറ്റ്യൂട്ടറി റേഷൻ നൽകിയിരുന്ന സംസ്ഥാനമാണു കേരളം. 16.5 ലക്ഷം ടൺ അരിയാണ് ശരാശരി റേഷൻ വിതരണത്തിന് ഇവിടെ ആവശ്യം. ഇതിൽ 4.1 ലക്ഷം ടൺ മാത്രമാണ് നമ്മുടെ ഉൽപാദനം. അതാണ് കുത്തരിയായി റേഷൻ കടകളിലൂടെ വിതരണം ചെയ്യുന്നത് ബാക്കി 12.40 ലക്ഷം ടൺ കേന്ദ്ര സർക്കാരാണു നൽകേണ്ടത്. ഭക്ഷ്യസുരക്ഷാ നിയമം നടപ്പിലാക്കിയപ്പോൾ ബിപിഎൽ കാർഡ് ഉടമകൾക്കു മാത്രമായി റേഷൻ സബ്സിഡി വെട്ടിച്ചുരുക്കി. കേരളത്തിലെ 57 ശതമാനം പേരും കേന്ദ്രത്തിന്റെ കണക്കനുസരിച്ച് മുൻഗണനേതരം എന്നറിയപ്പെടുന്ന എപിഎല്ലുകാരാണ്. മുൻഗണനാ വിഭാഗത്തിൽ 43 ശതമാനം പേരേയുള്ളൂ. അവർക്കു മാത്രമായി റേഷൻ സബ്സിഡി പരിമിതപ്പെടുത്തിയതിനെത്തുടർന്ന് കേരളത്തിനു ലഭിച്ചിരുന്ന അരിയിൽ രണ്ടു ലക്ഷം ടണ്ണിന്റെ കുറവു വന്നു. മുൻഗണനാ വിഭാഗത്തിന് അരിയും ഗോതമ്പും കിലോയ്ക്ക് രണ്ടു രൂപ നിരക്കിലാണു കേന്ദ്രം നൽകുന്നത്. മുൻഗണനേതര (APL) കാർഡുകാർക്കു നൽകിയിരുന്ന ഗോതമ്പിന്റെ വിഹിതം നിർത്തലാക്കിയിരിക്കുകയാണ്. ഗോതമ്പ് ക്ഷാമമാണ് കാരണമായി പറയുന്നത്. ഇതൊക്കെ വ്യക്തമാക്കുന്നത് ഇനിയങ്ങോട്ട് പുറത്തു നിന്ന് അരിയും ഗോതമ്പും ലഭ്യമാകാനുള്ള സാധ്യത വല്ലാതെ കുറയുമെന്നതാണ്. കേന്ദ്രം ഈ സമീപനത്തിൽ മാറ്റം വരുത്താൻ തയാറാകാത്തിടത്തോളം കാര്യങ്ങൾ ഇങ്ങനെയൊക്കെത്തന്നെ ആയിരിക്കും.

ഈ സർക്കാർ അധികാരത്തിൽ വന്നശേഷം ഭക്ഷ്യമന്ത്രിയെന്ന നിലയിൽ ഞാൻ മൂന്നുതവണ കേന്ദ്ര മന്ത്രിയുമായി ഈ വിഷയങ്ങൾ ച‍ർച്ച ചെയ്തിരുന്നു. അവസാനമായി കണ്ടപ്പോൾ അദ്ദേഹം നിർദേശിച്ചത് കേരളം ഉൽപാദന സങ്കൽപത്തിൽ മാറ്റം വരുത്തണമെന്നാണ്. നെല്ലുൽപാദനം വർധിപ്പിക്കണമെന്നാണ് അതിന്റെ അർഥം. മറ്റൊരു മാർ‍ഗവുമില്ലെന്നാണ് അദ്ദേഹം വ്യക്തമാക്കിയത്. കേരളത്തിനു കേന്ദ്രവിഹിതമായി ലഭിക്കാനിരിക്കുന്ന അരിയുടെ വിഹിതത്തിൽ ചില പുനഃക്രമീകരണങ്ങൾ വരാൻ പോകുന്നുവെന്നാണ് ഇതിൽനിന്നു മനസ്സിലാകുന്നത്. ഈ പശ്ചാത്തലത്തിൽ നിന്നുകൊണ്ട് കേരളം പുതിയ ഉൽപാദന രീതിയെക്കുറിച്ചു ചിന്തിച്ചു തുടങ്ങിയിട്ടുണ്ട്. ‘ഞങ്ങളും കൃഷിയിലേക്ക്’ എന്ന പദ്ധതിയെ ഈ പശ്ചാത്തലത്തിലാണു മനസ്സിലാക്കേണ്ടത്. കേന്ദ്രത്തിന്റെ സമീപനങ്ങൾ മുന്നിൽ കണ്ടുകൊണ്ടുള്ള നടപടികൾ കേരളം നേരത്തേതന്നെ സ്വീകരിച്ചിട്ടുണ്ട്. അതിന്റെ ഫലമായി. 2020 മുതൽ കേരളത്തിലെ നെല്ലുൽപാദനത്തിൽ വർധനവുണ്ടായിട്ടുണ്ട്. നെല്ലു സംഭരണത്തിലെ കാര്യക്ഷമതയാണതിന്റെ ഒരു കാരണം. മറ്റ് ഏതു സംസ്ഥാനത്തേക്കാളും മികച്ച വില നൽകിയാണു നെല്ലു സംഭരിക്കുന്നത്. അത് ഇനിയും കൂടും. ഉൽപാദനത്തിന് അടിസ്ഥാന സൗകര്യം ഒരുക്കാൻ ഹെക്ടറിന് 30,000 രൂപ അനുവദിക്കുന്നുണ്ട്. ഉൽപാദന രംഗത്തേക്കു കർഷകരെ തിരികെക്കൊണ്ടുവരാനും അവരെ ഈ രംഗത്ത് ഉറപ്പിച്ചു നിർത്താനുമുള്ള കൂടുതൽ നടപടികൾ പരിഗണനയിലാണ്.

∙ റേഷൻ കടകൾ വഴി ഇനി റാഗിയും

നമ്മുടെ ഭക്ഷ്യ സംസ്കാരത്തിൽ ചില മാറ്റങ്ങൾ വരുത്തുന്നതിനെക്കുറിച്ചു കേരളം ചിന്തിച്ചു തുടങ്ങിയിട്ടുണ്ട്. അരിയാഹാരമാണ് കേരളത്തിലെ ജനങ്ങൾ കൂടുതൽ കഴിക്കുന്നത്. ജീവിത ശൈലീ രോഗങ്ങളെത്തുടർന്ന് ഗോതമ്പും ഭക്ഷണത്തിന്റെ ഭാഗമായി.എന്നാൽ കേന്ദ്രം ഗോതമ്പു വിതരണം നിർത്തിയിരിക്കുകയാണ്. കമ്പോളത്തിൽ കിലോയ്ക്ക് 36 രൂപയാണ് ഗോതമ്പിന്റെ വില. ഈ സാഹചര്യത്തിലാണ് റേഷൻ കടകളിലൂടെ റാഗി വിതരണം ചെയ്യാൻ ആലോചിക്കുന്നത്.

നാണ്യവിളകൾ കൂടുതൽ ഉൽപാദിപ്പിക്കുന്ന സംസ്ഥാനമാണ് കേരളം. ഇന്ത്യയ്ക്ക് വിദേശനാണയം നേടിത്തരുന്നതിൽ ഇവയ്ക്കു വലിയ പങ്കുണ്ട്. അതിനു പകരമായി കേരളത്തിന് ആവശ്യമായ ഭക്ഷ്യധാന്യങ്ങൾ നൽകേണ്ട ഉത്തരവാദിത്തം കേന്ദ്രത്തിനുണ്ട്. കഴിഞ്ഞ തവണ കേന്ദ്ര മന്ത്രിയെ കണ്ടപ്പോൾ ഞാൻ ഇക്കാര്യം വ്യക്തമാക്കിയിരുന്നു. ഭക്ഷ്യധാന്യത്തിൽ അരിയും ഗോതമ്പും ആവശ്യത്തിനു നൽകാൻ കഴിയുന്നില്ലെങ്കിൽ എന്തുകൊണ്ടു റാഗി നൽകിക്കൂടയെന്ന ചിന്തയും കഴിഞ്ഞ തവണത്തെ യോഗത്തിൽ ഞാൻ പങ്കുവച്ചിരുന്നു. കർണാടകയിൽ റാഗിയുടെ കമ്പോളവില കിലോയ്ക്ക് 36 രൂപയാണ്. ആ വിലയ്ക്ക് നമുക്ക് എടുക്കാൻ കഴിയില്ല. കേരളത്തിനു ഗോതമ്പ് നൽകിയിരുന്ന വിലയ്ക്ക് റാഗി നൽകാൻ കഴിയുമോയെന്നു ചോദിച്ചിരുന്നു. അതിന് അനുകൂലമായ നിലപാടാണ് കേന്ദ്രം സ്വീകരിച്ചിരിക്കുന്നത്. ഓണം കഴിഞ്ഞ് രണ്ടു മാസത്തിനുള്ളിൽ അതിന്റെ തുടക്കം കുറിക്കാൻ കഴിയുമെന്നാണു പ്രതീക്ഷിക്കുന്നത്. കേരളത്തിലെ പഞ്ചായത്തുകളിലെ ഓരോ റേഷൻ കടകളിലെങ്കിലും പരീക്ഷണാടിസ്ഥാനത്തിൽ വിതരണം ചെയ്യാനാണ് ആലോചിക്കുന്നത്. ആട്ട കൊടുത്തതു പോലെ പൊടിച്ചു വിതരണം ചെയ്യുന്നതിനെക്കുറിച്ചാണ് ചർച്ച നടക്കുന്നത്.

കർണാടകത്തിൽ നിന്നാണ് കൂടുതൽ റാഗി സംഭരിക്കുക. 17 ലക്ഷം ടൺ സ്റ്റോക്കുണ്ടെന്നാണ് അവിടുത്തെ മന്ത്രി അറിയിച്ചിട്ടുള്ളത്. കേന്ദ്രത്തിന്റെ സമീപനം അനുകൂലമാണ്. അനുമതി ലഭിച്ചാൽ തുടർ നടപടികൾ സ്വീകരിക്കുന്നതിനും ഇക്കാര്യത്തിൽ ഒരു വിതരണ നയം രൂപീകരിക്കുന്നതിനുമുള്ള ചർച്ചകൾ നടന്നു കൊണ്ടിരിക്കുകയാണ്. റാഗി ഉൽപാദിപ്പിക്കാൻ കഴിയുന്ന ചില മേഖലകൾ കേരളത്തിലുണ്ട്. റാഗി മാത്രമല്ല പയറുവർഗങ്ങൾ ഉൽപാദിപ്പിക്കാനും കഴിയുന്ന ചില മേഖലകൾ നമുക്കുണ്ട്. നെല്ലും അരിയും പോലെ റാഗിയും പയറുവർഗങ്ങളും സംഭരിക്കാനും ന്യായ വിലയ്ക്കു വിതരണം ചെയ്യാനും നമുക്കു കഴിയും.

∙ ഗോതമ്പ് ലഭ്യത ഇനി എളുപ്പമാകില്ല

ഗോതമ്പിന്റെ ഉൽപാദനവും വിതരണവും കേന്ദ്ര സർക്കാർ സ്ഥാര്യ ഏജൻസികളെ ഏൽപിച്ചത് ഈ രംഗത്തു പ്രതിസന്ധിയുണ്ടാക്കിയിരിക്കുകയാണ്. യുക്രെയ്ൻ യുദ്ധമുൾപ്പെടെയുള്ള രാജ്യാന്തര പ്രതിസന്ധി പ്രശ്നങ്ങൾ കൂടുതൽ വഷളാക്കി. ഇപ്പോൾ മുൻഗണനാ വിഭാഗത്തിനു മാത്രമായി ഗോതമ്പു വിതരണം പരിമിതപ്പെടുത്തിയിരിക്കുകയാണ്. മറ്റുള്ളവർക്കുള്ള റേഷൻ നിർത്തലാക്കി. ഇതു കേരളമുൾപ്പെടെയുള്ള സംസ്ഥാനങ്ങളെ ഗുരുതരമായി ബാധിച്ചിരിക്കുകയാണ്.

∙ നെല്ലുൽപാദനത്തിലെ പുതിയ പരീക്ഷണം

നെല്ലുൽപാദന രംഗത്ത് അടുത്ത കാലത്ത് നടത്തിയ ചില പരീക്ഷണങ്ങൾ ആത്മവിശ്വാസം നൽകിയിട്ടുണ്ട്. പ്രതികൂല സാഹചര്യങ്ങളിൽ കൃഷിയിറക്കുന്ന ആലപ്പുഴയിലെ റാണി, ചിത്തിര, മാർത്താണ്ഡൻ കായലിലെ പരീക്ഷണമാണ് ഒരു ഉദാഹരണം. കേരളത്തിന്റെ ചരിത്രത്തിൽ ഇവിടെ ഒരുപൂ കൃഷിമാത്രമാണു നടന്നിട്ടുള്ളത്. എന്നാൽ ഇത്തവണ രണ്ടുപൂ കൃഷി ചിത്തിരക്കായലിൽ വിജയകരമായി പരീക്ഷിക്കാൻ കഴിഞ്ഞു. 500 ഹെക്ടർ ഭൂമിയിലാണ് ഇവിടെ കൃഷിയിറക്കിയത്. അതിലൂടെ 2000 ക്വിന്റൽ നെല്ല് നമുക്ക് അധികമായി ലഭിക്കും. കേരളമൊട്ടാകെയുള്ള കർഷകർ ഇതിൽനിന്നു പ്രചോദനം ഉൾക്കൊള്ളണം.