‘പെൺകുട്ടികളെ ആക്രമിക്കാം എന്ന ബോധമല്ല ആൺകുട്ടികളിൽ വരേണ്ടത്; തെറ്റ് തിരുത്തണം’

സംസ്ഥാനത്ത് അടുത്ത അധ്യയനവർഷം മുതൽ ആൺ, പെൺ വേർതിരിവില്ലാതെ സ്കൂളുകൾ മിക്സഡ് ആക്കണമെന്ന ബാലാവകാശ കമ്മിഷൻ ഉത്തരവ് വലിയ ചർച്ചകൾക്കാണ് വഴി തുറന്നിരിക്കുന്നത്. സർക്കാർ, എയ്ഡഡ് മേഖലകളിലായി ഏതാണ്ട് അഞ്ഞൂറോളം സ്കൂളുകളാണ് സംസ്ഥാനത്ത് ആൺകുട്ടികൾക്കും പെൺകുട്ടികൾക്കും മാത്രമായുള്ളത്. കുട്ടികളെ ചെറിയ ക്ലാസുകൾ മുതൽ ഇടകലർത്തി ഇരുത്തണം എന്ന നിർദേശം പോലും കേരളത്തിൽ വിവാദമാകുകയാണ്. ഈ സാഹചര്യത്തിലാണ് ‘ഇനി പ്രത്യേകം ആൺ, പെൺ സ്കൂളുകൾ വേണ്ട’ എന്ന നിർദേശം നടപ്പിലാക്കേണ്ടതെന്ന പ്രശ്നവും മുന്നിലുണ്ട്. മാത്രവുമല്ല, സ്കൂളുകളിൽ അടിസ്ഥാന സൗകര്യങ്ങൾ ഒരുക്കുന്നതു മുതലുള്ള ഒരുപാട് പ്രായോഗിക കടമ്പകൾ കടക്കാനുമുണ്ട്. എന്തുകൊണ്ടാണ് ബാലാവകാശ കമ്മിഷൻ ഇത്തരമൊരു ഉത്തരവ് പുറപ്പെടുവിച്ചത്? നമ്മുടെ സംസ്ഥാനത്ത് ഇപ്പോഴും ആൺ, പെൺ വിഭാഗങ്ങൾക്ക് പ്രത്യേകം സ്കൂളുകൾ നഗരങ്ങളിൽ പോലുമുണ്ട് എന്നതു കൗതുകകരമായി തോന്നി എന്നാണ് ഇതിനെപ്പറ്റി സംസ്ഥാന ബാലാവകാശ കമ്മിഷൻ അംഗം റെനി ആന്റണി പറയുന്നത്. ഇത്തരം സ്കൂളുകൾ ആരംഭിക്കുന്നതിന് പിന്നിൽ ചരിത്രപരമായ കാരണങ്ങളുണ്ടെന്നും അദ്ദേഹം വ്യക്തമാക്കുന്നു? ആ കാരണങ്ങൾ ഇരുപത്തിയൊന്നാം നൂറ്റാണ്ടിൽ പ്രസക്തമല്ലാതാവുകയാണോ? ഇപ്പോഴും ആൺകുട്ടികൾക്കും പെൺകുട്ടികൾക്കും മാത്രമായുള്ള സ്കൂളുകൾക്ക് സ്വീകാര്യത കിട്ടുന്നത് എന്തുകൊണ്ടാണ്? സ്കൂളുകൾ മിക്സഡ് ആക്കിയതു കൊണ്ടു മാത്രം പ്രശ്നങ്ങൾ തീരുമോ? മാതാപിതാക്കളുടെ ആശങ്കകൾ പരിഹരിക്കാൻ എന്തു ചെയ്യും? സ്കൂളുകൾ മിക്സഡ് ആകുമ്പോൾ രക്ഷിതാക്കളെ മാനസികമായി ഒരുക്കേണ്ടതുമുണ്ട്. പക്ഷേ, ഉത്തരവ് നടപ്പാക്കുന്നതിലെ വലിയ വെല്ലുവിളി ഇതൊന്നുമല്ലെന്നും റെനി ആന്റണി പറയുന്നു. ‘മനോരമ ഓൺലൈൻ പ്രീമിയ’ത്തിൽ മനസ്സു തുറക്കുകയാണ് അദ്ദേഹം...

∙ ബാലാവകാശ കമ്മിഷൻ ഇങ്ങനെയൊരു ഉത്തരവ് പുറപ്പെടുവിച്ചതിന്റെ പശ്ചാത്തലം എന്തായിരുന്നു? സ്കൂളുകളിലെ വേർതിരിവുകളെപ്പറ്റി മുൻപും പരാതികൾ ലഭിച്ചിരുന്നോ?

കുട്ടികളുടെ പാഠപുസ്തകങ്ങളിലെ ജെൻഡർ തുല്യതയെ സംബന്ധിച്ചാണ് കമ്മിഷന് ഏറ്റവുമധികം പരാതികൾ ലഭിച്ചിട്ടുള്ളത്. പാഠപുസ്തകത്തിൽ പുരുഷന്റെ പടം കാണിക്കുമ്പോൾ അതൊരു ഡോക്ടറാവുകയും സ്ത്രീയുടെ പടം കാണിക്കുമ്പോൾ നഴ്സ് ആവുകയുമാണു ചെയ്യുന്നത്. അതുപോലെ, ഡ്രൈവറുടെ പടം പുരുഷനാവുകയും പാചകം ചെയ്യുന്നത് സ്ത്രീ ആവുകയും ചെയ്യുന്ന തരത്തിലുള്ള ചിത്രീകരണങ്ങളും കാലങ്ങളായി തുടരുന്നു. ഇത്തരം പരാതികളുമായി ബന്ധപ്പെട്ട് ജെൻഡർ ന്യൂട്രലായി പുസ്തകങ്ങളെ മാറ്റാൻ കമ്മിഷൻ ഉത്തരവ് പുറപ്പെടുവിച്ചിരുന്നു. അതിന്റെ തുടർച്ചയായാണ് ഈ പരാതി വരുന്നത്.

നമ്മുടെ സംസ്ഥാനത്ത് ഇപ്പോഴും ആൺ, പെൺ വിഭാഗങ്ങൾക്ക് പ്രത്യേകം സ്കൂളുകൾ നഗരങ്ങളിൽ പോലുമുണ്ട് എന്നത് എനിക്കേറെ കൗതുകകരമായി തോന്നി. ഇത്തരം സ്കൂളുകൾ ആരംഭിക്കുന്നതിനു പിന്നിൽ ചരിത്രപരമായ കാരണങ്ങളുണ്ട്. പെൺകുട്ടികൾക്ക് വിദ്യാഭ്യാസം നിഷേധിക്കപ്പെട്ടിരുന്ന ഒരു കാലത്ത്, ഒരുമിച്ചിരുന്ന് പഠിക്കുന്നത് ചിന്തിക്കാൻ പോലും കഴിയാതിരുന്ന കാലത്താണ് പെൺ പള്ളിക്കൂടങ്ങൾ ഉണ്ടാവുന്നത്. അതിന്റെ പിന്നിലെ ഉദ്ദേശത്തെ തെറ്റ് പറയാനാവില്ല. എന്നാലിപ്പോൾ കാലം മാറുകയും വിദ്യാഭ്യാസം എല്ലാവരുടേയും അവകാശമാകുകയും ചെയ്തിരിക്കുന്നു.

കോ എജ്യുക്കേഷനാണ് വേണ്ടത് എന്ന ചിന്താധാരയുടെ ഭാഗമായി 1993ൽ തന്നെ നമ്മുടെ പ്രൈമറി വിദ്യാലയങ്ങളിൽ ബഹുഭൂരിപക്ഷവും മിക്സഡ് ആക്കിയിരുന്നു. പക്ഷേ, ഇപ്പോഴും പ്രശസ്തമായ സർക്കാർ വിദ്യാലയങ്ങൾ ഉൾപ്പെടെ ആണിനും പെണ്ണിനും വേറെ എന്ന രീതിയിൽ തുടരുകയാണ്. സംസ്ഥാനത്ത് പെൺകുട്ടികൾക്ക് മാത്രമായി 280 സ്കൂളുകളും ആൺകുട്ടികൾക്ക് മാത്രമായി 164 സ്കൂളുകളുമാണുള്ളത്. തീർച്ചയായും കാലഘട്ടം ആവശ്യപ്പെടുന്നത് എന്ന രീതിയിലാണ് ബാലാവകാശ കമ്മിഷന്റെ ഈ ഉത്തരവ് ഉണ്ടായത്.

∙ ഉത്തരവ് നടപ്പാക്കുന്നതിലെ ഏറ്റവും വലിയ വെല്ലുവിളിയായി കാണുന്നതെന്താണ്?

ഉത്തരവ് ചർച്ചയായതിനു ശേഷം പലയിടത്തുനിന്നും എന്നെ വിളിച്ചിരുന്നു. ഉത്തരവ് സ്വാഗതം ചെയ്യുമ്പോൾ പോലും നടപ്പാക്കുന്നതിലെ പ്രായോഗിക ബുദ്ധിമുട്ടുകളാണ് പലരും പറഞ്ഞത്. അത് തീർച്ചയായും പരിഹരിക്കാവുന്ന പ്രശ്നങ്ങൾ മാത്രമാണ്. അടുത്ത ഒരു മാസത്തിലോ 3 മാസത്തിലോ ഇത് നടപ്പാക്കണമെന്നല്ല കമ്മിഷൻ പറഞ്ഞിരിക്കുന്നത്. അടുത്ത അധ്യയനവർഷം മുതൽ എന്നാണ്. ശുചിമുറി സൗകര്യങ്ങൾ ഉൾപ്പെടെ പലയിടത്തും ഒരുക്കേണ്ടതുണ്ട്. ഇത് ജില്ലാ പഞ്ചായത്തുകൾക്കും കോർപറേഷനും പിടിഎയ്ക്കും സർക്കാരിനും ഒക്കെ ചെയ്യാം. അതിനു വലിയ സമയം വേണ്ടതില്ല. പക്ഷേ, സ്കൂളുകൾ മിക്സഡ് ആകുമ്പോൾ രക്ഷിതാക്കളെ മാനസികമായി ഒരുക്കേണ്ടതുണ്ട്. അതിന് ഒരു ജനകീയ ക്യാംപെയ്ൻ തന്നെ വേണ്ടി വന്നേക്കാം. മാധ്യമങ്ങളുടെ ഉൾപ്പെടെ സഹായത്തോടെ ഒരു വർഷം അതിന് മാറ്റിവയ്ക്കാവുന്നതാണ്. കൃത്യമായ ബോധവൽക്കരണം ഉറപ്പുവരുത്തുകയും വേണം.