യാത്രക്കാരെ കയ്യിലെടുക്കാൻ കർണാടക ആർടിസി; കേരളയാത്രയ്ക്ക് വമ്പിച്ച ഓഫർ

കോഴിക്കോട്∙ നഷ്ടക്കണക്കും നഷ്ടത്തിലോടുന്ന റൂട്ടുകളും നിരത്തി കേരളത്തിന്റെ ട്രാൻസ്പോർട്ട് കോർപറേഷൻ (കെഎസ്ആർടിസി) നിരങ്ങിനീങ്ങുമ്പോൾ സ്വാതന്ത്ര്യദിനം പോലും എങ്ങനെ മുതലാക്കാമെന്ന പുത്തൻ വിപണനതന്ത്രവുമായാണ് കർണാടക ട്രാൻസ്പോർട്ട് കോർപറേഷൻ രംഗത്തെത്തിയിരിക്കുന്നത്.

75–ാം സ്വാതന്ത്ര്യദിനം ആഘോഷിക്കാൻ കേരളത്തിൽ പോകാനാഗ്രഹിക്കുന്നവർക്ക് പ്രത്യേക ബസ് സർവീസുകളുമായാണ് കർണാടക ആർടിസി എത്തിയിരിക്കുന്നത്. 12 മുതൽ 15 വരെ കണ്ണൂർ, കോഴിക്കോട്, എറണാകുളം, പാലക്കാട്, തൃശൂർ, കോട്ടയം, തിരുവനന്തപുരം എന്നിവിടങ്ങളിലേക്കാണ് ഈ 19 സ്പെഷൽ സർവീസുകൾ. പതിവു സർവീസുകൾക്കു പുറമെയാണിത്.

നാല് പേരോ അതിൽ കൂടുതലോ യാത്രക്കാർ ഒന്നിച്ചു ഒരൊറ്റ ടിക്കറ്റായി ബുക്ക് ചെയ്താൽ ടിക്കറ്റ് തുകയിൽ 5% ഇളവുമുണ്ട്. മടക്കയാത്രയുടെ ടിക്കറ്റ് ഒപ്പം ബുക്ക് ചെയ്യുന്നവർക്ക് 10% ഇളവ് എന്ന മോഹിപ്പിക്കുന്ന ഓഫറും നൽകിയാണ് കർണാടക യാത്രക്കാരെ കയ്യിലെടുക്കുന്നത്. ടിക്കറ്റ് ബുക്ക് ചെയ്യാനും കൂടുതൽ വിവരങ്ങൾക്കും: www.ksrtc.in