വന്ധ്യംകരിച്ചിട്ടും നായ്ക്കൾക്ക് സുഖപ്രസവം; റോഡിൽ ‘കടി’ റെഡി, കോടികൾ മുക്കിയതാര്?

വന്ധ്യംകരണം നടത്തപ്പെട്ട തെരുവുനായ കൊല്ലത്ത് സുഖപ്രസവത്തിലൂടെ 6 കുഞ്ഞുങ്ങൾക്ക് ജന്മം നൽകിയത് കഴിഞ്ഞ ആഴ്ചയാണ്. ശാസ്ത്രം തോറ്റതല്ല, വന്ധ്യംകരണം നടത്താതെ ചെവി ‘വി’ ആകൃതിയിൽ മുറിച്ച് തെരുവിൽ കൊണ്ടുവിടുകയായിരുന്നുവെന്ന് പിന്നീട് കണ്ടെത്തി. ഇത് ഒറ്റപ്പെട്ട സംഭവമല്ല. സംസ്ഥാനത്തിന്റെ പല ഭാഗത്തു നിന്നും സമാനമായ കഥകൾ മുൻപു തന്നെ പുറത്തുവന്നിരുന്നു. ഏതാണ്ട് 4 വർഷമായി തെരുവുനായ വന്ധ്യംകരണം ലക്ഷ്യമിട്ടുള്ള എബിസി (ആനിമൽ ബർത്ത് കൺട്രോൾ) പദ്ധതി സംസ്ഥാനത്ത് പരാജയമാണെന്നാണ് ഈ മേഖലയിലെ വിദഗ്ധർ പറയുന്നത്. ഒരു കിലോമീറ്റർ ദൂരത്തിൽ തന്നെ എണ്ണിയാൽ തീരാത്തത്ര തെരുവുനായ്ക്കളെ കാണാവുന്ന അവസ്ഥയാണ് ഇപ്പോൾ മിക്കയിടത്തും. തെരുവുനായയുടെ ആക്രമണത്തിൽ പരുക്കേറ്റവരുടെയും പേവിഷബാധയേറ്റ് മരിച്ചവരുടെയും എണ്ണവും അതിനിടെ സംസ്ഥാനത്ത് വർധിച്ചു. നഷ്ടപരിഹാരത്തിനും വാക്സിനേഷനുമായി ചെലവിടുന്നത് കോടികൾ. എബിസി പദ്ധതിക്കായി വകയിരുത്തുന്ന ലക്ഷങ്ങൾ എവിടേക്കാണ് പോകുന്നത്? വന്ധ്യംകരിക്കപ്പെടുന്ന നായ്ക്കൾ എന്തുകൊണ്ടാണ് വീണ്ടും പ്രസവിക്കുന്നത്? പേടിച്ചുവിറച്ചല്ലാതെ കാൽനടയാത്രക്കാർക്കും ഇരുചക്രവാഹനക്കാർക്കും റോഡിലൂടെ നടക്കാൻ കഴിയാത്ത അവസ്ഥയാണ്. ഇതിന് ആരാണ് സമാധാനം പറയേണ്ടത്?

∙ പദ്ധതി തുടങ്ങിയിട്ട് വർഷങ്ങൾ

തദ്ദേശസ്വംയംഭരണ സ്ഥാപനങ്ങളുടെ ഉത്തരവാദിത്തമാണ് തെരുവു നായ്ക്കളെ നിയന്ത്രിക്കുക എന്നത്. മുൻപ് തെരുവു നായ്ക്കളെ പിടിച്ച് കൊണ്ടുപോയി കൊന്നുകളയുകയും അതിന്റെ എണ്ണത്തിനനുസരിച്ച് ഡോഗ് ക്യാച്ചേഴ്സിന് പ്രതിഫലം നൽകുകയുമാണ് ചെയ്തുകൊണ്ടിരുന്നത്. പിന്നീട് നായകളെ കൊല്ലാൻ പാടില്ലെന്നും വന്ധ്യംകരണം നടത്തി വിടണം എന്നുമുള്ള നിർദേശം വന്നു. മനേകാ ഗാന്ധി കേന്ദ്രമന്ത്രിയായിരുന്ന കാലത്താണ് ഉത്തരവ് കർക്കശമായി നടപ്പിലാവുന്നത്. 

രാജ്യത്ത് ആദ്യമായി പദ്ധതി ഏറ്റെടുത്തത് ചെന്നൈ കോർപറേഷനാണ്. ഇന്നത്തെ തമിഴ്നാട് മുഖ്യമന്ത്രി എം.കെ. സ്റ്റാലിൻ ആയിരുന്നു അന്ന് ചെന്നൈ മേയർ. പദ്ധതി വൻ വിജയമായി ചെന്നൈ കോർപറേഷൻ നടപ്പിലാക്കി. പിന്നീട് കേരളത്തിൽ പാലക്കാട് ജില്ലയിലെ തൃത്താല ബ്ലോക്ക് പഞ്ചായത്താണ് പദ്ധതി ഏറ്റെടുക്കുന്നത്. ഇവിടെയും എബിസി പദ്ധതി 100 ശതമാനം വിജയം കണ്ടു. അതിനുശേഷം സംസ്ഥാനത്ത് എല്ലായിടത്തേക്കും പദ്ധതി നീണ്ടു. തദ്ദേശസ്വയംഭരണ സ്ഥാപനങ്ങൾ പദ്ധതിക്കായി പ്രത്യേകം ഫണ്ട് നീക്കിവച്ചു തുടങ്ങി.

∙ പരിശീലനം തേടി ഊട്ടിയിൽ

എബിസി പദ്ധതി വ്യാപകമായി നടപ്പിലാക്കി തുടങ്ങുമ്പോൾ ആദ്യം നേരിട്ട വെല്ലുവിളി പരിശീലനം നേടിയ പട്ടി പിടിത്തക്കാരെയും വന്ധ്യംകരണം നടത്താൻ ഡോക്ടർമാരെയും കിട്ടാനില്ല എന്നതായിരുന്നു. ഊട്ടിയിലെ അനിമൽ വെൽഫയർ ബോർഡിന്റെ നേതൃത്വത്തിലുള്ള കേന്ദ്രത്തില്‍ വെറ്ററിനറി ഡോക്ടർമാരെ അയച്ചാണ് നൂതനമായ രീതിയിൽ വന്ധ്യംകരണം നടത്താൻ ആദ്യം പരിശീലനം കൊടുക്കുന്നത്. കേന്ദ്ര സർക്കാരിന്റെ സാമ്പത്തിക സഹായത്തോടെയായിരുന്നു പരിശീലനം. 

ഇതിനുശേഷം ലാപ്രസ്കോപ്പി വഴിയുള്ള വന്ധ്യംകരണം വ്യാപകമായി. ആൺ നായയുടെ വൃഷണങ്ങൾ എടുത്തുമാറ്റുകയും പെൺ നായയുടെ അണ്ഡവാഹിനിക്കുഴൽ ലിഫ്റ്റ് ചെയ്ത് അണ്ഡാശയം എടുത്ത് മാറ്റുകയുമാണ് ഇതുവഴി ചെയ്തിരുന്നത്. മുൻപ് പെൺനായയുടെ വയർ തുറന്ന് ഗർഭപാത്രം എടുത്ത് മാറ്റുകയാണ് ചെയ്തിരുന്നത്. ഊട്ടിയിലെ പരിശീലനത്തിനു ശേഷം മണ്ണുത്തി, പൂക്കോട് വെറ്ററിനറി കോളജുകളിലെ സർജറി വകുപ്പും വന്ധ്യംകരണം നടത്താൻ പരിശീലന പരിപാടികൾ നൽകിയതോടെ പദ്ധതി വ്യാപകമായി.

∙ കണക്കിലെ തിരിമറി

തദ്ദേശസ്വംയംഭരണ സ്ഥാപനങ്ങൾ പ്രത്യേകം ഫണ്ട് നീക്കിവച്ചാണ് പദ്ധതി ഏറ്റെടുത്തത്. ഏറ്റവുമധികം നായകളെ പിടിച്ച് വന്ധ്യംകരിക്കുന്നതിന് അവാർഡും ഉണ്ടായിരുന്നു. കേരളത്തിൽ പാലക്കാട് നഗരസഭയ്ക്കാണ് ആദ്യം അവാർഡ് ലഭിക്കുന്നത്. പക്ഷേ, പദ്ധതിയിലെ പാളിച്ചകളും വൈകാതെ പുറത്തു വന്നു തുടങ്ങി. നായയെ പിടിച്ചു കൊണ്ടുവരുന്നവർ, വന്ധ്യംകരിക്കുന്നവർ എന്നിവരുടെ പ്രതിഫലം  നിശ്ചയിക്കുന്നത് എത്ര നായകളെ വന്ധ്യംകരിച്ചു എന്ന കണക്ക് അടിസ്ഥാനമാക്കിയായിരുന്നു. 

ഇതിന് അതത് വാർഡ് മെംബർമാരുടെ സാക്ഷ്യപ്പെടുത്തലും വേണമായിരുന്നു. എണ്ണം പെരുപ്പിച്ച് കാണിക്കുക എന്നതു മാത്രം ലക്ഷ്യമിട്ടപ്പോൾ ഈ കണക്കിൽ വലിയ പാളിച്ചകൾ ഉണ്ടായി. തെരുവുനായ്ക്കൾ ഇത്ര എന്ന കൃത്യമായ കണക്ക് സംസ്ഥാനത്തില്ല. ഒരു പ്രസവത്തിൽ ജനിക്കാനിടയുള്ള കുട്ടികളുടെയും മറ്റും എണ്ണം കണക്കാക്കി ഒരു എകദേശ കണക്കാണ് പറയാറുള്ളത്. ഈ കണക്കും വന്ധ്യംകരിച്ചതായി അവകാശപ്പെടുന്ന നായകളുടെ കണക്കും തമ്മിൽ വലിയ അന്തരം വന്നു. പദ്ധതി നടത്തിപ്പിന്റെ പേരിൽ വലിയ തട്ടിപ്പ് നടന്നുവെന്ന് വ്യക്തം.

∙ പാളുന്ന ശസ്ത്രക്രിയകൾ

വന്ധ്യംകരണ പ്രക്രിയ വ്യാപകമായെങ്കിലും ശസ്ത്രക്രിയയിലെ പാളിച്ചകൾ മൂലം വന്ധ്യംകരിച്ച നായകൾ തന്നെ ഗർഭം ധരിക്കുന്ന സംഭവങ്ങൾ വൈകാതെ സംസ്ഥാനത്ത് റിപ്പോർട്ട് ചെയ്തു തുടങ്ങി. ഊട്ടിയിൽ പരിശീലനം ലഭിച്ചവർക്ക് പെൺനായയുടെ അണ്ഡാശയം എടുത്ത് കളയുന്ന രീതിയിൽ ശസ്ത്രക്രിയ നടത്താനുള്ള പരിശീലനമാണ് നൽകിയിരുന്നത്. കൃത്യമായി പരിശീലനം നേടാതെ ശസ്ത്രക്രിയ നടത്തിയ പലരും ഒരു വശത്തെ അണ്ഡാശയം മാത്രം എടുത്തു കളഞ്ഞ് നായകളെ വിട്ടു. ശസ്ത്രക്രിയകളുടെ എണ്ണവും വേഗവും കൂട്ടുക മാത്രമായിരുന്നു ലക്ഷ്യം. ഗർഭം ധരിക്കാനുള്ള ശേഷിയെ ഇത് പൂർണമായി ഇല്ലാതാക്കാത്തതു കൊണ്ട് ഒരു അണ്ഡാശയം മാത്രമുള്ള നായകൾ ഗർഭം ധരിക്കുന്ന സംഭവങ്ങൾ വ്യാപകമായി. 

∙ ഫണ്ട് മാത്രം പോരാ

കോർപറേഷനും തദ്ദേശസ്ഥാപനങ്ങളും വന്ധ്യംകരണത്തിനു വേണ്ടി ഫണ്ട് നീക്കിവയ്ക്കുമെങ്കിലും പദ്ധതിയുടെ നടത്തിപ്പ് ചുമതല മൃഗസംരക്ഷണ വകുപ്പിനാണ്. എബിസി പദ്ധതി വിചാരിച്ച ഫലം കാണാതെ പോയതിന് പ്രധാന കാരണം മൃഗസംരക്ഷണ വകുപ്പിന് കീഴിൽ പദ്ധതി നിർവഹണത്തിനുള്ള സംവിധാനങ്ങൾ അപര്യാപ്തമായിരുന്നു എന്നതാണെന്ന് വിദഗ്ധർ പറയുന്നു. നായയെ പിടിക്കാനുള്ള ഡോഗ് ക്യാച്ചേഴ്സ്, അതിനെ കൊണ്ടുവരാനുള്ള വാഹനം, പാർപ്പിക്കാനുള്ള സംവിധാനം, മുറിവ് ഉണങ്ങുന്നതു വരെ 4 ദിവസമെങ്കിലും ഭക്ഷണം നൽകി സംരക്ഷിക്കാനുള്ള സംവിധാനം, തിരികെ വിടാനുള്ള സംവിധാനം തുടങ്ങിയ എല്ലാം ഒരുക്കിയാലേ പദ്ധതി കൃത്യമായി നടപ്പാക്കാനാവൂ. ഇതൊന്നും മൃഗസംരക്ഷണ വകുപ്പിന്റെ കീഴിലില്ല. ഏതാണ്ട് 4 വർഷമായി പദ്ധതി താളം തെറ്റിയ നിലയിലാണ്. ‘സീറോ അച്ചീവ്മെന്റ്’ എന്നു തീർത്ത് പറയാവുന്ന അവസ്ഥ. 

ഒരു വർഷം 2 തവണ പ്രസവിക്കുന്ന നായ 12 കുട്ടികളായി പെരുകുകയാണ് ചെയ്യുന്നത്. 4 വർഷം പിന്നിടുമ്പോൾ ഒരു നായയിൽ നിന്നു തന്നെ 48 കുട്ടികളെങ്കിലും ഉണ്ടായിക്കഴിഞ്ഞു. അതുകൊണ്ട് ഇനി എബിസി പദ്ധതി വിജയകരമായി നടപ്പാക്കണമെങ്കിൽ മുൻപത്തേതിനെക്കാളും ഫണ്ട് വേണ്ടിവരും. കൂടുതൽ കർശനമായി, കൃത്യമായ മേൽനോട്ടത്തോടെ നടപ്പാക്കിയാലേ ആളുകളെ നായ കടിക്കാതിരിക്കൂ.

∙ കുടുംബശ്രീയെ ഒഴിവാക്കി

2018 ലാണ് തെരുവുനായ വന്ധ്യംകരണ പദ്ധതിയിലേക്ക് കുടുംബശ്രീ കടന്നു വരുന്നത്. ഒരു നായയ്ക്ക് 1941 രൂപ എന്ന ചെലവിൽ 67,034 തെരുവ് നായ്ക്കളുടെ വന്ധ്യം കരണത്തിന് കുടുംബശ്രീ മിഷൻ വഴി സർക്കാർ ചെലവിട്ടത് 13 കോടി രൂപ. തെരുവുനായയെ പിടിക്കാൻ കുടുംബശ്രീ അംഗങ്ങൾക്ക് പരിശീലനം നൽകി ചില ജില്ലകളിൽ പദ്ധതി നടന്നെങ്കിലും കുടുംബശ്രീ ഇതിന് പര്യാപ്തമല്ലെന്നും സംഘത്തിൽ വിദഗ്ധരില്ലെന്നും കണ്ടെത്തി 2021ൽ കോടതി ഈ നടപടി സ്റ്റേ ചെയ്യുകയായിരുന്നു. കുടുംബശ്രീക്ക് ദേശീയ മൃഗക്ഷേമ ബോർഡിന്റെ അംഗീകാരമുണ്ടോയെന്നും വന്ധ്യംകരണ നടപടികൾക്കുള്ള പരിശീലനം ഇവർക്ക് ലഭിച്ചിട്ടുണ്ടോയെന്നും സർക്കാർ അറിയിക്കണമെന്നും ഹൈക്കോടതി നിർദേശിക്കുകയും ചെയ്തു. പിന്നീട് കുടുംബശ്രീ പദ്ധതിയിൽ പങ്കാളിയായിട്ടില്ല. ട്രാപ് ഉപയോഗിച്ചാണ് കുടുംബശ്രീ വഴി തെരുവുനായകളെ പിടിച്ചിരുന്നത്. ഇത് പ്രായോഗികമല്ലെന്ന വിമർശനം ആദ്യമേ ഉയർന്നിരുന്നു. 

∙ വേണ്ടത് പ്രത്യേക ടാസ്ക് ഫോഴ്സ്

എബിസി പദ്ധതി ഫലപ്രദമായി നടപ്പാവണമെങ്കിൽ പദ്ധതിക്ക് പ്രത്യേക ടാസ്ക് ഫോഴ്സ് ഉണ്ടായേ തീരൂ. ദിവസേനയുള്ള ജോലികൾക്ക് പുറമേ നായകളുടെ വന്ധ്യംകരണം കൂടി ഏറ്റെടുത്ത് ചെയ്യുക എന്നത് മൃഗസംരക്ഷണവകുപ്പിനെക്കൊണ്ട് മാത്രം കഴിയുന്നതല്ല. വേണ്ട രീതിയിൽ പദ്ധതി നടത്തിപ്പ് ഉറപ്പു വരുത്താൻ ജില്ലാ കലക്ടർമാർക്ക് സർക്കാർ അടുത്തിടെ നിർദേശം നൽകിയിരുന്നു. പക്ഷേ, അതുകൊണ്ട് മാത്രം കാര്യമില്ലെന്നും യാതൊരു രീതിയിലുമുള്ള സോഷ്യൽ ഓഡിറ്റിങും ഇല്ലാതെയാണ് പദ്ധതി മുന്നോട്ടു പോകുന്നതെന്നും മൃഗസംരക്ഷണ വകുപ്പിൽ പെട്ടവർ തന്നെ പറയുന്നു.

എൻജിഒകളെ കൂടി ഉൾപ്പെടുത്തി പദ്ധതി വിപുലീകരിക്കണമെന്നതാണ് പ്രധാന ആവശ്യം. ‘‘എല്ലാ ജില്ലകളിലും ജന്തുക്ഷേമ സമിതികൾ പ്രവർത്തിക്കുന്നുണ്ട്. കലക്ടറാണ് അതിന്റെ ചെയർമാൻ. പക്ഷേ, ആ സമിതികളെയും പദ്ധതിയുടെ ഭാഗമാക്കിയിട്ടില്ല. തെരുവുനായ്കളെ സംരക്ഷിക്കാനുള്ള ധാരാളം എൻജിഒകളും ഇതിലേക്ക് കടന്നുവരാൻ സന്നദ്ധരാണ്. അവരെയൊക്കെ ഉൾപ്പെടുത്തി എബിസി പദ്ധതിക്ക് മാത്രമായി പ്രത്യേകം ടാസ്ക് ഫോഴ്സ് രൂപീകരിക്കുകയും മൃഗസംരക്ഷണ വകുപ്പിൽ നിന്ന് പദ്ധതിയെ മോചിപ്പിച്ച് തദ്ദേശ സ്വയംഭരണ സ്ഥാപനങ്ങൾ നേരിട്ട് നടത്തുന്ന രീതിയിലേക്ക് മാറ്റുകയും വേണം. ജന്തുക്ഷേമസമിതിയിൽ പ്രവർത്തിക്കുന്നവർ ഒരു പ്രത്യേക ചിന്താഗതിയുള്ളവരും ദയയോടെ മൃഗങ്ങളെ സമീപിക്കുന്നവരുമാണ്. അതാണ് വേണ്ടത്. മുറിവ് ഉണങ്ങാതെ പോലും നായകളെ ശസ്ത്രക്രിയ കഴിഞ്ഞ് പുറത്തേക്ക് വിടുന്ന ദയാരഹിതമായ സമീപനം അവസാനിക്കണം. ഒരു സ്വതന്ത്ര ഏജൻസിയെ ഏൽപിച്ചാലേ പദ്ധതി വിജയിക്കൂ.’’ മൃഗസംരക്ഷണ വകുപ്പ് മുൻ ഡപ്യൂട്ടി ഡയറക്ടർ എൻ. സുദോധനൻ പറയുന്നു.

∙ പരിഹാരമാണ് ന്യൂട്രനിങ്

തെരുവുനായകളുടെ വന്ധ്യംകരണം കുറേക്കൂടി ഫലപ്രദമാക്കാൻ ഏർളി ന്യൂട്രനിങ് ഇൻ ഡോഗ്സ് (എൻഡ്) എന്ന പദ്ധതി ഡോ.എം.കെ.നാരായണൻ മുന്നോട്ടു വച്ചിട്ട് ഒരു വ്യാഴവട്ടം കടന്നു പോയി. 2 വർഷത്തെ പഠനത്തിനു ശേഷമാണ് തെരുവുനായകൾ പെറ്റുപെരുകുന്നത് 5 വർഷം കൊണ്ട് തടയാൻ കഴിയുന്ന പദ്ധതി ഡോക്ടർ മുന്നോട്ടുവെച്ചത്. 

8 മുതൽ 12 ആഴ്ച വരെ പ്രായമുള്ള നായകളിലാണ് ഈ രീതിയിൽ വന്ധ്യംകരണം നടത്തുന്നത്. പെൺനായ്ക്കളിൽ അണ്ഡാശയം നിലനിർത്തുകയും ഗർഭപാത്രത്തിന്റെ ട്യൂബുകൾ മുറിച്ചു മാറ്റുകയും ആൺനായ്ക്കളിൽ വാസക്ടമിയിലൂടെ ബീജത്തിന്റെ പ്രവാഹം തടയുകയുമാണ് ചെയ്യുന്നത്. ശസ്ത്രക്രിയയ്ക്കു ശേഷം പ്രതിരോധ കുത്തിവയ്പ്പ് നൽകിയ നായകളെ അതത് സ്ഥലങ്ങളിൽ തിരികെ വിടുകയോ വീടുകളിൽ വളർത്താൻ നൽകുകയോ ചെയ്യാം. പ്രായം കൂടിയ നായകളെ പിടികൂടാനും അവയെ വന്ധ്യംകരണം നടത്താനുമുള്ള പ്രായോഗിക ബുദ്ധിമുട്ട് ഒഴിവാക്കാൻ കഴിയും. എബിസി പദ്ധതിയുടെ ഒപ്പം എൻഡ് പദ്ധതിയും കൊണ്ടു പോയാൽ 5 വർഷം കൊണ്ട് തെരുവുനായ പെരുകുന്നത് തടയാൻ കഴിയും. 

പരീക്ഷണത്തിന്റെ ഭാഗമായി 2012 ൽ അൻപതോളം നായകളെ ഈ രീതിയിൽ വന്ധ്യംകരിച്ചിരുന്നു. അന്ന്  വീ‍ടുകളില്‍ വളർത്താൻ കൊടുത്ത നായക്കുട്ടികൾ ഇപ്പോഴും ഉഷാറാണ്. നാടൻ നായകളെ വളർത്താൻ ആളുകൾക്ക് താൽപര്യം ഉള്ളതിനാൽ ഇത്തരത്തിൽ വന്ധ്യംകരിച്ച നായകളെ ഏറ്റെടുക്കാനും ആളുകൾ മുന്നോട്ടു വന്നു. പാശ്ചാത്യ രാജ്യങ്ങളിലേതു പോലെ നായക്കുട്ടികളെ വീടുകളിൽ വളർത്താൻ വന്ധ്യംകരണം നിർബന്ധമാക്കണമെന്നും ഡോക്ടർ പറയുന്നു.