P Jayarajan @ 70

‘തുടർ അധികാരം: ദുഷിപ്പുകള്‍ വരുന്നുണ്ടോ എന്നത് പാർട്ടി പരിശോധിക്കും’: 70ന്റെ നിറവിൽ കണ്ണൂരിന്റെ ചെന്താരകം

ശാരീരികമായ കഴിവുകളും മറ്റുതരത്തിലുള്ള കഴിവുകളും പരിഗണിച്ചിട്ടായിരിക്കുമല്ലോ നേതൃത്വം ചുമതലകൾ ഏൽപിക്കുക. എന്താണോ നേതൃത്വം ഏൽപിക്കുന്നത് അതു നിർവഹിക്കുക. അതാണു ഞാൻ ചെയ്യുന്നത്. അതേസമയം, വേറൊരു ഘടകമുണ്ട്. പ്രായം ഒരു പ്രശ്നമാണല്ലോ. കമ്യൂണിസ്റ്റ് പാർട്ടി ഇനിയും ശക്തിപ്പെടണം. അതിന് യുവാക്കളുടെ കർമശേഷി ഉപയോഗിക്കണം. എന്നേക്കാൾ സീനിയോറിറ്റി കുറഞ്ഞ ആളുകൾ പാർട്ടിയിൽ പ്രമോട്ട് ചെയ്യപ്പെടുന്നുണ്ട്. ഉയർന്ന കമ്മിറ്റിയിലേക്കു തിരഞ്ഞെടുക്കപ്പെടുന്നുണ്ട്. അത് പാർട്ടിയുടെ പൊതുവായ താൽപര്യത്തിന് ആവശ്യമാണെന്നാണു ഞാൻ വിചാരിക്കുന്നത്. പല മാധ്യമങ്ങളും എന്നെ തഴഞ്ഞു എന്ന നിലയ്ക്കുള്ള വാർത്തകൾ കൊടുത്തിട്ടുണ്ട്. 

‌

∙ പി.ജയരാജനെ തഴഞ്ഞതായ പ്രതീതി പാർട്ടിക്കോ താങ്കൾക്കോ തോന്നുന്നില്ലായിരിക്കാം. പക്ഷേ, അങ്ങനെ തോന്നുന്നവരും  ജനങ്ങൾക്കിടയിലുണ്ട്...

ഉണ്ടായിരിക്കാം. പക്ഷേ, പാർട്ടി മാനദണ്ഡമനുസരിച്ച് ബന്ധപ്പെട്ട കമ്മിറ്റി തീരുമാനിക്കുന്നതാണ് ആരെയാണു കമ്മിറ്റിയിലേക്കു തിരഞ്ഞെടുക്കേണ്ടതെന്ന്. പാർട്ടി നേതൃത്വം തീരുമാനിക്കുന്നതാണത്. അതിൽ വ്യക്തിപരമായി വിഷമിച്ചിട്ടു കാര്യമില്ല. യുവതലമുറ പാർട്ടിയിലേക്കു കടന്നു വരണമെന്നാണ് ആഗ്രഹിക്കുന്നത്. എന്നെപ്പോലെയുള്ള ആളുകൾ യുവാക്കളായിരുന്ന സമയത്ത് എനിക്കും അതുപോലെയുള്ള പരിഗണന കിട്ടിയിട്ടുണ്ട്. 

∙ 75ാം വയസ്സിൽ നായനാരുടെയോ വിഎസിന്റെയോ പ്രവർത്തനങ്ങൾക്ക് പാർട്ടി തീരുമാനത്തിന്റെ അടിസ്ഥാനത്തിൽ കടിഞ്ഞാണിട്ടിരുന്നെങ്കിൽ, ആ പ്രായത്തിനു ശേഷം അവർ ചെയ്ത സേവനങ്ങൾ കിട്ടുമായിരുന്നോ? പ്രവർത്തന പാരമ്പര്യമുള്ള, അനുഭവജ്ഞാനമുള്ള വലിയൊരു വിഭാഗം നേതൃത്വത്തിൽനിന്നു തുടച്ചു മാറ്റപ്പെടുകയാണെന്നു പറയുമ്പോൾ താങ്കൾ പറയുന്ന ഗുണത്തോടൊപ്പം ദോഷവുമില്ലേ?

അനുഭവ സമ്പത്ത് പ്രധാനം തന്നെയാണ്. അനുഭവ സമ്പത്തുള്ളവരെയാകെ പ്രായത്തിന്റെ പേരിൽ തള്ളിക്കളയാനല്ല പാർട്ടി തീരുമാനിച്ചത്. അവരുടെ അനുഭവ സമ്പത്തുകൂടി ഉൾക്കൊണ്ടു കൊണ്ട് പ്രവർത്തിക്കാൻ കഴിയുന്ന പുതിയ തലമുറയെ വളർത്തിക്കൊണ്ടു വരാനാണു നോക്കുന്നത്. കാലാനുസൃതമായ മാറ്റം സംഘടനയ്ക്കും വന്നിട്ടുണ്ട്. അത് ആവശ്യവുമാണ്. 

∙ പ്രായ പരിധി തീരുമാനം പാർട്ടി അംഗീകരിച്ചിട്ടുണ്ടാകാം. എന്നാൽ പൊതു സമൂഹം അങ്ങനെയാണോ ചിന്തിച്ചത്?

ഓരോ മാനദണ്ഡ പ്രകാരമാണ് പാർട്ടി കമ്മിറ്റികളിൽ ആളുകളെ ഉൾപ്പെടുത്തുന്നത്. താങ്കൾ പറഞ്ഞതു പ്രകാരമാണെങ്കിൽ പുതുതായി ആരെയും നേതൃത്വത്തിലേക്കു കൊണ്ടു വരാനാകില്ല. കാരണം ഒരു കമ്മിറ്റിയിൽ എല്ലാവരും പ്രവർത്തിക്കുന്നവരായിരിക്കുമല്ലോ. പാർട്ടി കമ്മിറ്റികളിൽ യുവാക്കൾ വേണം, സ്ത്രീകൾ വേണം, പട്ടികജാതി–വർഗ വിഭാഗക്കാർ വേണം. സ്വാഭാവികമായും ചില മാനദണ്ഡങ്ങൾ വയ്ക്കേണ്ടി വരും. ആ മാനദണ്ഡമാണു പ്രായപരിധി 75 വയസ്സാക്കി കൊണ്ടുള്ള തീരുമാനം. അംഗത്വത്തിലുള്ള ഒരാൾ വ്യക്തിപരമായ താൽപര്യങ്ങൾക്ക് ഉപരിയായി പാർട്ടി താൽപര്യങ്ങളാണ് ഉയർത്തിപ്പിടിക്കേണ്ടത്. പ്രായപരിധിയിൽ എടുത്ത തീരുമാനത്തിന്റെ അടിസ്ഥാനത്തിലാണ് ഇനി കാര്യങ്ങളെ വിലയിരുത്തേണ്ടത്. പ്രായപരിധി നടപ്പാക്കിയ ശേഷം എന്താണ് അവസ്ഥയെന്നു തീർച്ചയായും പാർട്ടി പരിശോധിക്കുമല്ലോ. 

∙ അധികാരം ദുഷിപ്പിക്കും പരമാധികാരം അതിലേറെ ദുഷിപ്പിക്കും എന്നാണല്ലോ പറയാറ്. വിമർശകർ ചൂണ്ടിക്കാട്ടുന്ന ഒരു കാര്യമുണ്ട്. അടിസ്ഥാന വർഗത്തിനായി നിലകൊള്ളുന്ന പാർട്ടിയിൽ അധികാരത്തണലിൽ ഒരു ഉപരി വർഗം രൂപപ്പെടുന്നു എന്നതാണത്. അക്കാര്യം ശ്രദ്ധിച്ചിട്ടുണ്ടോ?

ആ പറയുന്നതിൽ ഒരു കാര്യവുമില്ല. പാർട്ടിക്കകത്തു വരുന്ന ആളുകൾ വിവിധ വർഗ സംഘടനകളിൽ പ്രവർത്തിക്കുന്നവരാണ്. അങ്ങനെ വരുന്ന ആളുകളെ മാനദണ്ഡങ്ങൾ അടിസ്ഥാനമാക്കിയാണു വിവിധ കമ്മിറ്റികളിൽ ഉൾപ്പെടുത്തുന്നത്. ആ പ്രക്രിയ ജനാധിപത്യപരമായ പ്രവർത്തനത്തിന്റെ ഭാഗമാണ്. എല്ലാ വിഭാഗത്തെയും ഉൾക്കൊള്ളുന്ന നേതൃത്വം വരിക എന്നതാണ് അതുകൊണ്ട് അർഥമാക്കുന്നത്. അതേസമയം, താങ്കൾ പറഞ്ഞ ഒരു ഘടകമുണ്ട്. അതായത്, അധികാരം ദുഷിപ്പിക്കും, പരമമായ അധികാരം പരമമായി ദുഷിപ്പിക്കും എന്ന തത്വം കമ്യൂണിസ്റ്റ് പാർട്ടിക്കും ബാധകമാണ്. ബംഗാളിന്റെയും ത്രിപുരയുടെയും അനുഭവം നമുക്കു മുന്നിലുണ്ട്. 

തുടർച്ചയായ അധികാരം സൃഷ്ടിക്കുന്ന പ്രശ്നങ്ങൾ സ്വാഭാവികമായും പാർട്ടി ഗൗരവമായി പരിശോധിക്കും. തുടർച്ചയായി അധികാരം കൈവരുമ്പോൾ അതിന്റെ ഭാഗമായുള്ള ചില ദുഷിപ്പുകൾ പാർട്ടിക്കകത്തേക്കു വരുന്നുണ്ടോയെന്നു കേരളത്തിലെ പാർട്ടി ഗൗരവമായി പരിശോധിക്കും. ദുഷിപ്പ് പാർട്ടിയിലേക്കു കടന്നു വരുന്നതിന് എതിരായ ആശയ സമരം പാർട്ടിക്കകത്തു നടക്കുന്നുണ്ട്. അതിന്റെ ഭാഗമാണ് തെറ്റുതിരുത്തൽ പ്രക്രിയ. അത് ഏതെങ്കിലും ഒരു ദിവസം തുടങ്ങി മറ്റൊരു ദിവസം അവസാനിപ്പിക്കുന്നതല്ല. അതൊരു തുടർ പ്രക്രിയയയാണ്. 

∙ പാർട്ടിക്കകത്ത് അങ്ങനെയൊരു ഉപരിവർഗം രൂപപ്പെടാനുള്ള സാധ്യത ഇല്ലെന്നാണോ പറയുന്നത്?

അങ്ങനെയൊരു സാധ്യതയില്ല. പാർട്ടി ഉയർത്തിപ്പിടിക്കുന്ന ഐഡിയോളജി പ്രധാനമാണ്. കമ്യൂണിസ്റ്റ് പാർട്ടി കെട്ടിപ്പടുക്കുന്നത് എങ്ങനെയാണെന്ന് പാർട്ടി പരിപാടിയിൽ തന്നെ പറയുന്നുണ്ട്. സ്വയം പഠിക്കുക അതോടൊപ്പം പഠിപ്പിക്കുക എന്നതു പ്രധാനമാണ്. അതുപോലെ തന്നെയാണ് വിദ്യാഭ്യാസം, തുടർ വിദ്യാഭ്യാസം എന്നതും. പണ്ടു പഠിച്ചതുമാത്രം ഉരുവിട്ടു നടക്കലല്ല കമ്യൂണിസ്റ്റ് പാർട്ടിയുടെ രീതി. തുടർ വിദ്യാഭ്യാസവും അതിന്റെ ഭാഗമാണ്. വീണ്ടും വീണ്ടും പഠിച്ചുകൊണ്ടിരിക്കുക  എന്നത് പാർട്ടിയുടെ സവിശേഷതയാണ്. സ്വയം  നവീകരിച്ചു കൊണ്ടാണു പാർട്ടി മുന്നോട്ടു പോകുന്നത്. അപ്പോൾ സ്വാഭാവികമായും അങ്ങനെ ഏതെങ്കിലുമൊരു അധികാര കേന്ദ്രമോ, സംഘടനയ്ക്കു നിരക്കാത്ത രീതിയിലുള്ള ഗ്രൂപ്പോ പാർട്ടിക്കകത്തു നിലനിൽക്കാൻ പോകുന്നില്ല. പാർട്ടി സംവിധാനത്തിന്റെ ജൈവ ഘടനയുടെ സവിശേഷതയാണത്. അത്തരം തിന്മകൾ തുടച്ചു നീക്കപ്പെടുമെന്ന ഉറച്ച ആത്മവിശ്വാസമുണ്ട്. 

∙ ആക്രമിക്കപ്പെട്ടതിനു ശേഷമുണ്ടായ ശാരീരിക പരിമിതികളെ എങ്ങനെയാണു മറികടക്കുന്നത്? 

ഇടതു കൈകൊണ്ട് എഴുതാൻ ശീലിച്ചു. മൊബൈലിൽ മലയാളം എഡിറ്റ് ചെയ്യാനൊക്കെ ഈ കൈകൊണ്ടു പറ്റും. ഫെയ്സ്ബുക് കുറിപ്പുകളൊക്കെ ഇടതുകൈയ്യുടെ വിരലുകൾകൊണ്ട് മലയാളം കീ ബോർഡ് ഉപയോഗിച്ച് ചെയ്യുന്നുണ്ട്. സ്ക്രീനിൽ എഴുതാനാവില്ല. അതുകൊണ്ടാണു ടൈപ്പ് ചെയ്യുന്നത്. വസ്ത്രം ധരിക്കാൻ പരസഹായം വേണം. മുണ്ട് മുറുക്കിയുടുക്കാനോ ഷർട്ടിന്റെ ബട്ടൺ സ്വയം ഇടാനോ കഴിയില്ല. കൂടെയുള്ളവർ സഹായിക്കും. 

English Summary: CPM Leader P Jayarajan turns 70; Exclusive Interview