ഷിയും ഭയക്കണം, ചൈനയിൽ പടരാനൊരുങ്ങി സമരവൈറസ്;വെള്ളപ്പേപ്പറിലെ പ്രതിഷേധത്തീ

എന്നാൽ അടുത്തകാലത്തൊന്നും സമരം ചെയ്തോ കണ്ടോ ശീലമില്ലാത്ത യുവതലമുറയാണ് ഇത്തവണ പ്രക്ഷോഭരംഗത്തിറങ്ങിയതെങ്കിലും പരിചയക്കുറവ് എവിടെയും പ്രകടമായില്ല. ജീവിതം വഴിമുട്ടുന്നവർക്കും അവകാശങ്ങൾ നിഷേധിക്കപ്പെടുന്നവർക്കും തെരുവിലിറങ്ങാൻ ആരും പഠിപ്പിച്ചുകൊടുക്കേണ്ടതില്ലല്ലോ. ജനങ്ങൾ സർക്കാരിനെതിരെ പരസ്യമായി പ്രതിഷേധിക്കുന്നത് ആധുനിക ചൈനയ്ക്ക് ഒട്ടും പരിചയമുള്ള കാര്യമല്ല. ജനകീയ പ്രക്ഷോഭങ്ങളെ ടാങ്ക് ഉരുട്ടിക്കയറ്റി നേരിട്ടതാണ് ചൈനീസ് ഭരണകൂടത്തിന്റെ രീതിയെന്നു ചരിത്രം തന്നെ പറയുന്നു. എന്നാൽ, ഇപ്പോൾ ഉടലെടുത്ത പുതിയ സമരങ്ങളെ ഒറ്റയടിക്ക് അടിച്ചമർത്തുന്ന നയമല്ല ചൈന സ്വീകരിച്ചത്. കൈവിട്ടുപോയാൽ പിടിച്ചാൽ കിട്ടില്ലെന്നു മനസ്സിലാക്കിയാവണം അപ്രതീക്ഷിതമായി, പലയിടത്തും ലോക്ഡൗൺ ഇളവുകൾ പ്രഖ്യാപിച്ചത്.

∙ ഒരാൾ പോസിറ്റീവായി, ഒരു നാട് പൂട്ടി

എന്താണ് കോവിഡ‍ി്ന്റെ പേരിൽ ചൈനയിൽ നടന്നത്? അധികൃതർ ക്രൂരമായി പെരുമാറുന്ന പല വിഡിയോകളും ലോകം കണ്ടതാണ്. ഒരു പ്രദേശത്ത് ഒരു കോവിഡ് കേസ് റിപ്പോർട്ട് ചെയ്താലും ആ മേഖല പൂർണമായി അടച്ചിടുന്നതാണ് ചൈനയിലെ രീതി. തുടർന്ന്, ജനങ്ങളെയെല്ലാം ലാബുകളിലെത്തിച്ച് കോവിഡ് പരിശോധനയ്ക്കു വിധേയരാക്കും. കോവി‍ഡ് സ്ഥിരീകരിച്ചാൽ ടൂറിസം കേന്ദ്രങ്ങളും വലിയ പാർപ്പിട സമുച്ചയങ്ങളും ഫാക്ടറികളുമെല്ലാം ഉടനെ അടച്ചുപൂട്ടുകയാണ് സീറോ കോവി‍ഡ് നയം. കോവിഡ് ബാധിതരും അല്ലാത്തവരുമെല്ലാം അതിൽ കുടുങ്ങും. പരിശോധനയ്ക്കു ശേഷം രോഗികളെ അജ്ഞാതമായ ക്വാറന്റീൻ കേന്ദ്രങ്ങളിലേക്കു മാറ്റും. 

ലോക്ഡൗൺ ലംഘിക്കുന്നവരെ കണ്ടെത്താൻ പൊലീസിനൊപ്പം പാർട്ടി കേഡർമാരും ചൈനയിൽ ഇറങ്ങി. അമിതാധികാരപ്രവണതയുള്ള ഭരണാധികാരികൾ കൂടുതൽ നിയന്ത്രണണങ്ങൾ ഇഷ്ടപ്പെടുന്നവരാണല്ലോ. ആരോഗ്യമുള്ള ജനതയെ വാർത്തെടുക്കാൻ എന്ന പേരിൽ പ്രഖ്യാപിച്ച സീറോ കോവി‍ഡ് നയം, ഫലത്തിൽ ഷിയുടെ അധികാരം ചോദ്യംചെയ്യപ്പെടലുകളില്ലാതെ നിലനിർത്താനുള്ള കുറുക്കുവഴിയായി. പ്രധാന പാതകളിലടക്കം ഓരോ കിലോമീറ്ററിലും കോവിഡിന്റെ പേരിൽ പരിശോധന ശക്തമാക്കി. പാർട്ടിയുടെ വിശ്വസ്തരായ പൗരന്മാർ കൂട്ടത്തോടെ താമസിക്കുന്ന കമ്യൂണുകൾക്കുള്ളിൽ പോലും ഭരണകൂടത്തിന്റെ സംശയമുനകൾ നീണ്ടു. ആരോഗ്യപ്രവർത്തകർക്കൊപ്പം പൊലീസും വീടുകൾക്കുള്ളിൽ കടന്നു പരിശോധനയായി. വിമതരെന്നു സംശയിക്കുന്നവരെയെല്ലാം അടിച്ചമർത്താനും തടവറയിലാക്കാനും സീറോ കോവി‍ഡ് നയം ചൈന ഉപയോഗപ്പെടുത്തിയെന്നും റിപ്പോർട്ടുകളുണ്ട്

∙ നിയന്ത്രണങ്ങൾ കൂട്ടി, ജനം വലഞ്ഞു, നാട്ടിൽ പട്ടിണി 

എന്തുകൊണ്ടാണ് ജനങ്ങൾ സീറോ കോവിഡ് നയത്തിനെതിരെ പ്രതിഷേധിച്ചത്? സഹികെട്ടതു കൊണ്ടു തന്നെ. ഒക്ടോബറിൽ നടന്ന 20ാം പാർട്ടി കോൺഗ്രസിനു മുന്നോടിയായിത്തന്നെ ഷിയുടെ നേതൃത്വത്തിനെതിരെ പാർട്ടിക്കുള്ളിലും രാജ്യത്താകെയും മുറുമുറുപ്പുകളുയരുന്നതായി റിപ്പോർട്ടുകളുണ്ടായിരുന്നു. എന്നാൽ, ഷിയുടെ തിരോധാനം പ്രവചിച്ചവരെയെല്ലാം അമ്പരപ്പിച്ചുകൊണ്ട് അദ്ദേഹം എതിർശബ്ദങ്ങളില്ലാതെ സുഗമമായി അധികാരത്തിലേറി. പാർട്ടിയിലും സൈന്യത്തിലും കോടതിയിലുമെല്ലാം ഒരൊറ്റ പരമോന്നതനേതാവായി ഷി ഉയർന്നു. അധികാരത്തിലേറിയ ഉടൻ കോവിഡ് നിയന്ത്രണങ്ങൾ കടുപ്പിക്കുകയാണു ഷി ചെയ്തത്. ലോകത്തിന്റെ മറ്റു ഭാഗങ്ങളിലെല്ലാം കോവിഡ് നിയന്ത്രണങ്ങൾ പിൻവലിക്കുകയും ജനം പഴയപടി പുറത്തിറങ്ങി നടക്കുകയും ചെയ്യുമ്പോൾ ചൈനയിൽ കോവിഡ് പടർന്നുപിടിക്കുകയായിരുന്നു. ദിവസേന സ്ഥിരീകരിച്ചത് 40,000ത്തോളം കേസുകൾ. വലിയൊരു ഇടവേളയ്ക്കു ശേഷം കോവിഡ് മരണങ്ങളും റിപ്പോർട്ട് ചെയ്തു. കുറച്ച് ഇളവുകളുണ്ടായിരുന്നെങ്കിലും, അത്യാവശ്യകാര്യങ്ങൾക്കല്ലാതെ ജനങ്ങളെ വീടുവിട്ടു പുറത്തിറങ്ങാൻ അനുവദിച്ചിരുന്നില്ല. 

കടകമ്പോളങ്ങൾ അടഞ്ഞുകിടക്കുന്നതും ബിസിനസ് നടക്കാത്തതും ജനങ്ങളുടെ വരുമാനമാർഗം ഇല്ലാതാക്കി. പലയിടത്തും ഭക്ഷ്യക്ഷാമവും തുടങ്ങി. പ്രധാന നഗരങ്ങളിൽ മാത്രം ഒതുങ്ങിയിരുന്ന ഭരണകൂട നിരീക്ഷണം കുഗ്രാമങ്ങളിലേക്കു പോലും വ്യാപിച്ചു. ലോക്ഡൗൺ ചൈനയുടെ സമ്പദ്‌വ്യവസ്ഥ തകർത്തു. മധ്യവർഗക്കാരുടെയും ഇടത്തരത്തിൽ താഴെയുള്ളവരുടെയും ജീവിതം ദുഷ്കരമായി. റിയൽ എസ്റ്റേറ്റ് മേഖലയാകെ തളർന്നു. പണക്കാരനും പാവപ്പെട്ടവനും തമ്മിലുള്ള അന്തരം കൂടുതൽ വർധിച്ചു. തൊഴിലില്ലായ്മ രൂക്ഷമായി. ടൂറിസം മേഖല പാടെ തകർന്നു. അതോടെ ജനം നിരത്തിലിറങ്ങി. എന്നാൽ, സെപ്റ്റംബറിൽ ക്വാറന്റീൻ കേന്ദ്രത്തിലേക്കു ജനങ്ങളെ കൊണ്ടുപോയ മിനി ബസ് അപകടത്തിൽപെട്ട് 27 പേർ മരിച്ചതോടെ പ്രതിഷേധത്തിനു കനംവച്ചു. ആപ്പിൾ ഐ ഫോൺ ഫാക്ടറിയിലെ തൊഴിലാളികൾ പൊലീസുമായി സംഘർഷമുണ്ടാക്കി. വിവരങ്ങൾ ജനങ്ങളിലെത്താതിരിക്കാൻ അധികാരികൾ കിണഞ്ഞു പരിശ്രമിച്ചെങ്കിലും പ്രതിഷേധം പടരുന്നതു തടയാനായില്ല. ഷാങ്ഹായിൽ ഒത്തുകൂടിയവർ, ഷി രാജിവയ്ക്കണമെന്നും കമ്യൂണിസ്റ്റ് പാർട്ടി അധികാരമൊഴിയണമെന്നും വരെ മുദ്രാവാക്യം മുഴക്കി. 

∙ ഉറുംഗിയിൽ നിന്നുയർന്ന പ്രതിഷേധ ജ്വാല 

പടിഞ്ഞാറൻ ചൈനയിലെ ഉറുംഗി നഗരത്തിലാണ് സീറോ കോവിഡ് നയത്തിനെതിരായ പ്രക്ഷോഭം ആദ്യം ശക്തമായത്. ഈ നഗരം മൂന്നു മാസമാണ് അടച്ചിട്ടത്. ഉറുംഗിയിലെ അപ്പാർട്ട്മെന്റിൽ വലിയ തീപിടിത്തമുണ്ടായപ്പോൾ ലോക്ഡൗൺ നിയന്ത്രണങ്ങൾ മൂലം അഗ്നിരക്ഷാസേന സ്ഥലത്തെത്താൻ വൈകി. ചുരുങ്ങിയതു 10 പേരെങ്കിലും വെന്തുമരിച്ചു. 9 പേർക്കു ഗുരുതര പരുക്കേറ്റു. അപ്പാർട്ട്മെന്റിലുള്ളവർക്കു ലോക്ഡൗൺ മൂലം വേഗത്തിൽ പുറത്തെത്തി സുരക്ഷിതരാകാൻ കഴിഞ്ഞില്ലെന്നും രക്ഷാപ്രവർത്തനം വൈകിയെന്നും ആരോപണമുയർന്നു. പിറ്റേദിവസം മുതൽ നഗരവാസികൾ അധികൃതർക്കെതിരെ പ്രതിഷേധവുമായി പുറത്തിറങ്ങി. എന്നാൽ, അപ്പോഴും നിയന്ത്രണങ്ങൾ പൂർണമായി പിൻവലിക്കാൻ ഭരണകൂടം തയാറായില്ല. 

ചൈനയിലെ വിദ്യാഭ്യാസ സ്ഥാപനങ്ങളിലും സർവകലാശാലകളിലും സമരത്തിന്റെ അലയൊലികളെത്തി. ചൈനീസ് ആസ്ഥാനമായ ബെയ്ജിങ്ങിലും സാമ്പത്തിക തലസ്ഥാനമായ ഷാങ്ഹായിയിലും യുവാക്കൾ തെരുവിലിറങ്ങി. തീപിടിത്തത്തിൽ മരിച്ചവരുടെ സ്മരണയ്ക്കായി ഷാങ്ഹായിലെ പ്രക്ഷോഭകർ റോഡിന്റെ പേരുമാറ്റി. ഉറുംഗി റോഡ് എന്നു പേരിട്ട റോഡിൽ നടന്ന മെഴുകുതിരി പ്രതിഷേധത്തിന്റെ ചിത്രങ്ങൾ സമൂഹമാധ്യമങ്ങളിലൂടെ ലോകമെങ്ങും പ്രചരിച്ചു. ഒന്നും എഴുതാത്ത വെള്ള പ്ലക്കാർഡുകൾ പിടിച്ചായിരുന്നു സമരം. ഭരണകൂടത്തിന്റെ സെൻസർഷിപ്പിനെതിരെയുള്ള ക്രിയാത്മക പ്രതിഷേധം. ഒന്നും എഴുതാത്ത വെള്ളപേപ്പറുകൾ ജനാധിപത്യസമൂഹത്തിനാവശ്യമായ എല്ലാ മുദ്രാവാക്യങ്ങളും വിളിച്ചുപറയുന്നതാണെന്നാണു പ്രക്ഷോഭകരുടെ പക്ഷം. പലരെയും ചൈനീസ് പൊലീസ് തുറുങ്കിലാക്കിയതായി പാശ്ചാത്യമാധ്യമങ്ങൾ റിപ്പോർട്ട് ചെയ്തു. വുഹാനിലും ഷാങ്ഹായിലും ജനക്കൂട്ടം‍ പൊലീസുമായി ഏറ്റുമുട്ടി. 

ലോക്ഡൗൺ നിയന്ത്രണങ്ങളിൽ ഇളവാവശ്യപ്പെട്ടു തുടങ്ങിയ പ്രക്ഷോഭം പതിയെ ജനാധിപത്യത്തിനും പൗരസ്വാതന്ത്ര്യത്തിനുമെല്ലാം വേണ്ടിയുള്ള വിശാല പ്രതിഷേധമായി രൂപംകൊള്ളുകയായിരുന്നു. ചൈനീസ് ഭരണകൂടത്തിനെതിരെ സമീപകാലത്തു നടന്ന ഏറ്റവും വലിയ എതിർപ്പായി വെള്ളപ്പേപ്പർ സമരം രൂപപ്പെട്ടുവെന്നാണ് വിദേശകാര്യ നിരീക്ഷകർ പറയുന്നത്. ചൈനയിലെ ഏകാധ്യപത്യ ഭരണകൂടത്തിനെതിരെ 100 പേർ പുറത്തിറങ്ങി പ്രതിഷേധിക്കുന്നതു തന്നെ വലിയ കാര്യമാണെന്നും, ജനങ്ങൾക്കിടയിലാകെ പുകയുന്ന അസംതൃപ്തിയുടെ പ്രകടനമാണിതെന്നും വിലയിരുത്തലുണ്ട്. ഈ സമരങ്ങൾക്കു മുന്നിലെല്ലാം ഒടുവിൽ സർക്കാർ വഴങ്ങുകയാണ്. അപ്പോഴും ഏതാനും ചോദ്യങ്ങൾ ബാക്കിയാണ്. ജനം ഏറ്റെടുത്ത ഈ പ്രതിഷേധ മാതൃക കോവിഡിൽ ഒതുങ്ങുമോ, അതോ കൊറോണ വൈറസ് പോലെ ‘സമര വൈറസും’ ചൈനയിലാകെ പടരുമോ?

English Summary: China Eases Zero Covid Restrictions; Is it the Victory of Protesters?