മ്യൂണിക് ∙ ജി7 ഉച്ചകോടിക്കായി ജർമനിയിലെത്തിയ പ്രധാനമന്ത്രി നരേന്ദ്രമോദിക്കു മ്യൂണിക്കിൽ ഊഷ്മള വരവേൽപ്. വിമാനത്താവളത്തിൽ പ്രസിദ്ധമായ ബവേറിയൻ ബാൻഡിന്റെ സ്വാഗതസംഗീതം പ്രധാനമന്ത്രിയെ വരവേറ്റു. ദേശീയപതാകകൾ കയ്യിലേന്തിയും ‘ഭാരത് മാതാ കീ ജയ്’ വിളിച്ചും മോദിയെ വരവേൽക്കാൻ എത്തിയ ഇന്ത്യക്കാരെ പ്രധാനമന്ത്രി അഭിവാദ്യം ചെയ്തു. 

വൈകിട്ട് മ്യൂണിക്കിൽ നടന്ന പ്രത്യേക ചടങ്ങിൽ പ്രധാനമന്ത്രി ഇന്ത്യൻ സമൂഹത്തെ അഭിസംബോധന ചെയ്തു. ഇന്നലത്തെ തീയതി ഓർമിപ്പിച്ചുകൊണ്ട് 1975ൽ അടിയന്തരാവസ്ഥ പ്രഖ്യാപിച്ചത് ഇതേ ദിവസമായിരുന്നെന്നു പറഞ്ഞ മോദി, ഇന്ത്യയുടെ ജനാധിപത്യ ചരിത്രത്തിലെ കറുത്ത അധ്യായമായിരുന്നു അതെന്നും സൂചിപ്പിച്ചു. വിവിധ രംഗങ്ങളിൽ ഇന്ത്യ കൈവരിച്ച മുന്നേറ്റത്തെപ്പറ്റിയും മോദി പ്രസംഗത്തിൽ വിവരിച്ചു. പ്രസിദ്ധമായ ഔഡി എംഡോം ബാസ്കറ്റ്ബോൾ സ്റ്റേഡിയത്തിൽ നടന്ന പരിപാടിയിൽ ജർമനിയുടെ വിവിധ ഭാഗങ്ങളിൽ നിന്നുള്ള ഇന്ത്യക്കാർ പങ്കെടുത്തു.

English Summary: Narendra Modi in Munich