കുടംപുളിയിട്ട് നല്ല നാടൻ രുചിയിൽ, മത്തിക്കറി

മത്തി കുടംപുളിയിട്ട് നല്ല നാടൻ രീതിയിൽ കറിവച്ചാൽ ഊണ് സൂപ്പറാകും. ചോറിനു മാത്രമല്ല കപ്പയ്ക്കും രുചി പകരും ഈ മീൻ കറി.

ചേരുവകൾ

• മത്തി- അരക്കിലോ
• കാശ്മീരി മുളകുപൊടി - 2 ടേബിൾ സ്പൂൺ
• മുളകുപൊടി - ഒരു ടേബിൾ സ്പൂൺ
• മഞ്ഞൾപ്പൊടി - കാൽ ടീസ്പൂൺ 
• കുടം പുളി - ഒരു മൂന്ന് കഷ്ണം
• ഇഞ്ചി - ഒരു ചെറിയ കഷ്ണം
• വെളുത്തുള്ളി - 6 പീസ്
• ചെറിയ ഉള്ളി - 10 എണ്ണം
• തക്കാളി - 1   എണ്ണം

• കറിവേപ്പില - ആവശ്യത്തിന്
• ഉലുവ - അര ടേബിൾ സ്പൂൺ
• കടുക്-1ടേബിൾ സ്പൂൺ
• വെളിച്ചെണ്ണ - 3 ടേബിൾ സ്പൂൺ
• ഉപ്പ് - ആവശ്യത്തിന്

തയാറാക്കുന്ന വിധം

• ആദ്യം രണ്ട് കപ്പ് ചൂടു വെള്ളത്തിൽ കുടംപുളിയിട്ടു വയ്ക്കുക.
• ശേഷം മൺചട്ടിയിൽ 3 സ്പൂൺ വെളിച്ചെണ്ണ ഒഴിക്കുക. എണ്ണ ചൂടായാൽ അതിൽ കടുകും ഉലുവയും ഇടുക.
• ഇതു പൊട്ടി കഴിഞ്ഞാൽ ചതച്ചു വച്ചിരിക്കുന്ന ചെറിയ ഉള്ളി, വെളുത്തുള്ളി, ഇഞ്ചി എന്നിവ ഇട്ടു ഇളക്കുക.
• ഇതു ബ്രൗൺ നിറത്തിലായാൽ മഞ്ഞൾപ്പൊടിയും മുളകുപൊടിയും കാശ്മീരി മുളകുപൊടിയും ചേർത്തു യോജിപ്പിക്കുക.
• ഇതു ചെറു തീയിൽ വയ്ക്കുക (ഏകദേശം ഒരു മിനിറ്റ്) ഇതിലേയ്ക്കു പുളി ഇട്ടു വച്ച വെള്ളവും പുളിയും കൂടി ചേർക്കുക.
• നന്നായി ഇളക്കിയതിനു ശേഷം തിളയ്ക്കാൻ അനുവദിക്കുക, ഇതിലേക്ക് ആവശ്യത്തിന് ഉപ്പും മീൻ കഷ്ണവും ഇടുക. തീ കുറച്ചു വേകാൻ വയ്ക്കുക (10-15 മിനിറ്റ് ). വെന്തതിനു ശേഷം കറിവേപ്പില ഇടുക. നാടൻ മീൻ കറി റെഡി.

Content Summary : Fish curry nadan recipe by Jisha.