ഡ്രാക്കുള, സൈക്കോ, ഭ്രമയുഗം... ഭീതിയുടെ കറുപ്പും വെളുപ്പും; എന്തുകൊണ്ട് മമ്മൂട്ടി ആ തീരുമാനത്തിനൊപ്പം നിന്നു!

∙ ഇരുട്ടിൽ വിറയ്ക്കും, വെളിച്ചത്തിൽ ചിരിക്കും

ഓരോ സിനിമയുടെ കഥയും പ്രേക്ഷകരുടെ മനസ്സിൽ കയറിപ്പറ്റാൻ സംവിധായകർ സാങ്കേതികപരമായി ശ്രദ്ധിക്കാറുണ്ട്. ഇരുട്ടും വെളിച്ചവുമാണ് ഏതൊരു മനുഷ്യന്റെ മനസ്സിലും പണ്ടുതൊട്ട് ഭീതി ജനിപ്പിക്കുന്ന അടിസ്ഥാനകാര്യം. അതുകൊണ്ടുതന്നെ കറുപ്പിലും വെളുപ്പിലും ഒരു പേടിപ്പെടുത്തുന്ന കഥ പറയുമ്പോൾ അത് കാണികളുടെ മനസ്സിൽ വ്യത്യസ്തമായ അനുഭവമായി മാറുമെന്നത് ഉറപ്പാണ്. ലൂമിയർ സഹോദരൻമാർ സിനിമ അവതരിപ്പിച്ച കാലം തൊട്ട് സിനിമ ബ്ലാക്ക് ആൻഡ് വൈറ്റ് ഫോർമാറ്റിലായിരുന്നു. പിന്നീട് വന്ന ദ് ഗ്രേറ്റ് ട്രെയിൻ റോബറിയടക്കമുള്ള സിനിമകൾ ലോകമെങ്ങുമുള്ള പ്രേക്ഷകർ ആവേശത്തോടെയാണ് കണ്ടത്.

ബ്ലാക്ക് ആൻഡ് വൈറ്റ് മാത്രമല്ല, നിശ്ശബ്ദ ചിത്രം കൂടിയായ ‘നോസ്ഫരാട്ടൂ: എ സിംഫണി ഓഫ് ഹൊറർ’ സിനിമ പറഞ്ഞത് ഡ്രാക്കുള പ്രഭുവിന്റെ കഥയാണ്. ഇന്നും, ലോകത്തിലെ ഏറ്റവും ഭയപ്പെടുത്തുന്ന ചിത്രങ്ങളെടുത്താൽ അതിൽ നോസ്ഫരാട്ടൂവിന് നിർണായക സ്ഥാനമുണ്ടാകും. പേടിപ്പെടുത്തുന്ന ബ്ലാക്ക് ആൻഡ് വൈറ്റ് ഇന്നോ ഇന്നലെയോ തുടങ്ങിയതല്ലെന്നു ചുരുക്കം. ദ് കാബിനറ്റ് ഓഫ് ഡോ. കാലിഗരി (1920), ക്യാറ്റ് പീപ്പിൾ (1942), ദ് സെവൻത് വിക്‌റ്റിം (1943), ദ് ഹൗസ് ഓൺ ഹോണ്ടഡ് ഹിൽ (1959), ബ്ലാക്ക് സൺഡേ (1960), സൈക്കോ (1960) തുടങ്ങിയവയും സമ്മാനിച്ചത് കറുപ്പിലും വെളുപ്പിലെയും ഭീതിയനുഭവങ്ങളാണ്. ഹൊറർ സിനിമകളുടെ തലതൊട്ടപ്പനായ ആൽഫ്രഡ് ഹിച്ച്കോക്കിന്റെയും ആദ്യകാല ‘ആയുധം’ ബ്ലാക്ക് ആൻഡ് വൈറ്റ് തന്നെയായിരുന്നു. 

ചാർളി ചാപ്ലിനും കീറ്റണുമൊക്കെ കറുപ്പിലും വെളുപ്പിലും കഥപറഞ്ഞ് പ്രേക്ഷകരെ  കരയിപ്പിക്കുകയും ചിരിപ്പിക്കുകയും ചെയ്തു. ബാറ്റിൽഷിപ് പോംടെകിൻ പോലുള്ള ബ്ലാക്ക് ആൻഡ് വൈറ്റ് സിനിമകൾ പ്രേക്ഷകരെ ഇരുത്തിചിന്തിപ്പിച്ചു. സത്യജിത് റായുടെ ‘പഥേർപാഞ്ചലി’ ഇന്നും കറുപ്പിലും വെളുപ്പിലുമെഴുതിയ ഒരു കവിതപോലെ സിനിമാ പ്രേക്ഷകരെ ആവേശം കൊള്ളിക്കുന്നുണ്ട്. വിഗതകുമാരനും ബാലനുമടക്കമുള്ള സിനിമകൾ മലയാളികളെ സിനിമാക്കാഴ്ചകളുടെ മായികലോകത്തേക്കെത്തിച്ചതും ഈ ഫോര്‍മാറ്റിലായിരുന്നു. 1968ലിറങ്ങിയ ‘യക്ഷി’ ബ്ലാക്ക് ആൻഡ് വൈറ്റിൽ മലയാളികളെ വിറപ്പിച്ച ഹൊറർ ചിത്രമായിരുന്നു. ‘ഈ ഭാര്‍ഗവീനിലയ’വും എങ്ങനെ മറക്കും. ജോൺ ഏബ്രഹാമിന്റെ അഗ്രഹാരത്തിൽ കഴുതൈ, അമ്മ അറിയാൻ, ചെറിയാച്ചന്റെ ക്രൂരകൃത്യങ്ങൾ തുടങ്ങിയ സിനിമകളെല്ലാം ബ്ലാക്ക് ആൻഡ് വൈറ്റിലായിരുന്നു. ഭരതന്റെ പ്രയാണം, പത്മരാജന്റെ ഒരിടത്തൊരു ഫയൽവാൻ തുടങ്ങിയ സിനിമകളും ബ്ലാക്ക് ആൻഡ് വൈറ്റായിരുന്നു.

എഴുപതുകൾക്കൊടുവിൽ ‘പോസ്റ്റുമാനെ കാൺമാനില്ല’ പോലുള്ള അനേകം സിനിമകളിൽ കഥാസന്ദർ‍ഭങ്ങൾ ബ്ലാക്ക് ആൻഡ് വൈറ്റിലും ഗാനരംഗങ്ങൾ കളറിലും അവതരിപ്പിച്ചിരുന്നു. മലയാളത്തിൽ ബ്ലാക്ക് ആൻഡ് വൈറ്റ് സിനിമകളും കളർ‍സിനിമകളും ഒരേപോലെ റിലീസിനെത്തിയ കാലമുണ്ടായിരുന്നു. ആ കാലത്ത് ചലച്ചിത്ര അവാർഡുകളിൽ ഛായാഗ്രഹണത്തിന് രണ്ടു പുരസ്കാരങ്ങൾ നൽകിയിരുന്നു. ബ്ലാക്ക് ആൻഡ് വൈറ്റ് സിനിമകൾക്കും കളർസിനിമകൾക്കും പ്രത്യേകം പ്രത്യേകം പുരസ്കാരങ്ങൾ ദേശീയ ചലച്ചിത്ര അവാർഡുകളിൽപോലും ഉണ്ടായിരുന്നു.

∙ കുട്ടിച്ചാത്തനെ ഉപാസിക്കുന്ന കുഞ്ചമൺ പോറ്റി

ആരാണ് കുഞ്ചമൺപോറ്റി? അടുത്തിടെ ഉയർന്ന ഒരു ചോദ്യമാണിത്. ‘ഭ്രമയുഗ’ത്തിൽ മമ്മൂട്ടിയുടെ കഥാപാത്രത്തിന്റെ പേര് കുഞ്ചമൺപോറ്റിയെന്നാണെന്ന് സമൂഹമാധ്യമങ്ങളിലൂടെ പുറത്തുവന്നിട്ടുണ്ട്. എന്നാൽ ഭ്രമയുഗം കുഞ്ചമൺപോറ്റിയുടെ കഥയല്ലെന്ന് സംവിധായകൻ രാഹുൽ സദാശിവൻ  വ്യക്തമാക്കിയിരുന്നു. സസ്പെൻസ് ത്രില്ലർ ഗണത്തിലുള്ള ഫിക്‌ഷനൽ കഥയാണെന്നാണ് സംവിധായകൻ പറയുന്നത്. എന്നാൽ മലയാളചരിത്രത്തിൽ ആരാണ് കുഞ്ചമൺ പോറ്റി? കുട്ടിച്ചാത്തനെ ഉപാസിച്ച് പ്രത്യക്ഷനാക്കിയ മഹാമാന്ത്രികനാണ് അദ്ദേഹം. ഐതിഹ്യമാലയിൽ കൊട്ടാരത്തിൽ ശങ്കുണ്ണി ഇങ്ങനെയാണ് അദ്ദേഹത്തെപ്പറ്റി വിവരിക്കുന്നത്: ‘കുഞ്ചമൺപോറ്റി വിളിച്ചാൽ ഏതുകാര്യത്തിനും കുട്ടിച്ചാത്തൻ വിളിപ്പുറത്തുണ്ട്’.