മലേഷ്യയിലും ഇംഗ്ലണ്ടിലും കണ്ടു, എം80 കമ്പനി എനിക്ക് എന്തെങ്കിലുമൊക്കെ തരേണ്ടതായിരുന്നു!

∙ 16 വർഷം ഒരു മീൻകാരൻ ഓടിച്ച ആ എം80 യുടെ പ്രത്യേകതകൾ എന്തൊക്കെയായിരുന്നു?

ആദ്യമിറങ്ങിയ സാധാരണ എം80 തന്നെയായിരുന്നു അത്. ബ്രൗണും ക്രീമും ആയി ഡ്യുവൽ ടോൺ വണ്ടി. 10 വർഷം നന്നായി ഓടിയ വണ്ടി എന്ന പരാധീനതകൾ അതിനുണ്ടായിരുന്നു. എന്നാലും അതു പണിമുടക്കുകയോ ഞങ്ങൾക്ക് പണി തരികയോ ചെയ്തിട്ടില്ല. സ്റ്റാർട്ടാക്കി കഴിഞ്ഞാൽ പിന്നെ നമ്മുടെ കൂടെ സുഖമായി ഓടിക്കോളും. പക്ഷേ, ഞാൻ സ്റ്റാർട്ടാക്കിയാലേ അതു സ്റ്റാർട്ടാവാറുണ്ടായിരുന്നുള്ളൂ. എനിക്കേ അതിന്റെ കൃത്യം കിക്ക് കിട്ടാറുള്ളൂ. മറ്റൊരു രസകരമായ ഓർമയുണ്ട്. ഞാൻ ഈ വണ്ടിയുമായി എവിടെച്ചെന്നു നിർത്തിയാലും സ്ത്രീകളും പൂച്ചകളും ചുറ്റും കൂടും. മീൻവണ്ടിയാണെന്നു കരുതി. ഷൂട്ടിങ്ങാണെന്ന് ആളുകൾക്ക് പെട്ടെന്ന് മനസ്സിലാവില്ല. രസകരമായി പോയ ദിവസങ്ങളായിരുന്നു അത്.

∙ ആ വണ്ടിയിൽ കുടുംബമായി യാത്ര ചെയ്തിട്ടുണ്ടോ? ആരെങ്കിലും വണ്ടിക്കു വില പറഞ്ഞിരുന്നോ?

അതിൽ കുടുംബത്തോടൊപ്പം ഞാൻ യാത്ര ചെയ്തിട്ടില്ല. പക്ഷേ, സീരിയലിലെ എന്റെ കഥാപാത്രത്തിന്റെ കുടുംബമായ പാത്തുവും മക്കളും ഒരുപാട് കയറിയിട്ടുണ്ട് ആ എം80 യിൽ. പലരും ചോദിച്ചിട്ടുണ്ട് ആ വണ്ടി കൊടുക്കുമോ എന്ന്. പക്ഷേ, ഇല്ലെന്നു ഞാൻ പറഞ്ഞു. മറ്റൊരു തമാശയുണ്ട്. ഷൂട്ടിങ് കഴിഞ്ഞപ്പോൾ ആ വണ്ടിക്ക് വേണ്ടി പിടിവലിയായിരുന്നു. നിർമാതാവു പറഞ്ഞു താനെടുക്കുമെന്ന്, സംവിധായകൻ പറഞ്ഞു താൻ കൊണ്ടുപോകുമെന്ന്. പക്ഷേ, ഞാൻ പറഞ്ഞു, ആ വണ്ടിക്ക് ഏറ്റവും ആത്മബന്ധം ഞാനുമായാണ് അതുകൊണ്ട് എനിക്കുതന്നെ തരണം എന്ന്. അങ്ങനെയാണ് എനിക്കതു കിട്ടുന്നത്. ആദ്യം വീട്ടിൽ വെറുതെ വച്ചിരിക്കുകയായിരുന്നു. പക്ഷേ, ഇപ്പോൾ അതിനു പ്രത്യേകമായൊരു കൂടൊക്കെ പണിത് അതിലാണ് സൂക്ഷിച്ചിരിക്കുന്നത്. വീട്ടിൽ വരുന്നവർക്കൊക്കെ കൗതുകമാണ് അതു കാണുന്നത്. കുട്ടികളടക്കം പലരും അതിൽ കയറിയിരുന്ന് ഫോട്ടോയൊക്കെ എടുത്തിട്ടാണ് പോകാറുള്ളത്.

∙ ഏറ്റവും ഇഷ്ടമുള്ള ടൂവീലർ ഏതാണ് ?

എം80 ഓടിച്ച് ഇഷ്ടപ്പെട്ട ശേഷം ഞാൻ സുസുക്കിയുടെ സ്ട്രീറ്റ് എന്ന സ്കൂട്ടർ വാങ്ങിയിരുന്നു. അതാണ് ഞാൻ ആദ്യമായി കാശു കൊടുത്തു വാങ്ങിയ വണ്ടി. അത് ഏകദേശം എം80 പോലെത്തന്നെയാണ്. ക്ലച്ചില്ലായിരുന്നു അതിന്. കാലു കൊണ്ട് ഗീയർ മാറ്റി ആക്സിലറേറ്റർ കൊടുത്ത് പോയാൽ മതി. അതു കുറേക്കാലം ഉപയോഗിച്ചു. ആ വണ്ടി എനിക്ക് വളരെ ഇഷ്ടമായിരുന്നു. പിന്നെ കമ്പനി ആ മോഡൽ നിർത്തി. പിന്നെ ഞാൻ വാങ്ങിയത് ഹീറോ ഹോണ്ട ബൈക്ക് ആണ്. ഇപ്പോൾ എനിക്ക് ടൂവീലർ ഇല്ല. കാറിൽ തന്നെയാണ് യാത്രകൾ.

∙ കോവൂരിലെ വീട്ടിൽ വച്ചിരിക്കുന്ന എം80 എന്തു ചെയ്യാനാണ് ഉദ്ദേശ്യം?

ആ വണ്ടി വീട്ടിൽ വച്ചതിന് അങ്ങനെ പ്രത്യേക ഉദ്ദേശ്യങ്ങളൊന്നുമില്ല. അത് എന്റെ ജീവിതവുമായി വലിയ ബന്ധമുള്ളതായതിനാൽ അങ്ങനെ സൂക്ഷിച്ചെന്നു മാത്രം. അതാർക്കും കൊടുക്കാൻ തോന്നുന്നില്ല എന്നതാണ് യാഥാർഥ്യം. ജീവിതകാലം മുഴുവൻ അതു കൂടെയുണ്ടാവണം എന്ന ആഗ്രഹംകൊണ്ട് സൂക്ഷിക്കുന്നു. ഇനിയത് ഓടില്ല. ഓടിത്തളർന്ന് പഴയതായല്ലോ ആ എം80. മഴയും വെയിലും കൊള്ളാതെ സുരക്ഷിതമായി പാർപ്പിച്ചിരിക്കുകയാണ് അതിനെ. മൊത്തത്തിൽ പെയിന്റടിച്ച് കുട്ടപ്പനാക്കിയിട്ടുണ്ട്. അങ്ങനെ കാണാൻ ഒരു സന്തോഷമാണ്. എന്നും കണി കാണുന്നത് ആ വണ്ടിയെയാണ്. നാട്ടിലുള്ള സമയത്ത് ഉണർന്നാൽ അതിന്റെയടുത്താണ് ആദ്യം ചെല്ലുക.

∙ ഒരു വാഹനം എന്ന നിലയിൽ എം80യുടെ പ്രത്യേകത എന്താണ് തോന്നിയത്?

ഈ വണ്ടിയുടെ പവർ ഒന്നു വേറെത്തന്നെയാണ്. സാധാരണക്കാരുടെ വാഹനമായിരുന്നു എം80. എത്ര ഭാരം വേണമെങ്കിലും വഹിച്ചോളും. അൻപത് ഉറുപ്യയ്ക്ക് പെട്രോൾ അടിച്ചാൽ എത്ര ദൂരം വേണമെങ്കിലും കുതിക്കും, അത്രയും മൈലേജായിരുന്നു. മീൻവണ്ടി എന്ന പേരിലാണ് അറിയപ്പെട്ടതെങ്കിലും പച്ചക്കറിക്കടക്കാർ അടക്കം പലരും ഈ വണ്ടി ഉപയോഗിച്ചിരുന്നു. മലേഷ്യയിലും ഇംഗ്ലണ്ടിലുമൊക്കെ പോയപ്പോൾ അവിടെയും ഒട്ടേറെപ്പേർ ഓടിക്കുന്നതു കണ്ടു എം80. അവിടെയൊക്കെ ഭക്ഷണം ഹോട്ടലുകളിൽനിന്നു ഡെലിവറി നടത്താനാണു കൂടുതലും ഉപയോഗിച്ചു കണ്ടത്. പിന്നിൽ വലിയ ഒരു പെട്ടിയും സ്ഥാപിച്ചിട്ടുണ്ടാകും. 

എന്തായാലും, എം80 വണ്ടിയെ ലോകം മുഴുവനും പരിചയപ്പെടുത്താൻ ‘എം80 മൂസ’യിലൂടെ എനിക്കു സാധിച്ചു. അതിനു ശരിക്കും എം80 കമ്പനി എനിക്കെന്തെങ്കിലുമൊക്കെ തരേണ്ടതായിരുന്നു! (വെറുതെ ഒരാഗ്രഹം പറഞ്ഞതാണേ...). ഷാർജ ക്രിക്കറ്റ് സ്റ്റേഡിയത്തിലൂടെ എം80 ഓടിക്കാനും എനിക്കു ഭാഗ്യം ലഭിച്ചിട്ടുണ്ട്. എത്രയോ വർഷങ്ങളായി ഡ്രൈവിങ് ടെസ്റ്റിന് അധികം പേരും ഉപയോഗിച്ചിരുന്നത് എം80 ആയിരുന്നു. ബൈക്കിനേക്കാൾ എളുപ്പത്തിൽ എം80 യിൽ 8 എടുക്കാൻ സാധിച്ചിരുന്നു എന്നാൽ, പുതിയ നിർദേശപ്രകാരം 95 സിസിയുടെ മുകളിലുള്ള വാഹനമേ ടെസ്റ്റിന് ഉപയോഗിക്കാവൂ എന്നാണു പറയുന്നത്, അങ്ങനെ വന്നാൽ, എം80 ഇനി ടെസ്റ്റ് ഗ്രൗണ്ടിൽനിന്നു പുറത്താകും. അതു വലിയ ഒരു സങ്കടം തന്നെ.

∙ ഷാർജ ക്രിക്കറ്റ് സ്റ്റേഡിയത്തിലൂടെ എം80 ഓടിച്ച ആ സംഭവമൊന്നു പറയാമോ?

ഇപ്പോഴും ആലോചിക്കുമ്പോൾ അദ്ഭുതം തോന്നുന്ന സംഭവമാണ് അത്. എം80 മൂസ പ്രോഗ്രാം ക്ലിക്കായി നിൽക്കുന്ന സമയം. ചാനൽ ഒരുക്കിയ ഒരു ഷോയായിരുന്നു ഷാർജ ക്രിക്കറ്റ് സ്റ്റേഡിയത്തിൽ. ഞാനും സുരഭിലക്ഷ്മിയും മാമുക്കോയയും സുരാജ് വെഞ്ഞാറമ്മൂടും ശ്രീനിവാസനുമൊക്കെയുണ്ടായിരുന്നു ഷോയിൽ. എന്നെ എം80യിൽതന്നെ സ്റ്റേജിൽ എത്തിക്കണമെന്നു സംഘാടകർക്ക് നിർബന്ധം. പക്ഷേ, യുഎഇയിൽ അതു കിട്ടാൻ പ്രയാസം. നാട്ടിൽനിന്നു കൊണ്ടു പോകാനും പറ്റില്ല. പിന്നെ ചെയ്തതാണ് അദ്ഭുതം. അവിടെ വിദഗ്ധനായ ഒരു ടെക്നിഷ്യൻ ഉണ്ടായിരുന്നു. അദ്ദേഹം ഹീറോ ഹോണ്ട ബൈക്ക് മോഡിഫൈ ചെയ്ത്, റീഡിസൈൻ ചെയ്ത് എം80 ആക്കി മാറ്റി! എൻജിനും ഗീയറുമൊക്കെ പഴയതു തന്നെ. പക്ഷേ, എം80 യുടെ രൂപം.