കാലം മാറി, ‘മാന്യതയുടെ’ കളിയും; തോൽവിയിലും തലയുയർത്തി സച്ചിനും ധോണിയും ഗുണ്ടപ്പയും

∙ അരങ്ങേറ്റം ഗംഭീരം, ചരിത്രമായി അസ്ഹർ

അരങ്ങേറ്റത്തിലെ ആദ്യ മൂന്നു ടെസ്‌റ്റുകളിലും ഓരോ സെഞ്ചുറി വീതംനേടി മുഹമ്മദ് അസ്‌ഹറുദ്ദീൻ ക്രിക്കറ്റിന്റെ ഭാഗമായതും ഇംഗ്ലണ്ടിനെതിരായ ടെസ്റ്റ് പരമ്പരയിലാണ്. ക്രിക്കറ്റ് ചരിത്രത്തിൽ ലോകത്ത് ഇന്നുവരെ ഒരു താരത്തിനും അവകാശപ്പെടാനാവാത്ത മഹത്തായ നേട്ടമാണ് അസ്ഹർ കുറിച്ചത്. 1984–85ലെ ഇംഗ്ലണ്ടിന്റെ ഇന്ത്യൻ പര്യടനവേളയിലായിരുന്നു അസ്‌ഹറുദ്ദീൻ എന്ന ടെക്‌നിക്കൽ ബാറ്റ്‌സ്‌മാന്റെ കടന്നുവരവ്. പരമ്പരയിലെ മൂന്നാം ടെസ്‌റ്റിലൂടെയായിരുന്നു അസ്‌ഹറിന്റെ അരങ്ങേറ്റം.

1984 ഡിസംബർ 31. വേദി: കൊൽക്കത്ത ഈഡൻ ഗാർഡൻസ്. സുനിൽ ഗാവസ്‌കറുടെ നേതൃത്വത്തിൽ ഇറങ്ങിയ ഇന്ത്യൻ ടീമിൽ അസ്‌ഹറിനെയും ഉൾപ്പെടുത്തിയിരുന്നു. അഞ്ചാമനായി ബാറ്റിങ്ങിനിറങ്ങിയ അസ്‌ഹർ ഇന്ത്യൻ ക്രിക്കറ്റിനെ നിരാശപ്പെടുത്തിയില്ല. 4/127 എന്ന നിലയിൽ പതറിയ ഇന്ത്യൻ ഇന്നിങ്‌സിന് ജീവൻ നൽകിയത് അസ്‌ഹറും രവി ശാസ്‌ത്രിയും ചേർന്നായിരുന്നു. 443 മിനിട്ട് ക്രീസിൽനിന്ന് 332 പന്തുകളിൽനിന്ന് അസ്‌ഹർ നേടിയത് 110 റൺസ്. 

 ലോകക്രിക്കറ്റിൽ സമാനതകളില്ലാത്ത നേട്ടം. അരങ്ങേറ്റ പരമ്പരയിലെ അസ്‌ഹറിന്റെ നേട്ടം ഇങ്ങനെ സംഗ്രഹിക്കാം. മൂന്നു ടെസ്‌റ്റുകളിൽനിന്നായി 439 റൺസ്, മൂന്നു സെഞ്ചുറികൾ, ഒരു അർധസെഞ്ചുറി, ഉയർന്ന സ്‌കോർ– 122, ശരാശരി – 109.75. സുനിൽ ഗാവസ്‌കർ അസ്‌ഹറിനെ അന്ന് ഇങ്ങനെ വിശേഷിപ്പിച്ചു – ‘ഇന്ത്യൻ ക്രിക്കറ്റിന് ദൈവത്തിന്റെ വരദാനം’.

∙ വീണ്ടും ലോർഡ്സ്, ബിഗ് സല്യൂട്ട് കേണൽ

ലോകകപ്പിൽ മുത്തമിട്ടശേഷം ലോർഡ്സിലേക്കുള്ള ഇന്ത്യയുടെ ആദ്യ വരവ് 1986ലായിരുന്നു. വിജയശിൽപികളായി നായകൻ കപിൽദേവും ദിലീപ് വെങ്സർക്കാറും. ‘ഞാൻ എവിടെ പോയാലും ലോർഡ്സിലെ പിച്ചും കൊണ്ടുപോകും’ എന്നു പറഞ്ഞ ‘കേണൽ’ വെങ്സർക്കാർ ഇത്തവണയും കളി ഉജ്വലമാക്കി. ക്രിക്കറ്റിന്റെ മക്കയിൽ തുടർച്ചയായ മൂന്നാം സെഞ്ചുറി നേട്ടം എന്ന അപൂർവ റെക്കോർഡും സ്വന്തമാക്കി. സമനിലയിലേക്കു നീങ്ങുകയായിരുന്ന മൽസരത്തെ കപിൽ ഉജ്വല സ്പെല്ലിൽ ആവേശകരമാക്കി.

19 പന്തിനിടെ ഒരു റൺ മാത്രം വഴങ്ങി ഇംഗ്ലണ്ടിന്റെ മുൻനിരയിലെ മൂന്നുപേരെ അരിഞ്ഞ കപിലിന്റെ പ്രകടനത്തിൽ ആതിഥേയർ 180നു പുറത്തായി. 134 റൺസ് വിജയലക്ഷ്യവുമായി ബാറ്റിങ്ങിനിറങ്ങിയ ഇന്ത്യയെ കപിൽ തന്നെ നാലു ഫോറുകളിലൂടെയും മിഡ്‌വിക്കറ്റിനു മുകളിലൂടെയുള്ള ഒരു സിക്സിലൂടെയും വിജയത്തിലേക്ക് ഉയർത്തി. ഇന്ത്യയ്കക് 5 വിക്കറ്റിന്റെ ജയം. ലീഡ്സിലെ അടുത്ത മൽസരം 279 റൺസിനു ജയിച്ച ഇന്ത്യ 2–0ന് പരമ്പരയും സ്വന്തമാക്കി. 

∙ പറന്നുവീണ ജെല്ലി ബീനുകൾ, ജയം ഇന്ത്യയ്ക്ക്

2007ലെ ഇന്ത്യയുടെ ഇംഗ്ലീഷ് പര്യടനത്തിലെ രണ്ടാം ടെസ്റ്റിന് വിവാദങ്ങളുടെ കൂടി അകമ്പടിയുണ്ടായിരുന്നു. മൽസരത്തിന് വേദിയൊരുക്കിയത് നോട്ടിങ്ങാം ട്രെന്റ്ബ്രിജ്. മൈക്കൽ വോൺ, രാഹുൽ ദ്രാവിഡ് എന്നിവരാണ് നായകൻമാർ. പരസ്‌പരം എതിരാളികളെ പ്രകോപിപ്പിച്ചും ചീത്ത വിളിച്ചും കളി ജയിക്കുന്ന ഓസ്‌ട്രേലിയൻ രീതി പകർത്താൻ ഇന്ത്യയും ഇംഗ്ലണ്ടും ശ്രമിക്കുകയായിരുന്നു എന്നാണ് താരങ്ങളുടെ പെരുമാറ്റങ്ങളിൽനിന്ന് കരുതപ്പെടേണ്ടത്. സഹീർ ഖാൻ - കെവിൻ പീറ്റേഴ്‌സൻ ഏറ്റുമുട്ടലും എസ്. ശ്രീശാന്തിന്റെ അതിരുവിട്ട പ്രകടനങ്ങളും നോട്ടിങ്ങാം ടെസ്‌റ്റിനെ ഏറെ ശ്രദ്ധേയമാക്കി.

ബാറ്റു ചെയ്യാനെത്തിയ  സഹീർ ഖാനുനേരെ പിച്ചിലേക്കു ഇംഗ്ലീഷ് താരങ്ങൾത്തന്നെ മിഠായി വലിച്ചെറിഞ്ഞതാണ് വിവാദത്തിന് തുടക്കമിട്ടത്. എതിർ ടീമിലെ ആരോ ആണ് അവ വലിച്ചെറിഞ്ഞതെന്നാണ് സഹീർ പരാതിപ്പെട്ടത്. സഹികെട്ട സഹീർ ഖാൻ അവരുടെ അടുത്തേക്കു ചെന്നു. ‘എന്താണു ചെയ്യുന്നത് സുഹൃത്തുക്കളേ, ഞാൻ ഇവിടെ ക്രിക്കറ്റ് കളിക്കാൻ വന്നതാണ്’. ഇങ്ങനെ പറഞ്ഞപ്പോൾ തീർത്തും മോശമായിരുന്നു പ്രതികരണം. രോഷാകുലനായ സഹീർ ഗള്ളിയിൽ നിന്ന കെവിൻ പീറ്റേഴ്‌സനു നേരേ ബാറ്റുയർത്തി കാണിച്ചു.

‘‘എവിടെ നിന്നാണു ജെല്ലി ബീനുകൾ വന്നതെന്ന് എനിക്കറിയില്ല. ഒരുപക്ഷേ, തെറ്റായ ആളോടാകാം ഞാൻ ദേഷ്യപ്പെട്ടത്. ഞാൻ ആ സമയത്ത് അതിനെക്കുറിച്ചൊന്നും ഏറെ ആലോചിച്ചില്ല. എന്നെ അവഹേളിക്കുന്നതായിരുന്നു ഫീൽഡർമാരുടെ നടപടി. അറിയാതെയാണ് അവിടെ ജെല്ലി ബീനുകൾ വന്നതെങ്കിൽ, വീണ്ടും അവിടെ ജെല്ലി ബീനുകൾ കാണില്ലല്ലോ. എന്റെ ക്രിക്കറ്റ് ജീവിതത്തിലെ ഏറ്റവും മികച്ച ബോളിങ് പ്രകടനങ്ങളിലൊന്നിനു പ്രചോദനമായത് ഈ സംഭവമാണ്.’’ - സഹീർ പിന്നീട് പറഞ്ഞു.