ഈ ബംഗ്ലാവുകളിൽ എത്തണം തണുപ്പറിയാൻ; കാടിനുള്ളിൽ ഒരു രാത്രി; നിങ്ങൾ കണ്ടത് മാത്രമല്ല മൂന്നാർ

മഞ്ഞണിഞ്ഞ തേയില തോട്ടങ്ങൾ, കാൻവാസിൽ കോറിയ ചിത്രം പോലെ കണ്ണെത്താ ദുരത്തോളം പരന്നു കിടക്കുന്ന മലമേടുകൾ, മഞ്ഞുപുതച്ച വഴികൾ. ഒപ്പം കോടമഞ്ഞു വാരി വിതറുന്ന സുഖകരമായ തണുപ്പും. വർണനകളിലൊതുക്കാനാകില്ല മൂന്നാറിന്റെ സൗരഭ്യം. കണ്ണിനേയും മനസിനേയും ഒരുപോലെ വിസ്മയിപ്പിക്കും മൂന്നാറിന്റെ കാഴ്ചകൾ. കരിമ്പാറ കൂട്ടങ്ങൾക്കിടയിലൂടെ വെള്ളിയാഭരണം പോലെ ഒഴുകിയിറങ്ങുന്ന നീർച്ചാലുകൾ. കാഴ്ചകൾ ഒരുപാടുണ്ട്. അടിമാലിയിൽ നിന്ന് പൂപ്പാറ ഗ്യാപ് റോഡ് വഴിയും അടിമാലി– മൂന്നാർ റോഡ് വഴിയും അടിമാലി– കല്ലാർ– മാങ്കുളം– മൂന്നാർ റോഡ് വഴിയും മൂന്നാറിലെത്താം. മൂന്നുവഴികളും കാഴ്ചകളുടെ സ്വർഗം തുറക്കും

∙ ഗ്യാപ് റോഡ് വഴി മൂന്നാറിലേക്ക്

തുടക്കം മുതൽ ഒടുക്കം വരെ അവസാനിക്കാത്ത മനോഹര കാഴ്ചകളാണു കൊച്ചി–ധനുഷ്കോടി ദേശീയപാതയിൽ ബോഡിമെട്ട് മുതൽ മൂന്നാർ വരെയുള്ള 41.78 കിലോമീറ്റർ റോഡിലുള്ളത്. അടിമാലിയിൽ നിന്നും ഏലക്കാടുകളും ഗ്രാമീണ റോഡുകളും കടന്ന് പൂപ്പാറയെത്തിയാൽ ഗ്യാപ് റോഡിലേക്ക് കയറാം. അരിക്കൊമ്പനെ പിടിച്ചുകെട്ടിക്കൊണ്ടുപോയ വഴി സമൂഹമാധ്യമങ്ങൾ ഏറ്റെടുത്തതോടെയാണ് ഗ്യാപ് റോഡിന്റെ പെരുമ ചർച്ചയായത്. തേയിലക്കാടുകൾക്കിടയിലൂടെ നീണ്ടുകിടക്കുന്ന റോഡ് കേരളത്തിലെതന്നെ ഏറ്റവും മികച്ച യാത്രാനുഭവം നൽകുന്ന റോഡാണ്.

പൂപ്പാറയിൽ നിന്ന് പെരിയകനാലിലേക്കുള്ള വഴിമധ്യേ ആനയിറങ്കൽ ജലാശയം കാണാം. പെരിയകനാലിനും പൂപ്പാറയ്ക്കും ഇടയിലാണ് ആനയിറങ്കൽ ജലാശയവും ജലാശയത്തിന്റെ ചുറ്റുമുള്ള വനമേഖലയും. പൂപ്പാറ പിന്നിട്ടാൽ പിന്നെയും കുറച്ചു ഭാഗം കൂടി തേയിലക്കുന്നുകളുടെ സൗന്ദര്യം നുകരാൻ കഴിയും. ഏലത്തോട്ടങ്ങൾ പിന്നിട്ട് തോണ്ടിമലയിൽ എത്തിയാൽ അവിടെയും ആനയിറങ്കൽ ജലാശയത്തിന്റെ വിദൂരദൃശ്യം കാണാൻ കഴിയുന്ന ഒന്നിലധികം വ്യൂപോയിന്റുകൾ ഉണ്ട്. പെരിയകനാൽ വെള്ളച്ചാട്ടവും മൂന്നാറെത്താറാകുമ്പോഴുള്ള സിഗ്നൽ പോയിന്റും വാഹനം നിർത്തി പുറത്തിറങ്ങി കാണേണ്ട സ്ഥലങ്ങളാണ്. 

∙ മാങ്കുളം വഴിയും അടിമാലി വഴിയും മൂന്നാറിലേക്ക്

സഞ്ചാരികൾക്ക് ഇഷ്ടപ്പെട്ട മറ്റൊരു റോഡാണ് മാങ്കുളം– ലക്ഷ്മി– മൂന്നാർ. മാങ്കുളത്തുനിന്നു 25 കിലോമീറ്ററാണ് ഇതുവഴി മൂന്നാറിലേക്കുള്ളത്. വിരിപാറ വെള്ളച്ചാട്ടം, ലക്ഷ്മിക്ക് സമീപമുള്ള വ്യൂ പോയിന്റ് എന്നിവ മുഖ്യ ആകർഷണങ്ങളാണ്. എന്നാൽ, റോഡ് തകർന്നു കിടക്കുന്നതു സഞ്ചാരികളുടെയും യാത്രക്കാരുടെയും ദുരിതം വർധിക്കാൻ കാരണമായിട്ടുണ്ട്. എങ്കിലും മൂന്നാറിന്റെ യഥാർഥ സൗന്ദര്യം കാണണമെങ്കിലും ഒരിക്കലെങ്കിലും ഈ വഴി പോയിവരണം.

ഏറ്റവും അധികം ആളുകൾ മൂന്നാർ പോയിവരുന്നത് അടിമാലി വഴിയാണ്. കല്ലാർ വെള്ളച്ചാട്ടവും വ്യൂപോയിന്റും ചെക്ഡാമുകളും തേയിലത്തോട്ടങ്ങളും ഫോട്ടോപോയിന്റും ചോക്ലേറ്റ് ഫാക്ടറികളും ഗാർഡൻ വിസിറ്റുകളും മ‍ഞ്ഞുമൂടിയ ഏലത്തോട്ടങ്ങളുമെല്ലാം ഈ വഴിയിലെ കാഴ്ചകളാണ്. കൂടാതെ സിപ് ലൈൻ പോലുള്ള സാഹസിക പരിപാടികളും വഴിമധ്യേ ഉണ്ട്. നല്ല രസികൻ ചായയും ചെറുകടികളും ലഭിക്കുന്ന കുഞ്ഞുകടകളും ശുചിമുറി സൗകര്യങ്ങളുമായി ടേക് എ ബ്രേക്ക് കേന്ദ്രങ്ങളും വഴിനീളെ ഉണ്ട്.

∙ സീറോ ഡിഗ്രി ടൗൺ

മൂന്നാറിൽ അതിശൈത്യം ആരംഭിച്ച് താപനില പൂജ്യത്തിലെത്തിയത് ജനുവരി പകുതിയോടെയാണ്. ഗുണ്ടുമല അപ്പർ ഡിവിഷൻ, കടുകു മുടി എന്നിവിടങ്ങളിലാണ് താപനില പൂജ്യത്തിലെത്തിയത്. ഈ സീസണിലെ ഏറ്റവും താഴ്ന്ന താപനിലയാണിത്. മൂന്നാർ ടൗൺ, നല്ല തണ്ണി, നടയാർ എന്നിവിടങ്ങളിൽ 4 ഡിഗ്രി സെൽഷ്യസും ചെണ്ടുവര, തെന്മല, ലക്ഷ്മി, ചിറ്റുവര, എല്ലപ്പെട്ടി, ചൊക്കനാട് എന്നിവിടങ്ങളിൽ 2 ഡിഗ്രി സെൽഷ്യസുമായിരുന്നു താപനില. താപനില പൂജ്യത്തിലെത്തിയതിനെ തുടർന്ന് ഗുണ്ടുമല അപ്പർ ഡിവിഷൻ, കടുകു മുടി എന്നിവിടങ്ങളിലെ പുൽമേടുകളിൽ രാവിലെ വെള്ളം തണുത്തുറഞ്ഞ് മ‍ഞ്ഞ് രൂപപ്പെട്ട നിലയിലായിരുന്നു.

സാധാരണ മൂന്നാറിൽ ഒക്ടോബർ മാസത്തിൽ ആരംഭിക്കുന്ന ശൈത്യകാലം ഇത്തവണ ഏറെ വൈകി ജനുവരി പാതിയോടെയാണ് ആരംഭിച്ചത്. മൂന്നാർ കാണാൻ പോകുന്നവർ പലപ്പോഴും മൂന്നാർ പട്ടണവും രാജമലയും മാട്ടുപ്പെട്ടിയും ചുറ്റിക്കണ്ടു യാത്ര അവസാനിപ്പിക്കുകയാണ്. എന്നാൽ, ഈ സ്ഥലങ്ങൾ മാത്രമല്ല മൂന്നാർ. ദേവികുളം, വട്ടവട, സൂര്യനെല്ലി, ടോപ് സ്റ്റേഷൻ, പള്ളിവാസൽ, ചിന്നക്കനാൽ...അങ്ങനെ മൂന്നാറിനു ചുറ്റുപാടും മനോഹരമായ സ്ഥലങ്ങളുണ്ട്. ഇവിടെയൊക്കെയാണ് മൂന്നാർ പട്ടണത്തെക്കാൾ തണുപ്പുമുള്ളത്. കിടുകിടാ വിറച്ചുപോകും. അത്രയും തണുപ്പ്. പ്രകൃതിസൗന്ദര്യത്തിന്റെ കാര്യം പറയാനുമില്ല. മൂന്നാറിലെ പല വിദൂര എസ്റ്റേറ്റുകളിലും സഞ്ചാരികൾക്കു താമസസൗകര്യം ഒരുക്കുന്ന എസ്റ്റേറ്റ് ബംഗ്ലാവുകളുണ്ട്. ഇവിടെയാണ് താപനില പൂജ്യം ഡിഗ്രി സെൽഷ്യസിലും താഴാറുള്ളത്.

∙ കോൾഡ് ഹിസ്റ്ററി

ഒരു സ്കോട്ടിഷ് പട്ടണത്തിന്റെ കൊച്ചു പതിപ്പാണ് ഇന്നും മൂന്നാർ. പട്ടണത്തിന്റെ ഹൃദയഭാഗത്തുകൂടി മുതിരപ്പുഴയാർ ഒഴുകുന്നു. ചരിത്രത്തിന്റെ ഏടുകളിൽ മൂന്നാറിനു നിരത്താൻ അഭിമാനകരമായ ഏടുകൾ ഏറെയുണ്ട്. 135 വർഷം മുൻപു ബ്രിട്ടിഷുകാരെ മോഹിപ്പിച്ച ആ സൗന്ദര്യം പിന്നെയും പതിറ്റാണ്ടുകൾ‌ക്കു ശേഷമാണു പുറംലോകം അറിഞ്ഞതും അതുവഴി ലോകമറിയുന്ന വിനോദസഞ്ചാര കേന്ദ്രമായി മൂന്നാർ മാറിയതും. മുതിരപ്പുഴ, നല്ലതണ്ണി, കുണ്ടളി എന്നീ മൂന്ന് ‘ആറുകൾ’ ചേരുന്ന സ്ഥലം എന്ന വിശേഷണത്തിൽ നിന്നാണ് മൂന്നാർ എന്ന പേരുണ്ടായത്. പള്ളിവാസൽ, ദേവികുളം, മളയൂർ, മാങ്കുളം, കുട്ടമ്പുഴ പഞ്ചായത്തുകൾക്കു നടുവിലാണ് മൂന്നാർ.

ടാറ്റയുടെ ഉടമസ്ഥതയിലുള്ള തേയിലത്തോട്ടങ്ങളാണ് മൂന്നാറിന്റെ ഭൂപ്രകൃതിക്ക് അടുക്കും ചിട്ടയുമുണ്ടാക്കിയത്. അതേ സമയം ബ്രിട്ടിഷുകാരാണ് മൂന്നാർ പട്ടണത്തിനരികെ ആദ്യത്തെ ടൂറിസ്റ്റ് ബംഗ്ലാവുകൾ നിർമിച്ചത്. പഴയ മൂന്നാറിലുള്ള സിഎസ്ഐ ദേവാലയവും സെമിത്തേരിയും ബ്രിട്ടിഷ് ഭരണ കാലത്താണ് നിർമിച്ചത്. ഈ സെമിത്തേരിയുടെ ഏറ്റവും മുകളിലാണ് എലെയ്നർ ഇസബെൽ മെയ് എന്ന ബ്രിട്ടിഷുകാരിയുടെ കല്ലറ. പ്രകൃതിയും കാലാവസ്ഥയും ഒരുക്കിയ വശ്യസൗന്ദര്യം മാത്രമല്ല മൂന്നാറിന്റെ ആകർഷണം. യുനെസ്കോയുടെ ലോക പൈതൃകപ്പട്ടികയിൽ ഇടംനേടിയ പശ്ചിമഘട്ട മലനിരകൾ സമ്മാനിക്കുന്ന നീലക്കുറിഞ്ഞിയും വരയാടുകളും പോലുള്ള അപൂർവതകളൊക്കെ മൂന്നാറിന്റെ സ്വന്തമാണ്.

മൂന്നാർ പട്ടണത്തിൽനിന്നു 35 കിലോമീറ്റർ ദൂരെ ടോപ് സ്റ്റേഷൻ വരെ മലകളെ ചുറ്റി തീവണ്ടിച്ചക്രങ്ങൾ ഉരുണ്ടുതുടങ്ങിയത് 1908ൽ ആയിരുന്നു. ബുക്കാനനും ഹൈറേഞ്ചറും ആനമുടിയും കുണ്ടളയുമായിരുന്നു അന്നു വിറകും കൽക്കരിയും ഭക്ഷിച്ച് കിതച്ചും തീ തുപ്പിയും മല കയറിയിരുന്ന തീവണ്ടികൾ. ഇതിന്റെ അവശിഷ്ടങ്ങൾ ഇപ്പോഴും ടോപ് സ്റ്റേഷനു സമീപമുണ്ട്. ഇന്നു മൂന്നാർ ടൗണിൽ കണ്ണൻ ദേവൻ കമ്പനിയുടെ പ്രധാന ഓഫിസ് പ്രവർത്തിക്കുന്ന കെട്ടിടം ഒരിക്കൽ റെയിൽവേ സ്റ്റേഷനായിരുന്നു. പഴമക്കാർ മഹാപ്രളയം എന്നു വിശേഷിപ്പിക്കുന്ന 99(1924)ലെ വെള്ളപ്പൊക്കം മൂന്നാറിലെ റെയിൽവേ പാളങ്ങളെയും പാലങ്ങളെയുമെല്ലാം തകർത്തെറിഞ്ഞതും ചരിത്രം.

തേയിലത്തോട്ടങ്ങളിൽ ബ്രിട്ടിഷുകാർ ഇലക്ട്രോണിക് മാഗ്നറ്റിക് സംവിധാനത്തിലൂടെ 1908ൽ സ്ഥാപിച്ച വാർത്താവിനിമയ സംവിധാനം രാജ്യത്തിനാകെ മാതൃകയായിരുന്നു. രാജ്യത്തു മഹാഭൂരിപക്ഷം പ്രദേശങ്ങളിലും വൈദ്യുതി എത്താതിരുന്ന കാലത്ത് കേരളത്തിലെ വീടുകളിൽ 77 വർഷം മുൻപു വൈദ്യുതി എന്ന അദ്ഭുത പ്രതിഭാസം കടന്നെത്താൻ കാരണമായ പള്ളിവാസൽ ജലവൈദ്യുത പദ്ധതിയും മൂന്നാറിന്റെ ചരിത്രവിശേഷങ്ങളിലൊന്നാണ്.

∙ പാമ്പാടുംചോലയിലെ വനയാത്ര

കേരളത്തിലെ ഏറ്റവും ചെറിയ ദേശീയോദ്യാനമാണ് 1.318 ചതുരശ്ര കിലോമീറ്റർ മാത്രം വനപ്രദേശമുള്ള പാമ്പാടുംചോല നാഷനൽ പാർക്ക്. സംസ്‌ഥാനത്ത് ഏറ്റവും ഒടുവിലായി രൂപീകൃതമായ ദേശീയോദ്യാനങ്ങളിൽ ഒന്നും ഇതുതന്നെയാണ്. പാമ്പാടും മല എന്ന കൂറ്റൻ മല ഇവിടെയുണ്ട്. ഈ മലയുമായി ബന്ധപ്പെട്ടാണ് ദേശീയോദ്യാനത്തിന് ഇത്തരമൊരു പേരു ലഭിച്ചത്. പാമ്പാടുംചോല ദേശീയോദ്യാനത്തിലെ ഏറ്റവും ഉയർന്ന മലയാണിത്. ഇതു കൂടാതെ ഒട്ടേറെ മലകൾ അംബരചുംബികളായി ആദിത്യകിരണങ്ങൾ നിത്യവും ഏറ്റുവാങ്ങുന്നു. ചോലക്കുറിഞ്ഞി എന്നൊരു ചെടി ഇവിടെ കാണപ്പെടുന്നുണ്ട്. അഞ്ച്, ഏഴ് വർഷം കൂടുമ്പോൾ ഇതു പൂക്കാറുണ്ട്.