പണം തരുന്ന മരങ്ങൾ മാത്രം മതിയോ? ചിത്രം കണ്ട് സമൂഹം നന്നാകില്ല: എ.രാമചന്ദ്രൻ ഇങ്ങനെ പറഞ്ഞതിനു കാരണമുണ്ട്

എറണാകുളം ദർബാർ ഹാളിലെ ആർട്ട് ഗാലറി തിങ്കളാഴ്ചകളിൽ അവധിയാണ്. എന്നാൽ 4 വർഷം മുൻപ് ആർട്ട് ഗാലറി ആ പതിവ് തെറ്റിച്ചു. ചിത്രകാരൻ എ.രാമചന്ദ്രന്റെ ചിത്രപ്രദർശനം അവിടെ നടക്കുന്നുണ്ടായിരുന്നു. ആ പ്രദർശനത്തിന് മുടക്കംവരാതിരിക്കാനാണ് പതിവുകളോട് കണ്ണടച്ച് ആർട്ട് ഗാലറിയുടെ വാതിലുകൾ തിങ്കളാഴ്ചകളിലും ആസ്വാദകർക്കായി തുറന്നു നൽകിയത്. 4 വർഷത്തെ ഇടവേളയ്ക്കുശേഷമായിരുന്നു 2019ൽ തന്റെ ചിത്ര–ശിൽപ പ്രദർശനവുമായി എ.രാമചന്ദ്രൻ കേരളത്തിലെത്തിയത്.

കേരള ലളിതകലാ അക്കാദമി ആർട്ട് ഗാലറിയിൽ സംഘടിപ്പിച്ച ‘ദ് മഹാത്മ ആൻഡ് ദ് ലോട്ടസ് പോണ്ട്’ എന്ന എ.രാമചന്ദ്രന്റെ ചിത്ര പ്രദ‍ർശനവേളയിലാണ് അദ്ദേഹം ഇതു പറഞ്ഞത്. 40 വർഷത്തോളം ഗാന്ധിജിയെയും താമരക്കുളത്തെയും പിന്തുടർന്ന് 5 വർഷത്തിനിടെ ചെയ്ത സൃഷ്ടികളായിരുന്നു അന്ന് കൊച്ചിയിലെ പ്രദർശനത്തിലുണ്ടായിരുന്നത്.

പുലർത്തിയ സവിശേഷമായ നിലപാടുകളും പിന്തുടർന്ന വേറിട്ട വഴികളും കാരണം എ.രാമചന്ദ്രന് ഇന്ത്യയിലെ കലാരംഗം നൽകിയ സ്ഥാനം വളരെ ഉയർന്നതായിരുന്നു. ദർബാർഹാൾ ആർട്ട് ഗാലറിയിൽ 27 ദിവസത്തെ പ്രദർശനത്തിനെത്തിയ എ. രാമചന്ദ്രൻ കലാരംഗത്തെ വേറിട്ട കാഴ്ചപ്പാടുകളെക്കുറിച്ചും ഗാന്ധിജിയോടും പ്രകൃതിയോടും നാം കാണിക്കുന്ന നെറികേടിനെക്കുറിച്ചുമെല്ലാം സംസാരിച്ചു. ചിത്രരചന, വികസനം തുടങ്ങിയ മേഖലകളിൽ രാമചന്ദ്രന്റെ ചിന്തകൾ പരിചയപ്പെടാം.

∙ കളിസ്ഥലമില്ലെങ്കിൽ കുട്ടികൾ മൊബൈലിൽ കളിക്കും!

വികസനവും കലയിലെ മാറ്റങ്ങളും എങ്ങനെ പരസ്പരം ബന്ധപ്പെട്ടുകിടക്കുന്നുവെന്ന് അദ്ദേഹം ചുരുങ്ങിയ വാക്കുകളിലൂടെ വ്യക്തമാക്കിയത് ഇങ്ങനെയാണ്; ‘‘കുട്ടികൾക്കു കളിക്കാൻ കളിസ്ഥലങ്ങളില്ല, പകരം അവർ മൊബൈലിൽ കളിക്കുന്നു. തെങ്ങോല കൊണ്ടു പന്തുണ്ടാക്കിക്കളിച്ചവരാണ് എന്റെ തലമുറ. അതു നിങ്ങൾക്കെല്ലാം നിസ്സാരമാകാം. എന്നാൽ ഒരു കുട്ടിയുടെ നൈസർഗികത വളർത്താൻ അതിലും നല്ലൊരു മാർഗമില്ല. ഇന്ന് അതെല്ലാം ഇല്ലാതായി. എന്നെപ്പോലുള്ളവർ കണ്ടുവളർന്ന മരങ്ങൾ ഇന്നില്ല. പണം തരുന്ന മരങ്ങൾ മാത്രം വളർത്തുന്നതായി നമ്മുടെ പുതിയ രീതി. അതിന്റെ ഫലമാണ് ഇന്നു നാം അനുഭവിക്കുന്ന വെള്ളപ്പൊക്കം. നാം പതുക്കെ പ്രകൃതിയെ മറക്കുന്നു’’. 

∙ നിയമാവലി അനുസരിച്ചല്ല ചിത്രകാരൻ പ്രവർത്തിക്കേണ്ടത്

എന്താണ് ശൈലി? അദ്ദേഹം വ്യക്തമാക്കുന്നതിങ്ങനെ, ശൈലിയെന്നാൽ ഏതെങ്കിലും കള്ളികളിലൊതുങ്ങുന്നതാണെന്നു ഭൂരിപക്ഷം ചിത്രകാരന്മാരും വിശ്വസിക്കുന്നു. എന്നാൽ അതല്ല യാഥാർഥ്യം. ഇതിനോടെല്ലാം വിയോജിപ്പു പ്രകടിപ്പിച്ചതിനാൽ തനിക്കു പലതും അനുഭവിക്കേണ്ടിവന്നുവെന്നും അതിൽ പ്രയാസമില്ലെന്നും അദ്ദേഹം തുറന്നുപറഞ്ഞു. ചിത്രകാരൻ ഏതെങ്കിലും അജൻഡ പാസാക്കേണ്ടവരോ നിയമാവലി അനുസരിച്ചു പ്രവർത്തിക്കേണ്ടവരോ അല്ല. അതു വിശ്വസിച്ച് അങ്ങനെ പ്രവർത്തിക്കേണ്ടിവന്നില്ല എന്നതാണു തന്റെ സന്തോഷമെന്നും അദ്ദേഹം വ്യക്തമാക്കി. സുഹൃത്തുക്കളായ സമകാലിക ചിത്രകാരന്മാർ ചെയ്തതൊന്നും തനിക്ക് ഇഷ്ടമായില്ലെന്നും അദ്ദേഹം വ്യക്തമാക്കിയിട്ടുണ്ട്.