‘ആനെഹൊണ്ടെ’യിൽ തീർന്ന ജീവിതങ്ങൾ; ‘‘ഉദാ ഉദാ’’ വിളി മുഴങ്ങുന്ന മാഘപൗർണമി; ദേവദാസികൾക്ക് രക്ഷകരെത്തിയോ?

1982ലെ നിരോധനത്തിനു ശേഷവും ഇവിടെ ദേവദാസിയാക്കൽ ചടങ്ങ് നടന്നിട്ടുണ്ട് എന്നതിന് ആ കാഴ്ച തന്നെ തെളിവ്. ദേവദാസികളിൽ ഭൂരിഭാഗം പേരുടെയും മുടി ജ‍ട പിടിച്ചിട്ടുണ്ട്. അതു ദേവിയുടെ അനുഗ്രഹമാണെന്നാണ് അവരുടെ വാദം. ജട പിടിച്ച മുടിക്കു മുകളിൽ തളികയിൽ യെല്ലമ്മ വിഗ്രഹവും ഏന്തി അവർ മല കയറുകയാണ്, പിന്നെയും അനുഗ്രഹത്തിനായി. പടികൾ കയറി എത്തുന്നതു വലിയൊരു പാറയുടെ പുറത്താണ്. അതിന്റെ താഴ‌്‌വാരത്തിൽ ഒരു കുളം കാണാം. അതാണ് ആനക്കുളം. ദേവദാസികളും യെല്ലമ്മയെ തൊഴാനെത്തിയവരുമെല്ലാം അടുത്ത കാലം വരെ ആ കുളത്തിൽ കുളിച്ചു വസ്ത്രം മാറി ക്ഷേത്രദർശനത്തിനു പോകുമായിരുന്നു.

ഇപ്പോൾ കുളത്തിൽ ഇറങ്ങി കുളിക്കുന്നത് അപകടകരമായതിനാൽ ആളുകൾ കുറച്ചു വെള്ളം ശേഖരിച്ചു കൊണ്ടുവന്ന് പാറയിൽ നിന്നുകൊണ്ട് ദേഹശുദ്ധി വരുത്തിയെന്നു വരുത്തിത്തീർക്കുകയാണ്. യെല്ലമ്മ വിഗ്രഹം പാറപ്പുറത്തു വച്ച് വർണപ്പൊടികളും പൂക്കളും ചാർത്തി സ്വന്തം നിലയിൽ ഓരോരുത്തരും പൂജ നടത്തും. പൂജയ്ക്കിടയിൽ ചിലർ തുള്ളിയുറയുന്നതും കാണാം. രാത്രിയാകുമ്പോഴേക്കും പാറപ്പുറം മുഴുവനും ഭക്തരെക്കൊണ്ടു നിറഞ്ഞിരിക്കും, ക്ഷേത്രദർശനം കഴിഞ്ഞാലും ആളുകൾ പാറപ്പുറത്ത് തിരിച്ചെത്തി വിശ്രമിക്കും. അവർക്കിടയിലൂടെ നടന്നുപോകുക തന്നെ ദുഷ്കരമാണ്.

∙ നിരീക്ഷണം ശക്തം

ദേവദാസിയാക്കൽ നിരോധിച്ചു കൊണ്ടുള്ള ബാനറുകൾ അവിടവിടെ കാണാം. പെൺകുട്ടികളെ ദേവദാസിയാക്കിയാൽ 2 മുതൽ 5 വർഷം വരെ തടവും 2000 മുതൽ 10,000 രൂപ വരെ പിഴയുമാണു ശിക്ഷ എന്ന് ബാനറുകളിൽ കാണാം. മനോരമ ലേഖനം സുപ്രീം കോടതിയിൽ എത്തിയതിനെത്തുടർ‌ന്ന്, ദേവദാസിയാക്കുന്നതിനെതിരെ ശക്തമായ ബോധവൽക്കരണം വേണമെന്ന് 2016 ഫെബ്രുവരിയിലെ വിധിയിൽ നിഷ്കർഷിച്ചിരുന്നു. അതിന്റെ ഭാഗമാണു വനിതാ വികസന വകുപ്പ് തയാറാക്കിയ ബാനറുകൾ. 

റവന്യു, പൊലീസ് ഉദ്യോഗസ്ഥരും സന്നദ്ധ പ്രവർത്തകരും അടങ്ങുന്ന വിവിധ സംഘങ്ങൾ ക്ഷേത്രം കേന്ദ്രീകരിച്ചു പരിശോധന നടത്തുമെന്നും സംശയകരമായ സാഹചര്യത്തിൽ കുടുംബങ്ങൾ പെൺകുട്ടികളുമായി എത്തിയാൽ വിശദാംശങ്ങൾ ചോദിച്ച് ദേവദാസിയാക്കാൻ എത്തിച്ചതല്ലെന്ന് ഉറപ്പു വരുത്തുമെന്നും സുപ്രീം കോടതിയിൽ കർണാടക സർക്കാർ അറിയിച്ചിരുന്നു. ഇതിനായി സന്നദ്ധപ്രവർത്തകരും മാഘപൗർണമിക്ക് യെല്ലമ്മ ക്ഷേത്രത്തിൽ എത്തിച്ചേരും.

∙ നിസ്സാരമല്ല മാറ്റങ്ങൾ

സന്നദ്ധ പ്രവർത്തകരുമായി എത്തിയ ദേവദാസി വിമോചന മുന്നണി സംസ്ഥാന പ്രസിഡന്റ് ടി.വി.രേണുകയെ ഞങ്ങൾ‌ ഈ യാത്രയിലും കണ്ടു. സുപ്രീം കോടതി വിധി കർണാടകയിൽ വലിയ മാറ്റങ്ങൾ ഉണ്ടാക്കിയതായി രേണുക പറഞ്ഞു. പക്ഷേ, ഇപ്പോൾ ക്ഷേത്രങ്ങളിൽ നിന്നു മാറി വീടുകൾ കേന്ദ്രീകരിച്ച് ദേവദാസിയാക്കൽ ചടങ്ങു നടക്കാനുള്ള സാധ്യതയും അവർ ചൂണ്ടിക്കാട്ടി. വീടുകളിലെ ചടങ്ങ് കണ്ടെത്തുന്നതോ തടയുന്നതോ അത്ര എളുപ്പമല്ല. കഴിഞ്ഞ വർഷം ജഗലൂർ താലൂക്കിലെ മഡ്രള്ളിയിൽ ദേവദാസിയാക്കിയതായി പെൺകുട്ടി തന്നെ പരാതിപ്പെട്ടിട്ടും പിതാവിനെ 7 ദിവസം കഴിഞ്ഞ് വിട്ടയയ്ക്കേണ്ടിവന്നുവെന്നും ദുർബലമായ വകുപ്പുകൾ ചുമത്തിയാണ് പൊലീസ് കേസ് എടുക്കുന്നതെന്നും രേണുക പറഞ്ഞു.

മാഘപൗർണമി കഴിഞ്ഞ് ദിവസങ്ങൾ കഴിയുമ്പോൾ ഇത്തരം പരാതികൾ ഇപ്പോഴും പലയിടത്തു നിന്നും ഉയരാറുണ്ട്. ഇങ്ങനെ പരാതിപ്പെടാൻ തയാറായി കുട്ടികൾ മുന്നോട്ടുവരുന്നതുതന്നെ ഗുണപരമായ മാറ്റമായാണ് ദേവദാസി വിമോചന മുന്നണി കാണുന്നത്. കർണാടകയിൽ വിവിധ ജില്ലകളിലായി 44,000 ദേവദാസികൾ ഉണ്ട് എന്നാണ് സർക്കാർ കണക്ക്. എന്നാൽ, അനൗദ്യോഗിക കണക്ക് ഇതിലുമേറെയാണ്. ഇവരുടെ മക്കളായ ഒരു ലക്ഷത്തോളം പേർക്ക് രേഖകളിൽ അച്ഛന്റെ പേര് ഇല്ല. ഇതുണ്ടാക്കുന്ന സാമൂഹിക പ്രത്യാഘാതങ്ങൾ ഏറെയാണ്. ദേവദാസികൾക്ക് പ്രതിമാസം 2000 രൂപയാണ് പെൻഷൻ. പെൻഷൻ കിട്ടാൻ, ദേവദാസി ആയിരുന്നു എന്ന അവകാശവാദവുമായി ലൈംഗികത്തൊഴിലാളികൾ പോലും ഓഫിസുകളിൽ എത്തുന്നുണ്ടെന്ന് വനിതാ വികസന വകുപ്പ് ഉദ്യോഗസ്ഥർ പറയുന്നു.