തലച്ചോറിൽ മസ്ക് ഒളിപ്പിച്ച അദ്ഭുതം, ഇത് ചിന്തകളെ പിടിച്ചെടുക്കും ചിപ്: ലോകം കീഴടക്കുമോ ന്യൂറാലിങ്ക്?

നിലവിൽ തലച്ചോറിൽനിന്ന് സിഗ്നൽ സ്വീകരിക്കാനാണ് മസ്ക് സാങ്കേതിക വിദ്യ ഒരുക്കുന്നതെങ്കിലും ഇത് വിജയിച്ചാൽ മസ്തിഷ്കത്തിന് തിരികെ സിഗ്നൽ നൽകാവുന്ന സാധ്യതയും ശാസ്ത്രലോകം മുന്നിൽ കാണുന്നു. ഇത് ശരിയായാൽ ഒരുപക്ഷേ മനുഷ്യനെ ബാധിക്കുന്ന ഒട്ടേറെ രോഗങ്ങളും ലോകത്തുനിന്ന് ഇല്ലാതാകും. ചലനശേഷിയറ്റവർ‌ നടക്കും. കാണാനും കേൾക്കാനുമൊക്കെ പരിമിതിയുള്ളവരിൽ വലിയ മാറ്റമുണ്ടാക്കാൻ കഴിയും. എന്തിന്, മനുഷ്യന്റെ തലച്ചോറിന്റെ പ്രയോഗശേഷിയിൽ പോലും മാറ്റമുണ്ടായേക്കാം.

∙ ചിപ് വയ്ക്കാൻ റോബട്

നിലവിൽ പുറത്തുവന്നിരിക്കുന്ന വിവരം അനുസരിച്ച് ന്യൂറാലിങ്ക് തലച്ചോറിൽ ഘടിപ്പിക്കുന്നത് കൊച്ചുനാണയത്തിന്റെ വലുപ്പമുള്ള ഒരു ഡിവൈസും അതിൽ നിന്ന് തലച്ചോറിലെ തരംഗങ്ങൾ പിടിച്ചെടുക്കാവുന്ന കേബിളുകളുമാണ്. ഇതാണ് ബിസിഐ അഥവാ ബ്രെയിൻ– കംപ്യൂട്ടർ ഇന്റർഫേസ്. പുറമേ നിന്ന് വയർലസായി ചാർജ് ചെയ്യാവുന്ന കൊച്ചു ബാറ്ററിയും ഇതിലുണ്ട്. തലച്ചോറിൽനിന്ന് ശേഖരിക്കുന്ന ഡേറ്റ മുഴുവൻ വയർലസ് ആയിത്തന്നെ പുറത്തെ കംപ്യൂട്ടറിലേക്ക് ട്രാൻസ്മിറ്റ് ചെയ്യാനാകുമെന്നതാണ് ന്യൂറാലിങ്കിനെ മുൻപുള്ള ന്യൂറോ ടെക്നോളജി ഉപകരണങ്ങളിൽനിന്ന് വ്യത്യസ്തമാക്കുന്നത്.

64 ത്രെഡുകളിലായി 1024 ഇലക്ട്രോഡുകൾ ആണ് തലച്ചോറുമായി ബന്ധിപ്പിക്കുന്നത്. ഹൈ പെർഫോമൻസ് പ്ലാസ്റ്റിക് വിഭാഗത്തിൽ പെടുന്ന പോളിയമൈഡുകളാണ് വയറുകൾ ഘടിപ്പിക്കുന്ന നൂലുകളിലുള്ളത്. ഇതിനൊപ്പം സ്വർണത്തിന്റെയോ പ്ലാറ്റിനത്തിന്റെയോ കണ്ടക്ടറുകളുമുണ്ട്. തലച്ചോറിലുണ്ടാകുന്ന തരംഗങ്ങൾ പിടിച്ചെടുക്കുന്നത് ഇവയുടെ സഹായത്തോടെയാണ്. 

ഇവ ശേഖരിക്കുന്ന തരംഗങ്ങളെ സ്വീകരിക്കുന്നത് ന്യൂറാലിങ്കിന്റെ എൻ1 ചിപ്പുകളാണ്. തരംഗങ്ങളെ സ്വീകരിക്കാനും ക്രോഡീകരിക്കാനും പ്രത്യേകം പ്രോഗ്രാം ചെയ്തിട്ടുള്ളത് ഈ ചിപ്പുകളാണ്. 256 ആംപ്ലിഫയറുകളാണ് ഇതിൽ തരംഗങ്ങളെ അനലോഗിൽനിന്ന് ഡിജിറ്റലായി മാറ്റാൻ ഉപയോഗിച്ചിരിക്കുന്നത്. തലച്ചോറിലെ ന്യൂറോണുകളിൽനിന്ന് ഇങ്ങനെ ശേഖരിക്കുന്ന വിവരം ആണ് കംപ്യൂട്ടറിലേക്ക് ട്രാൻസ്മിറ്റ് ചെയ്യുന്നത്. തലച്ചോറിൽനിന്നു ലഭിച്ച വിവരങ്ങളെ വിശകലനം ചെയ്യുന്നതും കമാൻഡ് ആക്കി മാറ്റുന്നതും കംപ്യൂട്ടറിലാണ്. ഇതുവരെയുള്ള ഗവേഷണങ്ങളിൽ ഒപ്പിയെടുത്തതിന്റെ പല മടങ്ങ് കൂടുതൽ വിവരങ്ങൾ ന്യൂറാലിങ്കിന് ഒപ്പിയെടുക്കാനാകുമെന്നാണ് ഇലോൺ മസ്ക് അവകാശപ്പെട്ടിരിക്കുന്നത്. 

ന്യൂറോണുമായി ബന്ധപ്പെട്ട് നൂറുകണക്കിന് ചാനലുകളിൽ നിന്നാണ് ഇതുവരെ സിഗ്നലുകൾ ശേഖരിച്ചിരുന്നതെങ്കിൽ ന്യൂറാലിങ്കിനു രണ്ടായിരത്തിലേറെ ചാനലുകളിൽനിന്ന് വിവരം ശേഖരിക്കാനാകുമെന്നാണ് അവകാശവാദം. ഇത്രയും വലിയൊരു അവകാശവാദം ആരും ഇതുവരെ ഉന്നയിച്ചിട്ടില്ല. 

ശസ്ത്രക്രിയ നടത്തി ചിപ്പും വയറുകളും തലച്ചോറിൽ ഘടിപ്പിക്കുന്നതിന് അതിനൂതനമായ റോബട്ടിനെയും സംഘം ഒരുക്കിയിട്ടുണ്ട്. അതിസൂക്ഷ്മമായ ശസ്ത്രക്രിയ നടത്താൻ മണിക്കൂറുകളുടെ പരിശ്രമം വേണ്ടതിനാലാണ് ഇതിനായി റോബട്ടിനെ തയാറാക്കിയത്. പിഴവുകൾ വരുത്താനുള്ള സാധ്യതയും ഇതോടെ കുറയും. നമുക്കു ചിന്തിക്കാനും കാണാനും കേൾക്കാനും മനസ്സിലാക്കാനുമൊക്കെ സാധിക്കുന്നതു തലച്ചോറിലെ ന്യൂറോണുകൾ വഴിയാണല്ലോ. ശരീരത്തിലെ പ്രവർത്തനങ്ങളുടെ ഏകോപനമാണു ന്യൂറോണുകൾ നടപ്പാക്കുന്നത്. ഇതിന്റെ പോരായ്മകൾ പരിഹരിക്കാനും പ്രവർത്തനം മെച്ചപ്പെടുത്താനും കംപ്യൂട്ടറിന് കഴിയുന്ന സ്ഥിതി ആലോചിച്ച് നോക്കൂ...

∙ ഇനി മനസ്സിലും ഒന്നും ഒളിപ്പിക്കാനാകില്ല

മനുഷ്യനു സ്വകാര്യതയുള്ളത് സ്വന്തം മനസ്സിൽ മാത്രമാണെന്നും ന്യൂറാലിങ്ക് ഇതുകൂടി ഇല്ലാതാക്കുമെന്നുമാണ് പ്രധാന വിമർശനം. കൂടാതെ എഐ എന്ന സാങ്കേതിക വിദ്യ സിനിമയിലെ ‘ടെർമിനേറ്റർ’ ആണെന്നു വിശ്വസിക്കുന്ന മസ്ക്, മനുഷ്യന്റെ മസ്‌തിഷ്കം നിയന്ത്രിക്കാൻ കംപ്യൂട്ടറിന് അവസരമൊരുക്കുമെന്ന തരത്തിലുള്ള ആരോപണങ്ങളും ഉയർന്നിട്ടുണ്ട്. മൃഗങ്ങളിൽ നടത്തിയ പരീക്ഷണങ്ങളുമായി ബന്ധപ്പെട്ടും മസ്കിനും കമ്പനിക്കുമെതിരെ വ്യാപക പ്രതിഷേധമുണ്ട്. മസ്ക് ചിപ് ഘടിപ്പിക്കാൻ ശസ്ത്രക്രിയ നടത്തിയ 24 കുരങ്ങുകളിൽ ഇരുപതോളം കുരങ്ങുകളും ചത്തെന്ന് മൃഗസംരക്ഷണ സംഘടനകൾ കുറ്റപ്പെടുത്തുന്നു. എന്നാൽ ഒരു മൃഗത്തെ പോലും കൊന്നിട്ടില്ലെന്നും ആരോപണം തെളിയിക്കാൻ വെല്ലുവിളിക്കാനും മസ്ക് തയാറാകുന്നുണ്ട്. പരീക്ഷണം നടത്താൻ തിടുക്കപ്പെടരുതെന്ന അഭ്യർഥനയും ആരോഗ്യവിദഗ്ധർ മസ്കിനും ഫെഡറൽ ഏജൻസിക്കും മുൻപിൽ വച്ചിരുന്നു. 

പക്ഷേ, മസ്ക് പതിവുപോലെ ബയോടെക് സ്ഥാപനത്തിലെ പദ്ധതികൾക്ക് വേഗം കൂട്ടുകയാണ്. വിവാദങ്ങളുണ്ടാകുമ്പോൾ മറ്റെന്തെങ്കിലും വിഷയമുണ്ടാക്കി ശ്രദ്ധ തിരിച്ചുവിടുന്ന പതിവ് മസ്ക് സ്റ്റൈൽ ഇവിടെയുമുണ്ട്. ന്യൂറാലിങ്കുമായി ബന്ധപ്പെട്ട വിവാദങ്ങൾ ഉയരുമ്പോൾ ചൊവ്വയിൽ 10 ലക്ഷം വീടുകളുള്ള കോളനിയുടെ നിർമാണം, ഓപൺ എഐക്ക് എതിരെ കേസ്, എക്സിലെ ലൈക്കും ഷെയറും ഉപേക്ഷിക്കാൻ പദ്ധതി തുടങ്ങി പല വാർത്തകൾ ലോകത്തോട് ‘ഷെയർ’ ചെയ്യുകയാണ് മസ്ക്. ഒന്നിൽ ഉറച്ചു നിന്നാലല്ലേ വിവാദം പോലും പച്ചപിടിക്കൂ എന്ന് ഇലോൺ മസ്കിനെ ആരും പഠിപ്പിക്കേണ്ടതില്ലല്ലോ...