‘ആ ഇടിയിൽ വേദനയോടെ നിലത്തു വീണു; തകർന്നത് വലിയ വിശ്വാസം; നമ്മുടെ നാട് സ്വർഗമല്ലേ!’

മിലാനിൽ വിമാനം ഇറങ്ങി. അവിടെനിന്ന് ട്രെയിനിൽ രണ്ടു മണിക്കൂർ യാത്ര ചെയ്താണ് ഫ്ലോറൻസിൽ പോകേണ്ടിയിരുന്നത്. അതിനായി മിലാൻ സെൻട്രൽ റെയിൽവേ സ്റ്റേഷനിലെത്തി. വലിയ ഒരു സ്റ്റേഷനായിരുന്നു അത്. ഞാനും സുനിതയും പെട്ടികളൊക്കെ തൂക്കി ഉള്ളിലേക്കു പ്രവേശിച്ചു. പെട്ടെന്ന് വലിയ ഒരു കറുത്ത പെട്ടി എന്റെ വലതു മുട്ടിൽ ശക്തമായി ഇടിച്ചു. അതിന്റെ ആഘാതത്തിൽ കനത്ത വേദനയോടെ ഞാൻ നിലത്തു വീണു. സുനിത പരിഭ്രമത്തോടെ എന്റെ മുട്ടു തടവി. തിരിഞ്ഞു നോക്കിയപ്പോൾ  കറുത്ത പൊക്കമുള്ള ഒരു മെലിഞ്ഞ പുരുഷനും ഒരു വെള്ളക്കാരി സ്ത്രീയും അവിടെ പ്രത്യക്ഷപ്പെട്ടു. അയാളാണ് എന്നെ ആക്രമിച്ചത്.

അവർ എന്നെ നോക്കിയ ശേഷം പെട്ടെന്നു കടന്നു പോയി. ട്രെയിനിന്റെ സമയമായതിനാൽ നല്ല വേദനയുണ്ടായിരുന്നെങ്കിലും ഞങ്ങൾ പതുക്കെ നടന്നു പോകാൻ ശ്രമിച്ചു. 15 മിനിറ്റിനു ശേഷം മറ്റൊരാവശ്യത്തിനായി പെട്ടി തുറന്നു. പഴ്സ് നഷ്ടപ്പെട്ട വിവരം അപ്പോഴാണ് അറിയുന്നത്. തോളിൽ തൂക്കിയിട്ടിരുന്ന ഒരു വാലറ്റിൽ ഞങ്ങളുടെ പാസ്പോർട്ട്, ഒരു ഡെബിറ്റ് കാർഡ്, ഒരു ക്രെഡിറ്റ് കാർഡ്, അവിടത്തെ കുറച്ചു പണം എന്നിവ ഉണ്ടായിരുന്നു. അവ കാണാനില്ല. എനിക്കതു വിശ്വസിക്കാനായില്ല. മറ്റ് ഏതെങ്കിലും ബാഗിൽ ഉണ്ടാകുമെന്നുതന്നെ പ്രതീക്ഷിച്ചു. എല്ലാ ബാഗുകളും അരിച്ചു പെറുക്കി. പക്ഷേ നഷ്ടപ്പെട്ടുവെന്ന് സുനിതയ്ക്ക് ഉറപ്പുണ്ടായിരുന്നു. ടാക്സിക്കു തുക നൽകിയിട്ട് ഈ ബാഗിൽത്തന്നെയാണ് പണം വച്ചതെന്ന് സുനിത പറഞ്ഞു. ഞങ്ങളുടെ വിഷമം കണ്ട് റസ്റ്ററന്റിലുണ്ടായിരുന്ന ഒരാൾ പൊലീസ് സ്റ്റേഷനിൽ പോയി ഉടനെ റിപ്പോർട്ട് ചെയ്യാൻ നിർദേശിച്ചു.

∙ പൊലീസ് സ്റ്റേഷനിലെ അനുഭവം എന്തായിരുന്നു?

റെയിൽവേസ്റ്റേഷന്റെ മുകളിൽത്തന്നെയായിരുന്നു പൊലീസ് സ്റ്റേഷൻ. സ്റ്റേഷനിൽ നല്ല തിരക്കായിരുന്നു. ധാരാളം പേർ കാത്തു നിൽക്കുന്നു. അതുകഴിഞ്ഞാണ് ഞങ്ങളുടെ ഊഴം. അത് ഒരു സ്പീക്കറിലൂടെ അറിയിച്ചു. കുറച്ചധികം സമയം കാത്തു നിൽക്കേണ്ടി വന്നു. ഉള്ളിലേക്കു കയറിയപ്പോൾ വളരെ മാന്യമായി ആശ്വസിപ്പിക്കുന്ന വിധത്തിലായിരുന്നു അവരുടെ സമീപനം. ഒരുപാടു സമയമെടുത്താണ് വിവരങ്ങൾ ശേഖരിച്ചത്. അതു പൂർത്തിയായപ്പോൾ രാത്രി വൈകി. പിന്നീട് പൊലീസ് ഉദ്യോഗസ്ഥൻ പറഞ്ഞു: ‘‘ഇത് ഇവിടെ പതിവാണ്. നമുക്ക് ഒന്നും ചെയ്യാൻ സാധിക്കാത്ത അവസ്ഥയാണ്. എല്ലാവരും  ട്രെയിനിലും ബസിലുമൊക്കെ കയറുന്നതു വളരെ ശ്രദ്ധിച്ചാണ്. ഇനി ഇവിടെ നിന്ന് യാത്ര ചെയ്യണ്ട.  കാരണം കോൺസുലേറ്റ് ഉള്ളത് മിലാനിലാണ്.

അവിടെ നിന്ന് നിങ്ങൾക്ക് എമർജൻസി പാസ്പോർട്ട് കിട്ടും. ഞങ്ങൾക്കു മറ്റൊന്നും ചെയ്യാനില്ല. പഴയ പാസ്പോർട്ട് ഇനി കിട്ടാൻ സാധ്യതയില്ല.’’ കോൺസുലേറ്റിലേക്കുള്ള വഴിയും അദ്ദേഹം പറഞ്ഞു തന്നു. ശരിക്കും നടന്നത് കവർച്ച തന്നെയാണെന്ന് സ്റ്റേഷനിൽവച്ചു തന്നെ ഞങ്ങൾ മനസ്സിലാക്കിയിരുന്നു. മാർച്ച് 5 വൈകിട്ട് 6.20ന് മിലാനോ സെൻട്രൽ റെയിൽവേ സ്റ്റേഷനിലേയ്ക്കു കയറുന്ന ഒരു ഭാഗം ഞാൻ കൃത്യമായി പൊലീസ് ഉദ്യോഗസ്ഥനോടു പറഞ്ഞു കൊടുത്തിരുന്നു. അവിടെ വച്ചാണ് ഇതു സംഭവിച്ചതെന്നും പറഞ്ഞിരുന്നു. ധാരാളം സിസിടിവി ക്യാമറക‌‌ളുള്ള സ്ഥലമാണത്. പക്ഷേ കാര്യമായ അന്വേഷണത്തിന് സാധ്യതയുണ്ടെന്ന തോന്നൽ എനിക്കില്ല.

∙ നടന്നത് കവർച്ച തന്നെയാണെന്ന് എങ്ങനെയാണു മനസ്സിലായത്?

പൊലീസ് ഓഫിസറോടു സംസാരിച്ചിരിക്കുമ്പോൾ ഫോണിലേക്കു വരുന്ന രേഖകൾ ഞാൻ കാണുന്നുണ്ടായിരുന്നു. ഒന്നും തുറന്നില്ല. പെട്ടെന്നു നോക്കിയപ്പോൾ ബാങ്കിലെ കുറച്ചു മെസേജുകൾ കണ്ടു. അദ്ദേഹത്തോട് അനുവാദം വാങ്ങിയശേഷം മെസേജ് തുറന്നു നോക്കി. എന്റെ ഡെബിറ്റ് കാർഡ് ഉപയോഗിക്കാൻ ആരോ ശ്രമിച്ചിരിക്കുന്നു. പാസ്‌വേഡ് ഇല്ലാത്തതിനാൽ നടന്നില്ല. പക്ഷേ ക്രെഡിറ്റ് കാർഡിൽ ‘ടാപ് ആൻഡ് പേ’ വഴി 28 യൂറോ തട്ടിയെടുത്തു. സംഭവം നടന്ന് 20 മിനിറ്റിനു ശേഷമാണ് അവർ കാർഡ് ഉപയോഗിച്ചിരിക്കുന്നത്. ഞാൻ കാണാൻ വൈകിയതാണ്.

പെട്ടെന്നുള്ള ഷോക്കിൽ ക്രെഡിറ്റ് കാർഡൊന്നും ബ്ലോക്ക് ചെയ്തിട്ടില്ലായിരുന്നു. രേഖകൾ എവിടെയോ നഷ്ടപ്പെട്ടു. കിട്ടിയവർ വൈകാതെ തിരികെ എത്തിക്കും എന്നായിരുന്നു എന്റെ പ്രതീക്ഷ. പൊലീസുകാർ കംപ്യൂട്ടറിലൂടെ അതു കണ്ടെത്തിത്തരുമെന്ന ധാരണയും എനിക്കുണ്ടായിരുന്നു. എന്നാൽ ക്രെഡിറ്റ് കാർഡും ഡെബിറ്റ് കാർഡും ഉപയോഗിക്കാൻ ശ്രമിച്ചുവെന്നു മനസ്സിലാക്കിയതോടെ രേഖകൾ തിരിച്ചു കിട്ടുമെന്ന പ്രതീക്ഷ പൂർണമായി നഷ്ടമായിക്കഴിഞ്ഞിരുന്നു. അവ മോഷ്ടിച്ചതാണെന്നു മനസ്സിലായി. അപ്പോൾതന്നെ ക്രെഡിറ്റ് കാർഡും ഡെബിറ്റ് കാർഡും ബ്ലോക്ക് ചെയ്തു. എങ്കിലും പാസ്പോർട്ട് ഉൾപ്പെടെയുള്ള രേഖകളില്ലാതെ പുറത്തിറങ്ങുന്നത് എങ്ങനെയെന്ന ഒരു പ്രശ്നം ഞങ്ങൾക്കു മുന്നിലുണ്ടായിരുന്നു.

∙ അത് എങ്ങനെയാണ് പരിഹരിച്ചത്?

ഞങ്ങൾ മിലാനിൽ വന്ന ദിവസം താമസിച്ച ഒരു ഹോട്ടലുണ്ട്. അവിടെ വീണ്ടും  താമസിക്കാൻ ഇനി പാസ്പോർട്ടിന്റെ ആവശ്യമില്ല. അവിടെ നേരത്തേ പാസ്പോർട്ടിന്റെ രേഖ റജിസ്റ്റർ ചെയ്തിട്ടുണ്ട്. അവിടേയ്ക്കു വിളിച്ചപ്പോൾ സാധാരണ റൂം ഇല്ല. ഒരു സുപ്പീരിയർ റൂമേയുള്ളൂ. കൈയിൽ ഭാഗ്യത്തിന് മറ്റൊരു ക്രെഡിറ്റ് കാർഡ് ഉണ്ടായിരുന്നു. എടിഎമ്മിൽ നിന്ന് കുറച്ചു പൈസ പിൻവലിച്ച ശേഷം നേരെ ഹോട്ടലിലേക്കു പോയി. പാസ്പോർട്ട് നഷ്ടപ്പെട്ട കാര്യമൊന്നും പറഞ്ഞില്ല. സ്വാഭാവികമായി പോകുന്ന പോലെ രാത്രി തങ്ങുകയാണെന്നു പറഞ്ഞ് ഉയർന്ന തുകയ്ക്കുള്ള സുപ്പീരിയർ റൂം എ‌ടുത്തു.