കെട്ടിടങ്ങളിൽ ചാണകം, സമരം ചെയ്ത കർഷകർക്ക് രാഷ്ട്രീയ പാർട്ടി; നിർണായകം ജൂണിലെ തിരഞ്ഞെടുപ്പ്

വലിയ തോതിൽ കാർഷിക നാശവും സംഭവിച്ചു. 1976ലെ വരൾച്ചയ്ക്കു ശേഷം യുകെ കണ്ട ഏറ്റവും വലിയ വരൾച്ചയും 2018ലാണ് നടന്നത്. തുടർന്നങ്ങോട്ട് എല്ലാ വർഷവും വലിയ വരൾച്ച യൂറോപ്പിന്റെ രക്തവും ജലവും ഊറ്റിയെടുത്തു തുടങ്ങി. 2022ൽ എത്തിയപ്പോൾ വരൾച്ചയുടെ മൂർധന്യാവസ്ഥയ്ക്കു യൂറോപ്പ് സാക്ഷ്യം വഹിച്ചു. പഠനങ്ങൾ വ്യക്തമാക്കുന്നത് കഴിഞ്ഞ 500 വർഷത്തിനിടയിലെ ഏറ്റവും മോശം വരൾച്ചയായിരുന്നു 2022ലേത്. കാർഷിക മേഖലയെ ഇത് കശക്കിയെറിഞ്ഞു. ജല വൈദ്യുത ഉൽപാദനം കുറഞ്ഞു. വൈദ്യുതി ഉൽപാദനച്ചെലവ് ഗണ്യമായി വർധിച്ചു. അതോടെ ഊർജ പ്രതിസന്ധി രൂക്ഷമായി.

∙ കലങ്ങി മറിയുമോ രാഷ്ട്രീയം?

യൂറോപ്പിനെ ബാധിക്കുന്ന വേറെയും പ്രശ്നങ്ങൾ ഈ പ്രതിഷേധത്തോടു ബന്ധപ്പെട്ടു കിടക്കുന്നുണ്ട്. ഈ വർഷമാണ് യൂറോപ്യൻ യൂണിയൻ പാർലമെന്റ് നടക്കുന്നത്. കർഷകരുടെ പ്രതിഷേധം വലിയ തോതിൽ തിരഞ്ഞെടുപ്പിനെ ബാധിക്കും എന്നതാണ് ഭരണ കക്ഷികൾ നേരിടുന്ന പ്രധാന വെല്ലുവിളി. യൂറോപ്പിൽ തീവ്ര വലതുപക്ഷത്തിന്റെ ഉയർച്ചയ്ക്ക് പ്രതിഷേധങ്ങൾ കാരണമായേക്കാമെന്നും ആശങ്കയുണ്ട്. നെതർലൻഡ്സിൽ ഗീർട്ട് വൈൽഡേഴ്സിന്റെ തിരഞ്ഞെടുപ്പ് വിജയ സാധ്യതയും ഡച്ച് പ്രാദേശിക തിരഞ്ഞെടുപ്പിൽ ഫാർമർ–സിറ്റിസൻ മൂവ്മെന്റിന്റെ വിജയവും ഇക്കുറി സംഭവിക്കാനും കർഷക പ്രക്ഷോഭങ്ങൾ കാരണമായേക്കാം എന്നാണു വിലയിരുത്തുന്നത്.

സമൂഹ മാധ്യമങ്ങളിലെല്ലാം ഇത്തരത്തിലുള്ള പ്രചാരണങ്ങളും പ്രവചനങ്ങളും പാർട്ടികളുടെ ഉറക്കം കെടുത്തുന്നുണ്ട്. ജർമനിയിൽ ‘ഓൾട്ടർനേറ്റിവ് ഫോർ ജർമനി’ എന്ന പേരിൽ സർക്കാരിനെ വെല്ലു വിളിച്ചുകൊണ്ട് ഒരു സമൂഹമാധ്യമ ക്യാംപെയ്ൻ തന്നെ ഉയർന്നു വന്നിട്ടുണ്ട്. യൂറോപ്യൻ യൂണിയന്റെ കാർഷിക നയങ്ങളെക്കുറിച്ചുള്ള ചർച്ചകൾക്കിടയിൽ ജർമനിയിലും ഓസ്ട്രിയയിലും ‘മെയ്‌ഡ് ഇൻ യൂറോപ്പ്’ എന്ന പ്രചാരണം ശക്തമാണ്. ഭക്ഷ്യമേഖലയിൽ യൂറോപ്പിനുണ്ടായിരുന്ന മേൽക്കോയ്മ തകരാൻ അനുവദിക്കില്ല എന്ന സന്ദേശമാണ് ഈ ക്യാംപെയ്ൻ ഉയർത്തുന്നത്.

ഫ്രാൻസിൽ നാഷനൽ റാലി നേതാവായ ജോർദാൻ ബാർഡെല്ല പ്രസിഡന്റ് ഇമ്മാനുവൽ മക്രോയ്‌ക്കെതിരെ വലിയ ആരോപണങ്ങൾ അഴിച്ചു വിട്ടുകഴിഞ്ഞു. കാർഷിക മേഖലയെ ഭരണം നശിപ്പിക്കുന്നുവെന്ന് ജോർദാൻ ബാർഡെല്ല ആരോപിക്കുന്നു. ചെറുകിട കർഷകരെ യൂറോപ്യൻ യൂണിയന്റെ കാർഷിക നയങ്ങൾ ഇല്ലാതാക്കുന്നുവെന്നും കർഷകർക്കു വലിയ തോതിൽ ഭാരമുണ്ടാക്കുന്നുവെന്നും പ്രതിഷേധക്കാർ വിമർശിക്കുന്നു. സർക്കാരുകൾക്കെതിരെ സമരക്കാർക്കൊപ്പം തീവ്ര വലതുപക്ഷ പാർട്ടികൾ അണിനിരക്കുന്നത് ഭരണകൂടങ്ങളെ വലിയ പ്രതിസന്ധിയിലാക്കുന്നുണ്ട്.

 യൂറോപ്യൻ യൂണിയൻ പാർലമെന്റ് തിരഞ്ഞെടുപ്പിനെ ഈ കർഷക പ്രക്ഷോഭം വലിയ തോതിൽ ബാധിക്കുമെന്നാണ് സർവേകൾ സൂചിപ്പിക്കുന്നത്. തീവ്ര വലതുപക്ഷ വികാരത്തിലേക്കു ഫലം മാറാൻ സാധ്യതയുണ്ട്. അങ്ങനെ സംഭവിച്ചാൽ കാലാവസ്ഥ നയ രൂപീകരണത്തെ വരെ ഇതു ബാധിക്കും എന്നതാണ് നേരിടുന്ന വലിയ വെല്ലുവിളി. കാരണം യൂറോപ്യൻ യൂണിയന്റെ നയങ്ങൾ പാസാക്കുന്നതിന് നിർണായകമായ 705 അംഗ യൂറോപ്യൻ യൂണിയൻ പാർലമെന്റിന്റെ ഘടനയെ ഈ തിരഞ്ഞെടുപ്പാണ് നിർണയിക്കുന്നത്. ഏകദേശം 40 കോടി വോട്ടർമാർ പങ്കാളികളാകുന്ന തിരഞ്ഞെടുപ്പാണിത്. കർഷകർ ഇവിടെ ഉന്നയിക്കുന്ന ആവശ്യങ്ങളും ഹരിത പരിവർത്തനവും അതിന്റെ പ്രത്യാഘാതങ്ങളുമെല്ലാം ഇതിനെ ബാധിക്കും.

യൂറോപ്യൻ യൂണിയന്റെ ജിഡിപിയിൽ 1.4 ശതമാനം സംഭാവന ചെയ്തിരിക്കുന്നത് കൃഷിയാണ്. ജർമനിയിൽ ഇത് 0.7 ശതമാനവും ഫ്രാ‍ൻസിൽ 1.6 ശതമാനവുമാണ്. ഫ്രാൻസിൽ 2 ശതമാനവും ജർമനിയിൽ ഒരു ശതമാനവും കർഷകരാണ്. എണ്ണം കുറവാണെങ്കിലും ഇവിടങ്ങളിൽ കർഷകരുടെ  സ്വാധീനം വലുതാണ്. യൂറോപ്യൻ യൂണിയന്റെ ബജറ്റിന്റെ മൂന്നിലൊന്ന് കർഷകർക്ക് സംബ്സിഡി നൽകാനാണ് മാറ്റിവച്ചിരിക്കുന്നത് എന്നതുതന്നെ കൃഷിക്കുള്ള പ്രാധാന്യത്തെ സൂചിപ്പിക്കുന്നതാണ്. ജർമനിയിലും ഹോളണ്ടിലും നടന്ന കർഷക പ്രതിഷേധങ്ങളിൽ തീവ്ര വലതുപക്ഷ ഗ്രൂപ്പുകളുടെ സാന്നിധ്യം കാണുകയുണ്ടായി. 1920ലെ ജൂത വിരുദ്ധ കാർഷിക പ്രസ്ഥാനമായ ‘ലാൻഡ്വോൾക്ബെവെഗംഗി’ന്റെ വരെ സാന്നിധ്യം ബെർലിനിൽ നടന്ന കർഷക പ്രതിഷേധങ്ങളിലുണ്ടായിരുന്നു.

എല്ലാ പ്രതിഷേധക്കാരും ഇത്തരത്തിൽ ഉള്ള തീവ്ര ആശയങ്ങളുടെ ഭാഗമല്ലെങ്കിലും യൂറോപ്യൻ യൂണിയന്റെ ഗതി നിർണയിക്കാൻ പോകുന്ന തിരഞ്ഞെടുപ്പിൽ ഇത്തരം തീവ്ര വലതുപക്ഷ സംഘടനകളുടെ കടന്നു കയറ്റത്തെ ആശങ്കയോടെയല്ലാതെ കാണാനാകില്ല. റൊമാനിയൻ കർഷകർ തങ്ങളുടെ പ്രതിഷേധത്തിൽ നിന്ന് ഇത്തരം തീവ്രവലതുപക്ഷ നേതാക്കളെ ഒഴിവാക്കുകയും ചെയ്തിരുന്നുവെന്നത് ചെറിയൊരു ആശ്വാസമാണ്. പ്രവചനങ്ങൾ സൂചിപ്പിക്കുന്നത് ജനകീയ– വലതുപക്ഷ പാർട്ടികളുടെ ഉയർച്ചയും മധ്യ–ഇടത്– ഹരിത പാർട്ടികളുടെ പരാജയവുമാണ്. അങ്ങനെ വന്നാൽ ദൂരവ്യാപകമായ കാലാവസ്ഥാ വ്യതിയാനങ്ങൾ മുന്നിൽ കണ്ടുള്ള യൂറോപ്യൻ യൂണിയന്റെ നടപടികളുടെ മരണ മണിയായി  ഈ കർഷക സമരം മാറിയേക്കാം. താൽക്കാലിക ഇളവുകൾ നൽകി കർഷകരെ പ്രീണിപ്പിക്കാൻ യൂറോപ്യൻ യൂണിയൻ ശ്രമിക്കുന്നുണ്ടെങ്കിലും ഇതൊക്കെ ഫലം കാണുമോ എന്നുള്ളത് കാത്തിരുന്നു കാണണം.