സുരേഷ് ഗോപിയുടെ മകൾക്ക് മാത്രമല്ല ഗുരുവായൂരിൽ ആ ‘ഭാഗ്യം’: ഇവിടെനിന്ന് കൈ പിടിച്ച് അവർ മടങ്ങുമ്പോൾ കിലുങ്ങും കോടികൾ

വാഹനങ്ങളുടെ പാർക്കിങ് ഫീസ്. നോ പാർക്കിങ്ങിൽ വാഹനം പാർക്ക് ചെയ്താൽ പൊലീസ് ഈടാക്കുന്ന പിഴ. ദേവസ്വവും നഗരസഭയും സർക്കാരും ഗുരുവായൂരിലെ വിവാഹങ്ങളുടെ ഗുണഫലം അനുഭവിക്കുന്നു. ഇവിടെയൊരു കല്യാണം നടന്നാൽ തമിഴ്നാട്ടിൽ പൂക്കളും പച്ചക്കറിയും കൃഷി ചെയ്യുന്നവന്റെ കീശ നിറയും. അവിടെ നിന്ന് ഓടിയെത്തുന്ന വാഹനങ്ങളുടെ ഉടമയും ജീവനക്കാരും ഈ പണത്താൽ  കുടുംബം പോറ്റും. ഫൊട്ടോഗ്രഫർമാർ, നാഗസ്വരവും തകിലും വായിക്കുന്ന കലാകാരന്മാർ, ബ്യൂട്ടീഷ്യൻ, മുല്ലപ്പൂ വിൽപനക്കാർ, ഫ്ലവർ ഡെക്കറേഷൻ, സെറ്റുമുണ്ടും വേഷ്ടിയും വിൽക്കുന്ന  കടക്കാർ, ലോട്ടറി കച്ചവടക്കാർ...എല്ലാവരുടെയും മടിയിൽ കനമാകും. 

∙ എന്തിന് തേങ്ങ, പൂക്കുലയല്ലേ ലാഭം

ഓരോ കല്യാണത്തിനും നിറപറയും നിലവിളക്കും വേണം. പറയിൽ വയ്ക്കാൻ തെങ്ങിൻ പൂക്കുല നിർബന്ധം. ഒരു പൂക്കുലയ്ക്ക് 500 രൂപയിലേറെയാണ് നിരക്ക്. 100 കല്യാണമുള്ള ദിവസം തെങ്ങുള്ളവന്റെ പേഴ്സിൽ അര ലക്ഷം രൂപ നിറയും. ഇളനീരും നാളികേരവും ആകാൻ കാക്കാതെ മണ്ഡരിയും മഞ്ഞവീഴ്ചയും ഭയക്കാതെ പൂക്കുല വിരിഞ്ഞാലുടൻ പണമായി. ഇതിലൊരു ഭാഗം തെങ്ങുകയറുന്ന തൊഴിലാളിക്കും കിട്ടും.  അറിഞ്ഞും അറിയാതെയും എത്രയെത്ര പേരുടെ അന്നമാണ് ഗുരുവായൂരിലെ വിവാഹങ്ങൾ.

ഗുരുവായൂരിലെ ഭണ്ഡാരം നിറയാനും പതിനായിരങ്ങളുടെ പണപ്പെട്ടി കിലുങ്ങാനും അണിഞ്ഞൊരുങ്ങിയെത്തുന്ന വധൂവരന്മാരും കല്യാണ സംഘങ്ങളുമൊരു പ്രധാന  കാരണമാണ്.  500 രൂപയാണ് വിവാഹം ശീട്ടാക്കാൻ ദേവസ്വത്തിൽ അടയ്ക്കേണ്ടത്. 500 രൂപ ഫൊട്ടോഗ്രഫിക്കും. വിവാഹത്തിൽ നിന്ന് ദേവസ്വത്തിന് പ്രത്യക്ഷ വരുമാനം 70 ലക്ഷം രൂപ. വിവാഹ റജിസ്ട്രേഷന് 250 രൂപയും സർട്ടിഫിക്കറ്റിന് 100 രൂപയും നഗരസഭയുടെ ഫീസ്. നഗരസഭയ്ക്ക് നേരിട്ടു ലഭിച്ചിരുന്നത് കാൽ കോടിയോളം രൂപ. കെ സ്മാർട് വന്നപ്പോൾ റജിസ്ട്രേഷൻ ഫീസ് 100 രൂപയാക്കി കുറച്ചു.  

∙ അത് ഭാഗ്യയുടെ മാത്രം ഭാഗ്യമായിരുന്നില്ല

കഴിഞ്ഞ ചിങ്ങത്തിൽ സുരേഷ് ഗോപിയുടെ മകൾ ഭാഗ്യയുടെ വിവാഹം ഗുരുവായൂരിൽ നടന്ന ദിവസം തന്നെ നഗരസഭയിൽ നിന്നു വിവാഹ സർട്ടിഫിക്കറ്റ് ലഭിച്ചതോടെയാണ് വിവാഹ റജിസ്ട്രേഷനിലെ ഫാസ്റ്റ് ട്രാക്ക് സംവിധാനം ചർച്ചയായത്. അതും വിവാഹം റജിസ്റ്റർ ചെയ്ത് അര മണിക്കൂറിനകം. മന്ത്രി എം.ബി.രാജേഷ് ഈ നേട്ടം കെ സ്മാർട്ടിന്റേതെന്ന് സമൂഹ മാധ്യമത്തിൽ പങ്കു വച്ചു.  ഇത് ഭാഗ്യയുടെ മാത്രം ഭാഗ്യമാണോ? അല്ല. വിവാഹിതരായ എല്ലാ ഭാഗ്യവതികൾക്കും നഗരസഭയുടെ ഈ സൗകര്യം ലഭിക്കും. സർക്കാർ കെ സ്മാർട്ട് തുടങ്ങിയത് 2024 ജനുവരിയിലാണ്. എന്നാൽ 10 വർഷത്തിലേറെയായി ഗുരുവായൂരിൽ ഈ സൗകര്യമുണ്ട്. 

അവധി ദിവസങ്ങളിലും പ്രവർത്തിക്കുന്ന എയർ കണ്ടീഷൻഡ് വിവാഹ റജിസ്ട്രേഷൻ ഡെസ്ക് ഗുരുവായൂർ നഗരസഭയിലെ പ്രത്യേകതയാണ്. റജിസ്ട്രേഷന് തയാറായി ബന്ധപ്പെട്ട ഉദ്യോഗസ്ഥരെല്ലാം കർമനിരതരായി ഇവിടെയുണ്ടാകും. തികഞ്ഞ ആതിഥേയ മര്യാദയോടെ. റജിസ്ട്രേഷൻ ഫോമുകൾ പൂരിപ്പിച്ച് നൽകാൻ കുടുംബശ്രീയുടെ പ്രത്യേക വിഭാഗവുമുണ്ട്. ചെറിയ തുക ഫീസായി നൽകിയാൽ മതി.

കേരളത്തിൽ ഏറ്റവുമധികം വിവാഹം നടക്കുന്നത് ഗുരുവായൂർ ക്ഷേത്രത്തിലാണ്. ഏറ്റവുമധികം വിവാഹം റജിസ്റ്റർ ചെയ്യുന്നത് ഗുരുവായൂർ നഗരസഭയിലും. വിവാഹ റജിസ്ട്രേഷൻ സർട്ടിഫിക്കറ്റ് വിദേശ യാത്രയ്ക്ക് അടക്കം വിലപ്പെട്ട രേഖയായതിനാൽ വിവാഹ ദിവസം തന്നെ റജിസ്ട്രേഷനും കൂടി കഴിഞ്ഞ് മടങ്ങുന്നത് വധൂവരന്മാർ പതിവാക്കിയിരുന്നു. സർവാഭരണ വിഭൂഷിതരായ വധുവും വരനും കല്യാണമണ്ഡപത്തിൽ നിന്നിറങ്ങിയ ഉടനെ നഗരസഭ ഓഫിസിൽ എത്തി കാത്തിരിക്കുന്നത് ഇവിടെ പതിവു കാഴ്ചയാണ്. ഇതിനാലാണ് വർഷങ്ങൾക്കു മുന്നേ തന്നെ ഇവർക്ക് ഇരിക്കാനും സൗകര്യപ്രദമായി റജിസ്ട്രേഷൻ നൽകാനും നഗരസഭ തന്നെ സൗകര്യം ഒരുക്കിയത്.