‘മഹാമാരിയിൽനിന്ന് കരകയറി; അയോധ്യയിലേയ്ക്ക് ക്ഷണം; സർക്കാർ ‌മനോഭാവത്തിൽ വലിയ മാറ്റം’

? മഹാമാരിയുടെ പ്രതിസന്ധിയിൽനിന്ന് കര കയറിയോ.

∙ കോവിഡ് സൃഷ്ടിച്ച പ്രതിസന്ധിയിൽനിന്ന് ഞങ്ങൾ പൂർണമായും കര കയറിക്കഴിഞ്ഞു. മഹാമാരിക്ക് ശേഷം ഇന്ത്യയിൽ വിനോദസഞ്ചാര മേഖലയിൽ, പ്രത്യേകിച്ച് ആഭ്യന്തര ടൂറിസത്തിൽ, കുതിച്ചുചാട്ടമുണ്ടായി. മറ്റ് രാജ്യങ്ങളെ അപേക്ഷിച്ച് കോവിഡിൽനിന്ന് കരകയറാൻ ഇന്ത്യയ്ക്ക് പൊതുവേ കഴിഞ്ഞിട്ടുണ്ട്. 

? അടുത്തകാലത്തായി വണ്ടർലാ ടിക്കറ്റിതര വരുമാനത്തിൽ കൂടുതൽ ശ്രദ്ധിക്കുന്നുണ്ടോ? എന്താണിതിനു കാരണം.

∙ അഞ്ച് വർഷം മുൻപുണ്ടായിരുന്നതിൽനിന്ന് അൽപം വ്യത്യസ്‌തമായാണ് ആളുകൾ ഇപ്പോൾ വിനോദത്തെ കാണുന്നത്. ഭക്ഷണം കഴിക്കുന്നതിനു മുൻപ് ആദ്യം ഫോട്ടോ എടുക്കണം. ചിലപ്പോൾ ഭക്ഷണം കഴിക്കുന്നതിനേക്കാൾ പ്രധാനമാണ് അതിന്റെ ഫോട്ടോ എടുത്ത് സമൂഹമാധ്യമങ്ങളിൽ പോസ്റ്റ് ചെയ്യുന്നത്. അതായത് ഏതു കാര്യവും അവതരിപ്പിക്കുന്ന രീതി ഇന്ന് പ്രധാനമാണ്. ഞങ്ങൾ ഇപ്പോൾ ഇവന്റുകളിലും മറ്റ് വിനോദ പ്രവർത്തനങ്ങളിലും ശ്രദ്ധ കേന്ദ്രീകരിക്കുന്നുണ്ട്.

അടിസ്ഥാനപരമായി ഞങ്ങളുടേത് ഒരു വിനോദകേന്ദ്രമാണ്. അതിനാൽ അമ്യൂസ്‌മെൻ്റ് പാർക്കിന്റെ പ്രവർത്തനങ്ങൾക്കൊപ്പം സംഗീതവും നൃത്തവും പോലുള്ള മറ്റ് വിനോദപരിപാടികളും അതിന്റെ ഭാഗമാകണം. ഞങ്ങളുടെ പ്രധാന ഉപഭോക്താക്കൾ കുട്ടികളാണ്. അവർ ഏത് തരത്തിലുള്ള വിനോദവും ഇഷ്ടപ്പെടുന്നു. അഞ്ച് വർഷം മുൻപ് ടിക്കറ്റിതര വരുമാനം ഞങ്ങളുടെ മൊത്തം വരുമാനത്തിൻ്റെ 20 ശതമാനം മാത്രമായിരുന്നു. ഇപ്പോൾ അത് ഏകദേശം 35 ശതമാനമാണ്. രണ്ടോ മൂന്നോ വർഷത്തിനുള്ളിൽ ഇത് 40 ശതമാനമാകുമെന്ന് ഞങ്ങൾ പ്രതീക്ഷിക്കുന്നു.

? പുതിയ പ്രോജക്റ്റുകൾ ഏത് ഘട്ടത്തിലാണ്.

∙ രണ്ട് പ്രോജക്റ്റുകൾ നിർമാണഘട്ടത്തിലാണ്. ഭുവനേശ്വറിലെ പാർക്ക് രണ്ട് മാസത്തിനകം പൂർത്തിയാകും. അതൊരു ചെറിയ പാർക്കാണ്. ഏകദേശം 170 കോടി രൂപയാണ് നിക്ഷേപിക്കുന്നത്. നിക്ഷേപത്തിന്റെ കാര്യത്തിൽ ബെംഗളൂരു പാർക്കാണ് ഒന്നാം സ്ഥാനത്ത്. ഹൈദരാബാദ് രണ്ടാമതും കൊച്ചി മൂന്നാമതും. വലുപ്പത്തിന്റെ കാര്യത്തിൽ, അവ ഏതാണ്ട് സമാനമാണ്.

പുതിയ പാർക്കുകൾക്ക് കൂടുതൽ നിക്ഷേപവും കൂടുതൽ സാങ്കേതികവിദ്യയും ആവശ്യമാണ്. ചെന്നൈയിലേത് ഞങ്ങളുടെ അഞ്ചാമത്തെ പാർക്കാണ്. അത് 2025ൽ തുറക്കും. അതിനുശേഷം മറ്റു ചില പ്രോജക്റ്റുകളുടെ സാധ്യത നോക്കുന്നുണ്ട്. യുപിയിലെ അയോധ്യയിൽ ഒരു പാർക്ക് സ്ഥാപിക്കാൻ ഞങ്ങൾക്ക് ക്ഷണം ലഭിച്ചിട്ടുണ്ട്. എന്നാൽ ഇപ്പോൾ ഞങ്ങൾ ശ്രദ്ധയൂന്നുന്നത് ഗ്രേറ്റർ നോയിഡയിലാണ്. ഗുജറാത്ത്, മധ്യപ്രദേശിലെ ഇൻഡോർ, മഹാരാഷ്ട്രയിലെ മുംബൈ-പുണെ മേഖല, ഗോവ എന്നിവിടങ്ങളിലെ സാധ്യതകളും പരിശോധിക്കുന്നുണ്ട്. സംസ്ഥാന സർക്കാരുകൾ ഈ മേഖലയിൽ താൽപര്യം കാണിച്ചിടത്തെല്ലാം ഞങ്ങൾ അത് പരിശോധിക്കുകയും ചർച്ചകൾ നടത്തുകയും ചെയ്യുന്നുണ്ട്.

? മറ്റു കമ്പനികളുമായി ചേർന്നുള്ള സംയുക്ത സംരംഭങ്ങൾ ആലോചിക്കുന്നുണ്ടോ.

അത്തരം സംരംഭങ്ങൾ പരിഗണനയിലില്ല. ഒഡീഷയിൽ ഞങ്ങൾ സംസ്ഥാന സർക്കാരുമായി സഹകരിച്ചാണ് പാർക്ക് സ്ഥാപിക്കുന്നത്. കാരണം അവിടുത്തെ സർക്കാർ ഞങ്ങൾക്ക് വലിയ സബ്‌സിഡി നിരക്കിൽ ഭൂമി നൽകി. ഒരു വിനോദസഞ്ചാര കേന്ദ്രമായി വളരാനാണ് അവർ ശ്രമിക്കുന്നത്. അതിനാൽ പാർക്ക് സ്ഥാപിക്കുന്നതിന് ചില പ്രോത്സാഹനങ്ങൾ നൽകിയിട്ടുണ്ട്. ഇപ്പോൾ സർക്കാരുകളുടെ മനോഭാവത്തിൽ വലിയ മാറ്റമുണ്ട്. നിക്ഷേപങ്ങൾ ആകർഷിക്കാൻ സർക്കാരുകൾ സജീവമായി ശ്രമിക്കുന്നുണ്ട്. മധ്യപ്രദേശ്, ഗുജറാത്ത് തുടങ്ങിയ സംസ്ഥാനങ്ങളെല്ലാം ഭൂമി നൽകുന്നതിൽ വളരെ സജീവമാണ്. അത് നമുക്ക് ഒരുപാട് തലവേദന ഒഴിവാക്കുന്നു. 

? ഒരു സംരംഭകനെന്ന നിലയിൽ താങ്കളുടെ പിതാവ് കൊച്ചൗസേഫ് ചിറ്റിലപ്പിള്ളി തുടക്കത്തിൽ ഒരുപാട് പ്രതിസന്ധികൾ നേരിട്ടിട്ടുണ്ട്. രണ്ടാം തലമുറ വ്യവസായിയെന്ന നിലയിൽ എന്താണ് താങ്കളുടെ അനുഭവം.

തീർച്ചയായും ഈ ബിസിനസ് വെല്ലുവിളി നിറഞ്ഞതാണ്. കാരണം ഞങ്ങൾ തുടങ്ങുന്ന സമയത്ത് പാർക്കുകൾക്ക് അധിക നികുതി ഉണ്ടായിരുന്നു, സർക്കാരുകൾ കാര്യമായി സഹായിച്ചിരുന്നില്ല. ആ സ്ഥിതി ഇപ്പോൾ മാറി. എങ്കിലും ചില പ്രതിസന്ധികൾ നേരിടുന്നുണ്ട്. 2005ൽ ബെംഗളൂരുവിൽ അമ്യൂസ്‌മെൻ്റ് പാർക്ക് ആരംഭിക്കുമ്പോൾ അവിടെ അത് പുതിയ കാര്യമായിരുന്നു. ഞങ്ങൾക്ക് ഒരുപാട് വിഷമങ്ങൾ ഉണ്ടായിരുന്നു. ഗവൺമെൻ്റ് അനുമതികളുടെ കാര്യത്തിലുള്ള ബുദ്ധിമുട്ടുകൾ ഇപ്പോഴും നിലനിൽക്കുന്നുണ്ട്. പക്ഷേ അച്ഛന്റെ അനുഭവങ്ങളുമായി താരതമ്യം ചെയ്യുമ്പോൾ കാര്യങ്ങൾ ഒരുപാട് മാറിയിട്ടുണ്ട്.

? ഇന്ത്യ പോലെയൊരു രാജ്യത്ത് സിനിമയാണ് ഏറ്റവും വലിയ വിനോദോപാധി. ആ മേഖല വളർന്നു കൊണ്ടിരിക്കുകയാണ്. ഇത് അമ്യൂസ്‌മെന്റ് പാർക്കുകൾക്ക് ഒരു വെല്ലുവിളിയാണോ.

∙ കണ്ടന്റ് വലിയ തോതിൽ ജനാധിപത്യവൽക്കരിക്കപ്പെടുന്ന സമയമാണ്. ആളുകൾ കണ്ടന്റ് ഉപയോഗിക്കുന്ന രീതി മാറിയിരിക്കുന്നു. ആ വലിയ മാറ്റം ഞങ്ങളും അനുഭവിക്കുന്നുണ്ട്. എന്നിരുന്നാലും, പുറത്തുപോയുള്ള വിനോദങ്ങൾ ഇല്ലാതാകാൻ പോകുന്നില്ല. ആളുകൾ മൊബൈൽ, സോഷ്യൽ മീഡിയ, ടിവി എന്നിവയിൽ കൂടുതൽ സമയം ചെലവഴിക്കുന്നുണ്ടാകാം. എന്നാൽ അവർ സുഹൃത്തുക്കളുമായും കുടുംബാംഗങ്ങളുമായും സമയം ചെലവഴിക്കുന്നതിന് ഏറെ വിലമതിക്കുന്നുണ്ട്. യുഎസ്, ജപ്പാൻ തുടങ്ങിയ വികസിത രാജ്യങ്ങളിൽ പോലും തീം പാർക്ക് ബിസിനസ് ഇപ്പോഴും വളരുകയാണ്. ആളുകളുടെ ഇഷ്ടങ്ങൾക്കനുസരിച്ച് ഞങ്ങളും മാറിക്കൊണ്ടിരിക്കും.

? ഒരു റൈഡിൽ കയറാതെതന്നെ അതിന്റെ അനുഭവം നൽകാൻ വിർച്വൽ റിയാലിറ്റി (വിആർ) പോലെയുള്ള സാങ്കേതിക വിദ്യകൾക്ക് കഴിയുന്നുണ്ടല്ലോ.

∙ അതുണ്ടാവാം. പക്ഷേ അത് ഒറ്റയ്ക്കുള്ള അനുഭവമാണ്. ഒരു വിആർ ഗ്ലാസ് ധരിച്ചാൽ നമുക്ക് ചുറ്റുമുള്ളവരെ കാണാൻ കഴിയില്ല. അതല്ല, എനിക്ക് നിങ്ങളെ കാണണമെങ്കിൽ എന്റെ വിർച്വൽ ലോകത്തിനുള്ളിൽ നിങ്ങൾ ഡിജിറ്റലായി സൃഷ്ടിക്കപ്പെടണം. ഓരോരുത്തരും വ്യക്തിഗത കണ്ണട ധരിക്കുന്നതിനുപകരം എല്ലാവർക്കും ഒരുമിച്ച് അനുഭവിക്കാനാകുന്ന ഒരു വിർച്വൽ ലോകം കൊണ്ടുവരാനാണ് ഞങ്ങൾ ശ്രമിക്കുന്നത്.

അത്തരം റൈഡുകൾ ഞങ്ങൾ നിർമിക്കുന്നുണ്ട്. അവ ചെലവേറിയതാണ്. ഹൈദരാബാദിൽ ഞങ്ങൾക്ക് ഫ്ലയിങ് തിയറ്ററുകൾ ഉണ്ട്. അത് ബെംഗളൂരുവിലും കൊണ്ടുവരികയാണ്. രണ്ടു മൂന്നു വർഷത്തിനുള്ളിൽ അത് കൊച്ചിയിലും നിർമിക്കും.

? ഭീമൻ റൈഡുകളോടുള്ള ആളുകളുടെ സമീപനമെന്താണ്? പേടിയുണ്ടോ.

∙ അത്തരം റൈഡുകൾക്കാണ് ഏറ്റവുമധികം ആവശ്യക്കാരുള്ളത്. കുട്ടികൾ പോലും സിനിമയിലും മറ്റും കണ്ടത് പരീക്ഷിക്കാൻ ആഗ്രഹിക്കുന്നു. മുൻപ് ആളുകൾക്ക് ഭയം ഉണ്ടായിരുന്നു. ഇപ്പോൾ തീരെയില്ല. വലിയ റൈഡുകൾ ഒരു ദിവസം അടച്ചിട്ടാൽ പോലും പരാതികൾ ഏറെയാണ്.