പിണറായി ബസിലാണെങ്കിൽ ഇ.പി. ജയരാജൻ വിമാനത്തിലാണ്! കണ്ണൂരിനെ എയർ ഇന്ത്യ എടുക്കുവാ, ഇൻഡിഗോയ്ക്ക് മാപ്പില്ല

മന്ത്രി അല്ലാത്തതാണ് കാരണം. മാത്രമല്ല നവകേരള ബസിന്റെ ആഡംബരം സംബന്ധിച്ച ആക്ഷേപങ്ങൾക്കെതിരെ പ്രതികരിക്കാനും ഇപി തയാറായില്ല. ഇൻഡിഗോയിൽ നടത്തിയതു പോലെ മുഖ്യമന്ത്രിയെ ബസിൽ പിന്തുണയ്ക്കാൻ ഇപിക്ക് അവസരം കിട്ടിയിട്ടില്ല. മന്ത്രിമാരായ ആന്റണി രാജു, പി. രാജീവ്, എം.ബി. രാജേഷ്, സിപിഎം നേതാവ് എ.കെ. ബാലൻ എന്നിവരാണ് ബസ് പ്രശ്നത്തിൽ പിന്തുണ നൽകിയതെന്നതാണ് സത്യം. മുഖ്യമന്ത്രി ഒറ്റയ്ക്കും വിവാദത്തിൽ പ്രതിരോധിച്ചു.

ആഡംബരം ഇല്ലെന്നു വ്യക്തമാക്കാൻ മന്ത്രിമാരിൽ ചിലർ ബസിന്റെ ഉള്ളിലെ ദൃശ്യങ്ങൾ സമൂഹ മാധ്യമത്തിൽ പങ്കു വച്ചു. ഇതു പോലെ വിമാനത്തിലെ ദൃശ്യം പ്രചരിച്ചതാണ് ഇപിക്ക് 'പണി'യായത്. യൂത്ത് കോൺഗ്രസ് പ്രവർത്തകരെ പൊലീസ് അറസ്റ്റ് ചെയ്തതിനു പിന്നാലെ വിമാനത്തിനുള്ളിൽ നടന്ന സംഭവങ്ങളുടെ ദൃശ്യങ്ങളും പ്രചരിച്ചു. ഇതോടെ ഇ.പിയും പ്രതിക്കൂട്ടിലായി. മുഖ്യമന്ത്രിയെ ആക്രമണത്തിൽ നിന്ന് സംരക്ഷിക്കാൻ ശ്രമിച്ചു എന്നായിരുന്നു ഇ.പിയുടെ വാദം. പക്ഷേ, വിമാനത്തിൽ വച്ച് സംഘർഷമുണ്ടാക്കാൻ ശ്രമിച്ചതിന്റെ പേരിൽ യൂത്ത് കോൺഗ്രസ് പ്രവർത്തകർക്കും ഇ.പി. ജയരാജനും ഇൻഡിഗോ എയർലൈൻസ് യാത്രാവിലക്ക് ഏർപ്പെടുത്തി.

യൂത്ത് കോൺഗ്രസ് പ്രവർത്തകരായ ഫർസീൻ മജീദിനും നവീൻ കുമാറിനും സുനിത് നാരായണനും രണ്ടാഴ്ചത്തെ യാത്രാ വിലക്കും അവരെ തടഞ്ഞുവീഴ്ത്തിയ ഇ.പി. ജയരാജന് മൂന്നാഴ്ചത്തെ യാത്രാ വിലക്കും. ഇതിൽ പ്രതിഷേധിച്ചായിരുന്നു ഇനി ഇൻഡിഗോ എയർലൈൻസിൽ യാത്രയില്ലെന്ന ഇപിയുടെ ഉഗ്രശപഥം.

∙ ‘വന്ദേ ഭാരത് വരാൻ കാരണം സിൽവർ ലൈനാണ്’

കണ്ണൂരിൽ നിന്ന് കൊച്ചിയിലേക്കും തിരുവനന്തപുരത്തേക്കും സർവീസ് നടത്തിയിരുന്ന വിമാനക്കമ്പനി ഇൻഡിഗോ എയർലൈൻസ് മാത്രമായിരുന്നു. ഹൈദരാബാദ്, ബെംഗളൂരു, ചെന്നൈ നഗരങ്ങളിലേക്കും ഇൻഡിഗോ സർവീസ് മാത്രമായിരുന്നു കണ്ണൂരിൽ നിന്ന് ഉണ്ടായിരുന്നത്. ഗോ ഫസ്റ്റ് സർവീസുകൾ കൂടി നിലച്ചതോടെ ഇൻഡിഗോ അല്ലാതെ ആഭ്യന്തര യാത്രകൾക്ക് ആശ്രയിക്കാൻ കണ്ണൂരിൽ നിന്നു മറ്റു വിമാനം ഇല്ലെന്നതായിരുന്നു സ്ഥിതി.

ഇതോടെയാണ് ഇ.പി. ജയരാജന്റെ കണ്ണൂരിൽ നിന്നുള്ള വിമാന യാത്രകൾ പൂർണമായും നിലച്ചത്. എൽഡിഎഫ് യോഗങ്ങൾക്കും സിപിഎം പരിപാടികൾക്കുമെല്ലാം ഒരു രാത്രി മുഴുവൻ ട്രെയിനിൽ ഇരുന്ന് യാത്ര ചെയ്യുന്നത് ശാരീരിക ബുദ്ധിമുട്ടുകൾ നേരിടുന്ന ഇ.പി.ജയരാജന് കടുത്ത വെല്ലുവിളിയായിരുന്നു. യാത്ര കഴിഞ്ഞ് തൊട്ടടുത്ത ദിവസം വിശ്രമിക്കേണ്ട സ്ഥിതി വന്നതോടെ തിരുവനന്തപുരത്തു പോയി തിരിച്ചെത്തുമ്പോൾ 4 ദിവസം നഷ്ടപ്പെടുന്ന സാഹചര്യമായി.

ഇതോടെയാണ് ഇടക്കാലത്ത് ഇപിയുടെ സാന്നിധ്യം പല പരിപാടികളിലും കാര്യമായി ഉണ്ടാകാതിരുന്നത്. എൽഡിഎഫ് കൺവീനറുടെ അസാന്നിധ്യം മുന്നണിയെ ബാധിക്കുകയും ചെയ്തു. വന്ദേഭാരത് ട്രെയിനുകൾ വന്നതോടെ ട്രെയിൻ യാത്രയുടെ പ്രയാസങ്ങൾ കുറഞ്ഞു. ഇതിനു ശേഷം കണ്ണൂരിൽ നിന്നു കൊച്ചിയിലേക്കും തിരുവനന്തപുരത്തേക്കും ഉൾപ്പെടെ യാത്രകൾക്കെല്ലാം ഇ.പി.ജയരാജൻ ആശ്രയിച്ചിരുന്നത് വന്ദേഭാരതിനെയാണ്. കെ റെയിൽ മുന്നോട്ടു വച്ചതുകൊണ്ടാണ് കേരളത്തിന് വന്ദേഭാരത് ലഭിച്ചതെന്നും കെ റെയിലിന്റെ സർവേക്കല്ലും പിരിച്ചു നടന്നവർ ആ കല്ലുമായി ഇപ്പോൾ വന്ദേഭാരതിൽ കയറുകയാണെന്നും ഇ.പി വിമർശനം ഉന്നയിക്കുകയും ചെയ്തു.

∙ ഇനി ഇ.പിയുടെ യാത്രകൾ എയർഇന്ത്യ എക്സ്പ്രസിൽ

പക്ഷേ, യാത്രാ വിലക്കിൽ നഷ്ടം ഇൻഡിഗോയ്ക്ക് മാത്രമാണെന്നായിരുന്നു എന്നും ഇ.പിയുടെ നിലപാട്. അത് വിമാനക്കമ്പനികൾ തിരിച്ചറിഞ്ഞോ? എയർ ഇന്ത്യ എക്സ്പ്രസ് കണ്ണൂരിൽ നിന്ന് കൂടുതൽ സർവീസുകൾ ആരംഭിക്കുന്നതു കാണുമ്പോൾ അങ്ങനെ തോന്നാം. കണ്ണൂരിൽ നിന്നുള്ള യാത്രക്കാരുടെ ആവശ്യം കൂടി തിരിച്ചറിഞ്ഞാണ് എയർ ഇന്ത്യയുടെ നീക്കം. നിലവിൽ

ആഴ്ചയിൽ രണ്ടു ദിവസമാണ് എയർ ഇന്ത്യ എക്സ്പ്രസ് കണ്ണൂർ–തിരുവനന്തപുരം റൂട്ടിൽ സർവീസ് നടത്തുന്നത്. ബുധൻ, ശനി ദിവസങ്ങളിൽ രാവിലെ 6ന് കണ്ണൂരിൽ നിന്നു പുറപ്പെട്ട് 7ന് തിരുവനന്തപുരത്ത് എത്തുന്ന തരത്തിലും തിരികെ 7.30ന് തിരുവനന്തപുരത്തു നിന്നു പുറപ്പെട്ട് 8.30ന് കണ്ണൂരിൽ എത്തുന്ന തരത്തിലുമാണ് സർവീസുകൾ. കണ്ണൂരിൽ നിന്നു ബെംഗളൂരുവിലേക്കും 15 മുതൽ എയർ ഇന്ത്യ എക്സ്പ്രസ് പ്രതിദിന സർവീസ് ആരംഭിക്കുന്നുണ്ട്. ഉച്ചയ്ക്ക് 2.40ന് ബെംഗളൂരുവിൽ നിന്നു പുറപ്പെട്ട് വൈകിട്ട് 4ന് കണ്ണൂരിൽ എത്തുന്ന തരത്തിലും വൈകിട്ട് 4.30ന് കണ്ണൂരിൽ നിന്നു പുറപ്പെട്ട് 5.30ന് ബെംഗളൂരുവിൽ എത്തുന്ന തരത്തിലുമാണ് സർവീസുകൾ.