നെഹ്‌റു തുടക്കമിട്ടു, ബിജെപി പൊളിക്കുന്നു; ഇനി ‘യുഗി യുഗീൻ ഭാരത്’; 2 വർഷം ‘ഡാൻസിങ് ഗേള്‍’ എന്തു ചെയ്യും?

വർഷങ്ങൾക്കു മുൻപെത്തിയപ്പോഴത്തെ ന്യൂഡൽഹിയല്ല ഇപ്പോൾ. സെൻട്രൽ വിസ്റ്റ എന്ന നവീകരണ പദ്ധതി നഗരക്കാഴ്ചയെ അടിമുടി മാറ്റുകയാണ്. പ്രൗഢമായിരുന്ന പാർലമെന്റ് മന്ദിരം ചരിത്രസ്മാരകമാകുന്നു. പുതിയ മന്ദിരത്തിൽ പാർലമെന്റ് സമ്മേളനം ആരംഭിച്ചു കഴിഞ്ഞു. ശാസ്ത്രിഭവൻ, കൃഷി ഭവൻ, നിർമാൺ ഭവൻ, കൃഷി ഭവൻ, ഉദ്യോഗ് ഭവൻ  എന്നിങ്ങനെ പല പേരുകളിൽ അറിയപ്പെട്ടിരുന്ന സെൻട്രൽ സെക്രട്ടേറിയറ്റ് മന്ദിരങ്ങൾ മുഴുവൻ മറ്റൊരിടത്തേക്കു മാറ്റി സ്ഥാപിക്കുകയാണ്. ഒപ്പം നാഷനൽ മ്യൂസിയം എന്ന ചരിത്രസ്മാരകവും പഴങ്കഥയാകും. പുതിയ മ്യൂസിയം സജ്ജമാക്കാനുള്ള നടപടികൾ ആരംഭിച്ചു കഴിഞ്ഞു. 

ഡൽഹിയിലെത്തിയ ശേഷം ഏറ്റവുമധികം കണ്ടിട്ടുള്ള ഇടങ്ങളിലൊന്നാണു ജൻപഥ് റോഡിലെ നാഷനൽ മ്യൂസിയം. ചരിത്രനിധികളുടെ വീട്. ഡാൻസിങ് ഗേളിന്റെ അഴകു കാണാൻ മ്യൂസിയത്തിലെത്തി  മണിക്കൂറുകൾ ചെലവഴിക്കുന്നവരെ ഇവിടെ കാണാം. എല്ലാം മറന്ന്, ഒരു ധ്യാനത്തിലെന്നവണ്ണം കാഴ്ചകൾ കാണുന്നവർ. അവരുടെ കൺമുന്നിൽ ചരിത്രവും കഥയും കടങ്കഥയുമെല്ലാം മിന്നിമറയുന്നു. ചരിത്രശേഷിപ്പുകൾ ഒപ്പം നിന്നു കഥ പറയുന്നു. 

ജൻപഥിലെ ഈ നിധിവീട്  2023 അവസാനത്തോടെ അടച്ചുപൂട്ടുമെന്നാണു വിവരം. കെട്ടിടം 2024 മാർച്ചോടെ പൊളിക്കും. ‘യുഗി യുഗീൻ ഭാരത്’ എന്ന പുതിയ മ്യൂസിയം സൗത്ത്–നോർത്ത് ബ്ലോക്കുകളിലായി സ്ഥാപിക്കും. പക്ഷേ, ആ മന്ദിരങ്ങൾ സാംസ്കാരിക മന്ത്രാലയത്തിന്റെ കൈവശം ലഭിക്കാൻ 2025 മാർച്ച് വരെ കാത്തിരിക്കണം. ഫലത്തിൽ ദേശീയ മ്യൂസിയം എന്ന കാഴ്ചയില്ലാത്ത ഡൽഹിയാകും കുറ‍ഞ്ഞതു 2 വർഷത്തേക്കെങ്കിലുമുണ്ടാകുക. 

∙ ചരിത്രത്തിന്റെ ചരിത്രം

ഒരിക്കലും പണിതീരാത്ത കെട്ടിടമെന്നു നഗരത്തിലെ ചരിത്രകാരൻമാർ പലരും വിശേഷിപ്പിച്ചിട്ടുള്ള ഇടമാണു ജൻപഥിലെ നാഷനൽ മ്യൂസിയം. നഗരപ്രൗഢിയുടെ മറ്റൊരു അടയാളം. ഇവിടെയാണോ നാഷനൽ മ്യൂസിയം ആരംഭിച്ചത്? അല്ലെന്നതാണു വാസ്തവം. 1949ൽ രാഷ്ട്രപതി ഭവന്റെ ഒരു ഭാഗത്താണു നാഷനൽ മ്യൂസിയത്തിന്റെ തുടക്കം. 1955ൽ ജവാഹർലാൽ നെഹ്റുവാണ് ജൻപഥിലെ മ്യൂസിയം മന്ദിരത്തിന്റെ ശിലാസ്ഥാപനം നടത്തിയത്. 1960 ഡിസംബർ 18ന് ഉദ്ഘാടനം ചെയ്തു. 

സ്വതന്ത്ര ഇന്ത്യയുടെ കേന്ദ്ര പൊതുമരാമത്തിലെ ആദ്യ ചീഫ് ആർക്കിടെക്റ്റ് ജി.ബി. ദിയോലിക്കറായിരുന്നു രൂപകൽപന. നിർമാണം പൂർത്തിയാക്കിയതു ഭഗവന്ത് സിങ്. പ്രശസ്ത ഇന്ത്യൻ ഇംഗ്ലിഷ് എഴുത്തുകാരൻ ഖുശ്‌വന്ത് സിങ്ങിന്റെ സഹോദരൻ. ഇരുവരുടെയും പിതാവ് ശോഭാ സിങ്ങായിരുന്നു ലട്യൻസ് ഡൽഹിയിലെ പല പ്രധാന കെട്ടിടങ്ങളുടെയും നിർമാണകരാറുകാരൻ. ഡൽഹി കേരള ഹൗസ് ക്യാംപസിലെ കൊച്ചിൻ ഹൗസ് കെട്ടിടം നിർമിച്ചതും ശോഭാ സിങ്ങായിരുന്നു. സാൻ ഫ്രാൻസിസ്കോ മ്യൂസിയം ഓഫ് മോഡേൺ ആർട്ടിന്റെ ഡയറക്ടറായിരുന്ന, യുഎസിൽനിന്നുള്ള ഗ്രേസ് മോർലെയായിരുന്നു നാഷനൽ മ്യൂസിയത്തിന്റെ ആദ്യ ഡയറക്ടർ. 

മതിലുകളൊന്നുമില്ലാത്ത ഒരു കെട്ടിടമായിരുന്നു ആദ്യ ഘട്ടത്തിൽ. ഏറ്റവും ആധുനിക രീതിയിലായിരുന്നു മ്യൂസിയത്തിന്റെ നിർമാണം. ഏറ്റവും മികച്ച കൽപ്പണികൾ, തേക്ക് തടിയുടെ വാതിലും ജനാലകളും. ഓഡിറ്റോറിയവും ലൈബ്രറിയുമെല്ലാം നിറഞ്ഞു നിൽക്കുന്ന മ്യൂസിയത്തിൽ 2 ലക്ഷത്തിലേറെ ചരിത്ര വസ്തുക്കളുണ്ടെന്നാണു കേന്ദ്ര സാംസ്കാരിക മന്ത്രാലയം നൽകുന്ന വിവരം. രാജ്യത്തിന്റെ സാംസ്കാരിക തനിമയുടെ യഥാർഥ അടയാളമായി മ്യൂസിയം മാറി. 5000 വർഷത്തെ ഇന്ത്യൻ സംസ്കാരത്തിന്റെ കഥ പറയുന്ന ഇടമായി. മ്യൂസിയത്തിലെ 2.10 ലക്ഷം ചരിത്രവസ്തുക്കളിൽ 10 ശതമാനത്തിൽ താഴെ മാത്രമാണു കാഴ്ചകൾക്കായി പ്രദർശിപ്പിച്ചിരിക്കുന്നതെന്നാണു വിവരം. ഗവേഷകർക്കും മറ്റുമാണു മറ്റു വസ്തുക്കളിലേക്കു പ്രവേശനം. 

മോഹൻ ജൊദാരോയിലെയും സിന്ധു നദീതട സംസ്കാരത്തിന്റെയുമെല്ലാം കാഴ്ചകൾ ഇവിടെ വിരുന്നൊരുക്കി. നൃത്തം ചെയ്യുന്ന പെൺകുട്ടി 2300 ബിസിക്കും 1750 ബിസിക്കും ഇടയിലെപ്പോഴോ സൃഷ്ടിക്കപ്പെട്ടതാണെന്നാണു രേഖകൾ. ഇന്ത്യയെന്ന മഹാരാജ്യത്തിന്റെ പ്രാചീന സംസ്കാരത്തിന്റെ ഉദ്ഭവം കേന്ദ്രീകരിച്ചിരിക്കുന്ന മോഹൻ ജൊദാരയിൽ നിന്നു കണ്ടെടുത്ത വെങ്കലപ്രതിമ. ചരിത്രക്ലാസുകളിൽ കേട്ടറിഞ്ഞവയെ നേരിൽ കാണുമ്പോഴുള്ള അനുഭവം. നാഷനൽ മ്യൂസിയം പ്രിയങ്കര ഇടമായത് ഇങ്ങനെയാണ്. 

പൂർത്തിയാകാത്ത കെട്ടിടം എന്നു പറഞ്ഞിരുന്നല്ലോ. അതിനു കാരണമുണ്ട്. 2017ൽ വരെ കെട്ടിടത്തിന്റെ നവീകരണം നടത്തിയിരുന്നു; പുതിയ ഭാഗം കൂട്ടിച്ചേർത്തു. 1960ൽ തുറന്നു നൽകിയ കെട്ടിടത്തിന്റെ രണ്ടാം ഭാഗം പൂർത്തിയായത് 1989ലാണ്. 1878ൽ കൊൽക്കത്തയിലെ ഇന്ത്യൻ മ്യൂസിയമാണ് രാജ്യത്തെ ആദ്യ ദേശീയ മ്യൂസിയമെന്ന ചരിത്രം പേറുന്നത്. ലോകത്തെ 9–ാമത്തെ പഴക്കമുള്ള മ്യൂസിയവും ഏഷ്യയിലെ ആദ്യ മ്യൂസിയവും ഇതാണ്.