ഭവന വായ്പയുടെ പലിശ കൂടുമോ? പണപ്പെരുപ്പം നിയന്ത്രിക്കാൻ ‘ഓട്ടോ പൈലറ്റ്’; ആർബിഐ പണനയം നിങ്ങളെ ബാധിക്കുന്നതിങ്ങനെ

ഓസ്ട്രേലിയയുടെ ഗ്ലെൻ മാക്സ്‌വെല്ലും റിസർവ് ബാങ്ക് ഗവർണർ ശക്തികാന്ത ദാസും തമ്മിൽ എന്താണ് സാമ്യം? സത്യത്തിൽ ഒരു സാമ്യവുമില്ല, ഒരു ബന്ധവുമില്ല ക്രിക്കറ്റും പണനയവും തമ്മിൽ. എന്നാൽ ആർബിഐയുടെ സാമ്പത്തിക നയം പ്രഖ്യാപനം വായിച്ചാൽ എന്തോ സാമ്യം തോന്നാനും മതി. ലോകകപ്പ് ക്രിക്കറ്റിൽ അഫ്ഗാനിസ്ഥാനെതിരെ ഓസ്ട്രേലിയയുടെ ഗ്ലെൻ മാക്സ്‌വെൽ പുറത്തെടുത്ത മാസ്മരിക ഇന്നിങ്സ് ഓർമയില്ലേ. ആരോഗ്യകരമായ പ്രതിരോധവും മുന്നിട്ടിറങ്ങിയുള്ള ആക്രമണവും ഉൾച്ചേർന്ന ആ ഇന്നിങ്സ് മാതൃകയിലാണ് പുത്തൻ‌ സാമ്പത്തിക നയം ആർബിഐ കഴിഞ്ഞദിവസം പ്രഖ്യാപിച്ചത്.

റിപ്പോ നിരക്ക്, ബാങ്ക് റേറ്റ്, മാർജിനൽ സ്റ്റാൻഡിങ് ഫെസിലിറ്റി, സ്റ്റാൻഡിങ് ഡെപ്പോസിറ്റ് ഫെസിലിറ്റി എന്നിവയിലൊന്നും മാറ്റമില്ലെന്ന് പ്രഖ്യാപിച്ച റിസർവ് ബാങ്ക് ഗവർണർ ശക്തികാന്തദാസ് പണപ്പെരുപ്പം, വിലക്കയറ്റം എന്നിവയെ മെരുക്കി നിർത്താനുള്ള ആക്രമണത്തിൽ നിന്ന് പിന്നോട്ടില്ലെന്നും വ്യക്തമാക്കി. എന്നാൽ ഈ പ്രഖ്യാപനങ്ങളൊന്നും ഓഹരി വിപണിയെ കാര്യമായി ബാധിച്ചില്ല. ഗവർണറുടെ പ്രസ്താവന തുടങ്ങുമ്പോൾ 69,810ലായിരുന്ന സെൻസെക്സ് നേരിയ തോതിൽ ഉയർന്നിട്ട് 69,800ൽ പോയി ഇരുന്നു. നിഫ്റ്റിയാകട്ടെ 21,005ൽ നിന്ന് 20990ലേക്കു താഴ്ന്നു. തീരുമാനങ്ങളിലേറെയും പ്രതീക്ഷിച്ചിരുന്നത് തന്നെയാണ് എന്നതാകാം കാരണം. സാമ്പത്തിക നയത്തെ വിശദമായി മനസിലാക്കാം.

∙ യുപിഐ നിയന്ത്രണം നീക്കിയതിന്റെ പ്രയോജനം എന്താണ്

ആശുപത്രികൾക്കും വിദ്യാഭ്യാസ സ്ഥാപനങ്ങൾക്കുമുള്ള യുപിഐ ഇടപാട് പരിധി ഒരു ലക്ഷത്തിൽ നിന്ന് 5 ലക്ഷമാക്കി ഉയർത്തിയും പ്രഖ്യാപനം ഉണ്ടായി. വളരെ വേഗത്തിൽ‌ വളരുന്ന ഒരു പേയ്മെന്റ് ടൂൾ, അതിവേഗത്തിൽ വളരാൻ ആഗ്രഹിക്കുന്ന രാജ്യത്തിന്റെ വിദ്യാഭ്യാസ, ആരോഗ്യ മേഖലയ്ക്ക് അത്യാവശ്യമാണ്. യുപിഐ ഇടപാടുകൾക്കു മേലുള്ള നിയന്ത്രണം പതിയെനീക്കി വിശ്വാസ്യതയുള്ള സംവിധാനമായി ഉയർത്തിക്കൊണ്ടു വരാനുള്ള ശ്രമങ്ങളാണ് ആർബിഐ ലക്ഷ്യമിടുന്നത്. നിക്ഷേപങ്ങൾക്കും വായ്പ തിരിച്ചടവിനുമുള്ള യുപിഐ പരിധി മുൻപ് 2 ലക്ഷമാക്കിയിരുന്നു. രോഗികൾക്കും ആശുപത്രികൾക്കും കാര്യമായ പ്രയോജനം നേരിട്ടുലഭിക്കുന്ന തീരുമാനമായും സാമ്പത്തിക ഇടപാടുകളുടെ ഇടനാഴിയിലെ ചെറിയകല്ലുകൾ എടുത്തുമാറ്റുന്ന നടപടിയായും ഇത് വിലയിരുത്തപ്പെടുന്നുണ്ട്.

മൂച്വൽഫണ്ട്, ഇൻഷുറൻസ് പ്രീമിയം, ക്രെഡിറ്റ് കാർഡ് തിരിച്ചടവ് തുടങ്ങിയ പേയ്മെന്റുകൾക്കുള്ള ഇ മാൻഡേറ്റ് നിലവിലെ 15000 രൂപയിൽ നിന്ന് ഒരു ലക്ഷമാക്കി. മുൻപ് ഇതിന് മറ്റൊരു ഓതന്റിഫിക്കേഷൻ കൂടെ വേണ്ടിയിരുന്നു. ഇ മാൻഡേറ്റുകൾ റജിസ്ററർ ചെയ്യാനുള്ള സംവിധാനത്തിന് വലിയ സ്വീകാര്യതയാണ് രാജ്യത്ത് ലഭിക്കുന്നത്. പുതുതായി റജിസ്റ്റർ ചെയ്യപ്പെട്ട 8.5 കോടി ഇ മാൻഡേറ്റുകൾ വഴി 2800 കോടി രൂപയോളമാണ് ഒരു മാസം മാത്രം കൈമാറ്റം ചെയ്യപ്പെടുന്നത്. എന്നാൽ ഏറ്റവും കൂടുതൽ ആളുകൾക്ക് ഉപകരിക്കപ്പെടുന്ന മൂച്വൽ ഫണ്ട്, ഇൻഷുറൻസ്, ക്രെഡിറ്റ് കാർഡ് മുതലായവയിൽ ബിൽതുക പലപ്പോഴും 15000 മുകളിലാണ്.

അതിന് മറ്റൊരു ഓതന്റിഫിക്കേഷൻ കൂടെവരുന്നത് സമയ, അധ്വാന നഷ്ടമാണ്. മാത്രവുമല്ല, ഉപഭോക്താക്കളെ സംവിധാനത്തിൽ നിന്ന് അകറ്റുകയും ചെയ്യും. അതിനാലാണ് ഇ മാൻഡേറ്റുകളിലെ ഓതന്റിഫിക്കേഷൻ നിയന്ത്രണവും ആർബിഐ നീക്കുന്നത്. വളർച്ചയല്ല പ്രതിരോധമാണ് തങ്ങൾ ലക്ഷ്യമിടുന്നതെന്ന് ശക്തികാന്തദാസ് പറയുമ്പോഴും ‘റൺറേറ്റ്’ കുറയാതെ നോക്കാനുള്ള ശ്രമങ്ങൾ പുതിയ പണനയത്തിലും കാണാം.

∙ ദ്വൈമാസ ആർബിഐ പണനയത്തിലെ പ്രധാന തീരുമാനങ്ങൾ എന്തൊക്കെയാണ്?

അടിസ്ഥാന പലിശനിരക്ക് 6.5 ശതമാനമായി നിലനിർത്തും. ആശുപത്രികൾക്കും വിദ്യാഭ്യാസ സ്ഥാപനങ്ങൾക്കുമുള്ള യുപിഐ ഇടപാട് പരിധി ഒരു ലക്ഷത്തിൽ നിന്ന് 5 ലക്ഷമാക്കി. മൂച്വൽഫണ്ട്, ഇൻഷുറൻസ് പ്രീമിയം, ക്രെഡിറ്റ് കാർഡ് തിരിച്ചടവ് തുടങ്ങിയ പേയ്മെന്റുകൾക്കുള്ള ഇ മാൻഡേറ്റ് നിലവിലെ 15000 രൂപയിൽ നിന്ന് ഒരു ലക്ഷമാക്കി. മുൻപ് ഇതിന് മറ്റൊരു ഓതന്റിഫിക്കേഷൻ കൂടെ വേണ്ടിയിരുന്നു. സാമ്പത്തിക മേഖലയുടെ സുരക്ഷ ഉറപ്പുവരുത്താനായി ആർബിഐ ക്ലൗഡ് സൗകര്യം ആരംഭിക്കും. ജിഡിപി വളർച്ച പ്രവചനം 7 ശതമാനമാക്കി ഉയർത്തി. ഈ സാമ്പത്തിക വർഷത്തിലെ പണപ്പെരുപ്പം 5.4 ശതമാനമായി നിലനിർത്തുന്നു. രൂപയുടെ സ്ഥിരത ആഗോള സാമ്പത്തിക സുനാമികളിൽ നിന്ന് സംരക്ഷണം നൽകും.

∙ വായ്പാ നയത്തിലെ മാറ്റം പലിശ നിരക്കിൽ എങ്ങനെ പ്രതിഫലിക്കും

ബാങ്കുകൾക്ക് റിസർവ് ബാങ്ക് നൽകുന്ന വായ്പയുടെ പലിശനിരക്കിൽ വർധന ഉണ്ടാകാത്തതിനാൽ ഭവന, വാഹന, വ്യക്തിഗത വായ്പകൾക്ക് പലിശ വർധന ഉണ്ടാകില്ല. സാധാരണക്കാരായ ജനങ്ങൾക്ക് ആശ്വാസമായി കാർഷിക, വിദ്യാഭ്യാസ വായ്പകളിലുള്ള ഇപ്പോഴുള്ള പലിശനിരക്ക് തന്നെ തുടരും. എന്നാൽ റിസ്ക്ക് ഫാക്ടർ കൂടുതലുള്ള ലോണുകൾക്കുമേൽ ആർബിഐ കൊണ്ടുവരുന്ന നിയന്ത്രണങ്ങൾ ഉപഭോക്താക്കളുടെമേൽ കൂടുതൽ സാമ്പത്തിക ഭാരം അടിച്ചേൽപിച്ചേക്കാം.

∙ ജിഡിപിയിൽ എന്തു മാറ്റമാണ് ഉണ്ടാകാൻ പോകുന്നത്

അൽ‌പമെങ്കിലും കൗതുകമുണർത്തിയ പ്രഖ്യാപനം ജിഡിപിയുടേതാണ്. നിരക്ക് വർധിപ്പിക്കുമെന്ന പ്രതീക്ഷ നിലനിൽക്കുമ്പോഴും കൂടുതൽ പ്രവചനങ്ങളുണ്ടായിരുന്നത് 6.8 എന്ന നിരക്കായിരുന്നു. ശക്തികാന്ത ദാസിന്റെ പ്രഖ്യാപനത്തിൽ ഇത് 7 ശതമാനമാക്കി ഉയർത്തി. നടപ്പു സാമ്പത്തിക വർഷത്തിന്റെ അവസാനം ആഗോള സാമ്പത്തികാവസ്ഥ മാന്ദ്യത്തിലേക്ക് ആണെങ്കിലും ഒക്ടോബർ– ഡിസംബർ കാലത്ത് ഇന്ത്യയുടെ വളർച്ചാപ്രതീക്ഷ 6.5 ശതമാനമായി ഉയർത്തിയിട്ടുണ്ട്. മുൻപ് ഇത് 6 ആയിരുന്നു.

ആഭ്യന്തര ഡിമാൻഡും  ചെറു ബിസിനസുകളടക്കം നേടുന്ന വളർച്ചയുമാണ് കാരണങ്ങളിലൊന്ന്. ജനുവരി– മാർച്ച് ക്വാർട്ടറിലും വളർച്ചയുണ്ടാകുമെന്നാണ് ആർബിഐ കണക്കുകൂട്ടൽ. ആഭ്യന്തരവിപണിയുടെ വളർച്ചാശേഷിയിലാണ് പ്രതീക്ഷ. ഇക്കാലയളവിൽ ഫലം പുറത്തുവിട്ട ഇന്ത്യൻ കമ്പനികളുടെ മികച്ച പ്രകടനം അതിന് തെളിവായി ചൂണ്ടിക്കാണിക്കപ്പെടുന്നു.

∙ റിപ്പോ നിരക്ക് മാറ്റാത്തതിന് കാരണം എന്താണ്? വിലക്കയറ്റം കുറയുമോ?

റിപ്പോ നിരക്കുകളിൽ മാറ്റമില്ലാത്ത 5–ാമത്തെ സാമ്പത്തിക നയമാണ് പ്രഖ്യാപിക്കപ്പെട്ടത്. ഭക്ഷ്യവസ്തുക്കളിൽ ഉണ്ടാകുന്ന വിലക്കയറ്റം നവംബർ, ഡിസംബർ മാസങ്ങളിൽ പതിയെ ഉയരുന്നുണ്ട്. പ്രത്യേകിച്ചും പച്ചക്കറി ഇനങ്ങളിൽ. ഉള്ളിയുടെയും സബോളയുടെയും വില ഉത്തരേന്ത്യയിൽ ഉയർന്നു തുടങ്ങി. അതുകൊണ്ടുതന്നെ റിപ്പോ നിരക്ക് കുറയ്ക്കാൻ ആർബിഐ ശ്രമിച്ചില്ല. പ്രധാന വിലക്കയറ്റത്തോത് 6 ശതമാനത്തിനടുത്തേക്കു വരെയെത്താം എന്ന നിരീക്ഷണമുള്ളതിനാൽ നിരക്ക് വർധിപ്പിച്ച് ആഭ്യന്തര ഉൽപാദനത്തെ നിരാശപ്പെടുത്താനും ആർബിഐക്ക് താൽപര്യമില്ല.