‘ആ സിനിമകള്‍ക്കായി ഇറക്കുന്നത് ‘ടൺ കണക്കിന്’ പണം: ഷഹലയും കനയ്യയും മാത്രമല്ല ജെഎൻയുവിലെ ഇടതുപക്ഷം’

∙ പ്രചാരണകാലത്ത് നിങ്ങളുയർത്തിയ പ്രധാന ആവശ്യങ്ങൾ അടിസ്ഥാന സൗകര്യങ്ങൾ വികസിപ്പിക്കുക, സ്കോളർഷിപ് പ്രതിസന്ധികൾ പരിഹരിക്കുക, ഹോസ്റ്റൽ സൗകര്യം ഉറപ്പു വരുത്തുക, അതിനപ്പുറം ക്യാംപസിൽ എബിവിപി നടത്തി വരുന്ന അക്രമസംഭവങ്ങൾ അവസാനിപ്പിക്കുക എന്നതൊക്കെയാണ്. ഇനിയങ്ങോട്ടുള്ള പ്രവർത്തനങ്ങളിൽ സ്വീകരിക്കാൻ ഉദ്ദേശിക്കുന്ന പ്രധാന നയങ്ങൾ എന്തൊക്കെയാകും ?

തിരഞ്ഞെടുപ്പിന് മുന്നോടിയായി എട്ടു പേജുകളുള്ള പത്രികയിലൂടെ ഞങ്ങളുടെ ആവശ്യങ്ങൾ പ്രചരിപ്പിച്ചിരുന്നു. ഓരോ സ്‌കൂൾ ഓഫ് സ്റ്റഡീസിലെയും ജനറൽ ബോഡി യോഗങ്ങളിലൂടെ വിദ്യാർഥികളിലേക്ക് കൂടുതൽ എത്തിച്ചേരാനും, ഞങ്ങളുടെ ആവശ്യങ്ങളെ കുറേക്കൂടി നവീകരിക്കാനും അതനുസരിച്ച് വേണ്ട നടപടികൾ ആരംഭിക്കാനുമാണ് തീരുമാനം (പഠനത്തിനു വേണ്ട അടിസ്ഥാന സൗകര്യങ്ങൾ വികസിപ്പിക്കുക, വിദ്യാർഥികൾക്കെതിരെയുള്ള അതിക്രമത്തിന് ഫലപ്രദമായ നടപടി സ്വീകരിക്കുക എന്നിവയുൾപ്പെടെയുള്ള ആവശ്യങ്ങളുമായി ഏപ്രിൽ മൂന്നാം വാരം ക്യാംപസിൽ സമരത്തിനും ജെഎൻയു സ്റ്റുഡന്റ്സ് യൂണിയൻ ആഹ്വാനം ചെയ്തിട്ടുണ്ട്)

∙ 2016 ഒക്ടോബറിലാണ് ജെഎൻയു ക്യാംപസിൽനിന്ന് ഒന്നാം വർഷ എംഎസ്‌സി ബയോടെക്‌നോളജി വിദ്യാർഥി നജീബ് അഹമ്മദിനെ കാണാതാവുന്നത്. പതിയെ ഇവിടെ നടക്കുന്ന ചർച്ചകളിൽനിന്ന് ആ പേര് അപ്രത്യക്ഷമായി തുടങ്ങി. ഇന്ത്യയും ജെഎൻയുവും നജീബിനെ മറന്നോ?

ഞാൻ അങ്ങനെ കരുതുന്നില്ല. ഈ പ്രചാരണ വേളയിൽ നജീബിന്റെ പേര് പരാമർശിക്കാതെ പോയ ഏതെങ്കിലും ഒരു യോഗം നിങ്ങൾക്ക് ഓർത്തെടുക്കാനാവുമോ? എഐഎസ്എയുടെ നിലവിലെ സംഘടനാ പ്രസിഡന്റായ ഖസീം, നജീബിനെ കാണാതാകുന്ന കാലത്ത് അദ്ദേഹത്തിന്റെ റൂംമേറ്റ് ആയിരുന്നു. നജീബിന്റെ തിരോധാനത്തെ തുടർന്ന് നിഷ്ഠൂരമായ മാധ്യമ വിചാരണയാണ് ഖസീമിന് നേരിടേണ്ടി വന്നത്. നജീബ് നേരിട്ട അക്രമത്തിനും തുടർന്നുണ്ടായ തിരോധാനത്തിനും എതിരായ പോരാട്ടത്തിൽ ഐസ എന്നും മുൻപന്തിയിൽ നിന്നിട്ടുണ്ട്. ഈ ക്യാംപസ് അതിന് സാക്ഷിയാണ്.

∙ വിദ്യാഭ്യാസ സ്ഥാപനങ്ങളെ അരാഷ്ട്രീയവൽക്കരിക്കാനുള്ള ശ്രമങ്ങൾക്ക് മറുപടിയാകുമോ ഈ തിരഞ്ഞെടുപ്പ് ഫലം?

നമ്മുടെ വിദ്യാഭ്യാസസ്ഥാപനങ്ങളെ പുനർ രാഷ്ട്രീയവൽക്കരിക്കാനുള്ള പരിപൂർണശ്രമം ഐസയുടെ ഭാഗത്തുനിന്ന് ഉണ്ടാവുന്നുണ്ട്. അല്ലായിരുന്നെങ്കിൽ ഇത്തരമൊരു തിരഞ്ഞെടുപ്പ് ഫലം സാധ്യമാവുമായിരുന്നില്ല. മിക്കപ്പോഴും ജെഎൻയു വിദ്യാർഥി രാഷ്ട്രീയത്തിന്റെയും സംഘടനാ പ്രവർത്തനങ്ങളുടെയും നല്ല ഉദാഹരണമായി ചൂണ്ടിക്കാട്ടാറുണ്ട് എന്നതിനോട് യോജിക്കുന്നു. ഇനിയും രാഷ്ട്രീയവൽക്കരണത്തിനായുള്ള ഞങ്ങളുടെ തുടർശ്രമങ്ങളിൽ ഈ ക്യാംപസിന് അകത്തും പുറത്തും നിന്നുള്ള ധാരാളം വിദ്യാർഥികൾ ഞങ്ങളുടെ കൂടെ ചേരും എന്നതാണ് പ്രത്യാശ.

∙ ‘ഐസ’യുടെ തന്നെ മുൻ നേതാവും സ്റ്റുഡന്റ്സ് യൂണിയൻ വൈസ് പ്രസിഡന്റുമായിരുന്ന ഷഹല റാഷിദ് കഴിഞ്ഞ കാലങ്ങളിലായി മാധ്യമങ്ങളിലൂടെ നിരവധി മോദി അനുകൂല പ്രസ്താവനകൾ നടത്തിയിരുന്നു. ക്യാംപസിൽനിന്ന് പുറത്തു വന്നതിനു ശേഷം അവർ പാർട്ടി വിടുകയും ചെയ്തു. 2021ൽ കനയ്യ കുമാറും പാർട്ടി ഉപേക്ഷിച്ച് കോൺഗ്രസിനൊപ്പം ചേർന്നു. എന്തുകൊണ്ടാണ് ജെഎൻയു ക്യാംപസിന് പുറത്തെത്തുമ്പോൾ നേതാക്കൾക്ക് രാഷ്ട്രീയം ഉപേക്ഷിക്കേണ്ടി വരുന്നത്?

2007 മുതൽ ഇങ്ങോട്ടുള്ള കാലയളവിൽ ആറോളം പ്രതിനിധികൾ മാത്രമാണ് ക്യാംപസിന് പുറത്തെത്തിയ ശേഷം അവരുടെ രാഷ്ട്രീയ നിലപാടിൽ മാറ്റം വരുത്തിയിട്ടുള്ളത്. നൂറു കണക്കിന് പ്രവർത്തകർ സംഘടനയോടുള്ള പ്രതിബദ്ധതയിലും അതിന്റെ രാഷ്ട്രീയത്തിലും ഇപ്പോഴും ഉറച്ചു നിൽക്കുന്നവരാണ്. പക്ഷേ, സങ്കടകരമെന്ന് പറയട്ടെ, മിക്കപ്പോഴും പ്രചരിക്കപ്പെടുന്നത് ‘മാറിപ്പോയ’ ആളുകളുടെ പേര് മാത്രമാണ്. അത് ഇടതുപക്ഷ രാഷ്ട്രീയപ്രവർത്തനത്തെ മോശമായി ചിത്രീകരിക്കാനുള്ള മനഃപൂർവ ശ്രമങ്ങളുടെ ഭാഗമാണ്. ഒരു പ്രസ്ഥാനം ഓർമിക്കപ്പെടുന്നത് അതുപേക്ഷിച്ച മനുഷ്യരാലല്ല, മറിച്ച് രക്തസാക്ഷികളാലും, എല്ലാ പ്രതിബന്ധങ്ങൾക്കിടയിലും പോരാട്ടം തുടരുന്ന പ്രവർത്തകരാലുമാണ്. വിനയപൂർവം ഞാൻ ഒന്നുകൂടെ ഓർമപ്പെടുത്തട്ടെ, ഈ പ്രസ്ഥാനത്തിൽനിന്നും അകന്നുപോയവരേക്കാൾ, ഇരുപത് മടങ്ങ് കൂടുതലാണ് പ്രസ്ഥാനത്തോടൊപ്പം നിൽക്കുന്നവർ.

∙ ജെഎൻയു സ്റ്റുഡന്റ്സ് യൂണിയൻ തിരഞ്ഞെടുപ്പിനും ലോക്സഭാ തിരഞ്ഞെടുപ്പിൽ സ്വാധീനം ചെലുത്താനാകുമെന്നാണോ പറഞ്ഞുവരുന്നത്...

വരുന്ന തിരഞ്ഞെടുപ്പിനെ ജെഎൻയുവിലെ വിജയവും ശക്തമായും സ്വാധീനിക്കുമെന്നുതന്നെയാണ് ഞാൻ കരുതുന്നത്. ഈ ക്യാംപസിലെ തന്നെ ഭൂരിഭാഗം ഇടതുപക്ഷ വിദ്യാർഥികളും സ്വന്തം നാട്ടിൽ, സ്വന്തം ജില്ലയിൽ നടക്കുന്ന തിരഞ്ഞെടുപ്പു പ്രചാരണങ്ങളിൽ പങ്കെടുക്കാനുള്ള സജീവ തയാറെടുപ്പുകളിലാണ്.